يا قدره الفول المحجبه بكيس النايلون على نار هادئه

اخخخخخخ زى الساعه سبعه راقد فى العنقريب الهبابى الفى الحوش الهبابى واتناولت كيس التمباك ورفعت المرتبه قلت القى لى جريده اتسكع بيها واتلكع بيها لحدى ما تجينى الشجاعه اقوم استحمى فى الصفحه الفى النص
البروفسور مواد مسرطنه يحذر الشعب السودانى
التمباك مواد مسرطنه
برومات البوتاسيوم مواد مسرطنه
ماده البوليمر البختوها ناس الحكومه اروقوا بيها المنقه اقصد المويه مسرطنه
النفايات المدفونه فى ربوع السودان مسرطنه
حكيت راسى قلت ديل كلهم ممكن ازوغ منهم بما فى ذلك التمباك
جانى الخبر القرب اجيب لبى السرطان
قدر الفول المحجبه بأكياس النايلون على نار هادئه تجيب السرطان بواسطه حبيبى الفول
وووووووووب علينا الما قرينا

فرح المسـلطن

أكياس النايلون مسرطنة .. أذن والى القضارف ليهو حق .. أصدر قرار يمنع فيـه التعامل بأكياس النايلون و البشوفوهو شايل لحمة أو خضار فى كيس نايلون أظن يعاقب بالجلد أو السجن أو الغرامة أو الثلاث عقوبات معا .. الجماعة قالو الوالى متفق مع ستات القفاف

لكن سعادة الوالى لم يمنع التمباك و الذى هو مسرطن أكثر من أكياس النايلون كما لم يمنع أكياس النايلون التى يعبأ فيها التمباك ربما لأن سرطنتها خفيفة

يعنى يا فرح سرطنتك عينة تمباك و كيس نايلون

حيكومتنا بدل ما تجيب لينا كل هذه المواد المسرطنة كان من الأفضل لها الأقتداء برصيفتها حكومة طالبان و تبدل زراعة التمباك بالبنقو على الأقل تحولنا من مسرطنين الى مسلطنين لتحكم بمهلتها و لا من شاف و لا من درى .. و إنتا عبود دا جنّا و لّ شـنو ؟؟!!!!

لكن ياحلاوى انت قايل والى القضارف دا زى والى قبرص
دا بكون بدا حياتو بهوايات شعبيه من ضمنها سف التمباك وبعد داك الهوايه بتاعت السف دى اتطورت شديد
يعنى منع الاكياس مش عشان السرطان عشان الهوايه

الأخ الكريم فرح
البجيب السرطان كتير يا أخوي وربنا يحمينا وإياكم وجميع أعضاء المنبر الحر من جميع المصائب ، وكان بقت على قدرة فول وكيس تمباك وموية زير ما في عوجه.

أخوي فرح لكين ما دقستني يا راجل وأنا العامل تفتيحه يا أخي في قدرة فول بربطوها بكيس نايلون ليه النار دي النار الرمو فيها سيدنا إبراهيم عليه السلام ولا نار البعد والغربة والله في السودان كيس النايلون يطير ساكت في الهوا ينزل الواطه سيلسيون من شدة الحر تقول لي قردة الفول البولعو ليها الفحم من ستة صباحاً لغاية ما آخر واحد في الحلة يتعشي ما تنطفى.

يا فرح الله يكفينا شر السرطان ,لكن بالمناسبه اكياس حمر بتعمل سرطان???

up

ابو مهند تشكر على العفرته

يافرح الشوق قبل الادين

انت عارف مساله السرطان دى للاسف بقت جزء من ثقافه الموت في السودان (شفته المصيبه) والسودانيين فقدوا حاسه الرهبه تجهاهه يعني استئناس الكارثه البقولها عبد الله علي ابراهيم ذاتها

انت عارف نحن ما يحلنا تاني الا (السرطان تيراب)

فرح .. تمنيت أن تكون معى ليلة البارحة لترى إبداعاتى الفولية .. وصلنى فول (حب) من القاهرة .. فرحت لأن هذا يمنحنى إجازة من الفول المعلب و المسيخ .. وضعت الفول بملحقاته داخل الحلة كما نفعل فى حلة القطر قام .. أقلقت الحرارة الشديدة مضاجع الفول فصار غطاء الحلة يعلو و يهبط تبعا لحركة حبيبات الفول الرأسية .. و بدأ السائل الفولى الأصفر يسيل على جنبات الحلة و يملأ أرضية البوتوجاز .. لم أخاف أن يصاب فولى بالجفاف .. و لكنى خفت أن أضطر لأستدعاء المنظفة الرومانية .. فى كل مرة تزورنى تترك الشقـة تلمع .. لكن نصف محتويات الثلاحة يذهب لسلة الزبالة و يغيب النصف الآخر داخل بطنها .. فقلت مخاطبا نفسى .. يا حلاوى عليك بالحجاب عملا بنظريتك فى القدرة المحجبة .. و هل تقل حلتى أنوثة عن قدرتكم .. وقبل أن أضرب بهذا الحجاب النايلونى على جيب حلتى .. تذكرت الأخبار التى أوردتها الجرايد التى تعلّى مراتبك .. فأخافتنى السرطنة أكثر من خوفى من الرومانية .. تذكرت قدرة أدروب الذى كنت جار كنتينه بالصحافة .. حتى لا تنبح قدرته كان يلقمها طوبة .. فرح ما هى علاقة الطوبة بالأنثى ؟؟ ألم تركب يوما حافلة بها أنثى و حيدة .. راقب ماذا يفعل المساعد و أحيانا السائق !! يأتى بطوية و يضعها داخل الحافلة درءا الكوارث .. عوض ود حلتنا يعزى إنفجار ماكوك الفضاء الأمريكى جالنجر لخطأ فادح إرتكبه فنيى ناسا .. هى جهلهم أن يضعوا طوبة وهم يدركون أن المعلمة كانت الأنثى الوحيدة ضمن الطاقم .. تقول شـنو .. قمة الجهل .. لم يرد ذكر الطوبة عندهم فى الباراسايكولوجى .. لا يهمنى الماكوك جالنجر فقط أهتم بأمر حلتى التى جلبت لها شمار خصيصا من السودان .. و حتى لا يفقد شمارى رائحته بالتقادم .. لكن من أين لى بالطوب فى هذا المبنى الذى تقتله النظافة .. وجدتها .. أخيرا وجدتها .. هذة المكواة اللعينة التى حيرنى أمرها .. مكواة من النوع الذى يعمل بالفحم .. أظن أن جيلها يرجع لأنسان سنجة الأول .. و قد أتى بها بيالى باشا من السودان فى حملة الغزو التركى السودانى لقبرص .. دعك من تتبع تاريخ المكوة .. توهطت المكوة رأس الحلة التى ماعادت تقول بغم .. نسيت أن أقول لك .. فى حملة تفتيشى عى ثقل أضعة على راس الحلة وجدت شاكوشا لكنى لم أستغله فى هذه المهمة حتى لا يجئ الشمرشجية و يقولوا حلاوى أدى الحلة شاكوش .. على أى حال طلع فول حار و مدنكل تقطع لسانك وراهو .. قلت اليوم للبت الرومانية المكوة دى عايزها تلمع .. على الأقل نستفيد من حرارتها المكتسبة فى كى الملابس و نوفر كم واط كهرباء

بالمناسبة أنا مدمن فول لدرجة قف .. ما تقول لى درجة قف فيها كم درجة .. أنا زاتو ما عارف .. بس إنتا أخدها كدا بحيثياتها

ساعطيك سرا لم أبح به إلا للمدمنين أمثالى .. ما هى أفضل طريقة لشـد الفول .. طبعا الفول يشـد و لا يطبخ

- بل الفول لثلاث ساعات
- ضعه فى حلة من النوع الثقيل و غطه بالماء الكافى
- أقطع عليه بصلة واحدة و حبة طماطم
- أضف كوب صغير من العدس المصرى
- أضف مقدار فنجان أرز
- أضف مقدار فنجان زيت
- ضع الحلة على نار هادئة

و تأكلو بالهناء و الشفاء

ملحوظة :: حقوق الطبخ محفوظة

ياقرمبوز خليتو فاتح
دا انت ولا مااااا
لا لا لا لا

قفلناهو ليك
فرح

ياحلاوىىىىىىىى انا جاييك حضر لى البصل

قرمبوووووووووز
ازيك ياوجيه برضوا ما وريتنى قرمبوز كتبتها كيييييييف