ابويا مات

أبويا مات
الليلة كيف وأمسيت
قول ليا يا بويا
وحداني شلت الخطوة
وفارقت ناس البيت
خلاص فت خليتنا ؟
واتقطع علينا الخيت
يا الكان غطاك ترتيل
بي ترابك اتغتيت
وأنا لسع على دينك
ولا ذره ما سديت
اجيك بشوق ملهوف
ألقاك خلاص ارخيت
غمضت ما وصيت
بسملت وإتوضيت

جيتك لهاتي نشاف
هاردني ليك الشوق
أتغطى بي نمك
تبرد حشا المحروق
ألقاك بعيد رحت
غربت ولا شروق
وبعدت خطاويك
قبلت ما صديت
كان وعدي ليك اجيك
اياس يكون جنبك
يتلوله في حضنك
وجنبك ينوم ويحوم
تديه لي عافية
لو مره كان محموم
إلا القدر عميان
ما بخلي فرحة تدوم
مش كان تعودنا
على فرقتك بشويش

الليلة يا اب تله
ضوا عليك هلا
الطينو بي جنبك
بي موية ما اتبله
ابويا في حواكا
زول الله شيخ طيب
ما اظنو يغباكا
صافي زي لبن الصباح
بلسم وكت تندي الجراح
دوباي زي قمري
محزون في الصباح
فرحان لو الدنيا صاح
عطاي بي نية صافية وانطراح
الليلة ببكيك بي نواح
نوم عافية
وبي انطراح

خالد العبيد
غفرالله له ورحمه والبركة فيك
متين الخبر
انا لله وانا اليه راجعون

له الرحمة

وربنا يلزمكم الصبر

هذا نص قديم
حاولت ان اعدل فيه
ولكن لم استطع
اهديه بكل الحزن الى
اخواتي في السودان
والى الغالية دوما
ورقية وراق
وعاصم الحزين
ومريم الطيب
وتماضر شيخ الدين
وتماضر حبيب الله
وخالد الحاج
وهالة قوتا

والجميع ولكم كل الحب
اخوكم المحزون
خالد

زمراوي؟

شفت البقت علينا؟

نان نحن دييييييمة لافين عممنا وقدر مافي زول فرش في البورد شايلين الفاتحة......
خالد اخوي انا غايتو خاسة نفسي...ندمان وسافي التراب....لكن يا اخوي علي الاقل كان تقول بارك الله فيكم...........
الله ياجرنا

سجيمان يااخوى
ودالعبيد مابكون قاصد علا عجبنى كلامك
بس ماتبقالك توبة من الفاتحات

زمراوي

Quote: بس ماتبقالك توبة من الفاتحات

لا لا
بس حقو الزول العندو فاتحة تاني يكتب الدعوة عامة

نقوم ندخل ونشيل الفاتحة وبعدين نلقاهو ما يطلبه المستمعون

العزيز سجيمان
لك تحيات الورد
يشهد الله كم تعجبني كتاباتك
واحتفظ ببعض منها في ارشيفي
وكلام زمراوي صاح
لك مني كل الود
خالد

الاخ خالد
القليلون هم الذين يحولون الحزن الى طاقة ايجابية
احسن الله عزاءكم


وشكرا" للاهداء

خالد. اياس. وارف. رقيه و سعاد
اسرتى الاخرى
نفتقدكم ..نشتاقكم ..نفتقدكم ..نشتاقكم
ماريل .عشه .حبيب الله وانا.