الفاتحة بالصيني : شنق شانق شونق

حكاية حقيقية استمعت اليها بالامس
قالوا ان واحدة من بنات الجزيرة تزوجت بواحد صيني مسلم (لم تحسم كوزنته من عدمها) يعمل في مجال البترول وانجبا أولاداً في غاية الجمال (زي ولد وبنت) مزيج افريقي عربي صيني اسيوي و....و الحكاية فيها موقف قدرت ان يحكى:
قالو البت جات لى اهلها وقالت ليهم شوفو هوي انا جاني عريس وما بقدر اخليه ولازم توفقوا عليه ..! قالوا ليها ورينا ليهو هو منو وشغال شنو وأهلوا من وين ؟
قالت ليهم صيني شغال في البترول مسلم وملتزم .
أها قاموا الجماعة لمو ليك أهلها عشان الشورى وكدا وجوو اعمامهاواخوالها وأولادهم وكدا زي ما هو معروف في جنس الحاجات دي ومن بين الحضور كان هناك ود خالتها (ملقب بي شباب)ومعروف عنه (الطشمي) يعني خارج الشبكة على طول وقبل ما تفك يكون ربط التانية وكدا حمانا الله واياكم .
المهم انو اخوها الكبير كان من العاقلين وقال ليهم والله يا جماعة انا شايف انو أحسن نزوجها لانو بي اصرارها دا يمكن تزوجو من ورانا لو رفضنا وبرضو كتر خيرها جات شاورتنا وما عملتها وختتنا في الأمر الواقع ؟؟
وبعد المشاورات الجماعة وافقوا والأعمام والاخوال بي اولادهم باركوا الموضوع ..وحصلت انبساطة كدا كبيرة وفجأانتبه اخونا (شباب) وقال ليهم هو يا ناس أنا ما موافق ..!
سألوه ليه يا شباب
قال ليهم يا اخوانا انتو عارفين النسب بربط الناس اها والزول دا يبقى نسيبنا وبعدين أمو ولىّ ابوه يموت نقوم نمشي الصين ونرفع الفاتحة كيف ..؟ يعني نقول شنق شانق شونق ولىّ شنو.؟؟؟؟؟؟؟؟؟؟؟؟
انفجر الجميع بالضحك وقالوا ما تخاف ..الفاتحة عندعم بالعربي
أها اكان كدا معليش انا موافق!