يا ستنا .... (قصيده جديد مواصلة لحالة الفرح) - أخو البنات

متذكرة؟؟
وفاكراها يا ست العيون المذهله
يافكرة فينا مأصله
ياقمره عايزين نوصله
نتشابى ما بنحصله
أشواقنا ليك بنرسله
فى غنوه أو كلمات غزل متواصله
ونتمنى قبال ما تصل أروحنا تمشى تحصله
.......................................................
نتهنأ بى أجمل ملاك وعيون
والنونه والصوت المثير وحنون
منك بنستلهم جمال الكون
منك بنسترق الفرح، وبتوشح صباح الدنيا لون
.......................................................
منك نعيش نرجــى الأمــل
منك بنتاسى الحصـل، مهما حصل
منك ( نضوق) طعم العسل
.......................................................
متذكره؟؟
يوم بحت ليك بى حب عفيف
الدنيا ، ذى كانـت غـمــام
بتغنى للحب والســـــلام
الريد بحر ، وأحساس لطيف
لا ليهو ساحل ولا عندو قيف
وأنا فى خيالى سرحت فى عالم ظريف
أنك معاى ، وخطاك ما ضلت خطاى، فى يوم خريف
لكنى فجأة سمعت فى جواى أقيف ... !!!
.......................................................
ياستنا . . يا أحلى كلمة بنرسمه
لوحة جمال ، على كل دار، ونقسمه
عيديه للأطفال ، طلت ورود متبسمه
يا رائعـة ، يافـتـنه ودلال ومقسـمه
يا صافيه ، يانبع الزلال، يا نسمه فى عز الهجير نتنسمه
يا آيه ، ياهيبه وجلال. . . . يا نفحة جايه من السماء
......................................................
متذكره؟؟ كيفن بكون هائم بطوف حوليك
كيفن بكون مشغول ومهموم بيك
كيفن بكـــون جنبك ومشتاق ليك
كيفن بخاف من لحظة الفرقة قبل أيدى ، تصل أيديك
.......................................................
بخاف لحظة فراق ووداع
أصلو الدقائق ، بين حبيب الروح تعدى تفوت سراع
.......................................................
متذكره ؟؟
ريدى الشديد ، طفلا وليد
خائف عليهـــو وأدللو
ضاميه فى جو الفؤاد
داسيهو من عين العباد
وذى الغمــامه أضلــلو
متذكره؟؟
يوم قلتى لى والدنيا كانت بين يدى
ريدك ده أنسا وقللو
وأنا كنت راجيهـــو الندى أنعش وردنا يبللو
.......................................................
والفرحة ماتت فى العيون
والدنيا غطـاها السكــــون
ورجعت مـن نص الطـــــريق
مكسور جناح فى الهم غريق
لا فرحة لا زولا صديق
لا أيد تساند لا رفــــيق
.......................................................
بتقولى لى ريدك ده أنسه وقللو
وأنا كنت راجيهو الندى، أنعش وردنا يبللو
.......................................................

لحظات فرح منواصل

يا ستنا !!!

.....

*****

اتحفنا فنحن في الانتظار كما عودتنا دائماً

شكرا يا(ستنا) فلن يطول الأنتظار ، لك الود

يا ستنا أهرب منك اليك