لى قطــة صغيــرة..........سميتهــــا سميــــره..

لى قطــة صغيــرة..
سميتهــــا سميــــره..

تنام فى الليل معى..
وتلعب بأصــابعــى..

هل من أحــد يســاعـدنا فى توفيــر قصـص وأناشيــد للأطفال باللهجــة الســودانيـة؟

وشكــرا

عذرى يا حبوب
نحاول مرة تاني
بروح جادة

يللا فى الإنتظــار..

الأاخ العزيز / أبو الريش
أحاول هذه الايام أن ارجع إلى ارشيف الرأى العام و مجلة الصبيان ... مكتب النشر باحثا عن قصص كتبتها فى السبعينيات لكى انشر المجموعة فى كتاب ...
وفى دار الوثائق عن طريق إبن اخى فى السودان ....
وقد افادنى للأسف ما آل إليه دار الوثائق المركزية فى زمن الضياع هذا ... لقد إختلطت جرائد الرأى العام بالتايمز وتبعثرت المجلات والكتب وكل ذلك غارق فى التراب والرطوبة والإهمال الذى لا تتصوره ...
عندى محاولة فى الإجازة للرجوع لبعض الذين يحتفظون بالأعداد القديمة لمجلة الصبيان .. وفيها معظم ما تريده يا أبو الريش ... والله الموفق ...

أخى العــزيـز، وأستـاذى خلف الله عبــود،
الفـزاع، طويـل الباع..
أشكــرك جـدا على هــذه النفـرة، وفى الإنتظــار..

سـلامى لكل أفـراد الأســرة.

شكـرا يا رانى على الإطلالـة.
هـذا نشيــد باللهـجـة المصـريــة، وهـو نشيــد مصـرى.
الهـدف من البوسـت هـو، تجميـع الثقافـة التى تربينـا عليهـا، لأن أطفالنـا لهـم الحق الطبيعـى فى نقلهـا إليهـم.

بابا سافر مكة
جاب لي حتة كعكة
والكعكة جوة الدولاب
والدولاب عايز مفتاح
والمفتاح عند النجار
والنجار عايز فلوس
والفلوس عند السلطان
والسلطان عايز عروس
والعروس عايزة منديل
والمنديل عند الجهال
والجهال عايزين لبن
واللبن عند البقر
والبقر عايز حشيش
والحشيش تحت الجبل
والجبل عايز مطر
والمطر من ربنا
ربنا يا ربنا نحنا صغار إيه ذنبنا

أذكر وانا صغيرة كنت بفكر في النشيد دة واول ما اصل عند ربنا.. ابدأ في الاستفسار
منو ربنا؟؟

وطبعآ الوالد والوالدة كانوا بكل الطرق يشرحوا لي وانا ابحلق في السماء كما كانوا يشيرون لمكان وجود الله

العبرة واضحة..وهي تعليم الصغار ان كل شئ مرده الي الخالق

تسلم ابو الريش..خليتنا نرجع لايام لا تنسي
ومسكين الجيل الجديد..ناس فضائيات ساااي

شكــرا يا حنينـــة.

دى كانـوا ينومونا بيهـا..

هـووووهـا يا هـووووهـا
أبوك ســافـر مكـة
جاب ليك قفـة كعكــة
الكعكـة فى المخـزن
المخـزن دايـر مفتـاح
المفتـاح عنـد الحـداد
الحـداد دايـر فلوس
الفلوس عنـد النجار
النجـار دايـر لبن
اللبن عنـد البقـر
البقـر دايـر علف
العلف دايـر مطــر
والمطـر عنـد الله
لا إلـه إلا الله

الأخ ابو الريش وجميع المتداخلين تحياتي الحارة
أحاول أن أتذكر


يا طالع الشجرة
جيب لي معاك بقرة
تحلب تعشيني
بالملعقة الصيني
والملعقة انكسرت
تاني مين بعشيني

____________

ولكم أفضل تحياتي

ابو الريش...

تسلم اخي لهذه اللفتة البارعة
حقيقي كثيرا ما ينقصنا التوثيق والتاصيل
لقصص وحكايا الاطفال.. وفقك الله في بحثك

ولك هذه الاهزوجة التي كانت جدتي رحمها الله تلاعبنا بها
وارجو ان تملا فراغا ما..

تبدا هكذا بترنيم رخيم.. وسؤال واجابة

يا فرطوق

صنقع فوق

شن بتشوف..؟؟

بشوف القوم

قوم منو..؟؟

قوم عدلان

يا عدلان سل السيف

ختو ليَّ في الكتيف

والكتيف درَّ الدم

شالني بنات العم

ختني في الابريق (هكذا اذكرها)

والابريق ملان حجبات

انط البير بلا عتبات

وامش في الشوك بلا نعلات

توووووووت
بابور كوستي ام رقبة
جات..

(ويصاحب هذه الفقرة الاخيرة دغدغة لاسفل الذقن استجلابا للضحك)


لك ودي

ابو الريش

النملة ام ريش بي تبقى لك شنو؟



ملحوظة

لك كامل الحق في عدم الاجابة

ما عنـدى قريبـة إسمهـا النملـة ام ريش يا سجيمـان..
لكن لو عنـدك حكايـة أطفال فيهـا النملـة أم ريش، قولهـا وما حأزعل.

بالمناسبـة دى يا سجيمـان خلينى أحكى ليك نكتـة، ما عارف إذا عنـدهـا علاقـة بالمـوضــوع:

فى راجل وزوجتـو مســافرين بالعـربيـة، وكل مرة النقاش يحتـد بيناتـوم لحـد ما الزوج يقـرب يعمل حادث.. فى النهـايـة إتفقـوا إنهـم ما يتكلمـوا لحـد ما يصلـوا..
فى الطـريق مروا بمزرعـة، فيهـا حظيــرة كبيـرة بتاعـة حيـوانات.. بقـر.. خنازيــر.. حميــر.. الخ..
المـرة غلبهـا تمـر على الحظيــرة بدون ما تحاول تغيـظ زوجهـا.. قامت قالت ليـه، وهى تشيــر للحيـوانات:
ديل مـوش يبقــو ليك.. ما تســلم عليهـم، فايتهـم ليــه؟
الزوج إلتفت إلى الحظيـرة، و رد عليهـا:
نعــم يبقـو لى بالحيل.. ديل نســابتى، ولو ما الزمن، كان على الأقل نزلت خليتـوم يسلمـوا على بتهـم!

نحن اذا جاء المطر المطر

نجرى و نلعب ....


نسيت اخوى ابو الريش الكبر حصل ياريت تتمها

و مشكور اخى للفكرة و تسلم اخى.

نحن إذا جاء المطــر
المطــر
المطــر

نجـرى ونلعب بالزهــر
بالزهــر
بالزهــر

ثم ننظف ثـوبنـا
ثوبنـا
ثوبنـا

ليكـون ثوبـا متعبــر
معتبــر
معتبــر

لمن كنت صغيره بلعب بي التراب
ماما لبستني الجزمه و الشراب

و باقيها من ما كنت صغير ما حافظو