عمك هوندا !

زمان فى حلتنا كان عندنا (مواطن ) اسمو عوض هوندا ... اى شى ما بيعجبو ، يلاقى ناس بتنضم فى الكورة يختها ليهم فى الارض ( دى كورة بالله ) وعلى القسم لو بقت مباراة فى كاس العالم يطلع فيها عيب ويشنفها ، مرة اتغالطو عن منتخب ايطاليا ولمن لقى ليهو زول افحموا وقفل عليه كل دريبات المناورة قام قال دا فريق حناكيش شوفهم متمرين كيف كيف متل صوفيا لورين !
وفى السياسة الزول دا حير ناس الحلة اى انتخابات هو عامل شمطة ومخرخر يا قال مزورة يا قال مبيوعة يا قال فيها رشاوى وماكلة يا قال هى زاتها عمل شيطان ، الاحزاب هو ضدها والانظمة الشمولية مكجنها ولو جا عرس فى الحلة يقعد ينظر لمن يجوط الشغلة زح الكشافة دى شمال لم السلوك يا ولد زح الكوشة دى قدام شوية واعمل ليها طوبتين تحتها عشان العريس قصير ونتشة والعروس فرسة وتلقاه بيصور وبيدقق فى الوجوه ... ام العريس دى صارة وشها شكلها كدا العروسة ما خاشها راسها ! ولو جا بيت بكا الا تلحقو المرحوم ، تلقاه زى الردادار يتابع فى حديث المعزين ويشوف بس نقطة خلافهم يطبظها ليهم فيها.. وتلقاه يتامل فى وجوه الناس ويفكها ليك فى اضانك براحة اسمع دا المرحوم ببقى ليهو شنو نقول ليهو نسيبو يقول وهو يضارى فى ثرثرته و(قطيعته ) شكلو كدا مستاء من البكاء والظاهر عليهو تاجر والفراش دا لخبط عليهو نقاطة السوق ثم يردف بخبث .. عاين ليهو قرفان كيفن الفاتحة يرميها زى ظهر الليدو !!!.
زول من الحاجات الكبيرة ما بيشوف الا الفرعيات الما مهمة وما بتخش عضم الحدث ، يعنى يلاقى ناس بتتكلم فى تحالف المعارضة الجديد يقول ليهم ( دا مش بتاع الصادق المهدى والترابى ) يقولو ليهو ( اى ) ويشرحو ليهو بالتفصيل شكل النسب والمصاهرة يقول ( بالله يعنى عصام الترابى الصادق المهدى خالو والله ليهو حق يتضرع فى البلد ان فات ابوهو من الحكم خالو بيرمى عودو ) ويضحك ... قر قر ! وفى كل شى عندو راى بيمسك فيهو فى القشور بس ...اى حاجة ... اى كلام عندو بس قشرة وظاهر .
اها ... فى ناس كدا حبايبنا زى عمك هوندا دا .... خلو قصة السلام دى كلها وقعدو البشير صارى مالو وجون قرنق مالو نافخ جضومو وعلى عثمان صنقع كم مرة وكوفى عنان مسح عنقرتو كم مرة وملس زيناوى نضارتو بيضاء كدا من شنو ولا الخواجية الرقصت مع الشفع ديك مالها مبسوطة كدا ...
اتفاق واحتفال اوقف عشرين سنة من الحرب والموت والاحزان يقراها الناس ويحللوه بس باوهام زى دى ... وكان ممكن وبشوية حساب (ولد ) يحسب لينا زول كم روح حيوفرها لينا الاتفاق دا وكم مشروع تنموى حيبعث من جديد وكم مستشفى ممكن تقوم وكم مدرسة ممكن ترجع فى الجنوب والشمال وكم تلميذ صغير حيخش المدرسة . ..
دا كلو كويس وما بيساوى قطعا قدامو شى انو قرنق يصر ولا البشير يزغرد لكنها فى راى النفس الامارة بالسوء وحب تبخيس الحاجات وعدم الحمد الحيودى البلد دى فى ستين ... احمدوا الله واشكروه انو كتب على السودان السلام وللناس المسرة وبلاش حسد وغيرة جون قرنق والبشير ونقد والترابى والمهدى كلهم ماشيين والجابهم بجيب غيرهم ولكن بتبقى الماثر وببقى التاريخ وببقى الشعب شاهد وشهيد وتبقى البلد قاعدة وزى ما مشت فيها ملايين الارجل وبعدين قبرت كلكم اشخاص وافكار حتمشو وتخشو القبر وتبقو كوم تراب وبيفضل بس عمل وقول الناس شاهد عليها .

الحمد لله

انا غايتو نضمت في الرقيص







سجيمان هونداااااااي

اسمو سجيمان هيونداي
عاين كويس!

يا أخي ود جمعة
أولا تحياتي واشكر لك تزكيتك التي خصصت لها بوستا اخر غير هذا أتمنى أن تزوره.
يااااااااأخي الناس الزي عمك هوندا ديل كتيرين, وهم لا بعجبم العجب ولا الصيام في رجب ..وديل بنقول ليهم..اذا ماعندهم إضافة الى خير هذا البلد. احسن ما يعطلوا المسير
مع محبتي

سجيمان :

انت يا دكتور بره نظرية هوندا دى .... رقصهم ولا يهمك

بخارى
شكرا على المرور ونصيحتك اتمنى ان ينظر اليها ناس الهوندا

محمد حامد جمعة..
مبروك..
وقد..
عــــاد الـحـبـيـب المنتظر..!!
بس..

Quote: حساب (ولد ) يحسب لينا زول كم روح حيوفرها لينا الاتفاق دا وكم مشروع تنموى حيبعث من جديد وكم مستشفى ممكن تقوم وكم مدرسة ممكن ترجع فى الجنوب والشمال وكم تلميذ صغير حيخش المدرسة . ..

ما تنسونا من صالح الدعوات...


خاصة للناس الصابرة..




وكم طيارة إنتي نوف..
لزوم رش بعوض..
في رهيد البردي..


وما جاورها من حلال..

وربك يهون القواسي..


ويحلحل...




عقدنـــا..