Post: #1
Title: اتخيلوا المذيعه قالت للضيفه الاولاد يطلعوا ما ناقشين حاجه
Author: معتصم ود الجمام
Date: 05-20-2004, 12:36 PM
Parent: #0
بالامس مريت على تلفزيون السودان
لقيت مذيعه عامله لقاء حامض
مع نسوان مغتربين مرتاحين شديد
بس ضحكتا شديد لمن ايمان دفع الله قالت للمغتربه
العائده لارض الوطن عشان تعلم اولادها
قالت ليه احسن يطلعوا ناقشين
ما عارف ناقشين دي يا ربي راندوك ولا كلام حواري
والله انا ذاتي ما ناقش ابو النوم
على العموم المره المغتربه ناقشه حنة السرور
ولكم جميعا الحب بايمان دفع الله ذاتها
معتصم
|
Post: #2
Title: Re: اتخيلوا المذيعه قالت للضيفه الاولاد يطلعوا ما ناقشين حاجه
Author: Elnasri Amin
Date: 05-21-2004, 03:24 AM
الاخ معتصم
انا غايتو لو حضرت البرنامج ده كنت حانبسط شديد لو سمعت المذيعه قالت كده.
اتمنى كل المذيعين\ات يخلو التكلف و يتكلمو لهجه سودانيه عاديه.
فالارسال موجه للسودانيين و ما اظن فى عربى بجى حايم بجاي
فلو كان فى سودانى قلبه حار على راس اجهزة الاعلام كان امر بان تكون كل الحوارات بلهجه سودانيه خالصه ما عدا الاخبار و البرامج الموجه لغير السودانيين.
التحدث بلهجه سودانيه سيحرر المذيعين و مقدمى البرامج من عب الكلام بالفصحى.
انا من دعاة الحفاظ على كل ما هو سودانى, نحن سودانيين و نفخر بسودانيتنا و لهجتنا احد اعمدة شخصيتنا
المخاطبه بلهجه سودانيه سيكون له اثر كبير فى التواصل مع السودانيين الذين يتخذون اللغه العربيه كلغه ثانيه,,,,كذلك دول الجوار
نحن فخورين بلهجتنا( انا لا ارى داعى لتضخيم حرف الجيم)
خليهم يتكلو بلهجه سودانيه بس يكون بنظام بعيدا عن لغه الحوارى
(بالمناسبه كلمة ناقش دى قدمت لغاية ما بقت main stream)
النصرى
|
|