النـــــــ ولعت ـــــار ..... الى الجميل جورج بنيوتي

بنيوتي خُوي
بِكري الصباحيّة البِعَدلَ الراس
برقيكَ بي إسمو الكريم
من كَسْرَةَ الزمن البهيم
ومَراصد الأنجَاس

....................

والاقيك في زمن كاواي
أفرَح بيكَ للقَديم والجَّاي
وأرجاكَ
قصِيدةَ حَدِيدةَ
وقَمَر أحْمَر
يفصِّد عِرقَ الغُنا الماسِخ
والمَغَس المَمَدَّد غيمة
في جواي

...................

وقولة حق
موزونة كلماتو
بشوف في النَّقعة شوفة خير
ولداً عديل بالحيل
صَدرو تِرس أُماتو
وقلبو جوف الحرَّة
ما هو الفِرّة
وكتين تبقبِق في حلق اللئيم ينشرا
وبتاً قَبيلة مَفَرِعة في حَشا الارض المشققة
مغروسة في كبد البلد زاتو
والماتو
والفاتو
والجايين نسايم اللّيل البَرَد
من تال قِبلي تجيك هبّاتو

..................

النار ولَّعت
وما بيشبه بريق الماس
عِلا قلباً هميم وصَّميم
مَغَمَّس في هِموم النّاس
وحُب النّاس
ووجَع النّاس
مَحَروس مَرَصَّد
وشَرقان بي وحيح أرضا رحيبة
لافاها الحريق
في غفلة الحراس
والنار ولَّعت
تغَرِّب يوت
تشَرِّق يوت
تَخُت فوق الذي إسمو
مَكتوب بي مَدَاد الدّم علي القرطاس

الطيف الشفيف
اهنيك علي وسامة الدارجة في حماك
واحي فيك احتفاك بالجميل بنيوتي لانة بحق
بقامة الحنين الذي اوردت
فالتحية لقامتيكما
مع خالص ودي

غاليه... ام فاطمة

وجودكم فينا هو الذي يمنحنا تلك الوسامة
ولا فضل لنا سوى حمل المتاع

اما بنيوتي ذلك الشاهق فلا ادري كيف
اطوع اللغة الحجرية لتحمل بعض ملامحه

ودا سرمدا يستعصي على الادغام

حاشية..
كيف يسير العمل على بوست التواصل..
واين هو..؟؟

رائع ، عميق ، مؤثر ، مبدع

ؤبث

طيفور أخوي

شالَكْ عِرِقْ

ختاك فوق القبايل راسْ

فناجينك صباح الخير

وخش لي جاي.

+++

وعدِكْ زرَعْ نبتَه

غناكْ في أول التخته

وبكاكْ

شايلنو في غيمةَ النهار ينلَمْ

يا ساريه في عِرقو

وفداك بي دم.

+++

النار التولِعْ والنيون ينبقْ

ساق الفَرَسْ حيشانْ

حوش الولد عينكْ

ناس البلد كيمان

كوم الولد طينك

يا العازه يا أمو.

+++

ما هو المِسَردِبْ " لووول "

لا هو البقول " الروووب "

شايل القلم "واسوق "

مالي الكلام احساسْ

ولدا يشد حيل أمو

لامن يقرصا الوسواس.

+++++


وليك في باقي الكلام غنوات...

( انقطع النفس,,, جايييك )

بنيوتي خوي..


تعال..
وحكِّر فينا متراسك
قلمك سنين يا البّدري
والعجب راسك



عارف يا جورج ..
لما بديت اكتب الرد دا كان نفسي اقول ليك
ان صورك البلاغية متفردة حتى في الشعر العامي (ان جازت التسمية)
واكيد حتقدر تضيف الكثير لهذه النوعية المهضومة مع انها أقرب
للنفس "قد يكون هذا حكما فرديا غير ملزم للاخرين"

وكنت بين امرين اما ان اقول رأيي بالصوره العادية التي قد
تحمل في طياتها بعض الملق الجالب للملل.. او ان اضمنها صوره
تحرض فيك ذلك الجانب المهمش قسرا بدعوى العامية وهو اقرب
للمنفعة, ثم اردتها اكثر تحريضا ومشاكسة كما هي الان


فتدفق يا نيل الكلام الزين
خلي الصباح
ينداح
فوق خُدود أم زين
شوف عيني الشَحيح
والصباح يَقْنِت
العمر واحد
القلب واحد
والعيون إتنين
العَازّة دِيك يَاها
مَرَقت علي التَقْنَت
في راسا كمِين هَم
وفي ايدا نُوارتين
نُوَّارة حدَّ القَلب
فيها مِليون زُول
مزروعين هِناك بَعيد بعيد
بُعدا مافي مِنُّو خَلاص
مَكسُور مِرق السَّفينة
ومِتْشَتِت الرُّصَاص
ونُوَّارة في القَبْضَة
مَضمومة زي رُبطَة
وباقِيلا كم نُقطَة
ايام ؤتِنشَرَّا وتلحقَ الرايحين
وينشَطِر قِليب العازة
ويلحَق الزّينين


كدي يا البدري شوف جِبَّتنا
فيها زي كم قَد
واسكت عِد

*

ود الشيخ .. المقداد اخوي
شكرا لمرورك الاليف يا غالي

والتحايا الخاصة لعصابه القناع

ايويويويوووووووووووووووووها
ابشرو ساكت يا الجنون
تمام والله
يلا اتجادعو
وخلونا نتجدع
بنيوتى
انت الدهشة ذاتها وصفاتها
شكرا ليك
انا والعثفير الذى يعرف كيف يطير
واين يهبط

العزيزة بيان..

تسلمي على هذا المرور الضاج بالفرح
شهيتيني في الزغاريد... تصدقي
لي زمن ما سمعت لي
زغرودة ولا طقشت اضاني نقدة

هل منكن من تعلم
الفارق بين النَّقَدة والريشة؟؟؟
وتدينا تعريف مختصر عنهن

جفيتنى وانا ضايع

فروحي تويم روحي

كيف اجفوك وانت معي..
وكيف تضيع وانت في مقلتيّ..؟؟

*

ياسلام
دعاش المحبة
عابق يملاء بريحته هذا المكان الحميم

طيفور
جورج
انثرا رزازكما

محبة يا اهل المحبة

الجندرية..

حبا وكرامة ايتها الشفيفة

وكيف لا تكون محبة ونحن نحتفي
بقامة كجورج..

ونحتفل معة بعيد الفصح المجيد

فالمجد لله في الاعالي
وعلى الارض السلام
وبالناس المسرة

وكل عام انتم وجميع مسيحيي/ات السودان بالف خير

سؤال يفرض نفسه بشدة.. اين الاستاذ عثمان ثراث؟؟
ارجو ان يكون بخير وعافية

طيفور أخوي

(إن وردن بجيك في أول الواردات)

ظرفا كئيب خلا الكلام شخبات

وأنا قلت اجيك شايل الكتاب في يد

خابر النواصي التشبهك بى جد

+++++

العزيز طيفور : لك العتبى حتى ترضى ...

حبا بحب . جاييييييييييك تاني.

بنيوتي اخوي..

تسلم ليّ انت من الظرف اللئيم
وعوارض الشُمّات

قلبا لقلب حتى ينكسر القيد
وتَقدِل الحرّية من نُملى وحلفا
لى نيرتتي واربعات

لي نيرتتي و قلول

الشوق يطول

"بلبل" في الطريق

والرايعه شايله " الكاس "

مطرا غزير

حامي العيون الشوف

الجنبك كفاك

والعِبره بالوَنَاسْ !!!