Post: #1
Title: سؤال بريء ... في طريقة نرجع نستقر في السودان ؟
Author: محارب
Date: 04-26-2004, 10:30 AM
Parent: #0
يا أخوانا
الغربة حارة ... ومقرفة
الواحد حاسي انو عمرو وسنينو بتتسرق منو ... وياريت لو في ثمن أو مقابل
حياة رتيبة ... مملة... دوام - نوم وبالعكس
مافي اي احساس بطعم الحياة ومباهجا
الايام متشابهة ... الشهور متشابهة ... الاحداث مكررة
بدينا ننسى طعم الفرح الحقيقي
والواحد لمن يفكر يرجع السودان يتذكر انو لسع ما عمل بيت يسكن فيهو !!
ويتكر انو لازم يعمل ليهو ( مشروع صغير) يجيب ليهو حق القفة !!
والادهى والامر انك تلفى نفسك عاجز عن الاثنين لانو الارقام فلكية وتعجيزية مهما حاولت تبسط وتختصر طموحاتك
أها الحل شنو ... أفتوني
إقتراح :
ناس كتيرين عايزين يبنو بيت وما قادرين
طيب بدل ما الواحد يفكر يشتري قطعة ارش ( بالشي الفلاني ) وبعدها يبني ( ده لو قادر) ممكن يتلمو اربعة او خمسة اشخاص ( متفاهمين ) ويشترو قطعة ارض واحدة تسجل باسمائهم وبعدين يبنوها مع بعض شوية شوية اربعة او خمسة شقق... تسع الجميع... تختصر الزمن ...وتقلل التكلفة... وتجمع الناس في مكان واحد.
ونفس الطريقة ممكن تكون في اي مشروع استثماري ولو بسيط
رايكم شنو؟؟؟
|
Post: #2
Title: Re: سؤال بريء ... في طريقة نرجع نستقر في السودان ؟
Author: essam&amal
Date: 04-26-2004, 07:14 PM
Parent: #1
سؤالك مهم جدا فى الوقت الحالى ده
الاخ محارب خليك محارب للنهاية ...
فى هجرة جماعية للوطن بدون التفكير فى الاسئلة
بتاعتك دى .
فكر فى هذه الاسئلة
متى بدأت الاغتراب ؟؟
ماذا فعلت فى السودان ؟؟
المدة القعدتها حتقعد اكتر منها ؟؟
ماذا وفرت وهل تستطيع ان توفر بعد ذلك ؟؟
الرواتب كلها اكل وشرب وملابس ومدارس فقط .
الحياة روتينية قاتلة .
اليوم مكرر للسنة كلها
شاى الصباح المكتب الفطور انتهاء الدوام العودة للمنزل
الغداء نوم الظهيرة شاى المغرب التلفزيون الانترنت العشاء
النوم . وتتخللها الصلوات الخمس .
هذا هو الروتين القاتل
فالنعد الى وطننا الحلو العسل
وانا اول العائدين ان شاء الله
بلدنا غنية غنية غنية
قول بسم الله وابدأ من الصفر
لى عودة
امال
ام وضاح
|
Post: #3
Title: Re: سؤال بريء ... في طريقة نرجع نستقر في السودان ؟
Author: محارب
Date: 04-27-2004, 03:58 PM
Parent: #1
مشكورة يا اختنا ام وضاح
رفعتي معنوياتي ويظهر في احساس عام بالقرف من الغربة
لكن بالنسبة لي القرفة جاتني بدري شوية لاني بالضبط اكملت 3 سنوات واربعة شهور في الغربة
لكن الجواب باين من عنوانو
|
Post: #4
Title: Re: سؤال بريء ... في طريقة نرجع نستقر في السودان ؟
Author: nazar hussien
Date: 04-27-2004, 04:19 PM
Parent: #3
يا محارب يا اخوي
كلام امال دا طاااااعم وسمح وكلنا كان لقينا ما بناباه...لكن
علي بالايمان تمشي هسع عل نعلاتك ينهرن...من الكشتي...ومحل ما
تقبل ما تعرف...
ماشي وين...كدي بس جرب ليك اجازة اجازتين...كان فهمت حاجة
تعال راجع ورينا فهمت شنو؟؟؟؟
|
Post: #5
Title: Re: سؤال بريء ... في طريقة نرجع نستقر في السودان ؟
Author: محارب
Date: 04-27-2004, 06:08 PM
Parent: #1
الاخ نزار
ياها دي المشكلة زاتها
لكن كلام اختنا ام وضاح سليم , ويظهر انه مبني على تجربة
المسألة عايزة حل واتخاذ لقرار سليم في وقت مناسب
الشي اللفت انتباهي انه معظم الجنسيات الاخرى الموجودة معانا في الغربة تلقاهم محددين فترة معينة عشان يعملوا حاجة معينة ويرجعوا بلدانهم ... وبيعملوها
اما نحن فحدث ولا حرج ... الواحد تقول ليهو لي ثلاثة سنين هنا ... يقول ليك انت يادوب جيت
اما ناس عشرين وثلاثين سنة فديل بالكوم!!
قاعدين لشنو ... منتظرين شنو ما تعرف
|
Post: #6
Title: Re: سؤال بريء ... في طريقة نرجع نستقر في السودان ؟
Author: EMU إيمو
Date: 04-27-2004, 07:14 PM
خليك في خندقك يا محارب
|
Post: #7
Title: Re: سؤال بريء ... في طريقة نرجع نستقر في السودان ؟
Author: smart_ana2001
Date: 04-27-2004, 07:34 PM
Parent: #6
محارب
سلامات
الموضوع بيعتمد على اى نوع من الناس انت
لو كنت النوع البحب السودان جدا و بيحب العيشة فى السودان
وضعك كيف فى الغربة؟ , يعنى بصراحه شغلتك اللى انت شغالها الان ممكن تحوش منها قروش معقولة عشان تبنى بيت او حتى تدفع اجار سنه فى السودان ؟
لو كانت الاجابة نعم . طبيعة عملك شنو ؟ يعنى خبرتك فى شنو ؟ او مهنتك ؟ محاسب , ادراى , محامى ؟ شوف الناس اللى فى نفس وضعك عاملين شنو فى السودان ؟ لما اقول وضعك قصدى خبرة و شهادات وعلاقات فى السودان و كده . و على ذلك اقس. و لو قررت تستقر بره السودان شويه عشان تحوش . ابدا فورا سياسه تقشف قاسية جدا
لو كان مرتبك فى الغربة لا تكفى للتحويش , مفروض تقرر اذا كنت بتقدر تعيش فى الغربة للابد او ترجع السودان فورا . لانه لو فى اى احتمال انهم يقولوا ليك (مع السلامه ) احسن تكسب وقت و تتخارج من الان .
اذا كانت ما فارقه معاك فى السودان و لا فى اخر الدنيا . حوش اعمل ليك بيت فى السودان (عشان الظروف ما معروفه ).و لو كان مرتبك ما بيكفى التحويش . استمتع بحياتك فى بلاد بره . و انسى الموضوع
لو فى زول رسل ليك عقد عمل فى شركة بترولية فى السودان . ارجع طوالى
انا خريجه ٢٠٠٠ الان كل دفعتى فى السودان عندهم عربات و مبسوطين جدا . بس تعبوا جدا فى السنه الاولى.بعد دالك الامور مشت كويس جدا
الكلام الفوق ده شكلو كلام فارغ  .
لو قررت ترجع السودان . استخير . و ربنا معاك
|
Post: #8
Title: Re: سؤال بريء ... في طريقة نرجع نستقر في السودان ؟
Author: Abd-Elrhman sorkati
Date: 04-27-2004, 11:06 PM
Parent: #1
أخي محارب
اتفق معك ان المعادلة صعبة للغاية وانا الان في نفس مرحلة انعدام
التوازن التي تمر بها انت بل تجدني قطعت شوطافي هذا الاتجاه وذلك
بأن حسمت الموضوع مع نفسي وزوجتي بان أعود لامحالة وقد طرحت عدة
اسئلة ارجو ان تطرحها علي نفسك000
1- اهلك ومعارفك وجيرانك كلهم مغتربين؟
2- هل السودان فرغ من السودانيين؟
3- كيف يعيش الناس الموجودين الان هناك؟
4- هل انا افضل منهم؟
5- هل هم أفضل مني؟
6- ماذا تبقي من العمر ؟
بصراحة نان توصلت الي ان مسألة الغربة مسألة ( ضياع وقت) فقط
حيث لا فائدة من التضحية التي نقدمها ولا مقابل0
نتمني ان يسهل اله لنا عودتنا بالصحة
|
Post: #9
Title: Re: سؤال بريء ... في طريقة نرجع نستقر في السودان ؟
Author: محارب
Date: 04-28-2004, 08:07 AM
Parent: #1
الاعزاء ...
سمارت
عبدالرحمن سوركتي
سلمات واكيد شكري لكم ,,,
اعتقد انو المسألة محتاجة دراسة متأنية
وزي ما ذكر الاخ عبد الرحمن المعادلة صعبةومعقدة , انا اعرف ناس رجعوا للسودان بغرض الاستقرار وبعد فترة اغتربو تاني وهم يجرجرون ازيال الخيبة .
البعض رجع واستقر والامور ظبطت معاهم تمام والان بيشجعونا على العودة
وده بيقودنا لي كلام اختنا سمارت
ممكن تشتغل شنو في السودان ؟
علاقاتك كيف ومع منو ؟
والاهم ( البنية التحتية) وهي السكن لانها نص المعيشة
|
|