الأستاذة سعاد ابراهيم أحمد تبلغكم تحاياها

في اتصال هاتفي بالمناضلة الأستاذة سعاد ابراهيم أحمد دار الحوار التالي ...

- - ازيك يا أستاذة وحمد الله علي السلامة
- - نقاتل .. انتقلت من صفوف الموتي الي صفوف الأحياء
- - حمدالله علي السلامة .. عرفت من في سودانيز أونلاين انك عملتي عملية جراحية ... والكل يسال عليكي
- - وأنا بحنس في ولدي عشان يطلع لي الكمبيوتر وأقدر أتواصل مع الناس وأكتب في قضايا الوطن ..لكن هو خايف علي من التعب
- - فعلاً .. مافي داعي للاستعجال يا أستاذة .....
- - أنا في المستشفي كنت حاسة انو أنا محبوسة .. بعدين أنا كنت عاوزة أرجع السودان والدكاترة بيقولوا لسة
- - برضو لو قعدتي لحد ما تطمئني علي صحتك بيكون أحسن ...
- - الشباب أخبارهم شنو ؟؟؟؟ نحن عاوزينكم تتحركوا في اتجاه السلام والتنمية ... الشباب هم الفي يدهم يوحدوا البلد .. والناس البرة ما بنقوليهم أرجعوا لكن بنقول ليهم خلوا رجل جوة السودان ورجل برة .. أخلقوا قنوات اتصال بالوطن .. أقيموا الندوات وناقشوا القضايا
- - بنحاول ..
- - ما أطول عليك يا خالد تحياتي لكل الناس لحد ما نطلع ليهم .. وعاوزينكم ترجعوا السودان بأرفع الشهادات والخبرات ..
- - أنا سعيد بانو سمعت صوتك ... وخلي بالك من نفسك .. وسلامات
- - سلامات وشكراً علي السؤال

كان صوتها قوياً كالعادة .. بل وأقوي من العادة ... عندما وضعت السماعة كنت نسيت تماماً أنها خرجت للتو من عملية جراحية تم فيها اسئصال أجزاء من رجليها ... وكنت أفكر في العملية الجراحية القادمة للوطن .. وهكذا هي حبوبة .. لا تستطيع أن تفصل آلامها الخاصة والعامة حتي وهي في أحلك ظروفها ... التحية لها ولكل جيلها من المناضلين
ولكم كل الود

حبوبة بتصلى

تحت الفروة خمسة

يلى حبوبة احكى لينا حكوة (قلو كب)

شكرا ليك يا محسى ....

طمنتنا على صحة الحبوبة الجميلة

ونتمنى لحبوبتنا الجميلة العودة الى الوطن اقوى مما كانت وتواصل نشاطها مع رفاقها فى الحزب والتجمعات النوبية

محمد

العزيز محمد
حبوبة الآن في معنويات عالية جداً
أعلي من أي وقت مضي
وتحدثت أيضاً مع د.محمد سليمان الذي أكد أن صحتها الآن الأفضل خلال العشر سنوات الماضية
لك الود يا عزيز

شكرا المحسى
وربنا يشفى الاستاذه سعاد

العزيز فرح .. ويديك العافية

الف حمد لله علي سلامتها
وبلغها التحيه

تصل تحاياك أستاذنا الموصلي
ولك ودي

ابن عمي المحسي
مسكاقمي هكرفي
شكرا جزيلا انك طمئتنا على الاستاذة الوالدة الغالية سعاد بت ابراهيم
دعواتنا ليها ببركة شيوخ قبة سليم والشيخ زمراوي وشيخ منور وشيوخ كوكا
ان يشفيها ويسلمها ويحفظها
ولك الشكر والتقدير وبلغها تحياتنا واشواقنا

الهك اشفي استاذة الاجيال وادم لها الصحة والعافية،ومشكور اخي المحسي

سلامات ... وتسلم يابن العم
ستعود حبوبتنا أحسن مما كانت
ببركات أعمالها .. ودعوات أمثالكم
لك الود يا عزيز

الف حمدا لله على سلامة المناضله

الاستاذه سعاد

ربنا يديها الصحه والعافيه


شكرا... الاستاذ المحسى

ويديك العافية يا أستاذ فجراوي
ولك التحية

المحسى
حمدالله على سلامة الاستاذة وعبرك بقول ليها حمدالله الف الف الف على السلامة
تحياتى

الف سلامه الاستاذه سعاد
نحيك ..نحيك اجيالا اجيالا
ولا نفيك ما قدمتى يا رائده
كل الود

تصل تحياتك للأستاذة يا بلدي يا حبوب وشكراً علي الطلة

الأستاذة تماضر حبيب الله
حقاً الأستاذة سعاد بقامة وطن وتستحق منا أكثر من تحية
ولك الود

المحسي
الف حمد الله على سلامة الاستاذة سعاد
متعها الله بالصحة والعافية

الف سلامة لحبيبة الغالية المراة الجسورة سعاد ابراهيم احمد، وانشاالله ترجعي احسن من اول وتواصلي يا ست الكل .

تشكر يا خالد المحسي
وكما عودتنا دائما هميم بالناس
وكويس انك طمتنا عن الوالده سعاد
عاوزين نسمع صوتك لو امكن
معتصم واريج ومرهف

الله يسلمك أستاذ زمراوي
ويديك العافية
وتحياتكم تصل قريباً


حقاً هي جسورة ونتمني معك عودتها الظافرة عشة بنت فاطنة


ولكم الود

الجميل معتصم
لك الود يا صديق
الأستاذة سعاد تستحق منا أكثر من مجرد السؤال
وهي التي وهبت حياتها في النضال لأجل حياة أفضل لشعبها

وتوقع مكالمة قريباً
لك وللجميلة أريج وللصغير المشاكس مرهف تحياتي وودي

كل الأمنيات الصادقة بدوام الصحة والعافية للأستاذة سعاد ابراهيم احمد..

العزيز المحسي..

ألف شكر لك لأمانة توصيل التحايا..

عزيزتنا رجاء .. لكي كل الود
وتسلمي