اطشم و ما تتلوح...علماء السوء...ترزية الشريعه..خدم السلطان

لم يفاجا احد بالخبر و لا بالحدث نفسه فهولاء قوم كانوا و ما زالوا ادوات للسطان,اكتنزت ابدانهم من موائده و تكرشوا و تنفخت جضومهم/ا من عائد اصدار الفتاوى الملائمه لمارب السلطه و تقلباتها ....
لم يجدوا ما يبحثونه مع اطراف المفاوضات (الحاكم بامر الله و ظله على الارض و حركة التمرد الصليبيه الكافره) الا تارك الحكم بالشريعه وفسقه وكفره ..
تنازل هولاء المنزهين و سمحوا بان يستثنى غير المسلمين بان يسكروا فى الخرطوم "عاصمة دولة الاسلام" بشرط ان لا يترنح الشارب ... بئس الاستثناء و بئس من قام به وبئس العلماء....
من نصب هؤلاء علماء السوء ليتحدثوا باسم من؟؟؟ ليس باسمنا يا جهله و يا خدم السلطان ... ليس باسمنا مسلمين/ات ,مسيحيين/ات, لا دينيين/ات ,وثنيين/ات
ليس باسمناو اقصي ما يهمكم من يسكر و "لايتلولح" ... ليس باسمنا و انتم تصمتون على المحرقه والقتل والاغتصاب التى تتم على المسلمين/ات فى دارفور من اولياء نعمتكم

ليكم و لاولياء نعمتكم يوم حساب وحينها لن تنفعكم فتاويكم شيئا

استثنى العالمه سعاد الفاتح لانه لم يتضح ان كان الوفد قد حمل معه طوبه, ثانيا لم تصدر فتوى توضح مدى شرعية تنصيبها عالمه فى هيئة علماء السودان وهل يجوز ذلك مع نقص عقلها و دينها,ام ان عليها ان لا تترنح ؟؟؟

كيف تقاس اللوليحه؟؟؟؟

مراويد عندى ليك فكره
امشى السودان (اصلى شايفاك متجرس) وافتح ليك مدرسه برنامجها الاساسى كيف تمشى فى الشارع دون ان تلولحوالطلبه يكونوا من غير المسلمين ...تحت تحت اعمل دروس خصوصيه للمسلمين تلاقى قروش زى الرز


ومنين اجيب ناس لمعناة الكلام يتلو

راويه شكرا ليك على الافكار و الاقتراحات المماشيه لروح العصر، عصر اكتر من كده،دى حاله دى و ديل علما
لا و سعاد الفاتح ام حسن البطل !!!!¨!
المصيبه بعد ما افتح المدرسه و اكيد حتنجح نجاح باهر حيقلعوها منى لانو منهج المدرسه ما اسلامى كما افتى الفقيه رناح بن لولاح فى مرجعه الشهير "المتلولح العجول فى ما لايذهب بالعقول " محنك يا دنيا محن

دى وصله لبوست الاخ تاج السر لمن اراد قراءة الخبر
هيئة علماء السودان ، أم علماء آخر الزمان ؟؟؟

هذه الفتوه تذكرنى عادل امام حين قال
نحنا جدعان اوى

فليصر هذا شعار الماشين يتلولحو فى الشارع

أخى مراويد كلنا فى الهم شرق ، لقد اثقلتنا الجراح والغربة التى لن تنتهى طالما هذا هو حال علماؤنا الأفاضل

الاخوة والاخوات.

واضح جداً أن الكيزان نصبوا أنفسهم كعلماء للمسلمين في السودان.

أما موضع الخمرة ده العلماء دييل ما قالو لينا. الغير مسلم ده حيلقى الخمرة دي وين؟
مش مفروض يكون هناك بارات بتبيع ولا كيف؟
بعدين كيف تكون شارب وما تتلولح؟ طيب فايدة الشربة شنوا من غير لولحة؟
يعني كن الواحد عتر ليهو حجر ساكت البوليس حيقبض عليه.
الباقى لي أنوا حكومة الانقاذ سوف تصدر بطاقات تموينية لغير المسلمين لكي يشترو بها الخمرة.

والله دي قمة المسخرة والمهزلة من الكيزان في السودان.

Deng.

جريمة الترنح مسألة جديدة

تذكرت الرمية التي يذكر فيها
" إنتي يالسمحة المشيك مليخ"

طبعا في فرق بين مشي المليخ والترنح عشان بت الشيخ المشيها مليخ ما تقع في ايدي بوليس " الإنضباط الإجتماعي"

ولابد أن نفرق بين الترنح والشروع في الترنح
عشان الشروع في الترنح متعلق بالملاريا وفتيش الحقن وخاصة الذين تمت معالجتهم بالكينا

كذلك الجماعة الطالعين من فول أبو العباس أحياناً تظهر عليهم علامات الشروع في الترنح
مسألة عجيبة

والأعجب من ذلك إعلان الخرطوم أرض الإسلام
بغض النظر عن الذين أعلنو هذا الإعلان الذي كلف البلد تاريخها وماضيها وبشرها
طيب الجماعة القالوا طردوهم ديل ما كانو بفتكروا انهم وصلو ارض الإسلام
طردو ليه ، وينو حقهم في ارض الإسلام
انتو لو أعلنتو مثل هذا الإعلان يجب أن تكونوا قادرين على منح الحقوق لأصحابها
وارض الإسلام حق لكل المسلمين، إلا إذا كان في تفسير آخر مشابه لجريمة الترنح

Quote: أما موضع الخمرة ده العلماء دييل ما قالو لينا. الغير مسلم ده حيلقى الخمرة دي وين؟

ده السؤال المحيرني يادينق ..
من ما قريت الفتوة دي .. الناس دي بتشجع علي الصناعة الوطنية . ما عايزين مستورد.. البلح في .. والعيش في .. تاني شنو ؟؟

Quote: بعدين كيف تكون شارب وما تتلولح؟ طيب فايدة الشربة شنوا من غير لولحة؟ يعني كن الواحد عتر ليهو حجر ساكت البوليس حيقبض عليه.

خلاص يادينق الواحد يشرب خفيف ويشيل الباقي في كيس يتم لوليحو في السرير .. وكان بقدر علي الدق ..يتمو قبلو

يامراويد..

انا بقترح انو الواحد يطشم .. ويشوف ليهو واحد يتلولح ليهو

مراويـد يا خـوي الجماعة عايزين إطـلعوا بي أي حاجة الكعكـه الكبيرة دي ما إطلعوا منها بي حاجة و بعدين عليك الله قول لي من ما جـوا الناس ديل طبقوا في الشريعة شـنـوا....؟؟؟؟؟؟؟

الناس ديل ليهم أكثر من 15 سنة إقتلوا و إسجنوا و إطفشوا في الناس بعد دا كـلوا إطلعوا من المولد بدون حمص

لكن حكاية ما إترنح دي حلوة شديد حتى السكران عايزنوا إمشي دغري

و ما خفي أعظم

دينق:

Quote: بعدين كيف تكون شارب وما تتلولح؟ طيب فايدة الشربة شنوا من غير لولحة؟

ذكرتني ملاحظة زميلي وصديقي "بيير أبو صعب" وهو صحفي في "الحياة"..

قال لي اصحابو السودانيين بيقولوا: ياللا نسكر..
يعني ناوين يسكروا ناوين يسكروا ..

وهو مستغرب لأنو ممكن الزول يشرب بس من غير ما يسكر ..


مراويد..

مش في حاجات تانية غير الشراب بتخلي الزول "يترتًح"..

يا ربي الفتوى في الحالات دي تكون شنو ..؟

Quote: كيف تقاس اللوليحه؟؟؟؟

بمقياس خمريختر

طيب والناس المتلولوحين طبيعي

ماذا قالت الفتوي عنهم؟

وي كمال اوسلي عندك شال خاتيهو هنا

احسن تجي تشيلو

تمبس.

تعرف ده معناه المسلمين يشربوا عرقي وغير المسلمين يشربوا الشراب النضيف, يعني المسلمين يشربوا عرقي العيش وعرقي البلح وطبعاً هناك أنواع تانية بتكون مخلوطة ببنج حمار ولا حجار بطارية كمان. أما غير المسلمين هلك يا ويسكي بيرة بكل أنواعها جوني ووكر وجن. عشان كده على المسلمين البشربوا لازم يفتشوا أصحابهم الغير مسلمين البشربوا وين ويتم بينهم أتفاق بتاع جنتيلمين عن الشربة وما أدرك ما الشربة.

مهما قال هولاْ "العلماء" فأن الحصيلة في النهاية هي واحدة, لقد فشلتم وفشل معكم مشروعكم الحماري" الحضاري"

دينق

نشرب من ما نزرع..
من تلولح ليس منا..
حد اللوليحة..
الشروع في اللولحة..
اللجان اللوحية..
جمعية الأمر بالمعروف والمشي عدل..
علماء العذر و(الزريعة)..

أسماء تواكب التشريعات الجديدة:

أبراهيم موشوك
علي عسلية
عمر طشمة
حسين عيش
صلاح بلح
فاطمة مريسة
عثمان فك الجزرة
علي -شمو-
حيدر المترتع
بدر الدين جركانة
الطيب النص
فتحي جغمة
سوسن شربوت
عبدو كونجو مورو
زهير بقنية

معسكرات :
معسكر الملولح للدفاع الشعبي
مدارس إبن الملولح الإسلامية

خالد كباية - مثلا - برضو

يادينق ..
اول حاجه لي فترة ما ضحكته قدر كده.. من ردك الفوق ده ..

والحاجه التانية انا في حيرة من امري ياخ ده تناقض غريب جدا .. وتخبط .. معقولة الناس دي لحدي الآن عندهامقدرة انها تكذب .. وتغش .. ولمتين ؟؟؟

ده كلو كوم ومنظرم كوم تانى قعدت اتفرج
عليهم وهم بتكلموا فى نيفاشا اشكال غريبة
نظرات العيون ضيقة ومحاجر العيون غائرة
الدقن مبشتنة والفم مصرور
يعنى ديل منو القال ليهم انو الايمان والتقوى بالحمير
وصر الوجوه.....
وكان الله فى عونك يابلد

بسم الله الرحمن الرحيم
سودانيزأونلاين
لجنة الفتاوى والبحوث
التاريخ: 30 ربيع الأول 1425 ..... الموافق 19 مايو 2004... … النمرة: SOL

بالإشارة الى طلب الفتوى المقدم بشأن اعتراض كل من مراويد وراوية العباسي وتاج السر حسن ودينج والمسافر وتمبس وأبو حسين ورجاء العباسي وأوسلي وأسعد ابراهيم وخالد الحاج وزمراوي على ما توصل إليه أهل الحل والعقد في دولة "المشروع الحضاري"، وهو قرار فقهاء وعلماء ثقاة يفيد الرعية ويجنبها شرور أم الكبائر، ترى اللجنة أن اعتراض هؤلاء على حد من حدود الله إنما يعتبر اعتراضاً على دولة الشريعة وبالتالي إفساد في الأرض يستوجب القطع من خلاف-حد الحرابة. إلا أن اللجنة توصي بمناقشة الواردة أسماؤهم أعلاه وتبصيرهم بما اقترفوا من إثم عسى ولعل يثوبون الى رشدهم ويهتدون الى السراط المستقيم ويخرجوا بذلك من زمرة المفسدين في الارض، باستثناء أربعة منهم لا ترى اللجنة أن ثمة فائدة وراء محاولة هدايتهم الى السراط المستقيم وهم الآتية اسماؤهم:
مراويد: توصي لجنة الفتاوى بألا يقدم الى أي من محاكم العدالة الناجزة ولا يخضع لأية اجراءات قانونية وإنما يجب أن ينفذ فيه القطع من خلاف فوراً بسبب سوابقه التي لا تحصى ولا تعد ضد دولة "المشروع الحضاري" ووصفه للعلماء الثقاة الأخيار الأطهار بـ"ترزية"الشريعة.
دينج: توصي اللجنة بمثوله أمام قاضي إحدى محاكم العدالة الناجزة فقط كإجراء شكلي، ولكن لا بد من تنفيذ الحد عليه لأنه يرى أن لا فائدة للشربة من غير اللوليح، أي انه يشجع الناس على أن يسكروا "لط".
تمبس: توصي اللجنة بمثوله أمام إحدى محاكم العدالة الناجزة أولاً لأنه اقترح أن يتعاطى المسلم أم الكبائر ويبحث عن شخص آخر يتلولح نيابة عنه، أي إنه يشجع المسلمين على تفادى تطبيق حد من حدود الله. كما توصي اللجنة أيضا بمصادرة مكتبته الموسيقية وحرقها في ساحة عامة كما حدث عندما استولى أخواننا المجاهدون في حركة طالبان على السلطة في كابول وأقاموا إمارة افغانستان الإسلامية عام 1417 هـ.
خالد الحاج: توصي اللجنة بالتنفيذ الفوري لحد الإفساد في الأرض على المذكور لأنه يشجع على صناعة عرقي العيش والبلح والمريسة (نشرب مما نزرع) كما حاول التشكيك في حد "الشروع في اللولحة". وتود اللجنة أن تلفت الإنتباه الى أن المذكور كان قد قضى فترة من الزمن معتقلاً في بيوت الأشباح، مما يعني انه من أعداء دولة "المشروع الحضاري" من وقت مبكر.
والله من وراء القصد..
هي لله... هي لله... لا للسلطة ولا للجاه.

ع ع

Fellow brothers
This Liquor and what they call it “KHAMRA” is nothing but a drink, it is a personal matter (I think)anyway though a lot of our leaders don’t drink neither smoke for that matter. it is the suppression and the degrading by the name of another religion. Simple question, which comes first in history to be created/ to choose your religion? Normally you have got to be created then I can have the choice to be what ever …The fact I have been created non Muslim (which I had no choice in that) by the common sense should not deny my rights been created in this piece of land called Sudan to be EQUALL Sudanese isn’t it?? …Had all these scientists spare the time and knowledge in developing the way religion could be presented to humanity things could be different for every body instead of waisting every body's time in this non sense