الدِش

صحن يرقش ..معلق فوق ..في جو منعش
تجيهو قريب ..يمين تهرش,,
عرفتوهو ؟؟
دا أسمو الدش...
***
غايتو الدش جهاز مدهش

تقيف جنمبو .. ما بتفوت
تكون واقف..محلك سر ومتكلبش,,
وإجيك احساس..بانك أنت ماكل نيم,,
ملخبط بقرع ابيض..ملخبط ايس كريم فوقو..واقف لط بحبة مش !!!

لحظات ونواصل الأرسال دي ما فيهو !!!
ما بقطع...!!! ولا بقول إششش ...!!!
بجيب اللقطة سحرية..
مريح جداً..وما فيش نشرة جوية,,
ولو جابوها...الناس دي لا بتزهج ولا بتفوت
عارفين ليه ؟؟
عشان بتزيع خواجيه
قنواتو قريب ميه
واخطر شىء الفرنسية ...
تشوف اللقطة وتقهي .. وتسهي
تعاين فيها لا بتفتر ولا بترمش

مرقت بعيد
من ناس برد وناس ورنيش
دخلت لبيت وفيهو الدش
وفتشت...

وفتشت...
قناتو الأولي حولت
جابو قناه...افكر فيها بالمعنى
سرحت بعيد مكان تهنا
وعاينت..لقيت ارسالنا يا هو هنا ..نعست ... وقمت حولت !!

قناتو التانيه فتشتت
وجاتنا اسبانيا الوديعه
الخواجيه المذيعه..حاجه روعه وجد فظيعه
دى بتكون ....جهجهت كل الخواجات
شرتن نص الصقيعة !!!
عيونه جداد....!!!دي نت جدى!!!
هيا يا عماد؟؟؟دي بت جدك؟؟
دي مكنة رهيبة جد (فيري باد)
دي فلورا ... وجدك انت ود حمّاد!!
قالي مش اسبانية ؟ما جدنا طارق بن زياد...
وفتشتّ...

قناتو التالته حولتّ
جابو قناه لا محور ولا في صراعنقاش هادي...
ولا جوطة تجيب لي صداع
وقارنتّ
بينا وبين قناتنا هنا ..وبين ايام لها ...نعناع
وحولتّ

قناتو الرابعة فتشتّ..
وكانت كوره في روما
بين ميلانو ...مرسيليا
وتاري الليلة كان يوما
وقارنتّ... بين ناسنا ... وناس روما
بين ماردونا ... والدومه
ناس اتطورت كسحت..وناس سامع شخير نوما
وفتشتّ...
وغيرتّ....
وقلت افوت ومنو اطش
دخلت في بيت فيهو جهاز
بجيب اللقطة قالوا فريش
وعاينت دعايات وش
تخت في هدوم... تكب صابون ..وتكشح وش...
لمن مرقت عاينت
لقيت الزول معلق طش ...!!!

مشيت غيرو...
دا داير اجر اللقطة من جارو
واشوف لقطات فرايحية.. وما كضب علق ليهو صيفية,,
اكان فجأة
جاتنا اللقطة في الشاشة..كلها فول وطحنية!!!

مشيت غيرو والفرصه حتما سانحه
قعدت ليك جنب الجهاز
شفت المذيع طوالي ايدو مرجحة
حتي العماره الفي الفلم..بنشونا زاتا ملوحه
يا اخواننا عاد هو شنو الخبر؟؟؟
قام لينا واحد فينا صاح
يا امه يا متبطحه
قوموا يلا ... الزول دا فوق
علق سدادة المروحة !!!

الناس في البيوت ما تقيسا بى بيبانا
ما تفرك دشوشن والهمم خربانه..
متشوبرين شديد دايرين اشوفو الدنيا كل اركانا..
جابو الدش عديل..ربطوه اعلى مكانه
خلو الناس تحت,,برواديهم الخسرانه !!!
لكن نحن ما همانا
ممكن نسوي,,ارسالنا برانا..
نرسلو من هنا ,,لي اليزابيث في مكانا..
نقوليها شوفي يا ليزا
لئن تطيعي وتخضعي,,لزوجناك عصام غانا !!!
وكلمة الحق المعانا
ناس تقولا وناس تناور
ناس تقول البث مباشر
يعنى هو البص ..المباشر!!
ناس تقول في الدش خطوره,,وغزو كاسر
ناس تقول ...لا الدش دا فلته ...
وطفره في الزمن المعاصر
ونحن كلمتنا بنقولا وما بنكابر
انو ما عيب الخواجه لما ارسل بث مباشر
عيبنا نحن ... في نفوسنا
لا بنصنع تكنولوجيا لا بنهيىء شان نذاكر
عيبنا نحن ...شكله,,في كل المحاور
زيف بيطفح,,لما انتكت المنابر
بيهو اتكسر قلمنا ,طار واتشتت ورقنا,,وفيهو اندفقت محابر
وديمه نبكي في مجد غابر..حقو نحن نقيف ونصحي عشان ما نصنع مجد باكر ....

الاخوة الاعزاء:
هذه قصيدة حملمنيشية نقلا عن موقع الغابة الصحراء ارجو ان تكون خفيفة الظل علي الجميع رغم الاطالة.
ودمتم...