زرعــــــت ـــــــــ إلى محجوب شريف

زرعــت
‏=======‏
‏ إلى محجوب شريف‏

ومن زمن الغُنا الأوّل ‏
ومن شوق الضنا الطوّل
زرعتَ جنينة من آمال
سقيتا من الشعِر موّال
وبي مطر العنا الهطّال
ومازلتَ ...‏
وقاومت الجروح بي فال
ومازلتَ ... ‏
ومرّت بي رياح في يوم شمالية
وفي أيام جنوبية
وشرقية
وغربية
وبرضي زرعت ما كلّيت
ولا ملّيت ...‏
ولا في يوم نسيت حبّك
وما إتزحزت من دربك
وما بمرق من إحساسك ومن قلبك
ومن يوم قمت وإتربيت
على وترك دوام غنيت
على حبل الصبر شبيت
وما كلّيت وما ملّيت
هواك نسّاني أحزاني
وغيرك مافي زول تاني ‏
‏ **** ‏
ومن سهر الليالي غزلت ليك طرحه
مطرزة ليكي بالفرحه
وليكي براكِ يا السمحه
وقمت زرعت ليك قمحه
سقيتا رويتا بي حبي
وشلت دماي من قلبي
سقيت قلبك
بعزك وبلقا في حبّك
حنان الدنيا وأزهارا
وروح الغنية و أوتارا
دعاش الغابة وأمطارا
‏ ****** ‏
زرعت وشلت شبّالك
وكل جميل على بالك
جريت جبِتو
وما كلّيت وما ملّيت ‏
على وتر الوطن غنيت
وما هماني لو جنيت
بحبك جد وما إهتزيت
‏---------------- ‏
مهندس/ محمد تاج السر علي الشيخ
‏18/5/2005م
‏ ‏

Quote: زرعت وشلت شبّالك وكل جميل على بالك جريت جبِتو وما كلّيت وما ملّيت ‏ على وتر الوطن غنيت وما هماني لو جنيت بحبك جد وما إهتزيت

جميييييل

هذا الشبَّال المكنتل وفى طريفو ودع

على كتف الغنا الميَّل

الشكر لك شاذلي جعفر
بالانابه الشاعرين
استاذ محجوب شريف
وباشمهندس محمد تاج

هكذا يكون الشعر وهكذا يكون النزيف الحق. لله درك يا محمد تاج السر..أشهد أنك ما زلت الفتى المسكون برنين القافية وعطر الحرف المموسق! ويستحق منك ومنا الصديق الشاعر حقاً محجوب شريف مثل هذا الغناء وأكثر.

كانت الجامعة زمانها واحة أدب ومعرفة. تصور يلتقيك بمدرجاتها وميادينها الخضر الفساح في يوم واحد علي عبد القيوم، كامل عبد الماجد، محمد تاج السر وغيرهم من المبدعين ولا يغالبك هوس الإبداع، كيف تحسب نفسك مبدعاً إذن؟

في سبتمبر من العام 1989 التقيت بمحجوب شريف لأول مرة وكان ذلك في سجن كوبر و كنا مجموعة كبيرة من المعتقلين السياسيين من مختلف الأحزاب السياسية. توثقت علاقتي بالشاعر الإنسان عندما رحلنا لسجن بور سودان في أواخر الشهر نفسه و كنا مجموعة تضم نخبة من وطنيين و مثقفين و شعراء و نقابيين عارضوا النظام منذ نجاح انقلابه المشئوم. كان بيننا المؤرخ البروفسور محمد سعيد القدال و المحامى اللامع و الوزير في الفترة الانتقالية الدكتور أمين مكي مدني و المحامى القدير و الشاعر و الكاتب الصحفي كمال الجز ولى ود. عبد الرحمن أبو الكل نقيب الأطباء و آخر وزير صحة في عهد الديمقراطية الموءودة و الأستاذ المحامى الكبير الصادق الشامي وآخرين من النقابيين الشرفاء.

الشاعر الإنسان محجوب شريف كان درة المعتقل ( حسب كلام عشاق كرة القدم) . لم يكن يفتر عن نظم القصائد الرائعة فيبعث فينا الحماس و ينفض عنا عناء المعتقل. كان جم النشاط يشارك في كل شيء من المطبخ وحتى إقامة ليالي السمر الترفيهية و هو بالمناسبة صاحب بديهة حاضرة و عنده حس فكاهى كبير وما زلت أذكر حتى الآن كثير من نكاته وليدة اللحظة في المعتقل.

محجوب إنسان كريم الفى ايدو ما حقو لم يكن لديه الكثير لكنه كان يجود بالقليل الذي يصله. كان معلما في صموده يستحيل أن تلحظ فيه لين ولا مهادنة و هو الذي قال لسجن كوبر:

جيناك و كنا طلعنا منك مرفوعى الرؤوس
جيناك مرفوعى الرؤوس

افتح زنازينك اهو بنفتح صدورا ما بتكوس الرحمة
تب ما فينا عرقا فيهو سوس

كنا أنا و محجوب شريف و كمال آخر من أطلق سراحهم في مايو من العام 1991 وكنت أقول لهم مازحا أنا ولد صغير لسه يخلوني معاكم ليه يا مترددا السجون وكان محجوب يرد: يظهر عليك عامل ليك عملة كبيرة وانحنا ما عارفين.

تلك الأيام التي قضيتها معهم كانت من أجمل و أفيد أيام حياتي منهم تعلمت الكثير و تغيرت نظرتي لأشياء كثيرة وللحياة بصفة عامة.

أشكرك كثيرا آخى الشاعر محمد تاج السر على القصيدة الجميلة المعبرة وهو ده فعلا محجوب شريف التحية لك من على البعد شاعرنا الإنسان رمز العطاء الذي لا ينضب و الله يبارك لك في أيامك وفعلا زرعت.

يا لروعتة محجوب شريف الرجل المسكون بحب هذا الوطن متعه الله بالصحة والعافية ..اعطانا فأجزل العطاء ما اجمل ما قاله مهموما يعاتب في نفسة
…اخواني ختو الساس انا طوبة ما ختيت ديل من زمن تاتيت لامن كتبت قريت
اللقمة والكراس لي قشة الكبريت
وتقولي جيتا جيت
يا ولدي جيتا جيت
حارس مع الفرسان
فايت الحدود واسيت
وتغني يا مريوم لينا وتجري النم….

الشكر الجزيل للباشمهندسين عثمان و محمد تاج السر


تحياتي
غادة

ود عازه مره كتب بوست بعنوان لماذا لا يصبح محجوب شريف رئيسا للسودان

ازيد ان محجوب ينتمي الي العظماء ، امثال مانديلا والام تريزا وغاندي

محجوب شيف ولي من اولياء الله الصالحين كما قال ذلك الصفي يوما ما

شكر يا باشمهندس