Post: #1
Title: اطالب بنفي كل المسئولين عن الكرة السودانية الي سيبيريا
Author: تولوس
Date: 06-05-2005, 05:50 PM
اطالب بنفي كل المسئولين عن الكرة السودانية الي سيبيريا وطردهم والتنكيل والتشريد بهم كما نكلوا وشردوا بنا ....كلهم لا نستثني منهم احد ... اداريين ولاعبين وحكام ومشجعين ... وبالاخص صحافة رياضية وكتاب المنابر الرياضيين كمان ... استثناء فقط تاج السر عشان الخوة وكده ... وعلي رأسم كمال شداد وكمال حامد ... وبالعدم سته جلدة لكل واحد منهم... ولا عزر لنا في هذه الستة ....
|
Post: #2
Title: Re: اطالب بنفي كل المسئولين عن الكرة السودانية الي سيبيريا
Author: altahir_2
Date: 06-05-2005, 06:36 PM
Parent: #1
اوافق على المحاكمة إن وُجدت . والتهمة التلاعب بمشاعر البشر وتسبيب الاحباط الدائم
|
Post: #3
Title: Re: اطالب بنفي كل المسئولين عن الكرة السودانية الي سيبيريا
Author: تولوس
Date: 06-05-2005, 07:49 PM
Parent: #2
الطاهر سلام يا اخوي ...
والله انا ماقادر انوم وزعلان بالحيل ... وهسة شايل هم بكرة كيف نقدر نمشي للمكتب واليوم ده حايعدي علينا كيف مع نظرات الشماتة والاحتقار ... ياخي والله الفينا مكفينا
سته يامفترين والله الضرب علي الميت حرااام ومع ذلك يبشرنا كمال حامد بنقل المباراة..... انشالله ينقلوك لي كوبر ....
ملحوظة انا نسيت المدربين واللاعبين واللاعبين القدامي واللاعبين الاجانب كمان .... يلا بلا لمة
|
Post: #4
Title: Re: اطالب بنفي كل المسئولين عن الكرة السودانية الي سيبيريا
Author: newbie
Date: 06-06-2005, 00:15 AM
Parent: #3
مجموعة من الشباب في قهوة مصرية ,,كل واحد ماسك كباية شاي وما داير يتمها ,, عاينت للتلفزيون ليقيت 3/0 ,, قلت ليهم ده الشوط التاني ؟ قالوا لي ده الأول بتاع القهوة قال لي :
تشرب ايه يا اكصلنص
واحد مصري يكركر في الشيشة وقدامو كباية زنجبيل :
واد يا محاأأأمد ,,, الباشا حسابوا علينا
طبعا حلف ستين يمين ما يدفع ,, عرفت فيما بعد ان جميع اصاحبي السودانيين في ذلك اليوم كانوا باشوات
|
Post: #5
Title: Re: اطالب بنفي كل المسئولين عن الكرة السودانية الي سيبيريا
Author: تولوس
Date: 06-06-2005, 00:33 AM
Parent: #4
newbie سلام ياخي
قلت لي قال ليك تشرب شنو يااكصلنص...شفت بالله
هسة عليك الله قدر الشربناهو... تاني في شراب ... ياخي والله المفرووض الجلد اولا ... ثم النفي ..
|
Post: #6
Title: Re: اطالب بنفي كل المسئولين عن الكرة السودانية الي سيبيريا
Author: Sidig Rahama Elnour
Date: 06-06-2005, 00:41 AM
Parent: #5
| Quote: اطالب بنفي كل المسئولين عن الكرة السودانية الي سيبيريا |
الأخ تولوس
ماذا تتوقع من بلدٍنا وساستنا وحكامنا ولا عبيننا غير مزيداً من الإحباط كل يوم
لقد فقدنا طعم الحزن إثر تعودنا عليه ،،، وبأتت الفرحة ضرباً من ضروب المستحيل في شتى المجالات .............................
سيبيريا القريبة ، السمحة دي ، والجلد اللذيذ دا ،، والله أنت طيب خلاص وود ناس بشكل ...
|
Post: #7
Title: Re: اطالب بنفي كل المسئولين عن الكرة السودانية الي سيبيريا
Author: تولوس
Date: 06-06-2005, 00:49 AM
Parent: #6
حبيبي صديق رحمة
خليهم يغيروا جو شوية
عشان ما يجينا شداد تاني ويقول لينا انا قلبي علي الكرة السودانية
|
Post: #8
Title: Re: اطالب بنفي كل المسئولين عن الكرة السودانية الي سيبيريا
Author: ودقاسم
Date: 06-06-2005, 01:47 AM
Parent: #1
تولوس
أطلب إحالتهم لمحكمة لاهاي بتهمة التسبب في الإحباط ، وإشانة سمعة شعب بأكمله ،وتعريضه للهوان ،،
لا يستقيم الظل والعود أعوج ...
|
Post: #9
Title: Re: اطالب بنفي كل المسئولين عن الكرة السودانية الي سيبيريا
Author: ولياب
Date: 06-06-2005, 02:28 AM
Parent: #8
| Quote: اطالب بنفي كل المسئولين عن الكرة السودانية الي سيبيريا |
الأخ تولوس
لك التحية
أرى أن ترحليهم سيكون مكلفاً وأحبذ نفيهم شريطة أن يصلوا هناك(كداري)
|
Post: #10
Title: Re: اطالب بنفي كل المسئولين عن الكرة السودانية الي سيبيريا
Author: محمدين محمد اسحق
Date: 06-06-2005, 02:52 AM
Parent: #9
الاخ تولوس...لك التحية ...
| Quote: اطالب بنفي كل المسئولين عن الكرة السودانية الي سيبيريا وطردهم والتنكيل والتشريد بهم كما نكلوا وشردوا بنا ....كلهم لا نستثني منهم احد ... اداريين ولاعبين وحكام ومشجعين ... وبالاخص صحافة رياضية وكتاب المنابر الرياضيين كمان ... |
الجماعة يا اخوي زعلوك بالحيل ...بس الجماعة المساكين ديل ذنبهم شنو...
وبعدين ماشي بعيد مالك .. ياخوي ... قول يودوهم لدارفور..يخلو الجماعة اياهم يمرمطوا فيهم شوية...صدقني جماعتك ديل اما بقو مع الجماعة عشان يحققو امنية العم ود قاسم ولاّ دقشوا تشاد ..ولاّ خشوا المعسكرات .. ولاّ خشوا الغابة..الكرة دي حتطير منهم بالمرة..
تصدق بالله ..هزائمون دي خلتني اكره الكرة..وتشجيع الكرة .. يا اخي بيكهام بقيت اشوفو ليك موسي هلال ..مانشتر يونايتد بقيت اشوفوم جنجويد..ديل يجيبو ليك مرض علي مرض ..
وهلوسة في هلوسة..
البارحة قبل المباراة كنت مع جماعة اخواننا.. المهم واحد خبير في الشغلة ..قال لي ..
المبارة دي مبيوعة..ما بعرف صدقية الكلام دا...لكن السياسة برضها ما بعيدة من الكورة..
تحياتي ليك اخوي تلوس ..ولا يهمك ...تلوم منو وتخلي منو..
|
Post: #13
Title: Re: اطالب بنفي كل المسئولين عن الكرة السودانية الي سيبيريا
Author: تولوس
Date: 06-06-2005, 03:31 AM
Parent: #10
محمدين سلامات ياخوي وانشالله موفق والامتحان تمام التمام
ياخي شفت المشجعين ديل هم اصل البلوي زاتها ولو المشجعين ديل وهم نحن زاتنا لما كان هناك اصرار علي هذا النشاط المهزلة...
| Quote: يا اخي بيكهام بقيت اشوفو ليك موسي هلال |
ياخوي ده ضعف نظر ساكت بيكهام يبري من ناس موسي هلال
والله انا بقيت اشجع برشلونة من زمن ناس ريفالدو و خليت المريخ والتاكا كسلا ...بالله ايه رايك في رونالدينهو ..حريف وولعاب وكمان صوميل ايتو عيني بارده وربنا يحفظهم مش الكرور بتاعنا ده
وبعدين انت عارف المفروض يخش الغابة منو بعد قراراتنا الخطيرة دي
التزكرجية .... احي انا من التزكرجية ديل ... اه ديل مفروووض يكون حسابهم كيمان كيمان ... اصلو هم متعودين علي الاقفاص ... الواحد فيهم يعاين من وراء القفص ويملصك 20الف وانت روحك تطلع وراها وتدخل المبارة وتطلع منها وانت تسب للتزكرجي وبتاعين .....الابواب انشا الله يوقفوفهم كده في زانزين غوانتناموا
|
Post: #14
Title: Re: اطالب بنفي كل المسئولين عن الكرة السودانية الي سيبيريا
Author: تولوس
Date: 06-06-2005, 03:31 AM
Parent: #10
اطالب كمان بنفي سجيمان لانه ايضا من كتاب المنابر الكرويين ... انا اتذكر مرة في سودانت كتب لينا بوست عن مساويك الكرة السودانية
|
Post: #12
Title: Re: اطالب بنفي كل المسئولين عن الكرة السودانية الي سيبيريا
Author: تولوس
Date: 06-06-2005, 03:20 AM
Parent: #9
اخي ولياب مسكاقرو ومشتاقين والله...
والله انا زعلان ومحرووووق انا قلت النفي احسن وكنت فكرت في عقوبات تانية ولكن قلت يازوول استهدي بالله ... انت زات نفسك شريك في الجريمة باعتبارك تحملت كل الجرائم السابقة اقصد الهزائم السايقة ولم تعترض ... هسة الجده شنو ... عشان كده ياخوي خلينا في النفي احسن ..و نشوف لينا دفار كارب ونشحن الجماعة ونتخارج منهم وبالاخص كمال شداد وكمال حامد ...
وين الفيفا وين الامم المتحدة خليها تجي تعمل لينا موتمر يشوف لينا خارطة طريق محترمة عشان الدفار ده ما يتعطل ويصل سيبريا بي سرعة
|
Post: #11
Title: Re: اطالب بنفي كل المسئولين عن الكرة السودانية الي سيبيريا
Author: تولوس
Date: 06-06-2005, 03:12 AM
Parent: #8
صدقت والله يا خال ...كل المسئولين ياخال بلا استثناء...
والاعلاميين كمان
وبالاخص نحاكم عثمان حسن مكي ... عشان هو علي طول نافخنا معنويات كضابة... وعبد الرحمن عبد الرسول برضو مشارك في الجريمة
|
|