ألحق يا سجيمان ... إشتريلك رقم سيارة من دبى قبل ماتغلى !!!

شاهدت هذا الصباح فى تلفزيون العربية تحقيقا عن مزاد لبيع أرقام سيارات متميزة فى نادى الضباط بدبى ... والارقام المتميزة هى الأرقام الصغيرة ... وقد أضاف المعلق أن الرقم كل ما كان صغيرا كلما كان سعره عاليا ... وقد بيع الرقم 33 بمبلغ يزيد عن 11 ألف دولار وقد أردف المعلق أن هذا السعر يعتبر قليلا بالمقارنةبالاسعار التى بيعت بها أرقام أخرى فى مزاد أقيم قبل أيام ... وقد عرفت بالأمس من زملاء العمل أنأأحد الأرقام قد بيع بما يقارب المليار درهم أماراتى
والغريب أن أحد المسؤلين من الشرطة نفى إتهاما بأن هناك محاباة فى توفير الفرص المتساوية للحصول على الأرقام السحرية ، وقال أن كل الناس سواسيةأمام الحصول على الأرقام ، فقط على من يرغب أن يحضر المزاد وينافس !!!!

للحق إنعقد لسانى عن التعليق على هذا الخبر وأنا أدير فى ذهنى أحوال أهلناالتعساء المحرومين من لقمة العيش وقطرة الماء فى العالم العربى ،والإسلامى ، بل كل العالم الإنسانى.

ولم أجد بدا من الإستعانة بالعزيز سجيمان للتعليق على هذا الموضوع عله يخفف من الحرقة التى أصابتنى فى مصارينى ...
وللا أنا ياربى متخلف عن العصر وموش مودرن وعايش فى زمن تانى ؟

المهم ألحق يا سجيمان ياخوى وأدخل فى المزاد قبل مايقولوا عليك قروى وما بتفهم حاجة فى الحضارة !!!!

kh_abboud


يا اخوي دي اسمها الارقام المميزة...ودي موضة بقت في الخليج.. حتى في السعودية في..... اتذكر في رقم مميز كان 111... باعهو بي حوالي نص مليون ريال....اليوم السمعت الخبر دا ..... حياة الدنيا مسخت وغدبت غدب شديد.... واتذكرت حبوبتي بت ابقناية الله يسامح لها... ماتت بي هملتا..... كانت مشلخة 111... رقم مميز.... كنا حسي صنفرنا ليها جضيماتا...ودخلنا بها المزاد....وقبضنا فيها نص مليون.... وهي الله يسامح لها كشفا حق البكا.... ما جاب حق الشاي والموية الاتجوغروهن الناس.......دنيا حظوظ بس.... اي زول عندو زول مشلخ 111 يبقى فيهو عشرة وما يفرط فيهو......ولاّ اقول لكم انا بشتري شلوخو... وما بنختلف علي السعر.......

سجيمان ... الله يفرق عليك ... فرّقت على كتير من المغسة الصابتنى
والله حبوبتك بت أبقناية دى سعر شلوخا مليون كامل ..زى ما قال محمود ولدى ... إنت نسيت أنها بالجنبين وللا شنو؟
لكن والله مغستنا دى ما بتتفشى بالساهل .
بالمناسبةدى ... كيف بتكبر الحروف وتلونها ... مافى حاجة ظاهرة عندى فى الأوامر هنا

انا حابيع جُضم واحد......والتاني حاقشر بيهو انا

Quote: كيف بتكبر الحروف وتلونها

اكتب الامر دا قبل النضم الداير تكبتو

<*font color=red size=5*>

وما تنسى تشيل النجمتين