الما عاجبنى فى سودانيز أونلاين

السلام عليكم،

أولا أعتذر لكل من تداخل معى فى بوست مؤخرا ولم أرد عليه ـ ليس اهمالا أو تعاليا؛ وانما لظروف خاصة؛ وأعد برد قريب ان شاء الله.

تابعت سودانيز أونلاين من ديسمبر 2003. وحبيت عدد من كتابها ـ من الجنسين ـ واحترمت عدد أكبر. وفى فترة اتمنيت أقدر أكتب عشان أوضح رأيى فى مواضيع كتيرة هامة. وبعد ما فتحوا التسجيلات قدمت واتقبلت وبسرعة أدهشتنى.

وبسرعة أكبر..

اتصدمت..

وأحبطت..

وبقيت أجى أمد راسى لمن بطنى تطم وأمشى..

ليه؟

بسيطة. أمسكوا عندكم..

الناس مقسمة كيمان كيمان. وكل زول بحامى لى زولو. فى ناس ذكرونى القبائل العربية زمان. بس واحد فيهم زول يدوس ليهو على طرف، يكورك (يا قوووووم) وعينك ما تشوف الا النور. بس الجوارح والكواسر وكده. جماعتو كلهم يجو. البى سيفو والبى سكينو و .. و ..

وممكن برضو قبيلة تغير على مضارب قبيلة تانية، وأقرب زول مطرف يروح فيها.

داحس والغبراء بس..

ويا ويلك ويا سواد ليلك كان دافعت عن الاسلام أو قلت لى زول أو زولة الكلام دا ما صاح. أقل شى تطلع بيهو انك كوز وظلامى كمان.

اذا اتشتم الدين يا تسكت ولا تبعد بعيد. بعدين هو الدين ما اتشتم؛ انت الفهمك على قدك ومتحجر ـ ما ظلامى؛ الفهم يجيك بى وين. بعدين فهمك دا بتاع عصور وسطى وكده. ايش دراك بى الاسلام موديل 2005.

اما الألفاظ البذيئة فدا أدب؛ ورويسك الصغير دا ما بفهمو. وما تعمل لى فيها قارى جامعة؛ القلم ما بزيل بلم.

وزمان كان فى موضة الحرد. اذا زول زنقك فى خانة اليك ـ أو مافى زول هببو ليك ـ أحرد واستقيل. وما تخاف؛ التحانيس حتكون من هنا لى هناااك. ويا فلان ـ أو فلانة ـ انت ما نوارة البورد، خسمناك الا تقعد، وعشان خاطرنا ترجع وكدا.

أها دلوقتى الموضة اتغيرت. بقى فلان بطردوهو من هنا، وبوستات الشجب والادانة تبدا من هنا. آى؛ دا ما عشان قصير حاقرين بيهو؛ ودى ما عشان خدرا ومخططة بالبمبي مضطهدنها. وزى ما بيحصل فى الأعياد؛ يجى الموسم ويصدر عفو عام عن المعتقلين ويجو تاانى. ونادرا ما يحرد زول.

هو زااتو الطرد بقى من طرف. شى تعرف سببو وشى ما معروف. بس تسمع فلان دقوا ليهو خروج ولغو اقامتو. مغتربين بس.

اها ونزيدكم. عااادى تشترك فى بوست بى مداخلة معتبرة فى موضوع مفتوح للنقاش؛ ولو كنت جديد لسه سيد البوست ممكن يرد على القبلك والبعدك؛ ولما يصلك يعاين ليك من فوق لى تحت ويفطك. هو انت ذااتك كان ما شليق، البدخلك بوستات السناير شنو؟ أجرى ألعب بعيد.

اما كان اتشالقت وقلت تفتح بوست؛ ما بتلقى اكتر من اتنين أو تلاتة ردوا عليك. ولو أديتو يومين الا تفتش بوستك فتيش.

وكلو كوم وشكل الناس الكبار كوم. يتشاكلو يختوهو قرض. مرات بفتكر نفسى فى روضة أطفال.

ولو عايز تشتهر، بس نزل بوست عن المرأة وهاجم يمين وشمال؛ ما تخلى لى زول صفحة يرقد عليها. يا جماعة، صاح المرة مظلومة فى المجتمعات الشرقية؛ لكن ظالماها التقاليد ما الدين.

وفى ناس ما يشوفو موضوع مستفز الا وتلقاهم بصموا بالتأييد. وناس تانية زعماء معارضة بس. أى موضوع: (لن أقبل) بتاعت عادل امام فى الزعيم.

أها؛ باقى حاجتين: فى ناس ما بشملها شى من الكلام الفوق دا؛ فلهم العتبى.

والحاجة التانية بجى تااانى أنقنق..

سلام

والله لم تقل الا الحقيقه.

Quote: والله لم تقل الا الحقيقه.

مش كدا عليك الله يا أبوحميد؟

تسلم

العزيز خالد عثمان جعفر

القلتو كله حاصل و زيادة
لكن علي الكفة الاخري في المفيد و الدنيا اساسا ماشية بالتوازنات
القبح قصاد الجميل
و المزعج يجاور المريح
زي ما كان بقولوا عن مصر
انك اذا شفت مساجدها تظن انه مافيها غير الدين و الصلاة
و اذا بقيت علي كبريهاتها و علي واحدة و نص لا تتصور ان بها مسجد او مصلي واحد
يا عزيزي واقعنا المعاش بعيد عن المثالية فما ممكن نتوقع المنبر يكون مثالي
بل بالعكس طبيعة المنبر المنفتحة علي الناس بخصوصياتهم و مستوياتهم و تجاربهم
و خبراتهم و امزجتهم و حالاتهم النفسية المختلفة بشدة، اضافة لاسقاط اعتبارات
كثيرة تحكم اشكال الحوار بين الناس و ان التواصل السايبيري يتيح فرصة للفرد
لان يغلب مزاجة في تعامله مع الاخر. المنبر دنيا بحالها فهو ليس صحيفة ولا يتخذ
اي شكل من اشكال الملتقيات المعهودة المنبر هو السودان بكل الخيبات الحالة به


ودي

الأخ نصار

كلامك سليم وفعلا فى حاجات وناس حلوة فى المنبر

لكن أكتر حاجتين بيغيظوا انو القبح فى أحيان كتيرة بيطغى على الجمال؛ وانو المنبر صفوى ـ دخولو الا بالتذاكر.

يعنى لو كان مفتوح الواحد بيتوقع القلتو وزيادة؛ لكن كونو "صفوة" البلد يكون دا حالهم، ما حاجة مؤسفة وبتوريك البلد ماشة وين؟

الغريبة البلاوى البتحصل هنا فى المنابر المفتوحة ما بتلقاها

مع خالص تقديرى

الأخ خالد

تحياتي

أعجبني أسلوبك السهل الممتنع الواقعي في التعبير .

لن نقفز فوق الواقع فشئنا أم أبينا هذه عينة عشوائية لمتعلمي السودان . و الشعوب يقودها متعلموها . لا أدري على وجه الدقة هل بإنصلاح الكل سينصلح الجزء أم لا بد للجزء من تحمل قدره و يقود الكل للإصلاح ؟؟؟ يتفرع كيف و متى و بأى منهج و بأى أيدولوجية مما لا أود أن أزحم بوستك بها .

عموما نكابد و نحاول المشاركة قدر المستطاع و بما نستطيع توفيره من وقت مستقطع و أرجو ألا نضطر ( للحرد ) فقد لا نجد من يجري وراءنا .

ودي لك

الأخ عاطف

ليك أجمل تحية على ذوقك العالى

عارف البفقع المرارة انو مافى زول أمى من الناس الهنا. كنا قلنا معليش، لكن تقول شنو؛ الله يكون فى عون السودان.

الا أوصيك؛ أوووعك تحرد. ما سمعت بى قانون منع الحرد؟ غايتو ما لاقانى زيو فى أى منتدى

أنت بس أقعد وأصبر. مش يمكن تصبح تلاقى عفشك بره؟

superb ya Khalid

زول بن زول

الله يديك العافية

العزيز خالد
لقد أضحي الكلام عن الحال المايل ظلام و قدم و هلمجرا

ناس قدري أفندي فحدث و لا حرج

Quote: وفى ناس ما يشوفو موضوع مستفز الا وتلقاهم بصموا بالتأييد. وناس تانية زعماء معارضة بس. أى موضوع: (لن أقبل) بتاعت عادل امام فى الزعيم

أنا البيحرقوا روحي

ديوك العدة

لو خليتو بيوسخ العدة ولونشيتو بيكسرها


خليك معانا

فلا يصح إلا الصحيح

ود العجب ازيك

مشتاقين وكدا..

البتشوفو هنا عجيييب يا وليد

انت بس طول بالك..

عارف مرات بتذكر شعار مسلسل "يوميات مدير عام":

عشنااا وياما حنشوف...

كلامك صحى

واسلوبك شيق


اها قلت شنو فى المداخلة المعتبرة دى؟!

استاذة نور

ما قصرتى تب!


تسلمى

سلام للجميع

شكرا للمساهمات الطيبة

بس ماشى الجامعة؛ لكن بجيكم بعدين ان شاء الله للرد و..

النقة

عثمان خالد

نسيت حاجة

لو داير تشتهر اكتب فى الصادق المهدى عشان تتدرب
فى السياسة والحوار

عزيزي خالد
تحية كبيرة
أين أنت يا خالد ؟

Quote: وممكن برضو قبيلة تغير على مضارب قبيلة تانية، وأقرب زول مطرف يروح فيها.

أنا مطرف .. لكن دايما برفع راية الهلال الأحمر و أحيانا علم الأمم المتحدة

مودتي لك
و صدقت في كلامك تب

هوى يا الفاتح، ما تقعد تقلب فى اسمى..

سيد الحوش سمانى تلاتى لما دخلنى

بعدين خلينا بعيد من السياسة، بكره ناسها يجو يكرهوك حياتك ويطلعوك قاعد ساااى

يا سيد الموضوع
كدي بالهداوة ...مشكلتك انت شنو ...عشان يلقوا لك حل
سيبك من باقي الناس
.......................
حكمة اليوم
البتكلم ما بي يعمل

ونواصل النقة..

فى ناس كدا الواحد تلقاهو لابد لى زول. أول ما يشوفو هبش واحد ينط ليهو فى حلقو ويزح داك بعيد. وكان جيت مارى تحلف تقول الزول غلط فى البيتشاكل، ما فى زول غيرو..

وبعدين ناس تانية دايرة تسوط شرق غرب بدون ما زول يتكلم معاها. والبفتح خشمو دا طوالى عنصرى. وعينك ما تشوف الا النور..

ومرات مرات بفتكر انى فى مدرسة. الا دى بخليها لذكائكم

غايتو..

الله يصلح الحال

العزيز أبوجهينة،

وينك يا رجل؟

تقول شنو بس. مشاغل وجرى والحمد لله. زى ما عارف، لو باريت البورد بتمرق بى قد القفة.

تعرف راية الهلال الأحمر ولا الأمم المتحدة دى مرات بتحلك؛ لكن خليك حريف وما تقفل عليها..

مرات ما بتحلك

بلير،

كتبت رد واتمسح؛ لكن بجيك راجع ان شاء الله

خالد عثمان مرحب بيك

كلامك سمح

واصل النقة

up
(till i come back)

جيتك يا بلير،

قلت لى مشكلتى شنو؟ مشكلتى البحصل هنا؛

أفجر الخصومة تلقاها هنا..

اسوأ الألفاظ ممكن تقراها هنا..

أغرب الأفكار وأكترها شذوذا بتلقى البشجعها هنا..

عارف انو المنبر ما ممكن يكون مثالى؛ لكن لما ناس تعمل البدع باسم الحرية تبقى مشكلة،

ولما الناس دى تكون "مثقفى" السودان تبقى مصيبة

طبعاالكلام القلتو ما بنطبق على الجميع؛ لكن للأسف صوت النشاذ فى أحيان كتيرة بكون أعلى. وما بقول سودانيز اونلاين كلو كعب؛ بالعكس، فى حاجات كتيرة مفيدة، لكن اذا ممكن نبقى أحسن ليه ما نحاول؟

النقة النقنقتها دى كلها لسببين: كنت عايز أفضفض معاكم وأعبر عن خيبة أملى، وفى نفس الوقت أشجع الناس الما عاجبهم البحصل ينقو معاى لما المايل يتعدل

عارف انو أسهل حل انى "فوق الحلة دى تانى ما أجى" (هوى، دى ما استقالة)؛ لكن دا اسمو هروب وسلبية وأنانية..

ولا شنو؟

ولى قدام..
(عجبتنى وقلت أجربها؛ لكن النسألكم، انتو الناس دى ماشة لى وين قدام؟ وهو فى شنو قدام؟)

(أححح. الحمد لله. بلير ردك دا اتمسح مرتين قبل ما يمشى )

سلام يا أنور يا زينة شباب البورد

وينك مختفى؟ هو البعمل ماستر تانى الناس ما بتشوفو ولا شنو؟

تسلم

حسه عليكم الله شوفوا حال البورد عامل كيف

غايتو، الله يصبرنا

العزيز خالد والله كلامك بيدخل علي طول في القلب لانو نابع من القلب يعني من القلب الي القلب ونرجو الصلاح

الأخ حسام،

شكرا لكلامك البيفيض ذوق ونبل

غايتو زى ما قلت، الله يصلح الحال

الله ينصر دينك والله ختيت ايدك فى الجرح عديل كده

الأخ محمد،

الجرح شكلو لسه مفتوح. الغريبة كلنا شايفينو، لكن البيحاولو يقفلوهو شويييية

أها نواصل النقنقة..

من اللافت للنظر مؤخرا الفصل الكثير بدون احاطة الجميع بالسبب

الواحد بقى لما يدخل المنبر لسان حالو بيقول: أها؛ الليلة الفصلوهو منو؟

صحيح أنو معظم الاتفصلو كان فى مبرر لفصلهم؛ لكن البعض فصل بدون أسباب واضحة أو مقنعة

الفصل بدون ابداء أسباب مقنعة غير مفيد للمنبر.

على كل أتوقع عفوا شاملا فى القريب العاجل؛ وان كنت أفضل التمييز بين من فصل لسبب واضح للجميع ومقنع للغالبية وبين من وقع عليه ظلم بفصله

ولا شنو؟

الاخ خالد تحيات طيبات


المهم الما ذكرتو وهو اس البلاء

كل زول داير يفصلوا ليه المنبر حسب فهمه وايدولوجيته

ودينه الذى يعتنق...

اعمل زينا افتح البوست لقيتو خيتك واصل

ما نفع معاك......... يا بوست ما دخلك شر،،،

Quote: Mohamed A. Salih والله لم تقل الا الحقيقه

Khalid Osman Jaafar

ما يؤسفني حقيقة ويالمني اكتر انو كلام مع الاخ خالد عثمان كله صاح وطبعا الاخ خالد لسه ما كتب كل الكلام لانو كتير شديد

قبلي كده قرأت في منبر اخر موضوع يتطرق لموضوع مختلف لهذا المهم احد المشاركين ذكر بان في بعض الناس لمن يكتب موضوع يتصل بصحبه ويقول ليهو يا فردة ما قريت البوست بتاعي عليك الله اخوك مش خطر رأيك شنو في الموضوع كده اديهو دفرة لي فوق

الاخ خالد المؤسف حقيقة البورد ده ما بعكس السلوك الحاصل هنا وبس انما بعكس السلوك العام بالنسبة لينا وهسي ده الطريقة الماشة بيها البلد وفي نظام تهبب لي اهبب ليك

الاخ خالد تحياتي
ما قلت الا الحق .. وقد عانيت انا نفس الشيء حيث لم يتواصل معي الا القلة جدا واحفظ لكل من تواصل معي كل الاحترام والتقدير لانهم تواصلوا بغض النظر من اكون او لاي جهة انتمي ولاي كوم اتكوم وليس بيني وبينهم اي معرفة سابقة .. ورميت الشغلة وراء ظهري خصوصا انو اكل العيش ماخد كل وقتنا
نرجو ان يتغير واقع البورد نحو الافضل

Quote: قبلي كده قرأت في منبر اخر موضوع يتطرق لموضوع مختلف لهذا المهم احد المشاركين ذكر بان في بعض الناس لمن يكتب موضوع يتصل بصحبه ويقول ليهو يا فردة ما قريت البوست بتاعي عليك الله اخوك مش خطر رأيك شنو في الموضوع كده اديهو دفرة لي فوق

اخي aosman
مرة حصلت لي قصة زي دي في احد المنتديات اذ اعلمني احدهم بالماسنجر انه قد كتب وضوعا بالمنتدي لكي اساعد في رفع الموضوع.. لم ارفع الموضوع ولم اكتب بعدها في المنتدي لاني حسيت ان المسالة زي موضوع التكتلات البرلمانية عندنا مع اوضد القرارات

نرجو ان نرتقي لواقع افضل ..بعيدا عن موضوع الكيل بمكيال الشللية والمعرفة والصحوبية والحزبية

تحياتي لكم

السلام عليكم يا عم صديق (لو سمحت لى أناديك كده)،

كلامك صاح جدا، ودى مشكلة لوحدها. وفعلا فى الغالب بعمل زى ما نصحتنى؛ لكن فى أحيان تانية الغيظ بيكون شديد. وواضح من ردود الفعل انى ما براى..

نأمل انو الأوضاع تستعدل قريب.

سلام يا aosman

زى ما قلت الأعوج كتييير. وما فى سودانيز اونلاين بس. لكن الموضوع بزيادة شوية هنا

سياسة شيلنى وأشيلك والكيمان هى الخاربة البلد. عشان كده لازم نحاربها هنا..

سلام يا حريقة،

المشكلة دى بيعانى منها كل عضو جديد ما عندو كوم. لكن ولا يهمك. قول الدايرو وما تهتم بالمابيهتم بيك..

الشللية للأسف موجودة لدرجة انك مرات بتبدأ حوار مع واحد وتلقى نفسك بترد على جيش..

غايتو..