Post: #1
Title: يا أخوانا ..الواحد لو عايز ..ينكت موضوع من الارشيف ..يسوي شنو؟؟ليه موضوعي اتأرشف يا سيد الحوش؟؟
Author: saif khalil
Date: 05-20-2005, 08:47 AM
السادة البورداب
تحياتي
بالمناسبة..انا سنة اولي بورد..لذا لكم مني العذر ..ان سببت لكم ازعاجا..فدوما ما اصطدم بمعضلات التكنولوجيا..فأسارع بالاستنجاد بمروءتكم وشهامتكم..لدي بوست احسب انه مهم..من هو هم هن ديمقرسي..فهو بوست(سحارة) ..ومن لا يعرف السحارة..من حناكيش الزمن الاغبر..هي عبارة عن صندوق ..كان يقوم مقام الدولاب..وقد تمسكت به الحبوبات..الي وقت قريب..ويوم السعد..حين تفلح في فتح سحارة حبوبتك..ففيها ما لذ وطاب..ما لا عين رأت ولا اذن سمعت..المأكولات ..تين وزبيب..بلح..عسل ..سمن..المجوهرات..فضة(الفرج الله..المجيدي)..والذهب..التيلة..اللبة..الحجول..السوميت ..سبحة اليسر..وحق الريحة..وعضيمات الحوت..احفظ مالك..وجنيهات الدهب..ومن العطور ايضا..الصندلية،المجموع،وفلور دامور،سوار دي باريس،الصاروخ ،وقلامور..عبارة عن دكان..
هكذا كان بوستي..بدأ توضيحيا..ثم ترحيبيا..وبقدرة قادر اصبح بوستا عن خورطقت الفيحاء..ولربما قادنا تقفي اثر المحطات التي مر بها قطار حياتنا ..الي التوقف عند محطات تهم الجميع..خاصة انني اود الوقوف متمكثا في محطة تهم بكري سيد الحوش..الا وهي محطة جامعة الخرطوم..1980-1985..وهي فترة يهتم بها بكري كثيرا وينادي بتوثيقها..وقد فعل ذلك من خلال اكثر من بوست..وسوف اسهم ..كما اعتقد اسهاما مقدرا في ذلك..حيث انني كنت في مطبخ احداث تلك الفترة...
الي امس كنت ..اكتب في هذا البوست..اصبحنا واصبح الملك لله..وجدته قد اصبح ارشيفا..حاولت ان اكتب فيه جديدا ..فشلت..ماذا افعل؟؟
واستغرب ..ان بعض المواضيع ..التي لم تؤرشف..كانت بمعية موضوعي علي صفحة الامس..فأذا بموضوعي ..مؤرشفا..والموضوعات الاخري لم تؤرشف..يا تري هي شطارة اصحابها ام ارادة الادارة؟؟
ملاحظة يجب الا تفوتني..لقد لعبت في كلمة ارشيف..وخرجت منها افعالا ومصادر..ان صحت فالحمدلله..وان لم تصح(امسحوها لي في وشي)..اقول قولي هذا ..خوفا من ان يصطادني نقاد البورد..(ناس ود عجب الفيا واسامة الخواض)..يقعدو يتلتلو فوقي ..وانا زولا مسكين..ما زول ملاواة..
لكم جميعا تحياتي ومودتي
|
Post: #2
Title: Re: يا أخوانا ..الواحد لو عايز ..ينكت موضوع من الارشيف ..يسوي شنو؟؟ليه موضوعي اتأرشف يا سيد الح
Author: هشام مدنى
Date: 05-20-2005, 08:59 AM
Parent: #1
اضبط...من هو/هي/هن/هم...ديمقراسي؟؟؟..بكري ابوبكر يكشف ا...حح الاوضاع..له الشكر
عزيزى الفاضل سيف
عــاطر الـتحايـا
هو فعلا من اجمل البوستات فى المنبر العام
لذلك نرجوا من صاحب الدار الاخ بكرى ابوبكر
ان يعيده لنا حتى نستمتع بما يكتب من توثيق
بصورة رائعه حقا .
مع تحياتى
|
Post: #3
Title: Re: يا أخوانا ..الواحد لو عايز ..ينكت موضوع من الارشيف ..يسوي شنو؟؟ليه موضوعي اتأرشف يا سيد الح
Author: saif khalil
Date: 05-20-2005, 09:12 AM
Parent: #1
العزيز هشام مدني
تحياتي
شكرا علي المرور والمؤازرة..وان شاء الله ما نجيكم في شينة
لك المحبة
|
Post: #4
Title: Re: يا أخوانا ..الواحد لو عايز ..ينكت موضوع من الارشيف ..يسوي شنو؟؟ليه موضوعي اتأرشف يا سيد الح
Author: lana mahdi
Date: 05-20-2005, 09:26 AM
Parent: #1
الحبيب سيف خليل
لبكري بوست يشير فيه الى ان من يريد الا يتارشف اى بوست الخاص به
فعليه ان يدرجه في البوست المعني
ومكيفاني شديد برلمة الكبار دي
سانقل اسم البوست الجميل و الشيق خاصتك لبوست بكري
ليعود الى هنا
خالص محبتي
|
Post: #5
Title: Re: يا أخوانا ..الواحد لو عايز ..ينكت موضوع من الارشيف ..يسوي شنو؟؟ليه موضوعي اتأرشف يا سيد الح
Author: saif khalil
Date: 05-20-2005, 11:50 AM
Parent: #1
العزيزة لنا
تحياتي
عاد هي برلمة يا اختي! اشكرك علي الزيارة والمؤازرة..ان شاء الله نجيكي في السمح وعديل..
اشكرك مقدما علي ما تنتوين القيام به من اجلي..ودي المحرية فيك...
لك المودة
|
Post: #6
Title: Re: يا أخوانا ..الواحد لو عايز ..ينكت موضوع من الارشيف ..يسوي شنو؟؟ليه موضوعي اتأرشف يا سيد الح
Author: zola123
Date: 05-25-2005, 01:22 PM
Parent: #1
الأخ سيف
انت مرة وعدتنا بانزال مجموعة صور فلكلورية
ومن وقتها تاني ما شفنا ولا سمعنا أي فلكلور
بالمناسبة رفعت ليك البوست قبل الأرشفة على أمل أن تتذكر
بس ما يكون في صور وغاشينا ساي؟
|
Post: #7
Title: Re: يا أخوانا ..الواحد لو عايز ..ينكت موضوع من الارشيف ..يسوي شنو؟؟ليه موضوعي اتأرشف يا سيد الح
Author: saif khalil
Date: 05-25-2005, 03:23 PM
Parent: #6
العزيزة زولا
تحياتي
والله الصور في..وما غشيتك..بس انشغلت ..والبوست الآخر استولي علي جل اهتمامي..كنت ناوي احمل الصور الموعود بها..وما كنت عارف انو الارشفة دي بتلخبط الدنيا كدي..قدر ما اهبش واحد من بوستاتي ..القي الحكاية معصلجة ومافي طريقة طب..اها ..قعدت اكورك ..وكان ما الحبيبة لنا مهدي ..كان بوستي لحق امات طه..وعليكي النبي كان عارفة امات طه ديل منن ..وريني ليهن..ووريني الحصل عليهن شنو..وهو طه دا زاتو منو؟
اها يا اختي ابقي ..مرتن فالحة زي لنا مهدي ..جيبي البوست الدايراهو دا..انكتيهو من الجخنون الغتسو فيهو بكري ..وليك علي انزل ليك الصور..اها قصرت معاك..؟
لك المودة
|
|