Post: #1
Title: النسيان.. والأغنية السودانية.. العندو مثال يدينا
Author: nashaat elemam
Date: 06-14-2005, 04:49 AM
Parent: #0
النسيان.. في الأغنية السودانية
حفلت الأغنية السودانية بالعديد من الصور الجمالية الناطقة، والتي ظلت تعبر دوماً عن رهافة حس هذا الشعب الذواق، وكثير من المفردات كان لها تداول واسع جعلها تتكرر في عدة مواضع وبأحاسيس متباينة أو متفقة نوعاً ما.. والآن في سياحتنا في خضم كلمات الأغنية السودانية نتناول مفردة (النسيان) بشتى تصريفاتها واشتقاقاتها ونأمل أن تسعفنا الذاكرة كي «لا ننسى» جميل أغنياتنا..
نبدأ مع الفنان محمد وري والذي يجعل من خيار النسيان خياراً بعيداً عنه تجاه من يحب، حتى وإن عذبه ذلك المحبوب أو صلاه بالنار حتى، فيغني:
لو بالصد أبيتيني
أو بالنار صليتني
أنا لا.. ما بنساك
وفنانا الأنيق حسن عطية يخبر محبوبه أن النسيان لم يتسرب إلى ذاكرته التي لازالت تتقد بذكريات الطفولة والنشأة الأولى:
لو انت نسيت..
أنا ما نسيت.. نشأتنا الأولى
أيام جهالتنا.. زمن الطفوله
ويرد ابن البادية على تساؤل محبوبه حول نسيانه له، مؤكداً له أن ذلك محال، خاصة بعد حالة الجنون التي اعترت روحه جراء ذلك الحب:
ننساك..؟!
انت.. انت بتتنسي..؟
ما انت روحنا وحبنا
سافرنا في عينيك سنين
وأرواحنا بيك متجننه
وعماد أحمد الطيب في أغنية الحقيبة المشهورة، يوثق لذكراه مما يباعد بينه والنسيان، مستعيناً على ذلك بوصف الظرف المكاني والزماني اللذان لازما تلك الذكرى:
ما بنسى ليلة كنا تايهين في سمر
بين الزهور.. أنا وانت والنيل والقمر..
وكذلك أبو عفان في وكره المهجور، يخبر محبوبه عن تلك الذكرى العصية على النسيان، حتى وإن امكن نسيان ما دونها:
إن أنسى لا أنسى..
ذكراك يا سلمى..
ونرجع لوردي الذي يعلنها بملء الصوت بأن لا قبل له ولا قدرة على النسيان، على الرغم من ارتباط الذكرى بالشقاء، لكن النهي والأمر -حتى للذاكرة- بيد المحبوب:
أقول أنساك وأنسى شقايا لو قادر
وليل الغربة والهجران بلا آخر
أسيبك كيف.. وانت الناهي والآمر؟!
ويمضى خوجلي عثمان في نفس المسار.. ويقر بأنه لا يستطيع النسيان.. وذلك بدليل أن اشواقه والتي لها اكثر من عام لا زالت كما هي:
يا غالية يا صبح الهنا
يا نور حياتي الما ونى
أنساكي كيف اقدر انا
والشوق معاي عدى السنه
ويأتي تساؤل مفاده: كيف ولماذا أيها المحبوب تنسى؟ فتأتي هذه التساؤلات مشرعة لأبواب من الظنون.. لماذا النسيان؟ فيقول الفنان:
مال الزمان يا ناس
مالكم نسيتونا..
بدلتوا ريدنا بناس
للدنيا سبتونا؟
فهو يضع احتمال أن يكون هناك حب جديد قد أبدل مكان حبه القديم، لذا فقد تركه محبوبه للدنيا والزمان..
ويتساءل زيدان ابراهيم عن صحة ما ورده عن محبوبه بأنه أصبح ناسياً، وينعت النسيان بالظلم:
صحي.. اتغيرت انت خلاص
يا سيد روحي والاحساس؟
بقيت ظالم.. نسيت الناس!
والكابلي.. يجعل النسيان رديفاً للقسوة.. لأن من يستطيع أن ينسي، بإمكانه أن يقسو، وإلا لما نسي:
لو كان الزمن نساك
أنا ما نسيت
أو يوم زمن قساك
أنا ما قسيت..
ويعزي صالح الضي النسيان للبعد، إذ يقال أن البعيد عن العين بعيد عن القلب:
رحلتوا بعيد نسيتو..
الريد والحنان..
العشرة الجميلة..
أيامنا الزمان..
وتعزي سميرة دنيا في هذه الأغنية القديمة التي أعادت بعثها من جديد، تعزي نسيان الحب، إلى تبدل وتغير عام صاحب شخص المحبوب، فبعد الحلم المشترك بالمستقبل، انقلب على عقبيه:
كنا بنحلم بالمستقبل..
لكن فجأة بديت تتبدل
نسيت الحب في عهدو الأول..
ويستدعي الشفيع نكهة تلك الأيام التي تذوق فيها الحب مع خله:
يا النسيت أيامنا.. أيامنا
الضقنا فيها غرامنا
ثم يتساءل وهو يكاد ينتحب قائلاً:
خلي.. كيف تنساها..؟
في الفؤاد ذكراها
للممات نطراها.. ونطراها
واسامه الشيخ والذي تحرقه الذكرى يستجدى حبيبه أن يعطه وصفه علها تجعله قادراً على النسيان, اذ انه حاول ذلك ولم يستطع:
يا غايب وما غايب فيني
بس خلي الدمعة تخليني
وصيتك كيف تقدر تنسى
ونسيت يا غالي توصيني
وفي المقابلة الرقيقة بين الذكرى والنسيان، في الذكرى المنسية، يبحث النور الجيلاني عن الحنان الذي ولى مع تلك الذكرى.. فيناجيها قائلاً:
يا صحو الذكرى المنسيه
من بعدك وين الحنيه؟
أما البلابل فيعملون بحكمة «الجزاء من جنس العمل» إن تمنعهن عزتهن من الركون إلى من نسيهن من قبل:
نسيتني أنا وخلاص يعني
مافي طريق يرجعني
كل ما أقول أرجع صافي
ألاقي العزه تمنعني
والتاج مصطفى يصل إلى أن النسيان شر لابد منه، وعلى الرغم من اعترافه بتلك المرارة الناتجة عن ذلك لكنه يقول:
أنساني.. وأنا أنساك..
نتقاسم مرار البين أنا وإياك
ولكن قمة التطرف في الاحساس يحملها لنا الفنان الجابري، وهو يضع حداً للتواصل بينه ومحبوبه في قرار حاسم ونافذ، إذ أنه يؤكد نسيانه لمحبوبه بعد أن أهداه أجمل ما في عمره، ولكنه تنكر لكل هذا:
ما نسيناك..
جاي تعمل ايه معانا
بعد ما بدلتنا..؟
ما سقيناك..
أحلى مافي عمرنا
من عواطف وما لقيناك
ويتساءل مصطفى سيد أحمد في مرت الأيام، عن جدوى النسيان كقيمة انسانية واردة الحدوث.. وتساؤله عن استطاعته ذلك، وثانياً حول جدوى ذلك:
لو أستطيع أنساك..
لو ينفع النسيان!!
وأخيراً.. يأخذنا التجاني حاج موسى إلى جدلية التوافق والتنافر، القرب والبعد.. إلى الحد الفاصل بين الذكرى والنسيان، فيقول في تلك القصيدة التي تغنى بها الكابلي، وأيضاً النور الجيلاني:
وبين الذكرى والنسيان..
مسافة قريبة يا انسان..
|
Post: #2
Title: Re: النسيان.. والأغنية السودانية.. العندو مثال يدينا
Author: صديق الموج
Date: 06-14-2005, 05:51 AM
Parent: #1
عشة الفلاتية
انا ما بنساك انت يا النسيت الناس
عبد الله الماحى
يا النسونى كفى اعرفونى
ساهى ساهر ساحات جفونى
ننساك هو انت انت بتتنسى ما انت روحنا وحبنا
نسيت قلبى وروحى ونسونى
فقدت الكانوا بيانسونى
خلاص ما تنسى وانا انساك نتقاسم مرار الاسى انا واياك
انت السالى جيلك وجيلك مانساك
ارحم يا سميرى قلبى الما نساك اسمح لى بنظرة لو فى الطيف عساك
وهلم نسيان
|
Post: #3
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 06-14-2005, 05:55 AM
Parent: #2
استاذنا صديق الموج
نعم هو للنسيان الذي ذكرتنا به.. الف شكر لك.. ونحن جيل سمع بالفلاتيه ولم يسمعها فاعذرنا على ذلك
اما اغنية الحقيبة.. فهي تقول : انت السالي جيلك وجيلك ما سلاكا
والنسيان ياتي في مقطع:
ارحم يا سمير قلبي الما (نساكا) اسمح لي بنظرة لو في الطيف عساكا
|
Post: #4
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 06-14-2005, 06:00 AM
Parent: #3
شكراً للدكتور معز الذي منّ علينا ومن دون قصد منه بهذا المقطع عن النسيان:
كيف تنسى لهفة قلبي ليك
تنسى الحنان الكان لديك
وهي رائعة الشاعر مصطفى سند والتي تغنى بها صلاح مصطفى.. وأهدانا لها د. معز بصوت حنان النيل
|
Post: #5
Title: Re: النسيان.. والأغنية السودانية.. العندو مثال يدينا
Author: محمد صلاح
Date: 06-14-2005, 06:22 AM
Parent: #4
الأخ نشأت : تحياتي والفكرة جميلة
الكلمات لمحمد مريخا
والالحان لعجاج
والغناء للراحل مصطفى سيد احمد
والاحاساسي مفتوحة على الجميع
كيف انساك
كيف انساك وانت الجرح النازف منو خريف العتة
خريف المحل الما بتدارك نجم الطالع شيل وختّة
رحل الديرة وهج وديرة فرع الحنة النور حتة
جرحك نيلة وسيرة طويلة وشافى البلسم ابى يتختة
سبر العاشق كتر الليمة ولم الشمل الروح شتة
سبر الروح الكلمة الزينة ونفساً طيب مالى الجتة
غلب الراوى تملى حكاوى غلباً زى ما اتعودت
آهة حزينة وأنة دفينة تخفف عنى لماماً حتى
كيف انساكِ وليل الشارع رمى ستايرو وقفل الحتة
برج التالى إنشر بدالى وحوش ليك ايامى الستة
يوم الليلة يمر بى صبرو احلام باكر كيف تـتأتى
يامغلوبة وغالبة زمانك كيف أنساك محال البتة
|
Post: #6
Title: Re: النسيان.. والأغنية السودانية.. العندو مثال يدينا
Author: ولياب
Date: 06-14-2005, 08:27 AM
Parent: #5
الأخ نشأت مع التحية
بالرغم من طول البعاد عن الوطن إلا أن الذاكرة ما زالت تختزن ببعض الشيء
يعني (ما ناسين)
أذكر أغنية للفنان عبد الوهاب الصادق تقول كلماتها في معرض النسيان
تنساني أنا في اليوم الف مره ، حبيي خايف ...... الخ
وأتنقل للنور الجيلاني وهو يترنم بجوبا لجوبا حيث يقول :
عايز روحك تفرحي ... أنسى همومك روحها .
ولا أنسى الفنان إبراهيم عوض حينما يغني (حكاية غريبة تنسى الريد وتنسى المحبة)
( أقول أنساك وأنسى الماضي وأحزانو .... يجيني الليل يصحى الشوق وأحزانو)
وبهذه الكلمات يتغنى الفنان عبد العزيز المبارك .
ومن العاصمة حيث الثنائي يتغنون : ناس ناسيانا من حنان وريدهم بيجري في دماءنا سحابهم مر ما سقانا وراح يا ناس خلونا برانا.
وهذا جزء من النسيان وقد نسيت الكثير
|
Post: #7
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 06-14-2005, 08:42 AM
Parent: #6
لك التحية ولياب.. ولربما يعد هذا الموضوع تنشيطا للذاكرة الغنائية عندنا وتحصينها ضد النسيان.. فلك التحية مرة اخرى.. واتمنى ان نمتحن ذاكرة جميع البورداب
|
Post: #8
Title: Re: النسيان.. والأغنية السودانية.. العندو مثال يدينا
Author: عماد شمت
Date: 06-14-2005, 02:28 PM
Parent: #7
اغنية وردي
يا النسيت ايامنا حبنا وغرامنا مع النسيم الساري ..
وفي اغنيه اخري .. وهل ايامي تنساها تسلاها اذا ما غبت عن عينيك..
وايضا ياناسينا يا مجافينا حن علينا.
عثمان الشفيع
ايامنا يالنسيت ياحليلها في كل نهاره وليله.
عثمان مصطفي
انابحاول انسي ريدك وانسي ماضي الذكريات ....
عثمان الاطرش
ياراسي طبعك ناسينا مالك ما تبقي جافي دوام بنسال كيفنو حالك ..
ابرهيم عوض
انا ياحبيب الروح محال انساك ولو هجراني طال لو ابعدك عني الدلال
لابد من يوم الوصال..
ابراهيم الكاشف
ليك رسالة لو روحك يوم تنسي دلالك ليك رساله,,,
وايضا.. يالمسافر اوعي لا تنسي الحبيب وين الليله كيف امسي
وايضا.. كيف انساك وانا في لوعه وانت ملاك زايد روعه بس ياجميل حاسب واوعي ..
سيد خليفه
يامسافر وناسي هواك ارواحنا وقلوبنا معاك ..
محجوب عثمان
يالنسيت عهد الهوي لما كنا زمان سوي ليه رضيت انت النوي ليه رضيت
بعذابي ليه..
ثنائ الجزيره
ما بنسي الليالي ذكراها في خيالي حبك بين ضلوعي وانت عزيز وغالي..
ذكي عبدالكريم
انت نسيت ايام ما كنا نعيش الحب في عهده الاول ..
ياحمامه مع السلامه ...
الغرام ناسي فيهو ذاتي ليهو خاطرت بحياتي
بين حبي وذكرياتي اصبحت روحي مستهامه..
واقول ليكم مع السلامه..الذاكره ضعيفه
|
Post: #9
Title: Re: النسيان.. والأغنية السودانية.. العندو مثال يدينا
Author: Ahmed Omer
Date: 06-14-2005, 10:38 PM
Parent: #8
وهذا مقطع من اغنية المصير ل علي السقيد
يا زمن علمني انسى...يا زمن
علمني انسى
المحال نسيان عيونا..
ووردي في اغنية ارحل
قلت ارحل
اسوق خطواتي من زولاً نسى الإلفة
|
Post: #10
Title: Re: النسيان.. والأغنية السودانية.. العندو مثال يدينا
Author: عاطف عمر
Date: 06-15-2005, 03:54 AM
Parent: #1
( تطرف ) أصدقاء الأستاذ الطيب عبدالله في رائعته السنين , فلم يكتفوا بطلبهم له أن ينسى محبوبه بل يمسحه من الذاكرة
قالوا لى أنساه وامسح من خيالك ذكرياتو
انس كل الماضى وابعد عن طريقو وعن حياتو
فات وخلاك للزمن ضاعت آمالك سدى
ليه تحن تاني ليه وليه تفكر في صلاتو
Quote:
ويعزي صالح الضي النسيان للبعد، إذ يقال أن البعيد عن العين بعيد عن القلب:
رحلتوا بعيد نسيتو..
الريد والحنان..
العشرة الجميلة..
أيامنا الزمان..
|
رحم الله الفنان صالح الضى لكن هذه الأغنية ( ساعة الغروب ) هي كلمات الأستاذ اسحق الحلنقي لحن وغناء الأستاذ إبراهيم حسين متعه الله بالصحة والعافية
رحلتو بعيد نسيتو الريد والحنان
الإلفة الجميلة والسعد الكان
لكن فرقتنا أقدار الزمان
شكراً أخي نشأت
|
Post: #11
Title: Re: النسيان.. والأغنية السودانية.. العندو مثال يدينا
Author: atif anees
Date: 06-15-2005, 06:49 AM
Parent: #1
nashaat elemam
كيف الاحوال
محمود درويش بيقول  ْْْانسى لانسى اننى انسى)..
وعندو برضو اصدارة اسمها( ذاكرة النسيان)
فكرة البوست لطيفة جدا وقد تكون محاولة لسبر خبايا
واقع العشق والغناء فى المجتمع السودانى وبالتالى هى اشارة لامكانية
ادراج التوثيق بديلا للمشافهةالتى اغرقتنا فى (النسيان)
وعشان ما (ننسى) عندى شوية تصحيح:
-كتب nashaat elemam
1- رحلتو بعيد نسيتو ..الريد والحنان
ونسبها ل(صالح الضى)
والصحيح انها من كلمات (اسحق الحلنقى) وغناء (ابراهيم حسين)
2-نسب ل(سميرة دنيا) ..انت نسيت ايام ما كنا نعيش الحب فى عهدو الاول
والصحيح ان (زكى عبد الكريم) هو من تغنى بها
3-(التاج مصطفى): انسانى وانا انساك
الصحيح انهامن كلمات (عوض الكريم القرشى) ..لحنها وتغنى بها (عثمان الشفيع)
-كتب احمد عمر:
يازمن علمنى انسى والمحال نسيان عيونك
ونسبها ل(على السقيد)
والصحيح انها من كلمات (عزمى احمد خليل) ومن الحان وغناء (هاشم ميرغنى)
- اما عن مساهمتى فى البوست (النساى) ده :
بقول بى لسان(التجانى سعيد) :
قلت ارحل
اسوق خطواتى من زولا نسى الالفة..
ودى بالمناسبة لحنها( محمد وردى) فى السجن.. وهو اصى حاله نفسيه
لتفعيل الذاكره فى مقابل (النسيان).
|
Post: #12
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 06-15-2005, 11:31 AM
Parent: #11
شكراً لك عاطف انيس
لربما غازلنا النسيان فارهق الذاكرة.. فتساقطت منا هذه الدرر الجميلة..
شكراً لكل توصيباتك وملاحظاتك الدقيقة.. ونتمنى ان تثري ساحات الموقع.. بمثل هذا الجمال دوما
ولك التحية.. وبخصوص اغنية سميرة دنيا لم ننسبها لها انما قلنا اعادت بعثها.. فلك خالص الود
|
Post: #13
Title: Re: النسيان.. والأغنية السودانية.. العندو مثال يدينا
Author: Safa Fagiri
Date: 06-15-2005, 11:51 AM
Parent: #12
"وكيف أنسى
تذكارات هواك
نتحمل الغربة ..
ونعانى
ونصبر عشان
نكسب رضاك
ونغنى لو
زاد الحنين
ياريتو كان سفراً ..
معاك"
**********
أدينى إحساس بالأمل
كلمات الشاعر/مدني النخلي
|
Post: #14
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 06-15-2005, 11:59 AM
Parent: #13
شكراً صفاء على الاضافة.. لكن الاغنية ما مرت علي.. ما عرفت البغنيها منو؟ رجاء ورينا ولك الشكر الجزيل.. وحاولي انحتي ذاكرتك تاني
|
Post: #16
Title: Re: النسيان.. والأغنية السودانية.. العندو مثال يدينا
Author: Safa Fagiri
Date: 06-15-2005, 12:37 PM
Parent: #14
أدينى إحساس بالأمل
فى كل رحلة شوق .. تطول
وأدى الخطاوى الراجعة ليك
فى سكتك عشم الوصول
ما الدنيا كلها إنتظار
والإرتحال قدر الفصول
الموجة تحلم بالضفاف
والغيمة تحلم بالهطول
********
جايى ومعاى ضى الأمانى
وذكرى للأيام .. هناك
لحظات بتذخر بالأمانى
وكيف أنسى تذكارات هواك
نتحمل الغربة .. ونعانى
ونصبر عشان نكسب رضاك
ونغنى لو زاد الحنين
ياريتو كان سفراً .. معاك
**********************
دي كل الغنيوة الروعة....
ذاكرتي المهجنة
توحي لي وهي
مستحضرة لللحن
بالعود
اني سمعتها بصوت الراحل
المقيم مصطفى سيد احمد ...
|
Post: #31
Title: Re: النسيان.. والأغنية السودانية.. العندو مثال يدينا
Author: passpar
Date: 08-18-2005, 06:10 AM
Parent: #13
* تحية طيبة:-
نعم إن الاغنية السودانية المقصود منها الاغنية العربية المعروفة ضاربتا عرض الحائط بكل الاغاني الاخري من شرق وغرب وجنوب البلاد إن الحرب الشرسة التي تفرض علي الثقافة شئ يجب ان يفكر فيه الشرفاء ، فمثلا في دراسة قامت بها طليعة من شباب البجا المثقف داخل مدن شرق السودان تقول إن كل المنازل السودانية لا تهتم ولا تشتري الاغانية التي يغنيها فنانوا البجا ( مثل محمد البدري فنان الشرق) في الطريق المعاكس تري ابناء البجا يتدافعون لشراء كل الشرائط للاغاني السودانية بدون قصد او معرفة ان الفوارق التي هي اصلاً موجودة تعمل علي تقوية الاغاني العربية بدعم سخي منظم من قبل اجهزة الدولة فعلي كل الحادبين علي بتلك القاعدة إن لم تشتري ، لن اشتري، إن لم تسمع لن اسمع ! يجب علي شعب البجا العمل علي تقوية ثقافته وفرضها علي القادمين دون أن ياثر فيهم القادمون إلي منطقتهم فمثلا في المانيا الالمان لا يتحدثون مع الغرباء إلا بالالمانية قصداً منها فرض الالمانية كما في الصين... ( اشتري شريط ناطق بلغتي ادعم موقفي الثقافي اقوي واشجع الابداع في اواسط شعبي ) إن عدم مشاركتي في شراء اشرطة للفناين يعملون للافضل من اجل الثقافة البجاوية يعني المشاركة الفعلية في طمس الثقافة التي هي من من وهب الله لنا.. فنتمني ان نجد انفسنا بين الاغاني السودانية وإلا هذا يعني إننا ليس سودانين!
هل الاغاني البجاوية سودانية؟ ولماذا لا يهتم السودانين بتلك الاغاني حتي في المدن البجاوية؟
|
Post: #15
Title: Re: النسيان.. والأغنية السودانية.. العندو مثال يدينا
Author: Safa Fagiri
Date: 06-15-2005, 12:00 PM
Parent: #11
"يعني نسيتنا خلاص
مع إنك
إنت الخليتنا
نغني الحب
ذكري وإخلاص"
********
شال النوار
كلمات
الرائع /الحلنقى
غناء الرائع/محمد الامين
|
Post: #17
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 06-16-2005, 01:45 PM
Parent: #15
شكراً صفاء.. ولا ادري كيف غابت عني (يعني نسيتنا خلاص) مع انو ابو اللمين ده من
(عيندينا) فلك المودة الجميلة على تذكاراتك الجميلة
|
Post: #18
Title: Re: النسيان.. والأغنية السودانية.. العندو مثال يدينا
Author: Amir Mussaad
Date: 06-16-2005, 02:09 PM
Parent: #1
مانسيناك
نسيناك
بعد ما ودرتنا
الجابري
صح اتغيرت انت خلاص
نسيت العشرة يا روحي و الاخلاص
زيدان
|
Post: #19
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 06-19-2005, 05:25 AM
Parent: #18
الأخ أمير تحايا عظيمة لك .. ولك اجر الاجتهاد.. لكن لو قرأت الموضوع لوجدت المثالين في صلب الموضوع.. فلك الشكر اجزله
|
Post: #20
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 06-19-2005, 06:00 AM
Parent: #1
ما بنساك<<
كيف أنساك وأنا في لوعة
وانت ملاك زايد روعة؟؟؟
|
Post: #21
Title: Re: النسيان.. والأغنية السودانية.. العندو مثال يدينا
Author: almulaomar
Date: 08-17-2005, 05:36 AM
Parent: #1
عجبني البوست شديد وقلت أشارك بس سامحوني فأنا والنسيان صنوان
أقول أنساك وعارف إني ما بقدر .....
لا لقيناك وفرحنا لا نسيناك وإسترحنا
أنساكي كيف وأنا قلبي ريدك محنو
أنساني في اليوم بالمره حبيبي خايف....
ناس ناسيانا من حنانا .....
|
Post: #28
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-18-2005, 02:02 AM
Parent: #21
الاخ almulaomar
شكراً لاعجابك بالبوست.. واهو هسه انت بديت تفارق صنوك (النسيان)
واديتنا مقاطع جميلة جداً.. حاول تاني تنشط ذاكرتك وتطلع لينا حاجات حلوه زي ده
|
Post: #22
Title: Re: النسيان.. والأغنية السودانية.. العندو مثال يدينا
Author: altahir_2
Date: 08-17-2005, 12:58 PM
Parent: #1
يا ناسينا يا مجافينا حن علينا(وردى)
|
Post: #29
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-18-2005, 02:18 AM
Parent: #22
الطاهر..
يارب كل ناسي ومجافي ربنا يحنن قلبو
شكراً للمشاركة
|
Post: #23
Title: Re: النسيان.. والأغنية السودانية.. العندو مثال يدينا
Author: عثمان فضل الله
Date: 08-17-2005, 02:15 PM
Parent: #1
Quote: لو بالصد أبيتيني
أو بالنار صليتني
أنا لا.. ما بنساك |
ابو النش العزيز
صورتك الخابف عليها
مبروك الصوره واتمنى ان تفتح بوست بالصوره فى الاغنيه السودانبه
|
Post: #24
Title: Re: النسيان.. والأغنية السودانية.. العندو مثال يدينا
Author: Abdulla Ageed
Date: 08-17-2005, 02:32 PM
Parent: #1
نشأت الإمام
أول مرة نتكلم بالعربي (بدون شعر)
لك حبي وتقديري
وقد حاولت أن أتذكر بعض الأغاني
ولكني (نسيت)
سلمت
ود عقيد
|
Post: #25
Title: Re: النسيان.. والأغنية السودانية.. العندو مثال يدينا
Author: Waly Eldin Elfakey
Date: 08-17-2005, 02:55 PM
Parent: #24
ظلموني الحبايب قالوا لي انسي
من بعد المحبة العشتها همسة.. همسة
بعد ما قلبي حب
عشت مع الاحبة
بعد ما قلبي حب
يكفي قلبي لمسة
........ والي
|
Post: #26
Title: Re: النسيان.. والأغنية السودانية.. العندو مثال يدينا
Author: Elmosley
Date: 08-17-2005, 10:53 PM
Parent: #25
ياناسي انا العذاب علي قاسي وين
انا ود امي
====================
والموصلي وبانقا مع مجدي مسعد حنفي في السي دي الجديد
بقولو
ما اظن ياروحي انسي
عينيك الحنينه
|
Post: #33
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-18-2005, 12:14 PM
Parent: #24
تسلم ود عقيد اللوداد ما ناسي
تقديرك لي تاجاً بختو من فوق راسي
ذكراك لينا تكفي عن درر وألماس
وده الخلاك ديمه مالك لاحساسي
|
Post: #34
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-19-2005, 04:41 AM
Parent: #27
اتناسيت..
جميل هذا المقطع بس ياريت تقول لينا الشاعر والفنان صاحب الاغنية
حتى تعم الفائدة التوثيقية..
شكراً لمرورك
|
Post: #30
Title: Re: النسيان.. والأغنية السودانية.. العندو مثال يدينا
Author: عمار بيلي
Date: 08-18-2005, 03:58 AM
Parent: #1
اقول انساك وعارف إني مابقدر
|
Post: #32
Title: Re: النسيان.. والأغنية السودانية.. العندو مثال يدينا
Author: محى الدين ابكر سليمان
Date: 08-18-2005, 10:54 AM
Parent: #30
رائعة الشفيع:
انسانى وانا انساك
والحلوة القضيتها معاك
تصير مرة
نتقاسم مرارة البين
انا واياك
(لو الذاكرة بتجمع كويس, اظن كلمات الرائع ود القرشى)
|
Post: #42
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-30-2005, 01:08 AM
Parent: #32
شكراً محيو الجميل..
بس راجع النص فوق.. بتلقى المقطع ده فوق
|
Post: #35
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-22-2005, 04:18 AM
Parent: #30
شكراً عمار البيلي
أقول أنساك
وعارف اني ما بقدر
ومهما قساك عليّ يطول
يزيد شوقي في هواك أكتر
|
Post: #36
Title: Re: النسيان.. والأغنية السودانية.. العندو مثال يدينا
Author: معتصم دفع الله
Date: 08-22-2005, 05:17 AM
Parent: #35
العزيز نشأت
تحياتي ..
فعلاً بوست جميل ورائع ..
وعذراً إن جاءت مشاركتي فيه متأخرةً يمكن لعدم وجودي في تلك الفترة ..
يقول سيد خليفة ..
يا مسافر وناسي هواك ..
أرواحنا وقلوبنا معاك ..
حتماً سأعود ..
|
Post: #40
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-28-2005, 04:32 AM
Parent: #36
العزيز معتصم
حفي أنا بك.. وأنيق هذا البوست بك..
عديت نجوم الليل
في عيوني الدموع بتسيل
يا الفارقت ارض النيل
أرواحنا وقلوبنا معاك
يا مسافر وناسي هواك
أرواحنا وقلوبنا معاك
شكراً الجميل دوماً معتصم دفع الله
|
Post: #38
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-28-2005, 01:52 AM
Parent: #30
اقول انساك
وعارف اني ما بقدر ما بقدر
مهما جفاك عليّ يطول
يزيد شوقي في هواك اكتر
اسافر في العيون
وارحل..
وافتش جوه في الاعماق
وألقاك عاطفه تتفجر
شكراً يا بيلي
|
Post: #37
Title: Re: النسيان.. والأغنية السودانية.. العندو مثال يدينا
Author: Elmuez
Date: 08-22-2005, 06:29 AM
Parent: #1
أحاولـ مرة بس أنساك.. عشان ياغالية أتذكر
أجي و ألقاكي ديمة معاي
وألقي هواك ملك دنياي
وفي أعماقي إتحكر .. خمسة سنين
|
Post: #39
Title: Re: النسيان.. والأغنية السودانية.. العندو مثال يدينا
Author: Elsamani A.Malik
Date: 08-28-2005, 04:08 AM
Parent: #37
نسيتني أنا وخلاص يعني
ما في طريق يرجعنـــي
**البلابل
|
Post: #41
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-29-2005, 04:08 AM
Parent: #39
اخي العزيز السماني
شكراً للمرور.. ولو تأملت النص لوجدت البلابل يغردن في دوحه
نسيتني انا وخلاص يعني
مافي طريق يرجعني
كل ما اقول ارجع صافي
الاقي العزة تمنعني..
|
Post: #43
Title: Re: النسيان.. والأغنية السودانية.. العندو مثال يدينا
Author: waleedi399
Date: 08-30-2005, 04:05 AM
Parent: #41
العزيز
نشـات الامام
اقـول انساك
وعارف اني ما بقدر
مهما قساك علي يطول
يزيد شوقي في هواك اكثر
***
حبك عشتو من اول .....
من زمنا بعيد طول
ما بقدر اسيب حبك
اغيب عنك بعيد وارحل
***ً
يجيني الماضي بالماضي
واشوفك وانت كيف راضي
بالشـوق الاصلو من زمان
قاضـــي .. اقول انساك
*البلابل - التوزيع الموسيقي للموصلي
|
Post: #44
Title: Re: النسيان.. والأغنية السودانية.. العندو مثال يدينا
Author: tmbis
Date: 08-30-2005, 04:54 AM
Parent: #43
محمود تــاور يا نشأت
وكلمات الراحلة ليلي المغربي
صدق اللي قال
أودع انساك
وانسى النساك وابالغ كمــان
....................
وانساك
من ذاكرتي بمحاكا
غرورك حاجه بتزعل عواطفك فيها بتبدل
وليه ما كنت من أول عرفت حقيقه
معناكا
وانا بنساكا
ومن ذاكرتي بمحاكا
|
Post: #46
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-30-2005, 09:53 AM
Parent: #44
تمبس يا راقي
صدق اللي قال
ودع أساك
وانسى النساك..
وان شاء الله بينك وبين الاسى بحور وصحاري.. لا يشوفك لا يغشاك
جميلة هي ليلى المغربي.. وانيق هو تاور.. لذا كانت جمالية
هذا المقطع
|
Post: #45
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 08-30-2005, 09:47 AM
Parent: #43
ولي شخصياً..؟!
اسافر في العيون
وأسأل..
وافتش جوه في الأعماق
والقاك عاطفه تتفجر..
|
Post: #47
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 09-10-2005, 02:48 AM
Parent: #45
ولهاشم ميرغني في غيب وتعال:
لا لقيناك وفرحنا
لا نسيانك واسترحنا
وانت غيب وتعال
|
Post: #48
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 09-10-2005, 11:24 AM
Parent: #47
كيف انساك..؟
كيف أنساك وأنا في لوعه
وانت ملاك زايد روعه
بس يا جميل حاسب وأوعى
لاني كتير عليك بغير
طول عمري وزايد سبعه
|
Post: #49
Title: Re: النسيان.. والأغنية السودانية.. العندو مثال يدينا
Author: nashaat elemam
Date: 09-12-2005, 03:24 AM
Parent: #48
ولعبد العزيز المبارك:
اقول انساك وانسى الماضي وآحزانو
يجيني الليل يصحي الشوق وأشجانو
|
Post: #50
Title: Re: النسيان.. والأغنية السودانية.. العندو مثال يدينا
Author: عبير خيرى
Date: 09-14-2005, 07:24 AM
Parent: #1
.
تاني تاني ..
تاني راجعين مرة تاني ..
للقديم الاتنسى ..
ما لو عاد الشوق علينا ..
بعد ما روح مشا ..
|
|