ليه الناس و خصوصا ( النسوان) ما بيحبوا يقولو عمرهم ؟؟؟

سلامات

انا فى حاجة يعنى دايما قاعدة تضايقنى و هى لمن يجى الكلام لى قصة العمر دى،، ليييه الناس بتشوف انو الواحد لمن يقولو عمرو الحقيقى فيها مشكلة ؟؟ موش المشكلة اكيد بتكون فى الزول زاتو ؟؟طيب هو العمر دة زاتو الناس بتحسبو كيف ؟؟ موش بالحاجات الأنجزتها فيهو ؟ طيب الواحد لمن تجى المناسبة و يسألوهو من عمرو ، ليه بيضايق ؟؟ و كلو كلو ما بيقولو ؟؟ لازم يزوغ من السؤال بأى طريقة ؟؟ ليييييه؟؟؟ حاسى انو ما عمل حاجة تستاهل سنين عمرو الضاعت ساكت دى ولا السبب شنو ؟؟

و العجب النسوان ، انا غايتو نادر الاقى لى واحدة بتقول عمرها كام ؟ والغريبة ناس بيكونو دفعتك و قريت معاهم و بعد دة يعملو ليك فيا ( برىىىىى يختى انا ما قدرك ، انا اصغر من دفعتى كنت بسنتين و لا تلاتة ) اها لمتين ح نقعد ندسدس فى الحاجات دى ، دة موش برضو معناهو افتقادنا لى اهمية عامل الزمن؟؟ يعنى اذا كنا فاقدنو فى الحتة دى او (متناسينو) موش معناها اننا برضو مستهونينو فى باقى اولويات حياتنا ؟؟ لمتين ح نبقى كدة نحن ؟؟لمن المسيح الدجال يجى ؟؟؟؟

الله الله الله ...


الحكاية جابت ليها عمر..؟

عموما يا نوسة انا عمري معروووف.. يعني لو عرفتي سنة التخرج بتاعتي، وطرحتي منها سنوات الدراسة ودخول المدرسة.. زائدا السنوات الإشتغلتها ولا القعدتها قبل ما أشتغل براااااحة حتطلعي حاصل جمع عمري..

انا اتخرجتا سنة 1991 ..

بالمناسبة أسامة الخاتم قرأ معانا أولى ابتدائي.. لكن شكلو بقى عجوز براااهو ..

اهلا يا رجاء

ابدا و الله ما جابت ليها عمر ، لكن بس دى حاجة انا ملاحظاها ، و لكن لمن جيت بريطانيا هنا و لاحظت انو العمر هنا لصيق بالأسم ( سيك سيك معلق فيك) اكتشفت انو نحن يعنى عايشين فى وهم كبيير اسمو ( الصغرة) ليه ، ما عارفة ؟؟

لكن برضو اسى لو زول سٍالك بتقولى عمرك كام ؟ ولا ح تقولى ليهو انا اتخرجت سنة كدة؟؟ مثلا انا قبل ما اقرى الكلية القريتها دى كنت سافرت للدراسة فى الخارج و قعدت سنتين و لكنى زهجت من الغربة قمت جيت راجعة تانى السودان و قريت الترجمة (اللسة ما عارفة ليها اول من آخر دى) اها و اتخرجت سنى 92 ، اها دة ما معناهو انو عمرى 34 او 35 !! انا عمرى ماشى على ال 37 اسى ، يعنى شهر 9 ان شاء الله ببقى 37 ، اها شنو يعنى ؟؟ فيها مشكلة دى ؟؟انا شخصيا ما عندى مشكلة من الحاجة دى ، و حتى لو كنت ما متزوجة برضو ح اقول عمرى يعنى ما ح اخاف انو الناس تقول على (كبرت) ما مهم المهم الواحد يقتنع بى حياتو !

اسى قلتى لى بقيتى زى عشة الفلاتية و الكاشف ! اسى الكاشف دة جايبة سيرتو مالك ؟؟ ههههههههههههههههه
اها يا ود الخاتم بختك لسة دفعتك صغااااااااااااار ، يعنى ممكن تستشهد بيهم و كدة

Quote: انا اتخرجتا سنة 1991 ..

يا رجوية ما قالوا ليك إتخرجتي متين ؟؟؟ قالوا ليك عمرك كـم؟؟؟؟؟ دي عايزه ليها قراية جامعة؟؟؟؟؟ بعدين يا ذكية التخرج ممكن إكون بعد ما تشوتي الدراسة في 15 أو 16 سنة أو بعد ما تكوني زحيتي في كنب الإبتدائي عشرة سنة و المتوسط 6 سنة و الثانوي 6 سنة و الجامعة 6 سنة المجموع = 28 سنة من 91 يعني دخلتي المدرسة سنة 1963 ناقص 7 سنة قبل المدرسة يعني مواليد 1956 يعني ما بعيد تكوني كنتي واقفة جنب الأزهري و المحجوب لم رفعوا علم السودان و نزلوا العلمين البريطاني و المصري


يا نوسه يا أختي سـؤالك صعب شديد خاصة لي الفئة اللي إنتي واضعاها بين قوسين دي

و الله سؤالك صعب و صديقيني لو دخلن هنا و شاركن صديقيني حا إعوموا ليك السؤال و إزوغن بدون ما تعرفي إجابة لي السؤال

نوسة سلام

من اصعب الاسئله التي تواجه الباحث في استماره البحث

1- العمر
2- الدخل السنوي

حُذف..... تحت تهديد السلاح

عند بعض المجموعات الشماليه في السودان الشماليه _اعني شمال النيل- كان هناك اعتقاد ان شيطاناً للموت ويدعونه سريئل في دارجتهم لا يحب الشباب ولا الصبايا ولكن يحب الاطفال والعجائز لذا عليك ان تذيد من عمرك لكي تصل به الي مرحله الشباب واذا تجاوزتها -اي مرحله الشباب - عليك ان تنقص من عمرك حتي يظل في سنوات الشباب كم هو ..

فهو حسب الاعتقاد السائد الكذب في العمر من القيمه المحموده وليس المرفوضه ..لتمويه الشيطان



دقيقه امشي واجي اقول ليك حاجه تاني