الأسر السودانية في السعودية (السلام ..من خلف الأبواب )

في ييوم الجمعة الماضية , استقبلنا الوالده الكريمة جاية من السودان ...
وبعد الانتظار الممل جدا .. بسبب تاخر الطياره (كالمعتاد) وصلت بالسلامة ... وطبعا حلفت قسم انو تاني الخطوط السودانية دى مانقرب عليها حتي ولو جايبين من السودان (طلح)...
المهم ...وصلت الحاجة بالسلامة .. وبعد السلام الحااار ..سريع كده فتحت الكرتونة المغبره ديك ...أي والله مغبره ..وانا ماعارف الكراتين البتجي من السودان بتكون مغبره ليه ..رغم انو الشغله بالجو ..فتحت الكرتونه ولقيت فيها طبعا كمية من الويكاب والشمارات (البتتاكل) والتركين ..
وبما انو الحاجات دي كانت جاياني انا ... وانا طبعا عزاااابي مابقدر اطبخ ولا بستعمل الحاجات دي (رغم اني بحبها موت) ..وبما انو المستقبلين كانو كتاااار من ناس الجمعية والاهل والحبايب .. طوالي عملت مزاد جوه صالة الحضور .. كيس الويكة يبدا من 10 ريال ...والشمار من 5 ريال ..اما التركين يبدا من 30 ريال .. واليدفع اكتر يشيل.. وفي النهاية لقيت نفسي طالع بي مبلغ كبييير ..حتي انى فكرت اسيب الوظيفة المهببه دي واشتغل ..تاجر شمارات .. ..
وبعد ما انتهت مراسم الاستقبال ..ولانو الوالدة حتتجه لمدينه الدمام .. حيث اختي المتجهبزه والمتجندرة ..ولانو في فرق بين طيارة السودان الجاية عليها وبين الطياره السعوديه الحتنقلها للدمام ...كم ساعة ..قلنا نمشي نقيل مع أي جماعه من العوايل الفي الرياض .. ومشينا ..
وطبعا الجماعة المشينا ليهم ديل ناس اهل وجيران في الحج يوسف في الخرطوم ..يعني ناسنا ...
اول ماجينا خاشين ... ست البيت كانت في الصالة ..بس نحن فتحنا الباب كده ..وقامت ليك صوووف لى جوه ..
نحنا الرجال قعدنا في الصالون و(العوين) .. دخلو بي جوه .. وقعدنا واتغدينا وشربنا الشاي واتونسنا .. وست البيت ماجات تسلم علينا ..!!! انا قلت الحاصل شنو .. لمن جينا طالعين ..وقفت ورا الباب وقالت ..ازيك يا سمو ..كيفك ...يعني سلمت على من خلف الكواليس ..

انا طبعا اندهشت جد ..وماعارفت اقول شنو وقعدت ابرطم في الكلام..
دي واحده لمن تجي السودان في الاجازات بتاكل مع الضيوف في صينيه واااحده .. على الاقل بتسلم عليهم وش ... مش من خلف الباب ..لمن الواحد يتخلع ويفتكر انو بيكلم شبح ..
الكلام ده لاحظتو من اول ايام لي في المملكة .. انو السودانيين الهنا ..اكتسبو صفات اهل البلد .. زي السعوديين ...يعنى كان مشيت بيت قرايبك او اصحابك او زملانك في الشغل ..مستحيل تشوف صاحبة البيت ..
تغير كبير في عادات السودانيين في المملكة .. احلى مافي السودانيين هو البشاشه ... والبعد عن التعقيدات في التعامل ..واخد الامور في منتهي البساطة ..
زمان ...في السودان لمن نمشي عند أي من الاهل او الجيران ..تجيك صاحبة الدار قبل راجل البيت ... حتى مافارقه معاهم البيفتح الباب منو فيهم .. لمن تخش أي منزل تحس انك في بيتكم .. تكابس المطبخ براك ..وحتى تختار نوع الملاح العاوز تتغدي بيهو ,..
ده غير الونسة الجميله الرااايقه مع شاي المغربيه ..
جد كده ...نفسي اعرف السبب شنو البيخلي الناس تتعامل بالطريقة دي ... شنو البيخلى واحدة تلاقيها في السودان ..اخر ونسة واخر ضحك .. وتعال يافلان لي جوه ..ومالك واقف جنب الباب ..البيت بيتك ..و...و .. ونفس الزولة دي لمن ترجع للسعوديه ..تبقي كاتم صوت ..بغم مافي ... كان سلمت عليك ..بس بالصوت ...صورة تك ... ونسه تك ..كانك معزوم في مطعم ..

هل كل السودانيين المعتربين في كل بلاد الله كده ... والا ده عندييينا بس في السعوديه ..؟؟؟
والغريبة انو دخلت بيوت كتير من القبايل السودانية .. الشوايقة والدناقلة والفور والمحس والجعليين والرباطاب وناس الجزيرة والهدندوه والحال ياهو زاتو الحال ..
اكتر المغتربين هنا ..خاصة العزابة ... الزي حالاتي .. عايشين حياة جافة ... موحشه ... مملة وكئيبه ... البيت الشغل ...النوم الاكل ..مربع روتيني قاتل .. موت بطئ يعنى ..الواحد البيكون بيعرف ليهو اسرةبيكون من المحظوظين .. لانو على الاقل ..حيلاقي شفع يهظر معاهم وينطط معام حبه ولو مره في الاسبوع ...
بالنسبة لي انا ...مابشوف الاطفال والونسة مع الشاي دي الا مرتين فى العام ...في اجازة العيدين لمن امشي عند اختي .. غير كده ... الا شفع السعوديين المسيخين دي ...الواحد فيهم تعاين ليهو ساكت يقول ليك (بعد يزح شعرو الناعم من عينيهو )... وش تبي ... تقوم تقطم وتقفل بوزك وتشتت ... واوعك تكتر في الكلام ... لانو ممكن تلقي نفسك (خروج نهائي )في خلال 5 ساعات ..
بس ياريت بورداب السعودية البي اسرهم هنا مايكونو من نوع ديل .. سامع يا ودقاسم .. ؟؟؟

حقيقة ظاهره ...غريبه .. وبايخة .. حتي اني بقيت نهائي مابمشي بيوت عوايل ...

عزابة بس . .

اخي العزيز هناك قول ان الغربة تبلد الاحاسيس وان كنت اختلف مع هذا القول
تربية الشخص هي التى تحدد سلوكة سوى كان فى مكة او كلفورنيا او ام دفسو يااخي العزيز مثل الوضع الذى ذكرتة لايمكن تعميمة بتلك الصورة التى اوردتها من ان كل الاسر السودانية اصبحت تستقبل ضيوفها من وراء الابواب لقد كنت فى غربةطويلة جداً فى الجماهيرية الليبية ولم الاحظ ان تغيير فى سلوك الاسر الموجودة هناك (وهى كثيرة جداً) لم نحس فى اى يوم اننا خارج السودان بل اسرنا اثرت فى بعض الاسر الليبية واصبحوا يقلدوننا بالجزء الخاص باستقبال الضيوف بجد والله لقد لمست ذلك بنفسي
ماعارف هل الظروف المكانية تفرق فى موضوعنا هذا؟؟
اخي العزيز لك التحية واتمني لوالدتك اجازة اقامة طيبة معكم

العزيز سامو كيفك ياخي ،بالهي انت من اندنا،طبعا عرفت من ما جبت سيرة التركين دي،وانا طبعا زول مجنون فسيخ وتركين وكل الحاجات المهببة دي،فياسيدي نتمني ليك ايام سعيدة مع الوالدة العزيزة ومع التركين

by the way,donot let others
ruin your moments of enjoyments

ابو يسرا ..
انا طبعا ماقصدت التعميم في كل العالم ... لاني من الحاج يوسف للمملكة راسا ..يعني لاشفت ليبيا ولا هونلولو ..

اما لو تقصد التعميم لكل الاسر السودانيه في المملكة .فانا لم اعمم كل الاسر السودانية في المملكة ..ولكن عممت كل الاسر السودانية ..الانا دخلتها ..
بعدين ..كدي تعال ليك زيارة كده هنا وادينا رايك ..
ليبيا ..يخيل لي انها ..شوية مجتمعها مفتوح ... يعنى الناس متداخلة في بعض ...غير كده ..قوانين وعادات المملكة (زي لبس الحجاب المابيظهر الا العيون )اجبرت الناس على الانغلاق اكتر

زطبعا كلامي كلو من واقع تجربة شخصية بعيد عن التنظير ..

على العموم مشكور على المرور

سمو
ما دام حضرتك في الرياض ليه ما اتصلت علينا ، ولابد مالك ؟ معنى كده إنت ذاتك مخبئ نفسك وبالتالي تستاهل الناس تستخبأ منك ..
بعدين ممكن أناقش معاك موضوع السلام من خلف الأبواب ،،

samo
مسكاقمي
هكرفي
ما عندنا خبر بوصول الحاجة كنا جينا المطار
عشان ناخد التركين اوع تكون وزعتوا
اسمع زبط التركين وانا بجيب القراصة بجييك
ملينا من اكل الشكشوكة
يا اخوي كنت تجيب الحاجة عندنا في الجمعية وتريح نفسك
من سلام ورا الباب دوول
عافيلقو سلاملقو

سمو

حمد الله الف الف الف علي سلامه الحاجه
وبعدين ياخي الشلاقه ليك شنو سلمت عليك سلمت ماسلمت عليك في ستين ياخي ديل ناس بالمناسبه عاملين فيها ملكيين اكتر من الملك ذاتو يعني السودانيين هنا بقو صعبيين جزء كبير منهم الا من اتي الله بقلب سليم وبعدين ياسمو ياخي النمازج المابتسلم دي ما راقدين في السودان بقت علي الناس الهنا ياخي ماتشتغل بالحاجات دي كتير لانو انا شخصيا لامن امشي بيوت العوائل بتخيل نفسي ماشي بيت عزابه بس راقين حبه كده يعني الاكل بكون منظم والمراتب فوق السراير والملايات مفرشه لي ده اول ماانتهي من موضوعي الجايبني بتخارج لاسلام لاكلام

ايش فيك انت؟... تبينا نكشف حريمنا على الرجاجيل؟

انقلع!!!!!

العزيز manubia

Quote: العزيز سامو كيفك ياخي ،بالهي انت من اندنا،طبعا عرفت من ما جبت سيرة التركين

طبعا من عندكم ...يعني الواحد الا يرطن عديل عشان تعرفوهو ..

Quote: ما دام حضرتك في الرياض ليه ما اتصلت علينا ، ولابد مالك ؟ معنى كده إنت ذاتك مخبئ نفسك وبالتالي تستاهل الناس تستخبأ منك .. بعدين ممكن أناقش معاك موضوع السلام من خلف الأبواب ،،

والله يا ود قاسم انا ما من الرياض ..انا جنب الرياض ..وبجيها كل خميس ..بعدين انا مامخبي نفسي ...بحاول اتواصل مع الناس والاهل ..وده البيودينى كل خميس للرياض ..ولو كنت بعرف دربك اكيييد كنت وصلتك ..
وبعدين انت بالتحديد منتظر ردك ورايك في الموضوع ...تقوم تجي ماشي فينا كده ..؟؟

Quote: مسكاقمي هكرفي

اجمل ما سمعت في البورد ياحمزاوى .

والله ياريت كان تكون في المطار ...شكلك كده النوع الممكن يدفع اتي شي مقابل مرطمانية (تركين)

بعدين الجمعية دي مانحنا كمان عندنا ...بس لانو نحن في (المملكة)..ماممكن حرمة تدخل عليهم ..مع انو كل الفي الجمعية ..ده ود اخوها وده ود عمتها وده ود اخوها .. حنعمل شنو (حكم القوي)

Quote: عافيلقو سلاملقو

Quote: ايش فيك انت؟... تبينا نكشف حريمنا على الرجاجيل؟ انقلع!!!!!

ما قصرت تب يا سجمان

.....

حمد لله على سلامة الوالدة

كل الحب

محمد

لا فض فوهك يا سجيمان . والله طلعتني من دبرسة مهولة

قلت لي إييش بك . شوف يا حنوفا إيييش بك . يا راجل مشتاقين

يا سامو الدنيا فردنقس والزمان دفيس . يا زول علي الحرام زي أيام الجامعة . نمشي بيت القزاز تلقي البت تاكل حبة حبة في سنة البيرلم ولما مشينا لي نص السنة يمين تلقي الواحدة تكبس علي الفراخ تقول الصحن طاير .


بحيراوي

Quote: ايش فيك انت؟... تبينا نكشف حريمنا على الرجاجيل؟ انقلع!!!!!

سجم الرماد..سجيمان
ايش فيك انت يارجال ...

وش بلاك انت ..؟؟ حريمنا وما ادراك ماحريمنا ...مش لمن يكون عندك حريم زي حريم الخلق ... ؟؟ ولا كلام المطرب الروغوبة مش عاجبك

محمد ادريس ..
تسلم ياغالي ...

نسيت اقول ليك ...
الوالدة سالت منك ...

الأخوان سمو وسجيمان

تحياتي
بمناسبة حريمنا وحريمكم دي..أذكر أول أيام وصل فيها بث القناة الفضائية السودانية هنا..كان عندنا زميل وصديق سوداني يعمل معنا بالرياض ويسكن الخرج ..كان بيوصل معاه واحد سعودي..راجل كبير في السن لا يكتب ولا يقرأ وهو مراسله وفراش في مكتب هذا الصديق..كان بيركب مع صديقنا كل يوم ماشي وجايي لأنه ساكن معاه في نفس المنطقة..نشأ بينهم نوع من الود لطول الفترة الإشتغلوها مع بعض..حكي لي صديقي إنه يوم الراجل ركب معاه زي عادته وهم جايين وفي الطريق سأله السعودي العجوز: أمس شفت التلفزيون حقكم.
سأله صديقي: وعسي عجبك؟؟؟؟ لم يرد الرجل وبعد فترة صمت سأله: يا مجدي..حريمكم هادولي تحبونهن؟؟؟؟ رد صديقي: أيوه... فقال له السعودي بدهشة وهو مصعوق: يسألك الله؟؟؟؟؟ رد صديقي :يازول ما تخلي عندك دم..إنت بدوي مطرطش وللا شنو؟؟؟والله لو ماك راجل كبير كنت رميتك من السياره..تاني أوعك تركب معاي.
موقف ذكرني ليه بوست الأخ سمو...فأحسن تسيب الموضوع دا قبل ما سجيمان يرميك من البورد
تحياتي

Quote: اكتر المغتربين هنا ..خاصة العزابة ... الزي حالاتي .. عايشين حياة جافة ... موحشه ... مملة وكئيبه

يعني ...انت عايز...يخلوك تفك...وحشتك...بي القرقراب...
ما ...كفاك ونسة السودان....هسي لمان كنت مقيم في السودان...كنت بتدفع
ضرايب؟

لامن تمشي السودان ادفع ضرايب واتونس...ولامن تجي السعودية لم حق الضرايب واتوحش...اتنين لي النعامة ما تلقن يا سامو...الموضوع دا عادي...وان سلموا عليك واتونسوا معاك في السعودية وفكيت وحشتك عادي...بكون مافي فرق بين السودان والسعودية والله مش كدي.