سافر زمان قبال سنين ..لاجاب جواب لا جاب خبر ( محجوب شريف)

للخروج عن المألوف هذه الايام والاهداء الى كل الطيور المهاجرة مع تمنياتى لنا جميعا بالعودة

سافر زمان قبال سنين
لاجاب جواب لا جاب خبر
امو تسأل كل طاير
وكل عائد من سفر
خيالو ما فارق عيونها
وطيفو ما غاب .. ليه اثر

وما زال هناك .. فى الركن داك صوتو وغناهو وضحكتو
وصورو المعاقة فى الجدار
وجرايدو
والكتب الزمان
الليلة كاسيهم غبار
مصباحو فى الركن الحزين
ومكانو مازال فى انتظار
اصحابو انداد الطريق
قدام عيونا مشو اخضرار

ياماشي لى بلدا بعيد ..
قول للمخاصم اسرتو
قول للمفضل هجرتو:
ماعاد قطار
ووصل جواب
اسمك تهزّها ذكرتو
والبيت وراك لو شفتوا كيف ..
ضاعت مواسمو وخضرتو

ياحليلو لمن كان صغير..
تلميذ بيمشى المدرسه
تشفق عليهو من الطرق
وتخاف عليه من المسا
كيف ينسى عيدية وحنان
وكفاح سنين كيفن نسا ؟

سافر زمان قبال سنين
لاجاب جواب لا جاب خبر

لك ودى طارق والقومه لى محجوب شريف ، المغنى للأمومة والوطن

أخو البنات

والتحية موصولة لشخصك اخى تاج السر

طارق تحايا كتار،،

العمل النزلتو لي محجوب شريف كان إضافه جميله بالنسبه لي لأني بحاول أجمع كل حاجاتو،، بس الجدعه البعيده دي بتخليها صعبه شويه ياهو إلا فلان إنزل حاجه ولي علان إنزل حاجه،،
فشكراً مطر طارق،،

سوميتا

التحية كذلك للفنان صلاح مصطفى ... فقد طلب في لقاء إذاعي أغنية بهذا المعنى فكانت الاستجابة السريعة والمميزة من الشاعر محجوب شريف .

الاخ Soumeta
التحية لشخصك وانت تجمع للاستاذ ويشرفنى مساعدتك بكل الطرق المشروعة بس انت اطلب ..

تغطس يا طارق وتجيب مصايب
وتقلب المواجع
و(الأخ) سوميتا دي بالغت فيها..لو ما أنا غلطان

والله أول مرة اعرف انو القصيدة لمحجوب شريف
وبالرغم من الحاجز النفسي امام مؤديها
نحاول نسمعها (بعين) أخرى

لك الشكر

اهل العوض سلام
التحية لك وايضا للاستاذ صلاح ، ويا ريت نلقاها مسموعة ..

اخى وصديقى حليم ،، سلام كتير
و لا تعليق ...