رسائل قصيرة

هذه بعض الرسائل القصيرة التى كنت ابعثها للمحبوبة.

الرسالة الاولى:


يا زمن وقع معاى
اجمل الحان الغرام
دوزن الاوتار واعزف
للحبيب درر الكلام
لو بتعرف يا زمن
انا كيف بحبه وحده من دون الانام
كيف بساهر لى الليالي
وما بضوق طعم المنام
كنت تحلم يكون معاي
ويبقي جنبي على الدوام

***

الرسالة الثانية
سعدت بي لقياك كتير
وقلبي بي شوفتك فرح
ما انتي يا نبع المحنة
ومصدر الفال السمح
زادي في باقي الليالي
وبيك تخضر الاماسي وتنشرح
ان شاء الله توصلي بالسلامة
وكل عارض يمشي من دربك ويزح

***

الرسالة الثالثة:


داير اقولك انه حبك
اضحي في ذاتي وكياني
يا احلى ايات الوجود
ما بطيق لحظة في غيابك
واتمني ارجع ليك اعود
اقعد اتامل جمالك
يا روعة يا ارقى الورود
ما انتي لي الجنة ذاتها
وبسأل الله يتكتب لي فيها الخلود
***



الرسالة الرابعة
يا الصحيتي في جواى فرح
طول عمري ما بنسا
ليك سارت مراكب الشوق
وكنتي على الضفاف مرسى
معاك اتحققت احلام
وما عاد الزمان يقسى
تعالي معاي نعيش الحب وايامه
حلم نبداه من هس
يا روعة جمال الكون
يا حورية يا خنساء

الرسالة الخامسة:
الله منك
يا وردة نبتت على حد الشفق
فانت منارة تضئ بحار العاشقين
وتبين مفترق الطرق
الله منك
يا جرحا توغل فى الفؤاد
يذيقه الم البعاد
فما احترق
لغياب طيفك يا مناي
ليلي تمدد كالافق
ضاع البريق عن النجوم
والبدر فارقه الالق
فالله لى من وخز طيفك يا مناى
بغيابه ومجيئه
سيظل يسكنني الارق

up

Quote: يا زمن وقع معاى اجمل الحان الغرام دوزن الاوتار واعزف للحبيب درر الكلام لو بتعرف يا زمن انا كيف بحبه وحده من دون الانام كيف بساهر لى الليالي وما بضوق طعم المنام كنت تحلم يكون معاي ويبقي جنبي على الدوام

العزيز المعتمد

صباحك ود

وشكرا كثيرا علي هذا الجمال

ولمحبوبتك

كل النشيد

محبتي

المبدعة عالية
سلام.
سرنا واسعدنا كثيرا مروركم من هنا.
كيف لا يسعد المرء عندما يزوره شخص من القلائل الذى يستمتع لمفرداتهم.فانا من المعجبين بقلمك الرائع وموهبتك الفذة.
ما نكتبه هو مجرد فواصل صغيرة من الابداع الذى متعتنا به ونرجو تستمرى فى امتاعنا به.
لك الود
ومليون باقة ورد

المعتمد
وأنا اقول من زمان الزول ساكت فوق شيتاًكبير ،،،
أتاريك إنت محمّل بكل هذا الحب ، وكل هذا التحنان ، وكل هذا العشق ،،، والله أتاريك شايل شيلة تقيلة ،،،
بوحك جميل ، وتغريدك عذب ، وشحنة الشجن عندك عالية جدا ... لك التحايا بألوان الورود وبجمال قوس قزح ، وبظلال الغيوم ... ولحبيبتك أضعاف ... ً

الاخ ود قاسم
سلام.
لا يسعنى المكان الان وانا اقرأ هذه الكلمات المشجعة من رجل بقامك الاديب الشامل ود قاسم. فانا كلما قرأت لك فى الشعر وجدت انك شاعر مبدع. وعندما اقرأ فى الفنن القصصي تزداد قناعتى بانك اديب راقي ومتمكن. حتى عندما اقرأ عن الموضوعات الاجتماعية اتاكد من هذا الانسان نسيج وحده.
فكيف لى ان لا افرح وانطط من الفرحة عندما يقرأ ما اكتب من خربشات.
لك الود
والف باقة ورد

up

المعتمد الزول الراقي ..

رسائلك الاولى والتانية والاخيرة جميعهم لوحات من الجمال ..
رسمتها بريشتك الخاصة الى المحبوبه ..
شكراً لاشركانا في التمتع بقرأة هذه الرسائل الدرر الرائعة إلى من تحب
زادي في باقي الليالي
وبيك تخضر الاماسي وتنشرح
ان شاء الله توصلي بالسلامة
وكل عارض يمشي من دربك ويزح

أنشاء الله توصل بالسـلامـة يا معتمد .. امين

رسائل متوهجة بنور الجمال والمحبة

مثل كاتبها والمرسل إليه..

تسلم أيها الحبيب

الاخ وليد المميز بالتسعة سيدة الارقام كلها.
سلام
مشكور على هذه الكلمات الطيبة.
الحب عاطفة جميلة وشعور نبيل يولد فى الدواخل ابداعات لم يكن ممن المكن ان تتوافر لولا وجود الحب.
لك الود
والف باقة ورد

قريبنا ومعتمدنا
سلام بقدر حبي لك وإشتياقي للبلد

Quote: والبدر فارقه الالق

خمسة رسائل للمحبوبة ورسالة واحدة لي يا معتمد؟؟؟ فارقني الألق وبدأ القلق ومبروك ليك العرس وربنا يهنيك ويرزقك الذرية الصالحة

الاخ البروف معز
سلام.
لك الشكر على مرورك ولك الشكر على هذه الكلمات المشجعة من احد مبدعى بلادى.
ولك الود
والف باقة ورد

الاخ بدر الدين
سلام.
كيف اخبارك واحوالك.
شكرا على مرورك وتهنئتك بالزواج لكن انت يا البدرى اظنك كنت غرقان غرق شديد مع الاولاد.العرس ان شاء الله حيكون فى الشهر الجائي.
عشان خاطرك نغير البيت ونقول:
البدري فارقه الالق
والبدري لازمه الارق.
ولك الود
ومليون باقة ورد