إدريس تبيدي.. بالمنبر!! حبابك ألف!!!!

كنت أُطالع بوست "الوجيه عصام جبر الله" وولده، ووجدت الأخ إدريس تبيدي ضمن المهنئين .. ويبدو أنه بالمنبر من مده... مرحب بالشمباتي "القديم"..!!

سيف بشير



(محاولة لإعادة مسلسل عدلان "مرحباً بالداف"... فالمعروف في الفضائيات العربية أنها تقوم بإعادة بث المسلسلات "المسخنة" أكثر من مرة....)

Welcome, Idris

Thank you Saif Bashir for introducing him

أهلاً
إدريث تبيدي
وقطعاً إضافة وإضافة شحمانة كمان
وشكراً سيف بشير على المبادرة والترحيب بالرائع ادريس وأنا برضك شفتو في حوش
أبوخالد وبما إني ما مواظب على متابعة البورد يومياً قلت أنا المقصّر في معرفة
انضمام ادريس للبورد لكن تفاجأت وأنا طالع من ناس عصام ترحيبك بيهو..وقلت الحمدد لله ما براي..

عموماً مرحب بيك ومرحب بادريس
ولكم الحب..

إضافة لكفة الحوار العقلانى حول غد أفضل.. مـــــرحبابك ألــــف إدريس تبيدي،

وشكراً سيف بشير.

الأعزاء:

إسماعيل،

أمير، (لسع منتظر ردك على رسالتي)

و عدلان؛


شكراً لترحيبكم بإدريس، والمعذرة يا إدريس إنو الترحيب تأخر بهذا الشكل... ربما الأحداث في الفترة الفائتة (وأكبرها كان فقد القامة الخاتم) لم تمكن الأصدقاء الآخرين من الإنتباه لتواجدك بالمنبر..

مرحباً بك مجدداً وكما قال عدلان:


إضافة لكفة الحوار العقلانى حول غد أفضل


saif

هو وينو ادريس عامل فيها تقيل ولا دى حركات اولاد كوستى لكن برضو الف مرحب بتبيدى

عفيفى

ألف مرحب يا تبيدي ...

خالد محمد الطيب

الف مرحب بالاخ ادريس
شرفت ونورت يا ادريس ونتوقع قلمك إضافة لكفة الحوار العقلانى كما عبر عدلان.
بالمناسبة علمت من بكري ان الاخ عماد عيدروس قد نال العضوية ايضا وانا انتهز هذه الفرصة للترحيب به ودعوتة للظهور.

الصاوي

إدريس تبيدي شخصيةً

والله ليك وحشة شديدة جدا

لكن الحمد لله الشفناك طيب

يا مرحبا يا مرحبا


نورت البورد

الأخ إدريس تبيدي

في البدء أهلا ومرحبا بك، ضمن هذه الكوكبة "النموذج" من أبناء السودان "بطالحهم وكالحهم"، وها نحن أبناء كوستي قد زدنا كوستاوي آخر، وفي إنتظار إضافة إخوة أعزاء من "أولاد الدفعة"، وعقبال أخونا زكريا فضول، والطاهر النقر، وكل أولاد كوستي، نراهم هنا.

ويا إدريس تكتب لي على الإيميل

[email protected]

الأعزاء:

- عفيفي (إنت ما عارف أولاد كوستي دايماً عاملين فيها تقال "على شنو ما عارف")،

- خالد الطيب إزيك (وكيف أخبار ووين ياسر الطيب؟)،
- الصاوي (منعني الشديد القوي جداً من الإتصال .. تحياتنا للوالدة عطيات حتى نتصل)،
- ياسر حنا (شكلي كدا حا أرسل ليك الصور)، و
- نادوس 2000

شكراً لكم لترحيبكم بإدريس، وكنت مخطط أن أتصل به بالأمس لكي يفيق من ثباته ويعبِّر المرحبين به لكن إنشغلت... سأحاول بعدين وإنتو وحظكم يعبركم..

سيف

الرائع إدريس حبابك ألف
سعداء بإنضمامك لثقتنا في غنى و تميز إسهامك
ليتنا نراك بعد كل هذا الفراق جالب اللعنة والكوارث
ليتنا نستضئ بك وبالأحباب الذين رحبوا بك في هذا الزمان الملئ بالظلمة
كثير مودة لك ولكل الأصدقاء المتداخلين
و أقعدوا عافية

إدريس.. يا تدينا طلّة يا نعتبر هذه الواقعة:
Hit & Run Case

عن إذنك يا سيف:
أحمد عثمان انشاء تكون بخير.. ليك وحشة والله
الصاوي كتب لي سيف آخد عنوانك منتظر أن يرد.. وحتماً
سأكتب..

لكم المعزة والجمال جميعكم

Quote: هو وينو ادريس عامل فيها تقيل ولا دى حركات اولاد كوستى

شباب كيفكم:

عثرت عليه بالأمس ووعدني وعداً جاداً بإنه حا يفكر بصورة جادة في إنو "يعبركم" قريباً جداً... (أنا الورَّطني شنو في الحكاية دي؟)..


سيف

لكم الود جميعا
اصلو الحصل -
انا ما لاقي حتي زاتي في هذا الزمن الخرافي
سيف ادري بالحاله
الواحد بقى ذي السنجاب - ( معاذ) في حركه دايمه
اوعكم جميعا بالاتصال

لكم الود جميعا
اصلو الحصل -
انا ما لاقي حتي زاتي في هذا الزمن الخرافي
سيف ادري بالحاله
الواحد بقى ذي السنجاب - ( معاذ) في حركه دايمه
اوعكم جميعا بالاتصال

الأفاضل المرحبين:

صباح الخير (مع مراعاة فروق الوقت)

دخلت المنبر اليوم وأنا متوجس خوفاً من أن يكون التبيدي لم يقرر الظهور بعد...

وطالعت في أسى غير عادي البوستات التي تحدثت عن ما حدث في سوبا...

.......

وكلما أنتقل من مضوع إلى آخر إلى ثالث ولا أجد إدريس يزداد التوجس، إلى أن إنتهت الصفحة الأولى وذهبت للثانية وكدت أفقد الأمل تماماً ... إلاّ أنني بعد عدد قليل من البوستات وجدت رده (قطعت نفسنا)..

طبعاً وقع تبيدي في مقلب غير مقصود بتشبيه نفسه بمعاذ لما كان سنجاب... "أصحى يا بريش" - الكلام لي إدريس: كدي في مشيتك الجاية للسودان حاول قابل معاذ... وأراهنك إنك حا تعيد النظر في سنجابيته..


سيف

Welcome Idris Tabidi,
Thank you saif bashir
nada

الاخ سيف

تحياتي

هنيئا لنا بادريس تبيدي..مرحبا به وباسهاماته..

دخولي هنا ..لم يكن من باب الترحيب بأدريس ..او كما كتب احدهم..ادريث..فقط..وانما لتجديد عهد مضي عليه..حوالي ثلاثين عاما..حين كنت ادرس بكوستي الشمالية نمرة 2..وبعدها كوستي الاميرية..ربطتني صداقة وثيقة بالاخ ادريس تبيدي..ومنذ ذلك الحين لم التقيه..رغم اننا كنا دفعة بجامعة الخرطوم ..حرصت ان التقيه فيها ولم اوفق..زرته في شمبات عشرات المرات..وللاسف ..كنت لا اجده..لذا كان حرصي ..علي المداخلة هنا ترحيبا بادريس وتجديدا لعهود انقطعت..

وبما ان البوست..(حق اولاد كوستي)..المدينة التي احببت..لا بأس من توضيح علاقتي بكوستي..واهل كوستي..
فقد جئتها..في مطالع السبعينيات..بمعية والدي الذي عمل قاضيا بها..وكنا نسكن ..في سرايات السكة حديد خلف المدرسة الاميرية..درست الابتدائية بكوستي الشمالية نمرة 2..ودفعتي
عاكف احمد عوض حسين،احمد محمود(اجزخانة الشفاء)،الهادي مهدي فارس،ربيع رجب،مصطفي جمعة،محمد كدوس،مامون محمد الحسن(اضواء المدينة)،سيف الدين ضرار،رافع بابكر،هاشم محمد احمد بلول،عبد الله علي التوم،مزمل الوسيلة،التجاني الصايم،عبد الرحيم محمد سعيد..هناك من بقيت اسماؤهم مفردة غير مكتملة..كسمير،معاوية،مرتضي،حيدر(حارس المرمي)،عصبة،عوض..ود بابور

وقد درسنا في المدرسة الشمالية..الاستاذ عمر (المدير)..الاستاذ علي ابو سنينة،الاستاذ عبد الله ابو عكاز،الاستاذ ابوبكر

وفي الاميرية..ذهبنا اليها انا ،عاكف، احمد محمود،هاشم بلول،ادريس تبيدي،عبد الرحيم محمد سعيد..والتقينا هناك ..بكنتباي حسن كنتباي واخوه ابو قرجة حسن كنتباي..الفاتح محمد محمود الكنزي..
ممن درسنا في المدرسة الاميرية..الاستاذ ابراهيم عراقي(لغة انجليزية)الاستاذ عثمان (رياضيات)..الاستاذ سعد الدين محمد سالمين(لغة عربية وتربية اسلامية)

هذا ما جاء في الخاطر في هذه العجالة..ولربما جادت الذاكرة،في مرات قادمات، بما هو ارحب من ذكريات ندية ..عشناها في كوستي الجميلة..وتظل (كوستي بلد..وادريث تبيدي ولد)

لكم جميعا مودتي

حباب ادريس ود التبيداب ......منور البورد والبلد،،،

يا سلام يا سيف
مرحب بإدريس....
وسعاتنا بحضوره... في البورد
قد ظل سباقا في البحث عن أصدقائه
فعثر علينا واحدا واحدا.....
له ...
لك....
ولكل الأصدقاء الحب والحنين

إنعام علي عبدالله

يا سلاااام؛ ادريس تبيدي شخصياً بالمنبر العام.

منور يا تبيدي و شكراً يا سيف.

اها يا سيف حسين ملاسي وصل.

المشكلة يا الصاوي في الارشفة التي تسابقنا فتسبقنا.

Quote: اها يا سيف حسين ملاسي وصل.

الصاوى الراجل دا خطر تجيب الحرف الاول من اسمه يجى طاير تقوم تجيب الاسم وكمان (Family Name)


عفيفى

ولا يهمك يا ملاسي كلها سويعات وانت ترتاح وسيف يرتاح وتبيدي يرتاح وانا ارتاح .. ونفتح صفحة جديدة وتتم ارشفة ادريس تبيدي قبل ان يقول بإسم الله إبتدينا.

غايتو يا ناس اقتصاد الخرطوم؛

لو علمتم بالذي بيني و بينكم لعذرتموني.

كنت - في التمانينيات - عندما تنهزم الاقتصاد من الهندسة؛

اصاب بالاكتئاب حتى موعد الهزيمة التي تليها..... و هكذا.

الحمد لله يا حسين ما عندك حاجة مع القانون

بسم الله يا عفيفي؛

كيف ماعندي حاجة مع القانون؛

بس لانو الامور بخواتيمها؛ فقد اثرت ان احتفظ

بالذي - كان - بيني و بين القانون لنفسي.

مرحباً، مرحباً، مرحباً، بصديقي العزيز، وإبن دفعتي، الأخ الكريم إدريس تبيدي.

كم أشتاقك يا إدريس. ها تذكر صحن الفول اليومي، الذي كنا نتحلق حوله مع العديد من زملاءنا في القوز؟ من يومها لم أذق طعماً مماثلاً لطعم ذلك الفول. وغير ذلك كثير من الذكريات كثير. فقد كنا أيضاً نترافق في البصات في كثير من الأحيان.

يا سيف خليل، أيها العزيز، قد بهرتني بذاكرتك. كما أنك فاجأتني بأنك كنت تسكن قريباً جداً منا. مصطفي جمعة كان جارنا. وجاورنا أيضاً إسماعيل محمد إدريس (حيطة بالحيطة). يبدو أننا لم نلتق في فترة إقامتكم بكوستي لأنكم كنتم من "إولاد المصارين البيض،" سكان السرايات. وكنا نحن أبناء العمال الكادحين سكان "دبل رووم."

مرة أخرى أسجل إعجابي اللامحدود بذاكرتك، خاصة وأنني أعرف معظم من ذكرتهم، إن لم أقل كلهم.

شكراً سيف بشير على لفت نظرنا للترحيب بالعزيز إدريس.

السادة والسيدات المرحبين والمرحبات

أحمد عثمان: وينك يا راجل..

ندى علي: كيف أحوالك يا ندى،

سيف خليل:
أولاً دعني أهنئك على ذاكرتك الحديدية التي تستطيع العودة بها 30 عاماً إلى الوراء..
وبعدين تعال.. منو القال ليك إنو البوست دا بتاع أولاد كوستي.... البوست دا بتاعي أنا براي... غايتو أنا ما من كوستي ولكن لدي أصدقاء أعزاء من هذه المدينة الجميلة.. وممكن نتساءل هنا: هل تعود ملكية البوست لجهوية كاتبه أم جهوية المكتوب عنه؟؟ على العموم ممكن نقترح إنو نخليها منطقة وسطية بين مدني وكوستي.. نقول مرنجان مثلاً؟؟

صديق الموج: مرحب بيك..

إنعام: أخيراً ظهرتِ

ملاسي:
تعرف أنا إستغربت جداً لما دور البوست كم يوم كدا وإنت ما ظهرت.. فكرتي الشخصية عنك، إنك أسرع من يُداخل "من المداخلة" في البوستات بشهادة بشرى الفاضل.. ولو حتى عن طريق السلبطة "على رأي عصام جبرالله"... لكن لا أظنني أذيع سراً خطيراً هنا إذا قلت إن دخولك لأي بوست يزينه أضعاف وأضعاف... أما حديثك عن إنو الهندسة تغلب الإقتصاد أعتقد إنك بتكون قاصد العكس... لما الإقتصاد تغلب الهندسة كما كانت العادة.. وممكن نستعين بذاكرة الأخ سيف خليل...

الصاوي وعفيفي: منورين

وأخيراً:
د. حيدر مرحب بيك ومرحب بتبيدي مرات ومرات (وشايفك أكدت لي ما ذهبت إليه حول ذاكرة سيف خليل)

ودمتم، والمعذرة إذا نسيت أحد/ة

سيف بشير

العزيز جدا/الدكتور حيدر بدوي

تحياتي

لعلك لا تدري مدي سعادتي حين تهل في سماء البورد مفترعا لما يخصك..او متداخلا بما هو منير مؤتلق..
احمد الله كثيرا علي نعمة الذاكرة القوية..رغم انها بدأت في الضعف..ربما بحكم السن او مشغوليات الحياة واحباطاتها..
فعلا كنا نعد من اولاد المصارين البيض..اذ كان للموظفين في تلك الآونة سلطانهم وصولجانهم..وقد التصق بي في تلك الفترة لقب..او اسم ..(لا ادري)..كنت استسخفه جدا جدا..لانه منطلق من خلفية..تصنيفية..كانوا يقولون ود القاضي ..وكنت اقاوم ذلك اشد مقاومة..فما كنت احب ابدا ان يعتبرني الناس من اولاد المصارين البيض..رغم ان هذا التمرد لم يكن ..له عمق مفهومي ..بحكم السن..وانما كان تمردا نفسيا..وقد كان لي جنوح غير عادي ..في الارتباط ..بالسكة حديد ..كان العمال ينالون اعجابي ..لا لشئ اعرفه..انهم يعجبونني وكفي..لذا كنت لصيقا بابنائهم..العب الدافوري..اؤاكلهم القراصة والميلوحة..اكاد ان اكون مقيما بحي السكة حديد..متراوحا بين منزل الاعمام احمد عوض،جمعة،رجب ومحمد سعيد..ومنها يكون انطلاقنا الي البحر،الدافوري،وفيها تكون المذاكرة وحل الواجبات المدرسية..
ما اجمل ماضينا..ليت مستقبلنا يكون مثله..
فعلا من غرائب الاشياء ..انني لم التقيك الا في الجامعة..ربما لانك كنت طالبا مثاليا..وحينها كنا (شماشة)..نلعب الدافوري..نذهب الي البحر..نؤجر العجلات..نذهب الي المباريات في الاستاد..نرابط للقطارات القادمة والمغادرة...
وفعلا ان معظم وقتي كان في نواحيكم..لا انقطع عنها ..الا حين يأتي صديقي الهادي مهدي فارس..الي منزل سليمان شميس (تربطه بالهادي قرابة وطيدة)..والذي كان جارنا الجنب..فحينما يأتي الهادي..نرابط في حينا ..ونتجه الي حي النصر..حيث عبد الله علي التوم..عوض..هاشم بلول..الخ..ومن حي النصر الي ملاعب كرة القدم ..حيث تمارين فريق المريخ..ايام الجيلي عبد الخير ..قبل انتقاله الي المريخ العاصمي..وتمارين الشبيبة حيث يتألق استاذنا عبد الله ابو عكاز..وتمارين الدريسة حيث يتجلي استاذنا علي ابو سنينة..وتمارين الرابطة حيث كان كباتا قبل انتقاله الي العاصمة..

الاخ/سيف
تحياتي
يبدو انني ساستلف عادة الاخ الحبيب ملاسي..(اتلولس ليك في بوستيك هذا)..له تحياتي ومودتي...
بالنسبة للذاكرة..قولوا ما شاء الله..اما وصفي للبوست انه بوست اولاد كوستي..هذا باعتبار ما يكون ..بحكم معرفتي بالكوستاب ..كنت اعلم انهم سيهبطون هنا ويقيمون(اها شوف حيدر بدوي جاك محدر عميمتو كيف)..اما حديث ملاسي..لا ادري اي زمن يقصد..زمن ود معني وخليفة كاوتست في الاقتصاد ام زمنا آخر؟؟لم تكن كلية الاقتصاد في الفترة 1980-1984 لقمة سائغة للهندسة..الا اذا قصد ملاسي الثمانينات المتأخرة..وهذه تعني ان الحبيب ملاسي(صغنوني)..وتكون خسارة علينا..كنا (فاكرنو ولد حفرتنا)...
*بالمناسبة..وين العريس ..ام ان عريسنا اصبح مثل(الضو الخطر يوم عرسو)..خطر دي يعني سافر..ولا نقول المثل(البيت محروس وستو تكوس)..نحن نفتقد الحبيب..ادريس تبيدي..نأمل ان نراه عاجلا..

مودتي

العزيز سيف خليل

لا... ذاكرتك غير مفيدة خالص هنا... أعتقد ملاسي قاصد فريق إقتصاد ما بعد 1984 (معني، أنور، فوزي، أبوبكر ....... وبقية الكوكبة)..

"بمناسبة أولاد كوستي... سؤال ليك وللكوستاب: تعرف لي وين الأخ عمر خيري خريج جامعة جوبا- أعتقد أواخر الثمانينات - وأي وسليلة للإتصال به؟"

لك الود

سيف بشير

سيف خليل "ود القاضي"

ليك التحايا والمودة، بحسبة من زاملتهم "أحمد محمود "إجزخانة الشفاء"، الفاضل النقر، هاشم بلول، عاكف، فهؤلاء الدفعة السابقة للأخ إدريس تبيدي وشخصي، حيث انني أتيت للأميرية من نمرة (1) الإبتدائية (المرابيع)، وزاملت إدريس ومحمد عريبي والطاهر النقر، مزمل العطا، وماهر تاج السر "عازف الأورج المعروف"، وزكريا فضل المولى، ومحمد الفاتح، وآخرين كثر، وكنا في وقتها نمقت صديقك عاكف، الذي كان طالبا مثالياً، فما أكثر ما أعاد الكهرباء للمدرسة، بعد أن تعمد بعض الأشقياء تعطيلها لمشاهدة هلال مريخ في التلفزيون أو حضور فيلم سبقه صيته. وأضيف لقائمة الأساتذة بمدرسة كوستي الأميرية أستاذ عزالدين، سليمان الذي إلتحق بجامعة الخرطوم وتخرج من الهندسة، الناظر عمر أحمد إبراهيم والد زميلنا وصديقنا ياسر، .
أما في القوز فقد زاملنا د.حيدر بدوي، بمعية إدريث تبيدي، وآخرين كثر.

تصحيح للأخ إدريس وكل من يود الكتابة لي، فعنواني الإلكتروني الصحيح هو وليس كما ورد اعلاه:
[email protected]

Quote: غايتو يا ناس اقتصاد الخرطوم؛ لو علمتم بالذي بيني و بينكم لعذرتموني. كنت - في التمانينيات - عندما تنهزم الاقتصاد من الهندسة؛ اصاب بالاكتئاب حتى موعد الهزيمة التي تليها..... و هكذا.

"أما حديثك عن إنو الهندسة تغلب الإقتصاد أعتقد إنك بتكون قاصد العكس... لما الإقتصاد تغلب الهندسة كما كانت العادة"

كلامك صحيح يا سيف

رغم انى زعلانة من ملاسى و عمايله فى البورد (وجه غاضب جدا )


لكن فعلا لو علمتم بالذى بينه و بين اقتصاد الخرطوم لعذرتموه (وجه مبتسم)

الراجل "مناسبكم" عديل كدة.


ندى

كتب حسين ملاسي

Quote: غايتو يا ناس اقتصاد الخرطوم؛ لو علمتم بالذي بيني و بينكم لعذرتموني.

و الله يا ملاسي يا اخوي انا ذاتي عايز اعرف الذي بينك وبين اقتصاد. قبل فترة توصل عفيفي الي انك واحد من ناس مصر البكونوا واقفين قدام الداون تاون كل مغرب في اجازتهم السنوية وهم معطرين ولابسين ملابس انيقة واحذية مصرية لامعة، وبما انك لم تنفي ذلك فانا اعتقد انما توصل اليه عفيفي صحيحا. لكن عليك الله وريني انت كنت بتقيف لمنو؟ وما علاقة وقفة المغربية بالخرطوم بحري و اقتصاد؟
اما حديثك عن هزيمة اقتصاد من هندسة اكرر لك ما قاله سيف.

Quote: أما حديثك عن إنو الهندسة تغلب الإقتصاد أعتقد إنك بتكون قاصد العكس... لما الإقتصاد تغلب الهندسة كما كانت العادة.. وممكن نستعين بذاكرة الأخ سيف خليل...

الاخ الصاوى
سلامات
لا لا لا

رغم انه العزيزة "مدام ملاسى" دفعتى
و اكيد انت و سيف بشير بتعرفوها
لكن خالص ما شفته يوم حايم بهناك

الاخت ندي عشرات حبابك سلامات

Quote: الاخ الصاوى سلامات لا لا لا رغم انه العزيزة "مدام ملاسى" دفعتى و اكيد انت و سيف بشير بتعرفوها لكن خالص ما شفته يوم حايم بهناك

يا ندي يا اختي الكلام ده كان قبال ما يتزوج. الوقت داك لا انتي ولا مدام ملاسي كنتوا بتعرفوه .. وبالمناسبة ناس مصر ديل بكونوا دائما لابسين نظارات شمسية لزوم القشرة والتمويه.

Quote: لكن فعلا لو علمتم بالذى بينه و بين اقتصاد الخرطوم لعذرتموه (وجه مبتسم) الراجل "مناسبكم" عديل كدة.

Quote: و اكيد انت و سيف بشير بتعرفوها

والله يا ندي لو الراجل طلع مناسبنا حبابة عشرة لكن نحن جننا وجن الصلبطة. كدي قولي لي في اضاني دي منو؟

1000مرحب يا تبيدي ...

ندى:
كيف حالك.. شكراً على التوضيح "المبهم" للذي بين ملاسي والإقتصاد، لكن يبدو إنو في حاجات عارفنها ناس الصاوي وعفيفي أنا ما عارفها.. ويا ترى مين سعيدة الحظ مدام ملاسي البنعرفها أنا والصاوي؟

ناس كوستي:

لا نزال مترقبين ظهوركم.. هل ياترى ممكن يظهر لينا "عماد جوهر"؟، أو "عبدالله الصادق"؟

سيف