إعادة لسياق القـــرار ....

القـــــــــــــــرار



كل ما أقول ادور امشى وافوت وانساك
ألاقي خطاي ماشة عليك وماشة حداك
خطاى الضائعة في الدرب العريض يا ملاك
لقت دربك وضاعة فيه دون اسباب
أنا التعبانة من تعبك
أنا الفترانه من فترك
أنا الزعلانة من زعلك
أنا الزهجانه من زهجك
أنا المرضانة من مرضك
أنا الفرحانة من فرحك
وأنا الحزنانة من حزنك
وأوقول يا رب متين ألقاااااااااك؟

ووقت ألقاك ,,,
ألاقي الكون صبح في سكون
والساعات جرت ضدي
وألاقي الخطوة تتعتر
وألاقي الكلمة تتكسر
وسهوووووووووم عينك في جواااااااي تتخلل
تشتتني وتجمعني
تريحني وتعذبني
وما بقدر أنا اتحمل

وساعة الهجر ..
عيونك جافية قاســـــــية عديـــــــل
متل ما تقول سهم في الجوف سكن طوّل

وافتش ليك وما بلقااااااااك
وأقرر أقول خلاص انساك
وبإصرار ودعتك وفُتا هنـــــــــــــاك
وأول لحظة في بعدك
هـــــــلاك في هــــــلاك
فبرجع في القـــــرار بسراع
وما تتحسن الأوضاع
واعيد من تاني وجعي معاك
بشتاق ليك وما بلقاك

واقرر افوت بعيد وأنساك
يطير النوم
والتركيز
وحتى الذاد ما بنضاق
كنت قوية في قرارات
تعلمت الضعف وياك

وافتش ليك وما بلقاك
وما بلاقي الشبيه لهواك
وأعاين في العيون في الكون
بلأقي عينك أحلى عيون
وأحلى جنون
وأحلى طريق سلكتو معاك
وتتضاعف علي اوجاع
وارجع في القرار بسراع


ونفس القصة تتكرر
تعذب فيّ زي ما تدور
في الملايانة وفي الفارقة
أراضيك حتى لما تثور
وتتغير ملامحي معاك
فتر وسهاد زبول وضمور
واقرر تاني انسى هواك

وكل ما اقول أعاند وأهجر الأشواق
يقيف الشوق يلح ويلح
يدق في الباب
وتتعسم حياتي بلاك
وأرجع تاني لدربك
ومن الزيرو ابدا معاك
وكليّ حضور
وانت غياب
وأقعد اصنع الأسباب
أكيد مشغول
أكيد تعبان
أكيد وأكيد
وفي جواي يهتف صوت
أكيد كضااااااب

وأقرر تاني أنسى هوااااااااااك
وامشى بعيد هنااااااااك وهناك
إلا عينك قصب عني
تكٍسر العزة في جواي
وادووووووور ألقاك
وابقى معاك
ولا أفوتك
ولا أنـــــــــــــســـــــــــــــــــاك



سماح

ولا أنساك؟؟؟؟؟؟؟؟؟؟
ها يالواثق
قواي خارت
فترت عديل
تعبت ألولي وأحنس
تعبت أحجي واونس
وانت معاي في الداخل
وفي الواقع شبه معدوم
انقب عنك وافتش
بدون عنوان
غيابك يتعب ويطفش
حضور انسان
برودك يدمي ويعطش
ولو رويان
خلاص مليت وفاض الكيل
قراري اللية دون رجعة
مشاعري اتبدلت منك
بعد ما كنت انت انا
بقيت جوا القليب وجعة
بقيت آهــــــات
في النزلات وفي الطلعة
نسيت طعم الضحك وياك
بدايتي دوام بقت دمعة
بعد ما كنت مشتعلة
اسرد فيك كلام الحب
اكتب فيك بيت وبيوت
وتتعطل عشانك كل أعمالي
النهارية
المساءية
وبين البين
من الجمعة للجمعة
طفيت انت الأمل جواي
زي ما بتطفي في سجارتك
وهوف بتهفى في شمعة
وأفضل بوراك دخان
بدون احسان بدون لمعة
وهم
وهم ظنيت اني في حب
لأنو الحب عطاء بالجد
ومن طرفين

..........



سماح

سلامات
وعوافي
سماح
شكرا لهذه الانفعالات النبيلة التي تحكي عن حب اصيل
واتمني ان تجتهدي جيدا في تكثيف قراءاتك للشعر حتي تبلغي مرماك
ملحوظة

Quote: فبرجع في القـــــرار بسراع

يتخايل لي يستقيم البيت لو كان
وارجع في القرار بسراع
علي العموم قصيدة جميلة عل الطرف الاخر يسمعها فيحرك ساكنه نحوك

ود رميلة

سلامات والف شكر على حضورك ونقدك البناء
وطبعا الحكاية ما شعر لكن هترشة ساكت يعنى ما وصلت للمراحل دي ولا بحلم .. الف شكر وح اعمل بنصيحتك

سماح

قصيدة جميلة وياريت تتحفينا بأبداعاتك هذه لنغير الطعم العالق بحلوقنا هذه الأيام

الاخ عثمان على

الطعم العاق ....... يااااه للدرجة دي .. والله رفعت معنوياتي كتير
لك كثير من الشكر ..

سماح

سماح السمحة روحا التي لا تخبر زعل
دائما ترشين مساحاتنا بعطر الكلمة الجميلة
اهلا بك

سمبتيكو

سلامات ويا مرحبا بك .. اشكرك على الحضور واشكرك على المجاملة


سماح

ياااااااااااااااه

سماح الما بتخبر زعل

جيدا جيتي ايتها الصديقة
وهلا بي دعاش مدني واهل مدني

دا للترحيب بالعودة

ؤبث


وبجيك صادي

أهلا بحامل المسك
وأهلاً بالرائحة الطيبة
أهلاً سماح
طولتي الغيبة
التحية لك ولمن حولك

وبث؟؟ يااااااااه وكمان طيفوووووور

يا هلا بيك .. وشنو الهيئة الجديدة دي بالله كيف؟
اشكرك على الترحيب ومنتظره جيتك ..


سنجاوي ..
يا ابو كلاما يداوي

يا هلا بيك والله .. "على قولكم" عساك طيب ؟؟
ما شفنا النقد الحار!! يا ربي انفع اكون بكاية زي الناس الشوقا بإزعاجووووو؟؟



سماح