الاثنين 22/3/2004امتحانات الشهادةالسودانية احبائى دعواتكم معى لوحيدتى شيماء

شيماء يا نفس همس القصائد
شلناك الفة وطيبة خاطر وكلمة حنينة فى دفتر شاعر ..
وجهك المضىء يرتسم ويبتسم امامنا ونشهد له بان اجمل مافى الدنيا اتوزع فيك وكفى ... نهديك فرح البدايات والق النهايات ... وانت تهدينا باذن الله عطر النجاح والسمو والارتقاء بنجاحك فى امتحانات الشهادة السودانية .
ان شاء الله تعود الغيمة الشاردة بالخير والامل والرجاء ... وانت كوعد الغيمة فينا ... تجود الغيمة بالخير و تجودين انت بالفرح والنجاحات وهو عرفان بالجميل ورد بالوفاء لاهل العطاء .
وسياتى نجاحك باذن الله امتدادا لنجاحات وضاح لتحققى لنا كما من العزة والفرح .
احبائى
دعواتكم معى بنجاح شيماء بعد اصرارها على الجلوس للامتحان من السودان بعد ان ظلمنا البشير واعوانه ولم نجد انصاف طول هذه السنين للتعليم ومازالت مشكلة التعليم قائمة ولا نقتصر هذه المشكلة فى البورد فقط .
وكما قالت شيماء ( امتحن من الامارات عشان لو جبت 99،9 لا استطيع دخول اى جامعة او الكلية التى ارغبهابعد ما عمر البشير يشيل الحداشر فى المية بتاعته تقول قاعد يذاكر معانا واقرأ بستة الف دولار قايلنى عويره ليه )
حتى صغارنا شاعرين بالالم والقهر ومهما دفعنا من ضرائب الحال فى حاله.
احبائى دعواتكم معى لوحيدتى شيماء بالنجاح والتفوق ....
امال
ام وضاح

ام وضاح ربنا يسدد خطا شيماء و يرقيها الى اعلى المراقى

اتمنى لها النجاح و التوفيق

أتمنى لها التوفيق .. والنجاح

الحبيبة لنا
شكرا ليك يا ظريفة والامنيات للجميع بالنجاح والرقى لاعلى الدرجات.
سيد الدار بكرى
ما قصرت يا الهميم لك التحايا والله يقدرنا على جزاك .
امال
ام وضاح

العزيز عاطف
امين يا رب ونجاح الجميع فى كل المجالات
شكرا ليك يا عاطف .
امال
ام وضاح

ام وضاح وابوه ......سلام مع الصباح


انشاء الله ياام وضاح

بركة الصباح

والفقراء والصلاح

تسمعى بالنجاح

وبعد داك تجيب ليك النسيب المرتاح

البيتو جاهز تسليم مفتاح

والعربيتو مرسيدس صاح

ويسوقا شهر العسل بى ام جناح


ويحجز ليها عند الولاده جناح

وتخلف ليك حماده وخالد وعازه وصلاح


عشان تبقى حبوبه مشغوله بالعيال والبورد يرتاح

قولى امين...اها قصرت،،،،

آمييييييييييييييييييييييين .
يا صديق يا ظريف تب ما قصرت .
يديك العافية .
عاد دى يرد ليك عليها ابو وضاح عشان راجل كتاااااااب
جابت ليها منافسة خليك مستعد .
امال
ام وضاح

نسأل الله لها التوفيق و أن يجعلها قرة عين لوالديها و أن ينفع بها.

الدعوات صادقات من القلب لشيماء
بالتوفيق والنجاح الباهر...في
امتحان الشهادة السودانية...وربنا
يحفظها ويغطيها...ليكم يا عصام وامال

نرفع الاكف سائلين المولى جل وعلا شانه
ان يجعل النجاح حليفها والتوفيق طريقها
والى اعلى الدرجات يا شيماء يابت ام شيماء
قادر ياكريم .







امال زرعتوا نيمه تانى انا بصراحه هربت
مشيت خشيت الصالون الانيق . لكن بجيكم راجع
قريب وبجيب ناس الصالون معايا ....

لكم اصفى عصير الموده

والله يا أم وضاح قلوبنا معك ومع شيماء وكل الممتحنين في كل بقاع السودان الحبيب وفي المراكز الخارجية (الرياض/جدة) ولدينا نفس المعاناة من السعودية ما كفى عمر البشير ضرائبنا وزكاتنا ومختلف الرسوم حتى جار على درجات أبنائنا ...

رغم كل ذلك نتمنى للجميع التوفيق والنجاح ولن نقول كما قال ذلك الموصوف بأنه مسؤول في قطاع التعليم وهو لا يصلح ليكون مسؤول عن قطاع الكارو حيث قال عن حسم النسب بأنه لولم يتم ذلك سيأخذ ((((أولاد المغتربين فرص أولادنا)))))...

يعني أولاد المغتربين يا ربي أولاد منو ؟؟؟ ولا أولاد شنو في نظر هؤلاء ...


الأهم في هذه اللحظان أن نرفع أيادينا جميعاً مبتهلين إلى الله العزيز الحكيم ألا تحدث مأساة العام الماضي وتنكشف الامتحانات وتباع في الشوارع علناً ويصاب أبنائنا في كل بقاع الوطن بالإحباط.

ولعنة الله على المذكور أعلاه ...

....

الاعزاء
العوض
نزار حسين
محمد الشيخ
الشايقى
شكرا ليكم على الوقفة الرائعة والامانى الجميلة
وانا والله فى حالة عجيبة من التوتر والقلق ولكن اطمأنيت على وقفتكم معاى .
الله يجازى الكان السبب والله يا اخ الشايقى عندى حبوبتى عندها مقولة من زمن عبد الله خليل وازهرى وبعدهم البلاوى المتلتله تقوم من النوم تقول يا حليل الانجليز هسه الجوا ديل شن طعمهم ويقوموا اولادها يشبوا فيها يمه عليك الله اسكتى انت ما عارفة حاجة ساكت تقول ليهم خلاص شبيتوا فينى اها انا سكت وتقول قولتها الشهيرة ( المغص كتير لكن يفتوا لى منو ) .
ونحن فصاحة لسان ما قادرين نفتوا .
الله ينجح الاولاد والبنات الممتحنين من كل بقاع الدنيا قولوا آمين .
امال
ام وضاح

بت عصام المدردحه أكيد النجاح حليفها
وبالمرة دعواتكم معانا عشان توماتي ممتحنات ، سارا وسولارا ، وأها يا صديق الموج دفق مياهك علينا .

كل الاماني لابتكم بالنجاح فى امتحانات الشهادة
واسال الله لها النجاح فى مجمل حياتها وان يسعدكم بها ويسعدها بكم
يارب حذ بيدها وبلغها مقصدها
آميييييييييييييين

من قلبي أتمنى النجاح الباهر لشيماء ، وأسأل الله لها التوفيق ،،
ولتومات أبو ساندرا التوفيق والنجاح الباهر ،،
ربنا يحفظهم جميعا

ام وضاح
سلامتك
وربنا يحقق ليك امنياتك لشيماء

ام وضاح
يا زميلة النيمة الظليلة والهمبريب والعناقريب

انشاء الله بالنجاح لشيماء
وما شاء الله عليها باين عليها الفهم وعرفت للجماعة
ربنا يغطيها ويحفظها ليكم

وبرضو بالنجاح لتومات ابوساندرا

اتمنى لها النجاح و التوفيق

ابو ساندرا
ان شاء الله التومات يتألقن ويهدونكم الفرح والنجاحات
تمنياتى لكن وشيماء ان تكونن من الاوائل باذنه تعالى .
ابو يسرا
لك الشكر وربنا يحقق كل الامانى لابنائنا جميعا .
ود قاسم الهميم
ما قصرت ربنا يجبر خاطرنا جميعا بنجاح شيماء وتومات ابو ساندرا سارا وسولارا .
على عثمان
زميل النيمة الظليلة وينك يا راجل ليك وحشة بالله ادينا طلة عليك الله .
وعقبال نجاح الحلوين اولادك يا رب ونحتفل تحت النيمة .
حنونة الحنينة
وينك يا بت امى ما ظهرت تانى مالك والله زعلانين نيمتنا دى بتتفات
عليك الله تعالى نوريها .
لك الشكر وربنا يجبر خاطرنا ان شاء الله بالنجاح انا ورشيدة ام التومات .
ديمقراطى
ان شاء الله الديمقراطية نلقاها فى التعليم قبل اة شىء ، لك الشكر ولك الود.
ولكم جميعا القيام ..
امال
ام وضاح

ام شيماء
وابو شيماء
دعواتنا لشيماء بالتوفيق والنجاح
وربنا يجعل حياتها كلها مليئة بالنجاحات

كل المنى بالنجاح لشيماء
ولكل فلذات اكبادنا
واسمحى لى اتمنى النجاح واعلى المراتب
للابن الغالى امجد طارق السر التنى

الحبان آمال وعصام..
أخلص الدعوات للإبنة شيماء بأداء جيد في الامتحان.. وبي نتيجة تحقق الفي مرادها ومرادكم..
آمييين يا رب العالمين..

ومع راوية ادعو للأبن أمجد بالمثل..

وللعزيز أبو ساندرا وسارا وسولارا كمان..
ان شاء الله تشوفن أكبر واحسن بنات..
تمنياتي لهن بالنجاح..

هلت علينا هاله
مرحب بيك يا هلوله ولك الشكر وربنا يتمم لينا بالنجاح
راوية الحبيبة
مشكورة وربنا يحقق الامانى ويكمل لينا بالنجاح .
امنياتنا بالنجاح للابن امجد طارق السر التنى ( آمين )
امال
ام وضاح

العزيزة أمال أم وضاح، أمنياتي الصادقة لشيماء بالتوفيق وكل أبناءنا الذين يجلسون للإمتحانات. ربنا يخليها ليك وتفرحي بيها آمين يا رب العالمين.

مكرر

ابو ساندرا شايل قرعتك من بوست لى بوستت وشحد


عينى بارده هن اتنين ومستكثر عليهن الفرد بوست


اها ناس سارا وسولارا ديل داير ليهن نجاح بس والا نجاح وعرس عشان


نكبر ليك الفاتحه.

بركة ربى ياسولارا وساره

تجيبن الشهادات الحاره

واحده دكتوره والتانيه مهندسة طياره

ويجوكن العرسان البعرفوا الدباره

وابوكن يركب اللاندكروزر بدل الحماره

ويركب العدسات محل النضاره

وامكم تتبور باللكزس حاره حاره

وتانى بدل الشحده دى سوى ليك بوست براك عشان نجدع فوقو بى راحتنا.

انشاء الله يا ابو ساندرا تسمع بى نجاحن وتشوف جديدن،،،،،

نتمنى لشيماء وكل المعاها النجاح يا رب
وربنا يوفقهم

نسال الله العلي القدير لها التوفيق في كل خطوة من خطوات حياتها المباركة انشاء الله.

أتمنى لها التوفيق والنجاح لشيماء

الحبيبات رجاء ومشاعر
لكن الحب بقدر ما قدمتن من امنيات وان شاء الله النجاح حليفكن
فى كل شىء .
الامنيات لبنات رشيدة بالنجاح ولامجد طارق وكل شباب السودان .
الاعزاء الافاضل
صديق الموج والله قصيدة بنات ابوساندرا حلوة وتسلم يا ظريف .
كبسيبة
غايتوا صورتك دى ان شاء الله تكف لينا العين والبنات ينجحن نجاح تمام . ومشكور وعقبال كل النجاحات .
اعزائى اسعد والشريف
لكم الشكر وعقبال اولادكم وبناتكم وما قصرتوا ابدا يديكم العافية .
امال
ام وضاح

ام وضاح الوضاحة

ربنا ينجح ليك شيماء يفرحك بيها

اذا رغبت فى دراسة اى شئ غير الطب والصيدلة
نقترح عليك الجامعة الاسلامية العالمية بماليزيا
وربنا يوفقها

1- ودقاسم
شكرآ يا حبيب ويوم فرح فدوى حا أركز في وسط الدايرة وشبال فوزية يسطر جبهتي ذي شلوخ النوير
2- حنينه
مشكورة وإنشاء الله نجيك في الأفراح
3- آمال
أهو أصبحنا شركاء في البوست انا التلتين وانتي التلت
4-رجاء
بت العباسي الحقانية عاجزين عن شكرك ، وليك على يوم فرحك أشعل الدنيا إحتفالات ومهرجانات ، بالمناسبة التومات ديل طوال دينكا بس

5- الموج
وختامها مسك ، قلت شنو أركب الحمارة ، الليلة شيل شيلتك معاها! ، أكيد حا تبني بينك وبينها { كاسر أمواج } تشكر يا صديق يا { صديق}

يااااارب ينجحوا ام وضاح
يخلي ليكم شيماء
ويوفقها ويديها الفى مرادها
ويفرحك بيها يارب
ودعواتنا لسارا وسولارا ياابوهم
وبرضو قولو معاى يااااارب لسارا اختي وشوف لينا طريقة ليها في مركب الموج دي

يااااااااارب
لى تومات عبد الرحمن ولى ساره اختك ولى شيماء وامجد وكل الممتحنين امل بكره

ربنا ينجح شيماء و يفرحك بيها

1- ملكتنا المتوجة
مطلق البرأة الفيك ، كما الأطفال ، يجعلني موقن في إستجابة الرب لك وينجحهن ، ويا آمال أها البوست بقى ثلاثي ، بس شركاء الإيقاد ومن الليلة ملكة سبأ حا تشيل معانا البوست وترد على البتمنوا النجاح لسارا سبأ
ويا صديق تدفق بأمواهك وسوي سمح القول لي سارا أخت ملكة سبأ

2- راوية
أهلآ ،، وإنتي كمان أكيد دعوتك مستجابة ، مش الله نور ليك وجهك البهي

انشاء الله يا ملكة سبأ

يجيك من اختك سمح النبا

وساره تجيب الشهاده المكربه

ويجيها العريس عالى المرتبه

العربيتو ماها مكركبه

وقراشا يفتح كهرباء

وغرف نومو حرير ومذهبه

ويبعد عنكن كل وباء

بركة من صلى على النبى وقال مرحبا

بعدين مادام البوست بقى ثلاثى والله ما بخليه كده

لازم رباعى عشان حيدر ولدى برضو ممتحن وده كمان شهاده عربيه

الله يبعد منو حرامية 11% .

اها يلا نسمعكم برضوا..............

يللا يا ملكة سبأ ، الموج ما قصر ، يلا سوي الكلام السمح والزين في ولدنا حيدر ، المظفر ، باقي الموج ده حقاني ولو قصرتي معاهو حا يغمر البيوت ويدخل بالشبابيك ويهدد الدروشاب بالفيضانات

بيان العظيمة
لك الشكر يا حبيبة والله لدى صديقة طلبت منى ان اسال عن الجامعة الاسلامية فى ماليزيا سوف اكتب لك فى الماسنجر لتفاصيل اكتر .
ابو ساندرا همباتى عديل كدة تشيل التلتين اها جات الملكة وانا حاديها البوست كلة شوف ليك بوست تانى ان شاء الله يا الملكة النجاح والفلاح يلازموا سارة البارة وقصيدتها عسل عديل .
ندى امين يا رقيقة والله التوب يخلوه ليك اوعى تطليعيه خليه مشروع حجاب ظريف ان شاء الله النجاح حليفك دائما .
صديق ان شاء الله ربنا يديك العافية وينجح ولدك يارب من الاوائل .
حيدر وامجد وسارة والتومات وسيماء من المتفوقين يا رب .
امال
ام وضاح
ا

Best wishes to Sheima.

nada

ام وضاح

ان شاء الله ربنا يوقف شيماء وتكون من الاوائل... كية لي ناس ضرائب المغتربين البيشيلو من المغتربين ضرائب قروش ومن ولادهم ضرائب درجات في الشهادة...... والله مصيبة

نتمنى لها التوفيق

كل الامنيات الطيبة لابناءنا الاعزاء بالنجاح والتوفيق

وربنا يجمع الشمل عشان نستمتع بالنجاح0000

الحبيبات
ندى على وفرح ربنا يفرحكم باعلى درجات النجاحات فى دنياكم
ولكن الحب .
اعزائى الافاضل سجيمان وسوركتى
والله يا سجيمان تعبنا التعب ما يفوتهم ان شاء الله ونشوف فيهم يوم
المهم النجاح المشرف عشان ندخل جامعة الخرطوم من بلدنا كيتا ليهم
سوركتى العزيز يجمع شمل الجميع عشان الفرح يكتمل .
امال
ام وضاح