الليلة ميلاد فرحنا باركولينا

في البداية الشكر الجزيل للربان الاستاذ المهندس بكور
لتفضله بتعديل اسمي من سونيل الى اسمي الحقيقي محمد حسن
وحقيقة الواحد حاسي انو كانو اتولد من جديد ويا ريت لو زعلنا زول
بالاسم القديم يصفح عننا وانشاء الله لا تسمعون الا كل خير من اسمنا الحقيقي
وما اجمل ان يكون الانسان واضح بين الناس وطبعا دا ما تلميح لما قد يتبادر ولكنها حلاوة الحرية بعد تستر افرزته عقلية الدولة البوليسية التي كنا نعيش بداخلها وها انا اتحرر من عقليتي الباطنة لابدو امامكم هكذا محمد ود حسن ود العمدة محمد عثمان سهلا ممتدا بلا حواجز بلا قيود بلا ( حجاب )
ارجو ان تتقبلوني بينكم ابناو اخا وصديقاوصاحبا
ولكم جميعا اهلي اهل البورت الزينين السمحين

الاخ الكريم العمدة
لك الحب والتحية
أهلين بيك فى حزب اصحاب الاسماء الحقيقية وراجين صورتك ياجميل عشان تكتمل الابعاد
لك الود
أخوك

الحبيب عزيز
تحياتي
الف شكر ليك واخوك امي في شغلانه تنزيل الصور ولكن ارسلتا لاسماعيل وراق عشان يقوم باللازم وقريبا انشاء الله خط وصورة وعقبال الصوت
لك خالص حبي وللاخوان

مبروك أخى وحبيبى محمد حسن العمدة ، (سونيل) سابقا ، على هذا المولد الجديد ، فقد عهدناك صادقا داخل وخارج أروقة حزب الأمة وشابا مناضلا ومشاكسا من اجل اعلاء كلمة الحق ولو كره الكافرون

ولى قدام

هشام

الحبيب يا زول / استاذي هشام شيخ الدين
اخبارك وعموم جدة
الف شكر ليك يا سيدي على دعمك و تزيكتك الغالية
ومع انو انا من صرت من انصار حزب الاسماء الحقيقة بزعامة استاذ عزيز الا ان بعض الاسماء صارت كالعلامات التجارية غالية الثمن مثل اسمكم الكريم
ولك الف شكر مجددا على دعمك اخي وحبيبي هشام

يازول مبروك...بوليسية شنو المعلق الرقبه دى غير الله

اليجى يدليها ..واتمنى من الاخوان يحزو حزوك عشان كان الزول

لقى اخوه يطايبو ،وكان فى فرح والا كره يواجبو وكده،،،،

الأخ ود العمدة
تحية أخوية
و مرحبا بك بيننا

يعني الموضوع سماية ماعيد ميلاد؟

برضو احسن
والله مديدة التمر الذ من التورتة

الاخ محمد نحن بنقبلك حبيب وقريب

ويا هلا ومرحبتين

محمد ود حسن ود العمدة محمد عثمان ** سونيل
فى ذمتك الاحلى ياتو فيهم يا ود العمدة
مش كدة ؟ طيب مالك من زمان .
مبروووك السماية
الجندرية مديدة التمر وانا ملاح الروب واللقيمات
امال
ام وضاح

الحبيب سونيل ـ اقصد محمدحسن العمدة
مبروك الاسم وبعدين ما كلمتنا السماية
الساعة كم عشان اخوك متوحش لام فتفت
عسى ولعل تفك لينا البعاد

الفاتح الصادق

اهلا بمحمد حسن العمدة
سونيل سابقآ

حباب عمدتنا
حبابك..

الحبيب / محمد حسن العمدة / سونيل

تحياتي ، ومرحبتين حبابك الشرفنبو ديارنا ومرحب بميلاد من جديد وكل ناس الطائف .

الصادق خليفة

الاحباب الكرام
خالص حبي وتقديري لحفاوتكم الكريمة
الاخ صديق الموج زمان بنقول الزارعنا غير الله اليجي يقلعنا
حقيقة مافي زول قلعنا لكن الظروف هي القلعتنا من وسط اهلنا واحبابنا ونيلنا واقول انشاء الله نتلاقى من جديد وسط جروفنا وتحت لالوبنا ونخيلنا ونتنسم نفحات مريدي وقهوة شرقنا

الحبيب الفاتح الصادق لقد شغلتنا عنك الدنيا وسرابا وانشاء الله نرجع لايام البالتوك واسماره مع الاحباب

العزيزة الجندرية ابشري والله نحنا تورطتنا عصيدتا مدقلبة بملاح شرموط وحا نسوي السمايا بكرارتابقاموس الشماليي والنعيمية على قول الجزيري وناس قدام بروبن وكمان معاها اخواتا ناس الملوحي والقراصة بوصتين وفي روايه تلاتي واخيهن ملاح الكول واللوبيا وكما قال الشاعر
ملاح اللوبا حاجة تمام
ومغذي زي الحمام

الحبيب الزنجي والاستاذه حنينة وبنت النيل وابو جهينة والصادق خليفة لكم مني خالص الحب والتقدير وارجو ان اكون لكم اخا وصديقا

الاستاذه ام امال طلباتك سجلت الاسماء الاتنين حلوات ويمكن سيدن احلى منهم ( مدعي ) وربنا يتم تنزيل الصورة بس ناقصانا الخبرة
لكم جميعا ايها الرائعون خالص محبتي

واهدي اليكم ابيات الاستاذ الشاعر صلاح احمد ابراهيم
سبع حمائم
سيل عمائم
نحل في البرية هائم
موكب وعد , موكب امكانات أمتنا.
نار ودخان
وثن ,طبل , قرآن
طفل ظل يقوم الليل ويمسك في رمضان
حلم برفاه الأرض وخوف من فتكات الغيب لمقبل امتنا
عذراء كقلب القمة امتنا