Post: #1
Title: المشلَّخ E
Author: بدرالدين شنا
Date: 05-15-2004, 06:56 AM
Parent: #0
Bader Eldeen
والله أنا فرحت فرح لمن إنتهى جوازي الأزرق القديم داك مش لأنو فيهو مخالفات ولا ضرائب ولا عشان صورتي القبيحة ديك فرحت لأني إتخلصت من حرف ال[E] لأنو بي صراحة كان غايظني ومحرق روحي وطبعاً لأنو أغلب اسماء السودان مركبة (زي شمس الدين وسيف الإسلام وقمر الدولة) فكلها لمن يكتبوها تلقى [E] السجم دي محكرة في حين إنو لو نطقها بالعربي بلقاها فيها ضمة في حرف الراء
ولا عندكم رأي تاني؟؟؟
|
Post: #2
Title: Re: المشلَّخ E
Author: newbie
Date: 05-15-2004, 09:41 AM
Parent: #1
معليش يا بدر الدين شنا, ما اقدر افتيك لانو لغتي (الإنكيزية) ضعيفة
شوف ناس (الإنجليزي) الكتيرين ديل !!!
|
Post: #3
Title: Re: المشلَّخ E
Author: ابو جهينة
Date: 05-15-2004, 09:48 AM
Parent: #2
الشقيق بدر الدين
تحية و محبة
تصدق في جوازي الجديد برضو شلخوني E
في حين إنو في معاملات خارجية بيكتبوني Jalaladdin و في رواية أخرى Jalaluddin
غايتو تعال نكون حزب إسمو حزب المشلخين E )
أرقد عافية
|
Post: #4
Title: Re: المشلَّخ E
Author: THE RAIN
Date: 05-15-2004, 10:42 AM
Parent: #1
بدر سامى علاهو
ما فى زول بسواهو
كيفك يا صديقى العذب
تعرف دى واحدة من الحاجات المحيرانى والله، ليه السودانيين بختو الحرف ده فى مكان ال "ألف" فى السماء المعرفة، وده استخدام وصناعة مصرية مية فى المية لأنه المصريين فى الدارجية بتاعتهم وحتى كمان فى الفصحى، بكسروا الألف الأولى من الكلمات، يعنى نحن بنقول مثلا
اَلليل- ALLAIL
أما المصريين فبقولو
إلليل - ELLAIL
وبكتبوها حسب ما هم بنطقوها، يعنى السودانيين ما عندهم أى عذر فى الشغلانة دى، لأنه لمن يستخدموها زى ما المصريين بعملو، بكونو ارتكبو خطأين، الأول فى النطق والتانى فى الكتابة، لأنه أى صوت مسموع لمن تجى تكتبه مفروض تكتبه زى التماثل الصوتى بتاعه تماما والإسمه ال TRANSCRIPTION
يعنى لو عايزين نكتب إسمك يا بدر الدين زى ما هو منطوق تماما، مفروض يكون كده BUDRUDDEEN
حرف ال E
هو الحرف الخامس فى الأبجدية اللاتينية، وفى اللغة الإنجليزية وزى ما درسونا ليهو فى ال PHONOLOGY
هو من الأصوات اللينة أو ال VOWEL ARICULATED SOUNDS
ولمن يجى فى أول الكلمة يا اما بتنطق زى ما فى نطق الكلمة العربية "ايه" ايه اسباب جفاك - ايه لازم الزعل
وزى ما فى الكلمة الإنجليزية END, EGG, EVOLUTE, وده الغالب
أو يتنطق "يو" ودى حالات قليلة جدا زى مافى نطق "يوسف" بالعربى وبالإنجليزى زى ما فى , EUROPE, EUTECTIC, EWE
كوز أو ابريق يعنى
أو كمان يتنطق زى أول كلمة "إنت" بالكسرة على الألف وزى ما فى
EXCISE, EXCURSION
واذا جا فى آخر الكلمة، فدائما بكون صامت وما منطوق، إلا الا جات مرتين زى مافى
SEE, GUARANTEE
ففى الحالة دى بتتقال زى نطق حرف ال "يا" العربى
واللغة الإنجليزية طبعا مرت بتلات مراحل، القديمة والمتوسطة والحالية، وكل الحروف الزائدة حاليا أو الما منطوقة جات من ايام الإنجليزية القديمة لأنها كانت منطوقة فى المرحلة ديك، يعنى الحروف اللينة كلها كانت بتتنطق
ما عايزين نخش فى تفاصيل ما ليها لزوم طبعا، وليك التحية يا BUDRUDDEEN
|
Post: #5
Title: Re: المشلَّخ E
Author: Ahlalawad
Date: 05-15-2004, 10:44 AM
Parent: #1
البدري .. أظرف من ئييك (your E) صديقي الذي ينتهي إسمه بـ الحاج .. طبعا تكتب حسب رواية الدوري (El Hag) فكان الهنود ينادونه مستر إيلهاق .. يلحقنا ويفزعنا إن شا الله .
|
Post: #6
Title: Re: المشلَّخ E
Author: بدرالدين شنا
Date: 05-15-2004, 12:00 PM
Parent: #1
الغالي نيوبي سلام وإكرام
أشكرك كتير على الطلة وإن شاء الله ما نجيك في E
الشقيق Jalal Eldeen
أنا برقد عافية بس غيروا لي الE وجيبوا لي بطانية وأطفوا لي النور
تسلم لي يا مريودي
الملئ المترع أبوذر
سلام بعدد زخاتك
| Quote: ما عايزين نخش فى تفاصيل ما ليها لزوم طبعا، وليك التحية يا BUDRUDDEEN |
والله يالمطر ما فضل لي إلاَّ أقول ليك هاك سن الحمار وأديني سن الغزال أي نقوم بعملية إحلال وتبديل مراكز بأن نجعل كلامك إنت يكون البوست وكلامي يكون المداخلة
شكري وتقديري لك أيها الثري
أهل العوض والجمال
سلامي ليك وللهاق صديقك
الهقني أنا داير أنشرط بالضحك
يديك العافية يا Ahal Elawad
|
Post: #7
Title: Re: المشلَّخ E
Author: aboalkonfod
Date: 05-17-2004, 01:00 PM
Parent: #1
بدر الدين .. الشين ودِشن ..
حرف E هين ... الكلام في صورتك الشينة
الطممت بطن ناس الداخلية والخارجية وبقية
الوزارات .. أنا ما عارفك إنت شايلو كيف
ولا مستحملو كيف .. التقول مُركب ليك قناع
نصيحتي ليك .. شيل معاك ليمونة .. وأدي
جارك .. أنا غايتو بزرع لي حوض .. لمن
تفكر تزورنا.. غايتو البتعرسك ليها ..
الجنة
علي الطلاق ألقى لي ربطة مسوايك وكيلو لحم
...!!!... أحسن من العضام البتتهوزز دي
ترا الحِريف الليلو إتعرف .. الله يسترك مع
.. حوتك
|
Post: #8
Title: Re: المشلَّخ E
Author: بدرالدين شنا
Date: 05-18-2004, 07:56 AM
Parent: #1
لمن تعطس قول الحمد لله
حبيب قلبي أبوالقنفد سلاااااااااااااااااام
إنت ضنبك دا اصلو كدي ولا عملت ليهو عملية [circumcises]
جهز ليمونك وأنتظرني عشان أنا بريدك سااااااااااااااكت
|
Post: #9
Title: Re: المشلَّخ E
Author: aboalkonfod
Date: 05-22-2004, 12:11 PM
Parent: #1
سويت هارتي الشين ودِشن
"إنت ضنبك دا اصلو كدي ولا عملت ليهو عملية [circumcises]
جهز ليمونك وأنتظرني عشان أنا بريدك سااااااااااااااكت "
ضنبي .. بكوري .. من المانيوفاكشرر .. وللميكانيكي
وحات خوتك .. لمن يتهوزز أو يعصلج .. بشحيمو
ـــــ
وحاتك ليمونا خِلص .. بنجهز برتكانا .. ولو ما كفاك
موزنا .. بيرضي طموحك
|
|