زي المنقــة!

حطت طائرة من طراز بوينج تابعة للخطوط الجوية السودانية امسية
امس على (رنوي) مطار الملك خالد بالرياض بعد ان اعلن الكابتن لكل الركاب ان (ينكربو ويوقفو التسجير) استعدادا للهبوط..
هبطت الطائرة وعلى متنها عدد من المسافرين منهم من هو قادم من اجازة قصيرة قضت على الاخضر واليابس وابتلعت كل الكاشات الفى جيبو ومنهم من هو قادم لاول مرة ممنيا نفسه بلم الريالات (الممحوجة)
بعد ماباع البيت لشراء تلك الفيزا ومنهم ذات الشلوخ العريضة الجايه
(تنفس) بتها فى السعودية وهلماجرا..
لحدى هنا كلو تمام؟؟

المثير فى الامر ان عفش كل الركاب تحول الى منــــــقــة!
كيف الكلام ده!! والله صحى مننننننقة عديل كده....
يا جماعة كيف الكلام ده؟!!! طيب الشنط والكراتين الفيها دكوة وشمار
وشطة وكمان كرتونة ام شلوخ المليانة طلح وشاف؟!!!
كلها منقـــة سودانية خااااالصة

ولا (مخلاية) ما اترفعت من مطار الخرطوم تصدقوا؟
اها العمل شنو؟
السيد المسؤول: يا جماعة والله آسفين بس اضطرينا لكده بأوامر عليا
وان شاء الله السفرية الجاية حنجيب ليكم عفشكم
معنى كده ركاب السفرية الجاية ما عندهم عفش؟؟!!
وجوطة لرب السما....احسن حاجة انو الزول المشيت استقبلو ما جا
قلت لنفسي مكسب اكيد حيجى بسفرية الشمام
.
كل ذلك يضاف الى سجل سودانير العامر بهذه الحكايات المثيرة للغضب
والضحك فى آناً واحد

رايكم شنو؟

اشوفكم فى ساعة خير

ولدطه
المنقه ده الظاهر دخلوها الاتفاقيةالحصرية ونحنا ماعارفين
ولوكنتهمن ضمن الركاب احسن حاجة اغنى واقول
لون المنقه ياالشايل المنقه
ماعارف كيف نحنا بنشقى
رحم الله الناقل الوطنى واسكنه فسيح حواشته مع الترترات والديسكى والعاقبة لفيران الجزيرة
تحياتى

تعرف يوليد يا اخوي مرة راجع الخرطوم بسودان طير مشيت المطار من الساعة ثمانية صباحا وحالتي متأخر بقينا قاعدين منتظرين في المطار طبعا حتفتكر انه الطائرة اتأخرت ابدا والله جات في مواعيدا إلا ادوها عين وقالوا في الخرطوم في كتاحة ، وبعد شوية جات طيارة من لندن وبرضو عشان الكتاحة نزلت في جده ومسارها كان الخرطوم نيروبي جزر القمر ، ولحدي هنا كويسين قدر الله مابيترفع قام ناس نيروبي وجزر القمر احتجوا قالوا هم ماعندهم قضية بالخرطوم اها اتحركت بيهم الطائرة وانتظروا ناس الخرطوم ، واحنا افتكرنا حتمشي وتجيهم راجعة وحياتك ياخوي ثاني يوم الساعة واحدة صباحا قامت بينا الطائرة ودفسوا معانا الباقيين دفس وربنا يسألني يوم القيامة مجموعة كبيرة مشمعة .

الاحباب بلدى حبوب،على عثمان ودكين
لكم التحية وانتم تتكرمون بعمل(click) على بوستى فى زمن اصبح فيه الclick) غاليا ولأن البوست عنوانو قصير (وكلام القصير ما بتسمع)ما فى زول اشتغل بى
عموما موضوع (سودان طير) وملفها غنى عن التعريف فى مثل هذه المواقف
ولان النقد والسب لم يحركا ساكناطوال عمرها العامر قلنا نعبر عن سخطنابالمنقة ويختلف الامر اذا كنت شاهد عيان.

تعرفوا يا جماعة انو العفش فى سودان اير بيسافر اكتر من الراكب نفسو
يعنى مثلا تكون جاى من القاهرة للخرطوم عفشك يمشى نايروبى او من لندن يمشى ابو ظبى او العكس ويا ريت لو بخلو الواحد يمشى يجيب عفشو براهو كان على الاقل شفنا مدينة الضباب ونعم جوازنا(المهترى) بفيزانجليزية تكون فخرا لابنائنا من بعدنا بعدالتكتم عن سبب الزيارة طبعا.
اسمعوا الحكاية الصغيرة دى :كنت مسافر من الخرطوم الى جده ونادى المنادى بالتوجه الى البوابة بعد انتظار طويل ..وانا على اعتاب سلم الصعود لاحظت انا هنالك جزء صغير (مقلوع ) من جناح الطائرة فقلت بينى وبين نفسى أسال واحد موظفى الخدمات الارضية احتمال يكون ما شايفها قال لى يا ابو الشباب ياخى اركب ساكت عليك الله)...
ولولا والله ثقتنا فى كباتننا- الله يخليهم لينا- كان ما ركبنا وكان مشيناال IATA عدييل كده.
والله يا اخوانا -حكمة الله- انا سافرت كتير لكن للتاريخ والله ما شفت لى سفرية ثابتة زى دى لا مطابات ولا هزة ولا رجفة....الله ما كريم وعارف الحالة.
اهدى هذا الموقف الطريف كقدر من الماء البارد يصب على نار نقاشات البورد واهله فى مدهم وجزرهم هذه الايام..
هدية كده بلاش لا قرش لا تعريفة..
ولى عودة

استودعكم الله

وليد يا وغد
تشرني قدام محل البطاطس ؟؟

بعد الاربعين ريال ما داير معاك.

دكين يا ابوالدال
لم يحن الوقت - الذى لم تعيره اهتمام- للكلام عن البطاطص فما زلنا
فى محيط تلك اللذيذةالصفراء التى تسر الناظرين.

قلت لنفسى -وانا اتطلع للساعة التى تجاوزت التاسعة والنصف- دكين لمتين؟

عموماً لا زلت عندى كلمتى بتحمل كافة النفقات حتى لا يراق ماء وجهك

لك ودى

أخ وليد
طبعآمحن سودان طير ما بتتعدد
وحكاية الشماعة دي قالوها لينا ناس سافروا من لندن للخرطوم..
اما عن حكاية المنقة دي..
فالجماعة شغالين تصدير ..وانشاء الله المسافرين عفشهم يطير
هذا هو ديدن تعامل سودان طير...ورحمة الله علي الناقل الوطني

الاخت حنينة...سررت وانا اقابل-وكلى حنية- مداخلتك اللطيفة

قلبى مع حبيبتى ( المنقة السودانية) وهى تسب وتلعن فى تلك الامسيةوهى (لا ايدا لا كراعا) ولم تقترف ذنب سوى انها جات بطيارة ركاب بدلا عن طيارة شحن لتنزل برداوسلاماعلى بطون اهل الجزيرة العربية فهنياء لهم.

موضوع سودانير طوييييييل طولة بالنا.

السؤال يا اهل البورد:
* لماذا لا تخصخص سودانير ؟
وجهة نظر قابلة للنقاش ......ادونا آرائكم احبائي طيارين مهندسين،اقتصاديين ورجال اعمال وكل اهل الحارة حتى يتعافا الناقل الوطني ونرتاح.

حنينة... ما تشيلى مع الحنية هم
لكم ودى

الاخ وليد طه

مش كويس انه الركاب ذاتهم وصلوا ، يعني مرة طيارة مع ركاب بدون عفش ومرة طيارة وعفش بدون ركاب واكيد حتكون في مرة الركاب والعفش يصلوا والطيارة ما تصل !!!
مع سودان طير توقع غير المتوقع
ويجوا يقولوا ناقل وطني
في ناقل وطني اصعب من كده؟؟؟؟

مايا اللطيفة لكى ودى

بس ما اديتينا رايك فى قصة الخصخصة دى

ضرورى بالله
هلم يا بورداب

وارمو لقدام