(بتذكرك -أحمد شاويش) ياعمك تنقو أو حنينة أو خالد الحاج ... ويا حليل أيام زمان

"لا أدري كيف حدث ذلك ولكني وجدتُ نفسي في حالة من الهذيان الكبير. كيف يقبل بلد أن تُرمى ذاكرته في مفرغة؟ وددت لو أستطعت الصراخ بأقصى ما يمكن حتى يسمعني الأموات أو بكل بساطة أن أفعل ما فعله جدي حنّا الذي عندما رأي الحرائق تلتهم الكُتب، عضّ على يده بيأس" واسيني الأعرج من "حارسة الظلال"
شكراً تنقو أن أتحت لي الإستمتاع بهذا السفر اللذيذ ... فعلى قلة ما أجده من وقت للقراءة جراء مشاكساتٍ حدثتك عنها، إلتهمت أسطره، وجاييك الخميس أرجعوا ليك ... بس تمها وألحقنا بي شاويش هنا وما تنسى إني باصيت ليك السهرة دي ....

بتذكرك

بتذكرك...بتذكرك
بتذكرك وكت الكلام يصبح صعب
والليل يودر في النعاس
وكت النجم يتلالا زي عقدآ بيضوي عليهو ماس
**
انا في المداين الضايعة ضايع لي زمن
وغريب عيون
سرحان علي الارض الغريبة وبسأل الشوق عن وطن
انا بسأل الناس عن شوارعآ فيها سافرت ومشيت
انا بسأل الناس عن شوارعآ فيها تاتيتا ومشيت
وعن كلامآ داير اقولو
وقلت فيهو وياما غنيتو و بكيت
**
وعن عيونك وكيف بتصبح فيها احلام الاماني
كيفن بتصبح لهجة تانية مع الاغاني
انا والسفر خلاني اشتاق للسفر
انا اهوي السفر..خلاني اشتاق للسفر

لو القي لي..كان القي لي انا
كان القي لي خاطرآ سمح
كان كلمة واحدة اقولا بتداوي الجرح

كان مرة في عينيك انسي ومرة اقسي
ومرة ياخدني النعاس
وكت النجم يتلالا زي عقدآ بيضوي عليهو ماس

خالص التحايا
نادر
معاك وغشيتك اسلم عليك واتكل قصادك هموم الحراز

ونقول فوق..

Quote: خالد الحاج

اجي يا نادر.. خالد الحاج ده ما زمااااااااان فات البلد...

Quote: انا بسأل الناس عن شوارعآ فيها تاتيتا ومشيت

يااااااه...

هم أصلا كلهم مشوا يا مريم (تنقو / حنينة/ خالد الحاج) بس لمجرد تذكرهم وتذكر فضاء هذا البورد في زمان ليس كهذا الزمان، نداء حسرة يعني ... مش شايفة براك العولاق البقة عليهو البورد ده ... الصباح فتحت الصفحة الأولى ما لقيت ولا موضوع يتقري ... قلنا نتذكر أيام زمان وناس زمان لما الواحد كان بشرب قهوة الصباح على (كليكات) الماوس من بوست لبوست في متعة ونهم ...

معتز تسلم يا غالي شكرا للمرور

العزيز نادر


أودعت همومى همومك.... طب ايها السواح
بت وفى بقايا نومى جفون لم تسالم غبش الصباح
لك " الألق " اعلاه ... و لنا النواح
حبآ كلما خبأ بريقه بالقلب تنادت به الذكرى ... و لاح
خطل الشوق ... و تنفس الضياء و عانق ماضى الانس الفواح




لك الياسمين ..... و الاقحوان ، ... و امتنانى

حلو العينين عطر الصندل ... ذكرتنا ايام مضت ذي الاحلام
جلسات علي انغام ودندنات عود في الليالي القمريه ....
لقدزاملت الاخ الفنان احمد شاويش في بداياته كنا نعطر ليالينا بالنغم
وفي ليالي الافراح .....
لك تحياتي اخي نادر قد صحيت فيا ذكريات حبيبه فيى ذاك الزمن الجميل
دمت ودامت ايامك سعاده

نادر يا حبيب
لم اغادر رغم جور المكان وتغير السحنه وربطة اللسان ...
تجدني اتلصص الحروف واتابع ومثلك اتحسر
علي ايام خلت كنا نتحدث بالساعات عن البورد واخبار ناس البورد
.. اقول لك انني فقدت اهم ميزة وهي متابعة كل حرف يكتب هنا
فلقد اصبحت الحروف باهته غالبا ... والصباحات اقل نور ..
وكعادتنا وعشقنا للتاريخ .. وجدت نفسي اتمتع بالأرشيف اكتر
انظر لهذا البوست .. وعدد الموجودين به ولغة الحوار والود بين الناس
ماذا حدث يا تري ؟؟؟ :

اضغط هنا

...
اقبل نصيحة من اخوك .. ابتعد عن واسيني اذا لم تتورط معه بعد ... فسوف تفقد معه لذه كثير من الكتابات الاخري ولن تقبل باقل منه ، وهذه مشكلة كبيرة ...

احمد شاويش وبتذكرك ... سوف اقوم بتاجيل التعليق .. فقط تناول قهوتك اليوم علي انغام تختلف عن الامس ...


بالمناسبة وعلي ذكر الحاجات الجميله هل مرت عليك أي اخبار او اصوات لهذا الشكل ؟؟؟

اسمحوا لي بسباحة عكس التيار... ليه كلكم بتتكلموا عن الماضي وكأن الحاضر سيء... الحاضر والماضي كلاهما ناتج عن التعايش.. الشي المعروف انه العلاقات الانسانية شي خاضع لظروف... تصمد في وجه هذه الظروف لو كانت قوية بما يكفي... لو انها لم تصمد عبر الزمن هذا يعني انها لم تكن قوية كفاية...

يا جماعو غلّطوني لو انا غلط... إيه الاتغير؟ مافي شي اتغير.. كل الحصل انه الناس ظهرت مدى متانة علاقتها .. وظهرت اصول معادنها...

ولا شنو؟


بنت الحسين

العزيز نادر
خالص التحايا ليك ولى ضيوفك الجميلين
اتفق مع الاخت مريم فى ماذكرت
واضيف عليهو
العيش فى الماضى كثيرا هو اكبر مصائبنا كشعب سودانى ندمن العيش فى الماضى وعلى اساس ذلك نستكين..
لااقول ان لانسترجع الذكريات لان هذا شى لا ارادى لكن نحن نسرف فيها ونتحسر على مامضى ولانقدم للمستقبل شى..

تشكر على البوست والاغنيه الحلوه من عمك تنقو

أستأذنكم بالدخول

نادر- كوستا- تنقو- الشرغوف - المزرعة- الرابطةس.بالمنطقة الشرقية = ايام الزمن السمح

يااااااااااااااااااااااه يا حليل الزمن السمح

اصبحنا نعيش على اجترار ذكرياته

تنقو عندنا باقي خربشات على جدار الزاكرة متين نتمها؟؟؟؟

نتلاقى بالتأكيد

عميق احترامي
بنت الحسين ليس كل ما يوهن من علاقات سببه وهنها ابدا لكن السبب الاساسي فى ظروف كل منا

التي هو اقوى من كل تيار

فهل ياتري انقطاع اشقاء عن بعض هو وهن في العلاقة بينهم؟؟؟ قطعا لا

سلام

كوستا شكرا للطلة الجميلة وحمدالله على سلامة الرجوع ... أنت في جدة لو لم يخني التقدير؟؟؟ سنتواصل حتما كتلك الأيام ...

عمك أفتح موبايلك أو باصي الرقم الجديد ... وخلي البنفسج هو (الكفيل) ...
الشكل ده رايح في بور الزمن المعطون وجع وأزيز وبريق مربك ... برغم مساحات الجدب المتوهطة في قارعة وجدانه (ورأسه) يظن أنه لا زال يافعاً ويمني النفس بخطى تتسع التجريب ورهق في درب ملحوق (حلاها) ...

عماد شمت تسلم يا فنان وخليك بالجوار

مريم أولا بهدي ليك الأغنية دي كيفما تكون نكهتها وأنا أعلم جيّدا عنت الخيارات لديك خاصةً لو كان الحديث عن الغناء السوداني ... وأذكر جيّداً تعليقاتك عن أن صوت الموسيقى في الغناء السوداني أعلى من صوت الفنان أو تغلب الأصوات الموسيقية على ما عداها ووو... إلى ما ذلك مما قد نتفق ونختلف حياله ... أسمعي دي موسيقى ذاتو مافي بالعود ...

ليست سباحة عكس التيار، هي عين الحقيقة ما ذهبت إليه ... لكن يا مريم الإنسان مجبول بوعي و بغير وعي على الإرتهان وجدانياً لإشارات الماضي وبريقه اللذيذ أي كانت الأسباب ... الحاضر يحمل كل شيء إلا نكهة أمس التي نستطيبها أكثر ونستلذ بها... الوقت يضيع وتبقى الحقائق التي تتحدثين أنت عنها ويبقى أن نعمل من أجل واقع أفضل من الأمس ... أما جموح الخيال والوجدان الذي يخفق برومانسية الزمكان فيبقى حبيس الدواخل التي تنضح ألماً وحسرة على بريق الماضي ... والإنسان لدى بعض علماء النفس (ذاكرة) ومن خلال هذا الفهم تم استنباط الكثير من النظريات للتعامل مع بعض الأمراض النفسية واستدراكها وتخفيف حدتها على الأقل ...
قد أعود مساءً للحديث في نفس الموضوع حاسي في كلام كتير بس الوقت في الصباح والجو المحيط ما مساعدني
تسلموا جميعاً

مريم ومعتز
أنا لا أتحدث عن ركون للذكريات ببساطة في إطار العلاقات التي ذهبت للحديث عنها مريم نحن فقدنا أناس معادنهم جميلة نتحسر أننا فقدناهم هذا لا يعني أننا فقدنا الأمل بالعكس يوجد أيضاً اليوم أناس أجمل لكن (بيكون) أجمل لو كنا جميعاً هنا ... أتمنى دي تكون مقاربة للذي نتحدث عنه نحن ...
بتفق معاك يا معتز أن ما ضيّع السودان هو الركون للماضي وعدم استلهام المستقبل من تلك التجارب التي نتعامل في الغالب معها بقدسية صادرت وعي التقييم المجرد... لكن يا صديقي الضربات كانت متلاحقة وموجعة وفي مقتل أنظر أين أنت اليوم وقس على ذلك باقي هذا الشتات ... مشكلتنا أن التجارب تطحننا ولا فرصة للاستفاقة ... تعرف السلاح الذي أثبت مفعوله فينا هو سلاح الصدمة وتغييب الوعي وعدم منحنا فرصة لاستيعاب الحاصل لتقييمه ومن ثم البت بشأنه ...
تعرف يا معتز بالنسبة لي عبق الماضي حالة خاصة جميلة لذيذة - تعلمها مريم جيداً - تعقبها وثبة لتحقيق الحاضر بس بمعطيات اليوم واستشراق (بكرة) كما أسلفت سأعود لتفصيل أكثر خليك بالجوار

الأخت أم سهى البيت بيتك وشكراً على طلتك ... ودعواتنا تتلاحق ليعود الأخ زهير معافي بإذن الله وترجع البسمة لزهرتيكم سهى وسارة ... يااارب ألطف بزهير ...

ً

نادر العزيز

Quote: مريم أولا بهدي ليك الأغنية

اسمع مريم دى اتجاه واحد فى غنانا ده فاهديها لى انا

Quote: خليك بالجوار

اكيد بجيك صادى
شاويش ليهو نكهه خاصه لكنو كسلان
والناس الجميله الفى البوست كمان يجبروك ترجع

تشكر عزيزى نادر للترحاب..

نادر... صباح الخير...

وضيوف نادر.. كيفنكم...؟

أشكرك على الأغنية ... وعلى الإهداء... عارف مزاجاتي... ونقاش المشاكل البتعدني عن الأغنية السودانية ممن نتكلم فيهو في بوست تاني لو حبيت .. لكن عشان تلاحظ حاجه واحده في الاتجاه ده.. شوف الأغاني الأسرتني ... والجهجهتني.. أغنية أسرار، صوت نقي وموسيقى غايه في الإبداع.. الأغنية النزلها خدر، أيضاً لها نفس المواصفات... بالمقابل، باقي الأغاني بحسها (ازعاج).. ما بنختلف إنها كلمات روعه، ولحن جميل.. لكن اللحن ضايع في لخبطت الآلات.. والكلمات ما مسموعه في وجود مؤثرات تانية.... الأغنية دي، والأغنية النزلها شيبه الاتنين بالعود، صحيح، لكن الاتنين داخلين في نفس الإطار البنتكلم عنّه... بتكيف جداّ، زي ما انت عارف، لمحمد الأمين.. لانه هو انسان بهتم بالموسيقى والكلام، عشان كده بقيف انتباه.. وعشان كده (الجاحه) بتناديني بأعلى صوتها، كل ما يجيبوهو في التلفزيون... (مشيت شمين من اتجاه البوست موش)...


معاك تماماً يا نادر، في كل كلمة قلتها.. واعجبني ربطك لأهمية الذكريات بمسألة العلاج النفسي (تصوّر دي أول مره أفكّر في الحاجه دي)... لكن.. وخلينا نركز على لكن... البورد حالياً فيه رائعين.. وكان فيه ناس رائعين أيضاً... وممكن أكتب ليك قائمة بهم... نفتقدهم جداً.. لكن ألست معي أن هذا هو حال الدنيا؟ ان التفكير فيما مضى يجعلنا ننسى أن نستمتع بالآن .. فيمر (الآن) ليصبح ماضي، لنحن عليه مرّة أخرى... شيء متعب.. ودوامه صعبه.. لكنها واقع... الأستاذ محمود يقول أن هدف الدين .. أن لا يستغرق الانسان في الماضي ولا يقلق على المستقبل، وان يحاول جهد الإمكان أن يكون في الحاضر.. في الآن.. رغم أن هذا شبه مستحيل، لكن تحقيق درجة من درجاته يجعل الانسان متصالحاً مع نفسه ومع الدنيا ومع الله.. عزيزي.. انا لم أكن موجوده حين دخلت أنت البورد بداية.. فيبدو لي أنك دخلت قبلي بفترة... لكني أعلم أن البورد مر بمراحل طبيعية .. في اتجاه تطور جميل... تعرف يا نادر.. لا أؤمن بالعلاقات الانسانية التي تكون في بدايتها... لأنها تكون غير حقيقية.. لا أعني أنها غير جاده.. لكني أعني أنها تكون مبنية على افتراضات كل من الطرفين حول الآخر... بعد قليل تنكشف حقيقة كل طرف، ويبدأ النزاع.. وبعدها بقليل .. إما أن تصمد العلاقة.. او تنهار.. وفقاً (لتقبّل كل من الطرفين للآخر).. وهذا ما حدث هنا، ولازال يحدث، وسيظل يحدث مادام هناك أناس جدد.. وعقليات جديده.. وصداقات جديده تتفرخ لعداوات قم صداقات من جديد...

Quote: فهل ياتري انقطاع اشقاء عن بعض هو وهن في العلاقة بينهم؟؟؟ قطعا لا

أم سهى العزيزة ... أتفق معك تماماً حول ما تقولين.. (لا أعني اني اتبناه) لكني أتفق مع تسلسله المنطقي عندك... انقطاع الإخوة ينتج عن ظروف كما تقولين.. لكن عزيزتي العلاقة التي تكون أقوى من الظروف هي التي تجمع بينهم.. حتى في الإخوة في البيت الواحد.. تجدي من هو مواصل دائما لإخوته، ومن لا يسأل عنهم ولا يتفقدهم إلا حين تكون هنالك مصيبة لا قدّر الله، أو فرح عارم ان شا الله دايماً... ولازلت أصر على ان العلاقة يمكنها أن تصمد في وجه الظروف... حتى لو كان الانقطاع إلى حين، فإنها تعود منسابة كما الماء العذب... سمعت عن الرابطه التي كانت تجتمع في الشرقية، ويبدو أنها كانت تنظم أشياء جميلة، لكن فكرك، لو لم تظهر لكل منكم أوليات أولى منها، هل كانت انقطعت وانتم ثلاثتكم هنا (نادر، عنك تنقو وام سهى) متفقين في الحزن على أيامها؟

Quote: اسمع مريم دى اتجاه واحد فى غنانا ده فاهديها لى انا

عليك الله عان البتشبّك ده.. الاغنيه دي هدوها لي انا.. انا بعداك اعمل فيها العايزاه... شوف ليك زول يهدي ليك...





نادر.. ما قلت لي رأيك شنو في شبشب خدر الأخضر بي أزرق .. عينه موش؟

الاغنيه خلينها..
بس انتى ابقى على شى واحد
يا الاغنيه يالشبط. .

ربك يكون فى عونا. .

Quote: نادر.. ما قلت لي رأيك شنو في شبشب خدر الأخضر بي أزرق .. عينه موش؟

إلا أشوف الفردتين ... كده ما بقدر أضع رؤية واضحة ...