Post: #1
Title: قال تدقـني مرتي قال !!!
Author: ابوحراز
Date: 05-18-2004, 11:03 AM
يا حليل جدي أب عكازاً مضبب
والله دا يوم جاء من السوق لقى الغداء لسه ما اتعمل
أها بالعكاز حام الفريق كلو
يدي الولد عكاز والمرة عكاز وراجلها أب كرشة عكازين
كنا كلنا طبعاً في حوش واحد
والله أنا بس مرقـتـني جدادة
كنت ساكيها عشان الغداء المشؤوم دا
قبضتها وضبحناها ونجنضاها
وبعد التعب دا كلو مالـقـينا رغيف
الله ينعل ابو العولمة بت الكلب
العولمة جابت ليها غسيل عدة
وإحترام النسيبة أم لساناً طويل
وكمان غسيل ملايات ولبع !!!
كدي شوفوا مشكلة الراجل الحيوان دا قرأ تها امس بصحيفة خليجية
قال أنا مواطن قال 00 { بس الواحد يعجبك في مواطن دي } أعمل في وظيفة مرموقة ودخلي المالي جيد 00 ولي ستة من الأبناء والبنات 00 مشكلتي تكمن في زوجتي 00 فهي بمجرد أن تغضب مني تقوم بالهجوم علي وضربي أمام أبنائي ضرباً مبرحاً 00 يصل في بعض الأحيان إلى فقدان القدرة على الحركة { كويس بقت على قدرة الحركة بس }ومرات تشوتـني شوتة واحدة من غرفة النوم لحد المطبخ ارجوكم لاتضحكوا ومازال الحديث للراجل الـتـخة دا 00 فأنا رجل نحيل الجسم وزوجتي مستصحة لا استطيع مقاومتها ولاحتى الدفاع عن نفسي ناهيك عن الـتـفكير في منعها من ضربي 00 بل أنها أحياناً تضعني على الأرض وتجلس فوقي وتضع يدها في فمي حتى أكاد أخـتـنـق ولولا تدخل الأولاد { وفزعتهم } لكنت في عداد الأموات 00 أخشى إن طلقتها أن يتشرد أبنائي وبناتي 00 أو أن تحرمني من رؤيتهم كما أن وضعي كرجل لايسمح لي بأن آخذ أغراضي واذهب لبيت أهلي 0
ياجماعة الراجل دا بـيـسأل عن جمعيات لحماية حقوق الرجل 0
الله يرحمك ياغاندي
يوم أن تقدمت بكل شموخ مسيرة الملح وأنت حافي القدمين
وشاهدنا بعدك في عصر العولمة على شاشات تلفزيون دلهي أكثر من مليون رجل بكامل شواربهم يتظاهرون ضد ضرب زوجاتهم لهم 0 الغريب ان في هذه المظاهرة أن هناك نساء خرجن متعاطفات مع هؤلاء الرجال المضروبين !!!
ومسيرة مشابهة في أمستردام إحتجاجاً من الرجال على غسيل العدة
{ الله يستر مايكون عبد العزيز خطاب وسط المعمة دي }
قال فريزيان قال
تعاطفنا بالأمس مع رانيا الباز
فهل بنفس القدر سنـتـعاطف مع هذا الزوج المضروب ؟؟
وهل ظاهرة ضرب النساء للرجال متفشية عندنا ؟؟
قال الجميلة والوحش قال !!!!
|
Post: #2
Title: Re: قال تدقـني مرتي قال !!!
Author: بدرالدين شنا
Date: 05-18-2004, 11:38 AM
Parent: #1
هييييييييييييييع والله أنا.. أسكت ساكت مافي داعي...
والله فت طقة...
تدق منو؟؟؟ أه علي باليمين أحححححححححح
نحن أولاد بلد نقعد نقوم على كيفنا
في لقى في عدم دائماً مخرف صيفنا
أنحنا أبوخرس (إنت أبوخرس دا ببقى ليك ياأبوحراز) بنملاهو وبنكرم ضيفنا
أنحنا الفوق رقاب الناس دائماً مجرب سيفنا
هسع دا معرس ليهو مرة ولا أبوغريب؟؟؟
|
Post: #3
Title: Re: قال تدقـني مرتي قال !!!
Author: ابوحراز
Date: 05-18-2004, 12:04 PM
Parent: #2
يابدر الدين شناة
الزول مما يكون كلامو نحن ونحن ونحن
دا أكيد زول بتاع جلد ساااااكت
يعني بيكون ضاق ليهو خبطة خبطتين
شوف أنا حتى لو دقتني
فلابد أن تكون دقة بشرف
يعني دق السفنجة دا مشكلة
ميتة وخراب ديار
|
Post: #4
Title: Re: قال تدقـني مرتي قال !!!
Author: ابو جهينة
Date: 05-18-2004, 12:27 PM
Parent: #3
أبو حراز ،، ود الناس العزاز
تحية مدنكلة
زمان كانوا بيقولوا ( ضرب الحبيب زى أكل الزبيب )
أتاريهو كضب ساكت ،، هو زى الزبيب لغاية ما تقع تحت رحمة إيديك ،، و ساكت كان نقنقت ،، اللبع يبدأ.
ثم جاء زمن وزير بريطاني ،، إسمو ( بروفميو ) على ما أعتقد ،، أها دة أول واحد يظهر للعلن و يوري الناس إنو غريزتو الجنسية ما توصل ذروتها إلا إذا ( ضربتو ) المرأة علقة ساخنة بعد أن تربطه على أركان السرير ( ثم صارت موضة عينك يا تاجر و ليها أماكن و ليها مدربات و متدربين و متدربات ) .. أجارك الله و إيانا ..
ثم جاء زمن الراجل داك ،، واقف قدامي في صف مطار الخرطوم و ماشين على التفتيش الأخير و منها للباص البيودي للطيارة ،، عليك أمان الله يا أبو حراز ، الزوجة تناول ليك الراجل كف ( أنا أضاني صنت منو ) و قالت ليهو ( أنا بعرف شغلي معاك هناك في الرياض ) .. طيب قدام الناس ناولتو كف ،، في الشقة المقفولة شن بتسويلو ؟؟ و الله ما فتح خشمو ،، بقى يشاغل في بتو الصغيرة المذهولة ..
هذا زمن الوحشية و الحمل الوديع يا ربي ؟؟؟
أرقد عافية أبو حراز
|
Post: #6
Title: Re: قال تدقـني مرتي قال !!!
Author: سجيمان
Date: 05-18-2004, 12:34 PM
Parent: #4
ابو حراز ازيك
ابو جهينة
| Quote: تناول ليك الراجل كف ( أنا أضاني صنت منو ) و قالت ليهو ( أنا بعرف شغلي معاك هناك في الرياض ) |
دي ماسكة عليهو..... شيتن غليييييييييييييدة....الما ساعلة في الناس وفيهو
|
Post: #5
Title: Re: قال تدقـني مرتي قال !!!
Author: manubia
Date: 05-18-2004, 12:32 PM
Parent: #3
ابوحراز يا ظريف ,واللهي ضحكتني الي ان دمعت عيناي
ست النفر كيف بالله,رسليها تحايانا معاك
|
Post: #8
Title: Re: قال تدقـني مرتي قال !!!
Author: عزيز
Date: 05-18-2004, 01:24 PM
Parent: #5
الحبيب ابوحراز
الله يفضحك يالفضيحة
وأنا سوف اوفى بوعدى واشرك ست النفر فى النت مع سوداتك مع ارسال جهاز كمبيوتر
عشان تشوتك بكراعها الطويله شلوت تحلقك المواطن
قال مواطن قال
بعدين مسيرة امستردام دى ما سمعنا بيها
والا كان تلقانى شايل اللافتة قدام الجماعة
وبعدين لو فى مسيرات تانية كلمنا من بدرى لأن مواهبنا اصبحت كثيره وبنلعب فى كل الخانات
قال رونالدينهو قال
لك الحب والتحية
|
Post: #7
Title: Re: قال تدقـني مرتي قال !!!
Author: nada ali
Date: 05-18-2004, 01:22 PM
Parent: #1
ابو حراز،
هل لديك عنوان السيدة التى كتب عنها زوجها فى الجريدة؟
باقى انا و صاحباتى الجندريات مغرودين لينا فى واحدة زيها لزوم النضال.
امزح فقط
و لا للعنف ضد المرأة
لا للعنف ضد الرجل
ولنقضى على العنف بجميع اشكاله
|
Post: #10
Title: Re: قال تدقـني مرتي قال !!!
Author: ابوحراز
Date: 05-18-2004, 08:12 PM
Parent: #7
ابوجهينة
سجيمان الظريف
خطاب
منوبيا
ندى
ضربتو عديل كف في المطار
غايتو لو كنت ضابط في المطار ما كان خليت صاحبنا دا سافر
المسافر ليها شنو
يعني كمان عاوزين يوروهو العين الحمراء في الرياض
هو في عين حمراء أكتر من كدا
قال جدودنا وصونا على الوطن قال
صاحبنا دا تفتكر حا يقدر يحرس الوطن ؟؟؟
تعرف جدنا دا كان مشهور بـتـفرتـق الحفلات
شفت الجماعة بتاعين الزراير البيقشرو وبيجو الحفلة بكروه موووووت
تعرف دا عندو حساسية تقول مع الدلوكي على قول الشايقية
مما يسمع صوتها يجيك جاري
وأول شيء يدي الرتينة عكاز
وبعديها الدلوكة
طبعاً حاتقولوا لي ناس الحفلة ووووووووين
ديل أول مما يشوفوه رجال على نسوان بنطوا بالحيطة
للذين يسألون عن ست النفر فهي مسكينة جداً
كمان في إجازتي دي عرفت سر غريب جداً
وسوف استفيد من هذه الثغرة في زواجي
تصوروا دي بتخاف من الدودة
انشاء الله قبل الزواج بكم يوم كدا
حايكون عندي مجموعة كبيرة سوف أحملها معي ابتداءاً من الفندق
|
Post: #9
Title: Re: قال تدقـني مرتي قال !!!
Author: ABUHUSSEIN
Date: 05-18-2004, 06:38 PM
Parent: #1
| Quote: فأنا رجل نحيل الجسم وزوجتي مستصحة لا استطيع مقاومتها ولاحتى الدفاع عن نفسي ناهيك عن الـتـفكير في منعها من ضربي 00 |
الجـابروا على جنس دا شـنـو...؟؟؟؟؟ هــو من الأول ما فكر و درس الموضوع من كل جوانبو و وضـع كـل الإحتمالات لـــيـيـيـيـه يعني ما عمل حساب حاجة زي دي ليه
غايتو يا أبو حـراز قالو مصائب قوم عند قوم فوائد كـدي راجع حساباتك و أوزن ست النفر بتاعتك دي و شوف الوزن كيف معاك و كمان ما تنسى مقاس الجزمة كم و مقاس الغوايش كم علشان ديل بحددوا ليك قوة الكـف و قـوة الـشـلوت علشان ما إجيبوك الأخوان من بيت الجيران
|
Post: #11
Title: Re: قال تدقـني مرتي قال !!!
Author: ابوحراز
Date: 05-19-2004, 07:23 AM
Parent: #9
ABUHUSSEIN
ابوحسين 00 طبعاً الوزن 56 بالله تقول متفقات عليها
كل واحدة تسألها تقول ليك 56 كيلو
مرات الواحد تقول بتوزن نفسها من الخصر ولفوق
والعمر طوالي 21
ست النفر كلما ارجع أسألها اها عمرك كم
طوالي 21
يعني فترة إغترابي كلها ماقاعدين يحسبوها
|
Post: #12
Title: Re: قال تدقـني مرتي قال !!!
Author: عاطف عبدالله
Date: 05-19-2004, 11:06 AM
Parent: #11
أبو حراز
الله يجازيك
الكلام ده بتجيبو من وين؟
تعرف لما تقفل معي بدور على بوستاتك ..
مش فقط لأجل كتاباتك المبهجة بل لأنها بتعدي وكل التعقيبات عليها ذكية ولماحة
بعدين يا أخي ست النفر تعبت ريحوها شويه
تلقاها منك ولا من أصحابك؟؟
|
Post: #13
Title: Re: قال تدقـني مرتي قال !!!
Author: ابوحراز
Date: 05-19-2004, 11:24 AM
Parent: #12
أخي عاطف
أتمنى ان تكون كتاباتي بهذا المستوى من الأريحية والحب
اشعر احياناً بانها بسيطة جداً وتملأ الباندوث أكثر من اللازم
لكنني سرعان ما أدفعها للبورد دون تردد علها تلطف الجو قليلاً
وكم أتمنى أن تكون كل مواضيع البورد متـنفساً لنا جميعاً
ست النفر الإنسانة الأسطورة
هي أنموذج لكل إمراة تحب بصدق وبعفوية
وأنموذج لكل إمراة بسيطة
وأنموذج لكل إنسانة غير معقدة
|
|