وصيتى الأخيره اليكم....

الاخوه والاخوات الكرام

السلام عليكم ورحمه الله

الحياه من الموت ما مضمونه والزول ممكن يكون ماشى فى الشارع تضربو عربيه ويموت, اها الله سبحانه وتعالى قال انه بيغفر الزنوب كلها ماعدا الاشراك بالله, وعقوق الوالدين وحق الناس
يعنى لو حصل اسأت لواحد او واحده الا اطلب منهم السماح ...لان الله لا يضيع حق الناس ابدا خاصه المظلومين منهم
الحمدلله ناحيه الشرك بالله ده بعيده عنها, واحاول جاهده ان ابر بوالدى...لم احتك مع ناس خارج البورد كثيرا ولم ادخل معهم فى نقاشات لذلك سأتزكر اى شخص اسأت له من قبل وان لم اجدهم عشان اطلب منهم السماح سأدعو لهم عسى ذلك ان يخفف شيئا عما بدرى منى تجاههم

لم يتبق الا ناس البورد وسأحاول ان اتزكر من دخلت معهم فى مناقشات ساخنه فربما جرحت احداهن/هم من غير قصد منى...والرجاءاى شخص لم اورد اسمه هنا ويظن/تظن اننى اسأت لهم بأى شكل فليعفو عنى فوالله نحن ما شايلين من الدنيا ده الا اكفاننا
اعلمكم اننى ايضا مسامحه الجميع ولا احمل اى شئ تجاه اى شخص منكم
كما اطلب منكم ان تدعو لى بالرحمه والمغفره وان تدعو لوالدى بالمغفره والرحمه...واسألو لى حسن الخاتمه والنجاه من النار وان يخفف على سؤال منكر ونكير وعزاب القبر

واشهدكم والله اننى احبكم جميعا ولا اكن لكم سوى الود والتقدير مهما اختلفت اراءونا وافكارناومهما احتد بنا من نقاش


الواره اسماءهم هم ما اذكر اننى احتديت معهم...لكن كماقلت سابقا ان يعفو لى الجميع ان تسببت فى الاساءه لأى شخص كان

الاخ بكرى ابو بكر
الاخ obay_uk
الاخ ابو الريش
الاخ ودقاسم
الاخت تماضر
خاله دوما
الاخت عشه بنت فاطمه
الموناليذا
الاخ ابو امنه
الاخت ساره منصور
الاخ عادل عبد العاطى
الاخ اسامه الخواض
الاخ بلير


هذا ما اذكره الان واسأل العفو لكل من اسأت له ولم ازكر اسمه واخر وصيتى اليكم ان تتفقدونى فى الجنه, ان لم تجدونى فأسألو لى الشفاعه عند رب الناس

...

ملحوظه

سأتوقف عن الكتابه والتعليق فى المنبر الا ان انتهى من امتحاناتى والبروجيكت بتاعى, والرجاء الانتباه ان حاول اى احد استخدام اسمى فى اشياء خارجه للانى سأحاول جاهده التوقف حتى على الاطلاع على البورد لأن الفتره ده حاسمه جدا لدراستى ومستقبلى, ادعو لى الله بالتوفيق


وفى امان الله

لا اله الا الله

لله والرسول يابت الاحفاد

وادعوا لك بالتوفيق دايما


شدي حيلك ....

الحبيبة الغالية بنت الاحفاد
ما تشوفى المعارك المحتدمة دى
السودانيون برغم كل شىء هم الطيبة و الصفاء و هم العفو عند المقدرة و تجاوز المسىء
تصدقى كم من الخلافات هنا انتهت بمجرد كلمة طيبة من احد المختلفين للمختلف معه؟؟؟
وكم من الصداقات تلت عداوات سافرة
وبعدين ده انقطاع ما خروج نهائى ليك و سننتظرك

بالـتــــوفــيـــق إنـشــــاءالــلـــــه

الاخ الكريم ود العباسيه

اشكرك كثير, العفو والعافيه وتشكر للدعوات


الحبيبه القريبه الى قلبى لنا

الله يطمنك زى ما طمنتينى, الرجاء الا تنسينى من دعواتك فأنا فى اشد الحوجه لها هذه الايام, سأتوقف من اليوم عن الكتابه والتعليق فأنا فى اشد حوجه للوقت الذى اقضيه هنا, وسنتى الدراسيه ده مهمه لى شديد فأدعو لى بالتوفيق, سأتى كلما سنحت لى الفرصه باذن الله وما اوصيكى على نفسك وزوجك...


الاخ الكريم حسين

الله يبارك فيك ومشكور للدعوات


وفى امان الله

لا اله الا الله

بنت الاحفاد
لا والله يا اختاه
لم نلقي منكم اساءة كل ما لقيناه هو حبكم وايمانكم بالاسلام ..واتمني ان تسامحيني ان اساءنا اليكم بجملهاو مسسنا احساسكم بكلمه او جرحنا مشاعركم بحرف
ان الذي بيني وبينك هو الاختلاف في زاويه النظره للامور :انك تنظرين لكل شي من خلال الدين الاسلامي وانا انظر اليها واضعآ في اعتباري الاديان الاخري
ولن افشي سرآ ان قلت لك ان صديقه غاليه علي وربما اليك قد لامتني يومآ لانني لم استطيع فهمك علي حقيقتك...لقد كانت محقه ...
امنياتي لك بالنجاح والتوفيق
واتمني ان تلقي لنا ولاهل البورد بالسلام بين الحين والاخر متي ما سمح وقتكم..حتي تطمئنينا عليكي
في رعايه الله وحفظه اتركك

الأخت بت الأحفــاد،
الله يحقظك ويغطيك..
لم أجـد منك إلا الإحتـرام الأخـوى والتفهـم الكامل.. ولكن بدورى أطلب منك الصفـح إذا وجدت منى شيئـا حرك خـاطـرك.
العفــو والعافيـة..
كما أدعـو لك بالتوفيق فى دراستك.. أنا زاتى طالـع من إمتحانات نص السمستـر قبل يومين بس، وأستطيــع أن أتخيل الزرة
يللا بالتوفيق، ونشــوفك قريب إن شـاء الله.

الاخت بنت الاحفاد

سلام جاك
لم اشعر قط انك كنت حادة معي

تمنياتي لك بالنجاح

المشاء

الحبيبة الغالية بنت الاحفاد والله عافيين ليك لله والرسول
وانت نعم الاخت الوفية الصادقة والحنونة والله لكن كلامك
يبكي الحجر صحي الموت ده بيخم في الناس خم شديد خلاص
الواحد بس حقوا يكون جاهز مشتري كفنه وخاتيه في الدولاب
ويكون مستعد لليوم داك .. الله يديك طولة العمر وتشوفي
اولاد اولادك انشاءالله وشدي حيلك في الدراسة والله معاك
وقبال الامتحانات اقراي صورة يس وانشاءالله ربنا حيوفقك
ودعواتنا معاك ياغالية .

قلوبنا معاك ودعواتنا ليك بالتوفيق والنجاح الباهر يرفع راسك وراس اسرتك ياغاليه ........
لك الحب والاماني الطيبه
ماتنسي تقري سورة هود: { وماتوفيقي الا بالله عليه توكلت وهو رب العرش العظيم }
في رعاية الله
دوما
نوف

Salam Sis Bit Alahfad

From me and the family all the best to U
Take care and as I told U we do not accept less than Excellent, and we R sure U R qualified 4 that
Fi Amani Illah

بالتوفيق انشاء الله

بت الاحفاد

تحية طيبة


في الحقيقة استغربت جدا لما لقيت اسمي في القائمة وما متذكر انو كان في وقت من الاوقات بينا مشكلة وحتي الحدة الممن تصحل كانت في اطار طبيعي جدا ما حصل شعرت بانها حدة ..

عموما ده يبين انو حساسيتك عالية تجاه الاخرين

ربنا يوفقك

اللهم انى اسألك فهم النبيين و حفظ المرسلين و الهام الملائكة المقربين برحمتك يا أرحم الراحمين.....الهم اجعل ألسنتنا عامره بذكرك و قلوبنا بخشيتك و أسرارنا بطاعتك أنك على كل شىء قدير...حسبنا الله و نعم الوكيل

بعد المذاكرة
اللهم انى استودعتك ما قرأت و ما حفظت و ما تعلمت فرده عند حاجتى اليه أنك على كل شىء قدير...حسبنا الله و نعم الوكيل

يوم الامتحان
اللهم أنى توكلت عليك و سلمت أمرى اليك لا ملجأ و منجا منك الا اليك

دخول القاعة
رب أدخلنى مدخل صدق و أخرجنى مخرج صدق و أجعل لى من لدنك سلطانا نصيرا



بالتوفيق أختي بنت الأحفاد

قبل بدء الامتحان
رب اشرح لى صدرى و يسر لى أمرى و أحلل عقدة لسانى يفقه قولى بسم الله الفتاح , اللهم لا سهل الا ما جعلته سهلا و انت تجعل الحزن ان شئت سهلا يا أرحم الراحمين

أثناء الامتحان
لا اله الا انت سبحانك انى كنت من الظالمين يا حى يا قيوم برحمتك استغيث , رب انى مسنى الضر أنك أرحم الراحمين

عند النسيان
اللهم يا جامع الناس فى يوم لا ريب فيه أجمع على ضالتى

بعد الانتهاء
الحمد لله الذى هدانا لهذا و ما كنا لنهتدى لولا أن هدانا الله

Quote: نحن ما شايلين من الدنيا دي الا اكفاننا

لحظات وينهال التراب ..
وتفرغ من شؤونها الأقدار ..
كم هي قصيرة ..
كم هي شحيحة الحياة ..

بنت الأحفاد ..
ربنا يجعل ليك في كل خطوة سلامة
ويحفظك أبدا بريئة ونقية
وامنياتنا لك بالتوفيق ودوام النجاح ..

صلاح / شتات

الاخت بنت الاحفاد
امنيات صادقات بالتوفيق والنجاح

لم اتدخل معكى من قبل فى اى نقاش سخن او خلافه
يمكن لنو الخطوط متوازيه بيننا ولم تتقاطع
عموما امشى وتعالى وتأكدى جدا ان تقاطعت خطوطنا
يوما فان الحميميه تحفها وكذلك الاحترام

وختاما اتمنى لك عمرا طويلا فى طاعة الله وتقواة
لك المنيات الطيبه ويخلى ليكى والديك ويمتعهم وانتى بالصحه والعافيه


وتانى ربنا يوفقك واعلى الدرجات يارب



ولك الموده

انا عافي ليك اي حاجة الا القروش الدينتك ليهاالسنة الفاتت

الابنة الغالية بت الاحفاد

تمشى وتجى سالمة وغانمة ومنصورة

وفقك الله فى الدنيا والآخرة

والله يطول عمرك وعمر والديك ويديم عليكم الصحة والعافية فى دينكم ودنياكم.

آميييييييين

تحياتى

..
.
أنا اسمي ما مكتوب ؟؟
الحمدلله ..
والله الدعوات ليك من الارض المقدسة ومن البطين الايمن
ربنا يوفقك ويجعل ليك فى كل خطوة بركة
ودعوات خالصات بالتوفيق والنجاح
وابقي عشرة على كلام كبسية دا عشان امورك
تتسهل كلها باذن الله .

دوما لك الود والاحترام

الاخت الكريمة بنت الاحفاد

نشكرك علي الوصية الطيبة ونسال الله ان نكون عند حسن ظنك

ونسال الله ان يوفقك في دراستك وفي كل امور حياتك

والله الموفق