تحالف( ود الفاشر و المحسي) للعماري الممتاز..

سادتي ،،
التحالفات خشم بيوت ،، واهلنا الغبش تأسرهم مصطلحات السياسة و فلسفة الساسة ،، وبما ان التحالف شراكة فقد شدني اسم احد المحال المتخصصة في تجارة(سلطان الكيف) رغم اننى من الد اعداء هذا السلطان (السرطان) ولكن للضرورة احكام ...
شارع جبره الصحافة وانا في طريقي الى جهاز المغتربين قبل اشهر شارد الذهن متوجسا من المصير المنتظر هناك من حيث ( فرش المتاع) بلغة العسكرية و غسل الجيب بلغة العامة ،، أتأمل الطريق على جانبيه في محاولة للشرود الذهني ،استوقفتنى عبارة (المحسي) وهي ذات سحر خاص ودر جة عالية من الجاذبية بعيدا عن( التعنصر) ودلالة على عمق الانتماء،، دهشت وانا اطالع اسم المحل على جانب الطريق وجالت في خاطري كمية التحالفات في تاريخ السياسة السودانية والدولية وهذا التحالف النوعي المتمثل في ( تحالف ود الفاشر والمحسي للعماري الممتاز) الذي يحمل دلالة ذات طابع جديد، اعدت البصر كرتين ليتفجر احاس بالراحة والاستغراب معا ،، احساس بالراحة لذلك التحالف ( اللذيذ) رغم انه بطعم التمباك ورائحة العطرون .
ان يخرج الرطانة من عزلتهم ويتداخلوا مع ابناء الوطن الكبير في شراكة اجتماعية وتجارية لهو مبعث للسرور ، وان يقتحم الرطانة مجال جديدا من التجارة غير المعهوده لديهم وان تكون (تحالفا) مع اهلنا في الفاشر اصحاب الخبره واهل السوق يبشر (بشراكة ذكية) للاستفاده من الخبرات (الفاشرية) لولوج عالم( الكيف)، دلالة الاريحية وكرم اهل الغرب وهم يفردون موطىء قدم لاهلناالمحس في امبراطورية سلطان الكيف وهم من تربع علي عرش زراعتها و تجارتها منذ سالف العصور ..
لتدم تحالفات التمباك ولتضف معنى جديد من التعايش والتواصل بين ابناء الوطن الكبير ..
هل يصلح التمباك ما افسدته السياسة ؟؟؟؟

الاخ شلبي
مساقكمي
تخيل من الممكن يكون في تحالف ناجح من خلال التمباك ، لكن سؤال السودانيين المتحالفين ليها شنو، مما وعينا ما في غير كلمة تحالف وهي ابعد ما تكون عن التحالف ، زي حكاية اللجان يعني اذا عاوز تفشل قضية بس كون لجنة

وكل عماري والشعب السوداني بخير

العزيزه Maia
لك التحية والود ،،
طبعا الحاجه الطريفة انو التحالفات اصبحت من مفردات السوق وهو مايعبر عن واقع حال التحالفات البقت (خشم بيوت) ،،وبالمناسبة تحالف التمباك (ود الفاشر والمحسي)حقق نجاح كبير وانتشرت له عدة فروع في احياء الخرطوم الطرفية خاصة مناطق الرطانة في الكلاكلات وهو ما يكشف ايدلوجيةالتحالف في الاستفاده من خبرة ود الفاشر في (تمطير التمباك وفق المعايير المعتمده) و استغلال المحسي لنفوذه بمناطق الرطانة في التسويق ...
ودمتم،،،