الخرطوم تغتصب عفراء ليلاً

عن اي بلاد نتحدث وعن اي ابداع وثقافة تتكلمون وعن. عن حقيقة ماحدث ليلة امس بمركز عفراء التجاري يوم عرسه امتدت يد الغدر والحقد لتسرق الفرحة من افواه اصحابه وكل الخرطوم وهي مزهوة بجمال ذلك الصرح البديع
عن بلاد بها مليار وزير ماجور ومليار شاعر يلتق في الحروف ومليار كاتب يحكي من قصص الثعالب والتفاح والغراب النبيه
عفراء يوم الزفاف كسودانيات الموضة اجتهدت في الفير ولكسيد ار . ولم تكن تعلم بان هنالك نوع من الهرجلة في سودان ال50 % ثروة وسلطة وسلاح وشعب
فقد عادت عفراء البنت الحزينة اكثر من حزن عاصم بعد حطمت تلك الجموع كل ما كان يبرق وكل ماهو غالي
اقترح بان نذهب في رحلة محو امية ال28 مليون سوداني ثم نذهب بهم لحمام كبير وبعدها نعلمهم ثقافة الاعتراض لا التدمير فليذهب وفد الحكومة الزائر الي الجحيم وليذهب فنان الحفل الي حيث لا رجعة فقط تبقي لنا عفراء المبنى لنفاخر به اسواق العالم

قول

تحدث

ابن

افصح


عفراء الموول ...كسروه؟؟

الريموت كنترو؟؟


حصل شنو يا شاموق..ولسه ما حكيت لينا عن السودان..بحسك الشاعر


قوووول

والله ياتمااااااااااااااااضر حقيقة انت ست وجعةليلة امس اثبتنا للعالم باننا دهماء بان السودان (دلوكة وعودها لين)رااااااااااااح المووووووووووووول وراحة معاة وسامة مصطفي سيد احمدزادت اسعار الرغيف و الشعب الجاهل صاحب المليار فنان ومبدع وطمبار وزمبار يفرغ كل غله في احدث منشاء بالبلاد

يازول الحصال شنو هجمتنا بالله وضح بالعربي وخلينا نفهم الحاصل شنو والله مافاهمين حاجه الموضوع لو الغاز

العزيز شمهروش كل سنة وانت طيب
ثقافة السودان الجديد القادمة هي ثقافة (خنقو رماهو)

قامت مجموعه كبيره من الجماهير باحداث اعمال شغب وتخريب واسعه فى المركز وهشمت زجاج العربات وخربت واجهات المركز والحدائق الداخليه ولم تنجح حتى محاولات شرطه النجده والعمليات فى تفريق المشاغبين والسيطره على الموقف الى بعد فتره من الزمن
الموضوع في منبر صديق

..
.
خسارة والله ..
تصرف ينم على عدم المسئولية والهمجية وتخلف الفكري
وحضاري وافتقارنا للحس الوطني ، فمهما كانت الاسباب والمبررات
بعدم السماح للمواطنين الغلابة التعابه بحضور الافتتاح الا ان هناك
جانباً مهما لا يزال مفقوداً فى بلادنا وهى الوطنية والشعور بالمسئولية والتخلف الذى يسوق الى مثل هذه الانفجارات ..
ورغم ان البعض ساق المبررات بعدم اهتمام الدولة بالاستثمار فى القطاعات الزراعية والصناعية والابنيات الاساسية للبلاد من تعليم وصحة
وخدمات تفتقدها العاصمة وكل الاقاليم الا ان هذا ليس سبباً لعكس صورة
غير حضارية وارهاب الاستثمار الاجنبي وان كان فى بعض المجالات التى قد لا ترفع من البنية التحية للبلاد ..
بس ياهو دا السودان يا شمهروش
بلد الشعراء والقتله
بلد الساسة والادباء
بلد الفوضى والهمجية
بلد العلمانية والاسلامية
بلد الفقراء والاغنياء
بلد الطبقات والدرجات
بلد المرض والمستشفيات الخاصة
بلد الجوع والمول
بلد الحوجة واللا حوجة ..
وعندما تنظر لهذه المتناقضات فأنك قد تجد للفوضى والهمجية ما يبررها، وان كنا نرفضها ..

وكان الله فى عون الشعب والوطن ..

انا لله


عفراء منو؟

اشياء مضحكة مبكية ، هي الخرطوم تغرق في النيون ، بينما تسبح البلاد في ظلامها ، اي مول واي افتتاح ، اعتقد ان الموضوع كله هرجلة في هرجلة ، هل هذا وقت مولات ، ثم ماذا تعني هذه الكرنفالات الوهمية .. هل افتتاح مول في عاصمة بلد تمتد مساحته مليون حزن .. يحتاج لحضور اجانب ولجان احتفال ومهرجانات .؟ ماذا دهى هؤلاء .. لا اعرف حكاية الافتتاح هذه التي تبدأ بالكباري والزقاقات الى المولات ... وغيرها في كل مدن العالم تبنى في كل ليلة مراكز تجارية وطرق وغيرها ولم نرى رئيس يرقص على كبري او جمهرة جوقة من اللصوص تفتتح مركز تجاري .. وما دخل الفقراء ومصطفى سيد احمد يا شمهروش بهذه الزفة .. ؟ لا اعرف هل احزن على المول ام على سواعد المغبونين التي لم تجد ما تطاله الا الواجهات الزجاجية والعربات ... كم اعياهم رمي الجمرات هذا .. ان المسألة ليست في تخلف شعب او عدم قدرته على مسايرة حضارة العصر ، ان مثل هذه الاحداث هي انعكاس لحالة الغبن التي وصل اليها شعبنا ، وحالة اليأس .. وحراق الروح .. كيف لا يمكن ان تنتج حالة مثل هذه تكسير واجهات مبنى يستفذ في الانسان المغلوب صبرة ويوصلة لحالة ان يكسر اي شيئ حتى نفسه .. يا جماعة انظروا للبلاد من طولها وعرضها دماء تسيل في كل شبر .. لاجئين في عراء الدول المجاورة .. لاجئين في بقعة من العالم من اقصى الصقيع الى اعلى درجات حرارة الشمس .. والخرطوم ترقص على افتتاح مول .. هذا زمن المهاذل .. واللعب بجراح هذا الشعب المسكين .. لا اشعر بأي اسف على اغتيال مول ، او عربة ما لا اشعر بأي فرح لما حدث ايضا .... هي حالة تفقد فيها الشعور بأي شيئ .. وعندما تقارن بين اغتيال اشجار الحديقة او قتل الجنايني الذي يشذب زوائدها تجد نفسك في مقارنة بين انسانيتك وموقفك من موت الانسان ام الشجرة وايهما اولى بالايقاف ..اولا .. انا من انصار حماية البيئة لكن انصار حماية الانسان اولا ... كل هذا عبث ولتكن عفراء هذا الوطن .. حليبا لأطفالنا .. وجرعة امان .. لتكن حبا وسلاما يعم فيافينا الجديبة ويوقف نزيفنا اليومي وليذهب المول ومن بناه الى الجحيم .

..
.
سلام يا سجيمان

عفراء تكاد تشبه مدلينا وان كان الفرق جلياً ..
فهذه جنين هجين من اب تركي وام سودانية من قبيلة انقاذية
يديرها عمدتها ود طه و ابناء عمومته.

تحياتى ،،

تبلدينا

لكن دحين الخرتوم دي مو انتاية؟......الله يكفينا شر الما نقدرا

شمهروش

Quote: رحلة محو امية ال28 مليون سوداني ثم نذهب بهم لحمام كبير وبعدها نعلمهم ثقافة الاعتراض

وما ذنب هؤالاء ال 27 مليون اذا افترضنا ان المليون فد اجرموا فى حق عفراء وانا معك ادين هذا الاسلوب الغير متحضر ولكن لا يمكن نجريم الجميع .
ولك وافر الشكر والتحايا

الجوع الكافر لايرحم

الجوع الكافر لايرحم

الجوع الكافر لايرحم

احذروا جيوش الجوعي

احذروا جيوش المشردين

احذروا ارتال المظلومين

اي جمال هذا الذي يغزل من عصب الفقراء

اى زهور تلك التي تسقي من دموع الامهات

واي (بولينج)للجوعي ومبتوري الاطراف...


والايدو في النار ماذي الايدو في الموية

سجيمان يا اخوى احتمال تكون عفراء دي الحنكوشة الاتخلعت !!!!

أؤيد كل ما جاء فى رد الأخت مريم الطيب؛فأنا هذا المبنى لا يهمنى فى شئ غير أن المواصلات بتجيبنى بى دربه!
أخى شمهروش الجمال ليس فى المبنى الخائف عليهو؛الجمال أن يدخل هذا المبنى ال 27 مليون .وجميعهم يستطيع أن يشترى ما يسد الرمق.
وإلا إلى الجحيم كل الرموز الرأسمالية التى تؤسس للجمال فى مبنى يأتى عليها بالكثير؛ وتؤسسللقبح فى حياة شعب بأكمله.

العزيز شمهروش لك التحية

لا تستغرب ابدا ان يكون هنالك فلة من الحاقدين تفعل مثل هذه الامور
لكن اخي رغم هذا سوف نحلم بسودان خالي من الشماسة والحاقدين
ولا تستغرب اخي من ان ياتي بعد قليل ليصفك بانك كوز او انقاذي
فهذا هو ديدنهم في قياس الامور
حطم كسر
لا يهم
والله لقد احزننا هذا الخبر وكان هذا المول ملك لي

والغريب في الامر هذ سابقة لا تحدث الا من سوداني

الي متي نظل في هذا الجهل
نعم نحن نعادي ثورة الانقاذ لكن علي الاطلاق لا نعادي ان نري مركز تجاري ضخم قام بايادي اجنبية دفعت من حر مالها لتبني ثم ناتي لنكسر السودان ثم ناتي ونقدم لها هذ التصرف المشين
اصابني الذهول والياس من هذا الوطن

واللـه الواحد يستغرب أكثر من مثل هؤلاء الذين يهللون لمثل هذه الفضائح ـ أليست هذه نعماء ثقافة اقتصاد السوق التي يتنادي بها الليبراليون ـ والتي يتنعم معظم الشامتون في ظلها سواءآ في الشرق او في الغرب ؟؟؟ ـ أليست هي سياسة الغاب في عالم اليوم ؟؟ والتي يعيش بيل قيتس و مشردو نيويورك تحت سقفها في نفس الوقت ـ أذن لم ذرف دموع التماسيح باسم الغلابة والشماشة؟؟ ــ
والله فعلآ شئ محبط ـ وزي ما قيل ـ متي يبلغ البنيان يومآ تمامه اذا كنت تبنيه وغيرك يهدم ؟؟ ــ
خلونا بقي نعيش مع اسواق الجمع واسواق الشمش ـ

Quote: نعم نحن نعادي ثورة الانقاذ لكن علي الاطلاق لا نعادي ان نري مركز تجاري ضخم قام بايادي اجنبية دفعت من حر مالها لتبني ثم ناتي لنكسر السودان ثم ناتي ونقدم لها هذ التصرف المشين

الأخ عمر مهدي،
لا أود التعليق على وصفك لنظام الجبهة " بـ"الثورة"، ولكن ما أود قوله هنا هو أنه لا يستقيم عقلاً أن "تعادي" الإنقاذ و"تؤيدّ" سياتها... خصوصاً أكثرها انحطاطاً واستفزازاً لجموع الجوعى والفقراء الذين لا يملكون حتى قوت يومهم.
فالذين افترسهم غول الإفقار والعوز منذ 30 يونيو 1989 وحتى افتتاح هذا المول المستفز ليسوا "قلة"، كما ذكرت، وإنما أغلبية ساحقة. لكنني لم أفهم من هم "الشماسة" و"الحاقدون"الذين أشرت إليهم. ترى، هل تقصد أن من شاركوا في ما حدث "شماسة" و"حاقدين"؟؟؟

Quote: والغريب في الامر هذ سابقة لا تحدث الا من سوداني

ولكن السابقة الحقيقية والأمر الأكثر غرابة هو أن السودانيين لم يحدث أن تعرضوا لمستوى العوز والإفقار والجوع والملق الذي جاء مع دولة المشروع الحضاري، التي طبقت إقتصاد عبد الرحيم حمدي ومستشاري بنوك العيش في بلد تعاني غالبيته الساحقة من الفقر والمرض والأمية ورفعت يدها حتى التعليم والعلاج مما اضطر جيوش المرضى، في ظل أجواء الدجل والخرافة، الى اللجوء الى "عيادات" العلاج بالقرآن!!!!

مع الود،

ع ع

Quote: نعم نحن نعادي ثورة الانقاذ لكن علي الاطلاق لا نعادي ان نري مركز تجاري ضخم قام بايادي اجنبية دفعت من حر مالها لتبني ثم ناتي لنكسر السودان ثم ناتي ونقدم لها هذ التصرف المشين

الأخ عمر مهدي،
لا أود التعليق على وصفك لنظام الجبهة " بـ"الثورة"، ولكن ما أود قوله هنا هو أنه لا يستقيم عقلاً أن "تعادي" الإنقاذ و"تؤيدّ" سياساتها... خصوصاً أكثرها انحطاطاً واستفزازاً لجموع الجوعى والفقراء الذين لا يملكون حتى قوت يومهم.
فالذين افترسهم غول الإفقار والعوز منذ 30 يونيو 1989 وحتى افتتاح هذا المول المستفز ليسوا "قلة"، كما ذكرت، وإنما أغلبية ساحقة. لكنني لم أفهم من هم "الشماسة" و"الحاقدون"الذين أشرت إليهم. ترى، هل تقصد أن من شاركوا في ما حدث "شماسة" و"حاقدين"؟؟؟

Quote: والغريب في الامر هذ سابقة لا تحدث الا من سوداني

ولكن السابقة الحقيقية والأمر الأكثر غرابة هو أن السودانيين لم يحدث أن تعرضوا لمستوى العوز والإفقار والجوع والملق الذي جاء مع دولة المشروع الحضاري، التي طبقت إقتصاد عبد الرحيم حمدي ومستشاري بنوك العيش في بلد تعاني غالبيته الساحقة من الفقر والمرض والأمية ورفعت يدها حتى عن التعليم والعلاج مما اضطر جيوش المرضى، في ظل أجواء الدجل والخرافة، الى اللجوء الى "عيادات" العلاج بالقرآن!!!!

مع الود،

ع ع

عفراء مول والافتتاح بكل هذا الزخم الاحتفالي لم يكن يعني الا مزيد من الاستفزاز لشعب يبحث عن ما يسد الرمق , يبحث عن حليب لاطفالة , يبحث عن علاج لمرضاه
لذا لا يمكن ان ننظر لما قام به البعض الا على انة انفعال لحظي حدث نتيجة لاستفزاز معين

Quote: [عفراء مول والافتتاح بكل هذا الزخم الاحتفالي لم يكن يعني الا مزيد من الاستفزاز لشعب يبحث عن ما يسد الرمق , يبحث عن حليب لاطفالة , يبحث عن علاج لمرضاه لذا لا يمكن ان ننظر لما قام به البعض الا على انة انفعال لحظي حدث نتيجة لاستفزاز معين

منعم وضعت يدك فى الرجح

انا شخصيا كنتا اشتركتا فى هذا التكسير
هل هذا المول اولويات

من زمن طويل كنت اتمنى اكسر حاجات الشهيد الفاخرة ديك
لانه اولاد الشهداء جعانين وامهاتهم جعانين
وما لاقين حق العلاج القروش مشت فى المظاهر
وتانى نفسى برضو اكسر عربات وديوان الزكاة
لانها فى السودان بس للعاملين عليها
ونفس اكسر واكسر.. حاجات كثيرة بتحتاج تتكسر فى البلد
ونبدأ نشوف الاولويات
بعدين نجى للحاجات الرفاهية

جوع شنو ال بخلى زول يكسر املاك الناس ؟؟؟
و اظنك يا بيان كنتى من الطلبة اللى لمن يزعلوا من ادارة الجامعة بيحرقوا المكتبة ؟؟؟
ده هو الشعب السودانى . دى اخلاقنا . و ما تقولوا اسفزاز و لا جوع
جوع شنو اللى بخلى طالب فى جامعة محترم يكون عايش فى كوشه فى الداخليه . و بس ما ينط لى واحد منكم و يقول تدهور حال الدخليات و الحكومة ما قاعده تصرف عليها
يا اخى مهم كيف الحال الداخلية , بس النظافه سلوك شخصى . يعنى عسل ملايتك و نظف الاوضه حتى لو كانت مكسرة
ده هو سلوك السودانيين .
ده بالضبط ذى تكسير الجامعات و عربات الناس فى الشارع

"انا شخصيا كنتا اشتركتا فى هذا التكسير"

عفارم عليك يا بيان، وعفيت منك.

وجاى راجـع للتعليق على الموضـوع.

شئ محزن حقا والموضوع فية كثير من الاستفهامات ؟؟ ولكن السؤال يفرض نفسة هنا ماذا استفاد هؤلاء هل امتلآت بطونهم بعد هذا التخريب ؟ وماذنب الكم الهائل من الشباب والشابات الذين وجدوا ضالتهم بعد ان عجزت حكومة بلدهم في توفير وظيفة ملائمة يستطيع من خلالها ان يعيش بشرف ؟ كم بيت كان سيفتح من خلال هذا العمل الضخم الذي لم يساهم فية السودان بشئ ! هل هذا جزاء كل من تخول له نفسه بآستثمار اموالة في السودان؟ وكيف ستبني الحضاره التي نناشد لها ؟هل ذلك من خلال شعبنا الكسول الذي ليس في جعبتة سوي الاشتغال بالسياسة واهل السياسة ؟ كيف ستمتلئ بطون الجوعي ؟ بالتخريب؟...
لقد عاش معظمنا في الآونة الآخيره بحكم نفس الظروف التي يعاني منها من تركناهم خلفنا ولم تسمح لهم الظروف لهم بالاغتراب كما يحلو للبعض تسميتة وعشنا في الدول الغربية كامريكا وكندا ووو سؤالي كيف الحياه هنا هل استطاع احد منا ان يؤمن سبل حياتة اليومية دون ان يعمل ؟ من لا يعمل هنا يمووووووووووووووووووووووووووت جوعا. اذا العمل هو الغاية التي يناشد لها الجميع ولانه ايضا من خلاله لن تكون هنالك مشاكل ابسطها المآكل والمشرب والملبس اذا توفرت هذه الفرصة (العمل) ..وجاء احد من الخارج ووفر هذه الفرصة لآلاف الشباب العاطلين عن العمل! بغض النظر عن النواحي الجمالية والحضارية التي اضافها للبلاد! اليس من حقنا ان نحمية بانفسنا حتي من حكومة السودان نفسها ؟ اليس من حقة ان يشعر بالامان وسطنا(المستثمر) حتي ياتينا بعمل مشابه مثله ولكن في بقعة اخري من بقاع السودان الواسعة هذه المره ؟ كم مثله سيآتون وخصوصا هو يعتبر تجربة والعين عليه ؟ انني مازلت استحضر تلك المقولة التي تقول (الفشي غبينته خرب مدينته) ! ولن انتظر رد من احد لانه الموضوع اغلق دون تعليق ... ومهما كان هنالك رد(عذر) من خلال الذين يدافعون عن هؤلاء الجهله ويوجدون لهم العذر ... فآفيدهم بآنه سيكون عذر اقبح من الذنب ولكم احتراماتي ...

افتتاح أول مول عصري بالخرطوم (Re: Rakoba)

أجمل مافي المركز كان إدارتو البادرت لي تعيين مجموعة العمل قبل ما تفتتح المحل , بذكر الشركة وصلت من تركيا وأعلنت تنظيم لقاء مع كل الطلاب السودانيين هنا في قبرص , وقاموا بعرض الفكرة وتشجيع الخريجين من مختلف المجالات , وكالعادة إفتكرناها حركات السودان ولازم تكون في قائمة جاهزة , بس للحق إختاروا أكتر من أربعة من خريجين الجزيرة هنا , والأهم إنهم أقاموا دورة تدريبية حتى للملتحقين بالمركز من السودان في تركيا , في مركز الشركة المرتفع لأعلى من تلاتين طابق .
يا ريت لو اصحاب المال السودانيين في خارج السودان يقدروا يوظفوا قروشهم ويفتحوا فرص عمل ويطوروا البلد قدر إستطاعتهم


--------------------------------------------------------------------------------
أبنوسي



يا فرحه ما تمت يا آبنوسي !!!!!!!!!!!

افتتاح أول مول عصري بالخرطوم (Re: almohndis)

شكرا علي الصوره الحلوه دى وبصراحه حاجة تفتح النفس وعشان الناس في السودان تعرف العالم البره وصل وين ويبطلو حرب وتجعل فيهم همه الي التطوير وانشاء الله نشوف محلات تجارية في الخرطوم وكل السودان وكده العندو فلوس يشترى والمفلس يروح يتفرج ويرجع البيت يفكر كيف يعمل فلوس عشان يشترى من محل ذى وبصراحه انا والله مديون بس الحقيقه تقال عمل حلو وكمان عشان ناس دارفور المناطق المهمشه انشاءالله الشركات تمشى هناك تشارك في التطوير وبطلو حرب اذا كانت الحكومه والله غيرها ويجب علي الجميع الوقوف في وجه الحرب والضغط علي الجانيببن.
الي الامام ومزيد من الاستثمارات الاجنبيه في كل المجالات فنادق مطاعم ومدن سياحيه وطرق واتصالات والطيران والتصنيع والكهربا والزراعه والتعدين ياناس هوي الحل في السودان هو الاستثمار الاجنبي ويجب علي السودانيين المنافسه
الي الامام ياسودان الي الى الامام ومزيد من الصور التى تفتح النفس


theNile



عليك الله ده ما سد نفس لكلامك الجميل المفيد يا theNile

يا أخوانى أسألكم سؤال ..

المشكله وين لمن في بلدنا يبقى مركز تجاري .. خلونا من السياسه و الأغراض حسي .. بس وروني المشكله وين .. كيف نحن دايريين نمشى لي قدام و في ناس ما بيحترموا الحقوق بالشكل ده .. ده عباره عن حقد ما أكتر .

ياخي دي حاجه مؤسفه والله .. لمن قريت خبر الإفتتاح .. أحد الأعضاء كتب رد و قال يا ريت لو الناس تحافظ عليهو .... أها شفنا النتيجه من أول يوميين .. أنا و الله لمن قالوا في مركز تجاري شلت هم أولادنا الغلابه .. ناس بتدخل و تشتري و تنبسط وده قدام عيونهم و هما فرجه ساكت ما عندهم ..

لكن ده برضو ما يمنع التطور حبه حبه .. و انو يكون من كل الجوانب . يعني ما ممكن نعمر و نبني مساكن .. و الإنسان مهدوم من جوه .. صح ؟ ليه الإستهتار الموجود جوه السودانيين ده ؟ دي مشكلتنا .. ناقصنا الإحترام وعدم الإستهتار ده ..و انا متأكده انو الإستهتار و الخراب ده ما من الطبقه الفقيره .. دي طبقه معينه كده عندها أعراض بغيضه ..

انتو في رايكم الحل شنو ؟؟ و الله دي حاجه تزعل

وتسلموا
سكوتاويه

الظاهر ان اي ايجابية تحصل في البلد يفتش لها البعض عن صـلة بالجبهجية و ما ادراك ما لصوص الجبهجية !!! ـ واللـه ما أظن هؤلاء الا الممثلون للطرة، أو قل الوجه الآخر لعملة الجبهة ـ يعني النتيجة : مافيش فايدة .. ـ

لا للتخريب

لا للفوضي

لا لخلط الكيمان 0

لا لللاصطياد في الماء العكر

٭ليه الشعب يخرب ارضه ؟؟
آيه الحاصل فيك يادنيا؟؟
ليه الكل يدمر نصفوا؟؟
آيه الحاصل فيك يادنيا؟؟
وليه ؟ وليه؟ وليه؟
ليه الناس بتدمر وتنهب و تسرق ليه؟؟
ماتقولوا لي عشان لقمة عيش !!!
ياما ناس بتطفح كوتة وبرضو في حب الله عائشين..
ياما ناس بتصارع جوعها وبرضو في رحاب اوطانها تغني >الوطن > الملاذ
الحب > الام >الاب> الاطفال> بلدنا ياناس هوي كيفن نخربه كيف؟
وآآسفاه علي بلدي < وآآسفاه علي بلدي> وآآسفاه علي بلدي>
خلونا احنا بس في الهتافات ضد الحكومات >
خلونا احنا بس في الشعارات الكذابة>
خلونا احنا بس في البكاء علي الذي مضي ولن يعود>
خلونا احنا بس في انتظار غد عقيم >
خلونا احنا بس في الكتابة و الشعر والقصائد وحب العذاري والاستماع للسكاري >
خلونافي التشتت و الترحال و الاسفار والتجوال في شواطئ بغير بحار>
خلونا في الكذبة التي نجتمع عليها سويا .. ((اننا سودانيين ))
ونتباهي و نتقاتل عليها .. والله احنا شعب بتاع شعارات و هتافات
احنا شعب لايشعر بكيانه الا من خلال الوجعة .
خلاص بقينا ماقادرين نشوف بلدنا بتتطور ؟؟؟؟؟؟؟
ماقادرين نشوف بلدنا عروسة في ليلة زفافها؟؟؟؟؟؟؟؟؟
ماقادرين نشوف اطفالنا ، اولادنا، فلذات اكبادنا، سعيدين بجمال وروعة الوطن؟؟؟؟؟؟؟؟
آخ لكم انا حزينة عليك ياسودان؟/
والله من يحكم السودان كرئيس يجب ان نشفق عليه فالشعب السوداني ده يحتاج الي
((نبي او غبي)) ..
كنت قد فرحت بقدوم عفراء وقلت عنها (( عفراء ياهبة السماء))
الآن قتلوا عفراء كما قتلت الحرب اولادنا ..
كسروا عفراء كما انكسرت قلوبنا علي كل اللذين ودعونا وداع من لن يعود..
((بلادي بلادي بلادي لك حبي و فؤادي )) رددها كل المصريين بالرغم من الجوع و ذل الحياة
والقهر للكثيرين منهم لكنهم ظلوا يرددوها..
بلادي بلادي بلادي بلادي بلادي بلادي لك حبي ووووووووووو فؤادي >>>>>>>

يا سمارتى
نحكى ليك قصة من الواقع
لدى صديقتى هى ام لاربعة اطفال.. تعطلت غسالتهم
وصارت يوميا تغسل بيدها ملابس البيت
وسألتها لماذا لا يشتروا غسالة جديدة قالت والله ما عندنا قروش
قلتا ليها بالقسط قالت:: فلان قال ما بيحب القسط
اها استر الحال كدا وبقى عندها حساسية من الصابون

المهم يوم وانا طالعة منهم لاقيت فلان دا
داخل البيت بدرى على غير العادة وفرح شديد جدا
حتى انا قلتا ليه: هو ها انت رقوك يا راجل ولا شنو
قال لى لا وعاين لى كدا عينة غريبة ودخل
اها بعد ساعة ضربت لى صاحبتى توسوس فى التلفون وتبكى
قلتا ليها:: سجم خشمى مالك(لانى عارفة فلان داك بالانشراحة الفيهو ديك ما بيكون جاب خبر موت)
قالت وهى تغالب دموعها: عارفة فلان جا بدرى ليه؟
قالتا ليها: كندو مالو ان شاء لله خير!!!
قالت مرقتك كدى يقيف داك يا اللورى
ويجو صينين شايلين ليهم كرتونة قدر الليلة وباكر
قالت فرحت قالت خلاص جاب الغسالة
عارفاه يا سمارت جاب شنو!!؟؟




جاب ليه تلفزيون مليون بوصة بسماعات خارجية وشنو كدا بلازما
الصينين ديل قعدو اليوم كلو يركبو فيهو.. ثمنه يوازى
مرتب شهرين كاملين ولكن اشتراه بالتقسيط..
ليه ما عندهم تلفزوين 24 بوصة قال عشان يتفرج فى كاس العالم
انا قلتا ليها تمشى تشيلى كرسى تضربى فلان دا فى راسو وتضربى
البلازما تدشدشيهاعشان يآمن.. او تحردى البيت وتقعدى معانا
او تضربى عن الغسيل..
ففلان دا ذى حكومة السودان
يا اما تدشدشيها.. ويا اما تحردى البيت زينا كدا يا اما تقعدى وتضربى عن العمل.. اما عن المظاهرات وحرق المكتبات انا لما اكسر وادمر بعرف اكسر شنو وليه..عمرها المكتبات ما كانت بتستفز مشاعرى وأقول بالله نحنا ساكنين فى الاوضة عشرة يخلو المبنى الواسع داك
عشان كتب شوف بالاهى؟؟!!

وابو الريش شكرا ليك على التفهم

ازيك يااختي يابيان ..
تعرفي يابيان الناس في السودان شقيانة و طافحة الحنظل..
يعني بالنسبة لي صاحبتك الغسالتها خسرت دي (( انا شايفة ومن وجهة نظري
البسيطة يعني انه كونها تغسل بيدها ده عادي جدا.. الحساسية دي بتجئ للمدلعات
وبنات الراحات بس.. بعدين لا الغسالة مهمة ولا التلفزيون شئ مهم ده كله كماليات
ساكت يابيان يااختي .. وبعدين اصلها لو دائرة شئ من راجلها وابو عيالها
مابخراب البيت ولا بالصوت العالي..والله لو مشت بكلامك ده اكيد راجلها حيكون
هو الكسبان لانه رجالنا ديل ماعائزين الواحدة تطول لسانها و تقل ادبها عليهم
والله يمشي يعرس عليها ثلاثة ثاني كية فيها والبنات الدائرات السترة ..السترة
بس راقدات بي الكوم..والكلمة الحلوة الرقيقة لو ماجابت خبر الراجل و خلته
يفز من مكانه يجري يجيب الغسالة والدش و الفيديو وووو..
الكلمة الشينة مافيها فائدة غير الخراب والدمار..
وعندك المثل حي بين جون قرن وناس البشير شوفي الكلمة الشينة والحرب و الدمار
ماجابوا آي نتيجة ولا فائدة.
لكن الكلمة الحلوة و التفاهم والاجتماع علي حب شئ واحد شوفي النتيجة كانت
كيف عظيمة ..
الراجل ..آي راجل في العالم دائرة زوجته تكسب رضآه و حبه بالكلمة الحلوة
الرقيقة ..الكلمة الفيها حنية ورجاء و حب وضعف وطاعة ..
فتصبحي يابيان انتي الملكة والرئيسة والزعيمة علي زوجك لا هو..
وافهموها بقي .....

ومرة اخرى

ينزل المطر

ومحمد الآخر
مسجي على الرصيف

متهما بابواب الدكاكين

مولعا بواجهات الزجاج

والخبز عصي
على دمعة الكرامة

شوفتى يا سارة يا اختى انك ما فهمتى القصد شنومن القصة دى
اقريها تانى المسألةما غسالة ولا تلاجة ولا بنات راحات ولا كيف تكسب
ود زوجك وتخليه يموت فيك ولا اقرب طريق الى الزوج معدته
دا ما الموضوع اقرى القصة من خلال معنى البوست الاصلى
لانك اخدتى ظاهر القصة ولم تأخذى المغزى..
وشكرا ليك

سحر .. سمر .. ساره .. محاسن
كله محصل بعضه..
انشاءالله انتي تكوني فهمتي قصدي يابت امي ..
انا برد علي البين سطورك ..
المغذي؟؟؟ احنا كلنا لافين لفة طويلة عريضة بنفتش علي المغذي..
(( مغذي آيه الانتي جاية تقولي عليه؟؟ هو انتي عارفة معني المغذي آآيه؟؟
طيب قولي لي عليه!!!!!!!!!!!!

Quote: مغذي آيه الانتي جاية تقولي عليه؟؟ هو انتي عارفة معني المغذي آآيه؟؟ طيب قولي لي عليه!!!!!!!!!!!!

الاخت سارة



القصة هنا عن الاولويات
لما الطبقة الوسطى كلها اتحولت لشحادين
والفقراء بقت مصارينهم تتغذى من مصارينهم
والامية تزيد ويعز الخبز وجرعة الدواء
يبقى مبنى فاره للناس العايشة عيشة هنية
يبقى ما اولويات
يعنى فلان داك لامن جاب التلفزوين وهو عنده واحد عشان يتفرج فى كاس العالم.. وزوجته المسكينة تغسل هدوم العائلة الكبيرة دى
غير الاعباء الاخرى لانه ما عندو قروش
يبقى ظلم ولخبطة اولويات ودا مغذى القصة
مش فلان بيحب مرتو ولا انانى ولا مرتو ما فالحة عشان ما قدرت
تكسب وده وتخليه يشترى الغسالة..ولا انا شرانية عشان حرشتها على فلان ابو اولويات ملولوة
والتحت السطور هو المغزى بتاع لخبطة الاولويات
مش كيف تكسبين قلب زوجك الحبيب





بعدين يا حبيبتى ما تسخنى معاى باقى انا ما بحب التسخين معاى
دى وجهة نظرى واحترم وجهة نظرك..
وأكرر انى لو كنت فى الخرطوم كنت كسرت معاهم
وان شاء الله اى حاجة ذى دى يسكروها الناس
لو شاء القدر وصادفت اجازتى بشترك بدون تأنيب ضمير

يايمة ولا تسخني معاي ولا اسخن معاك ..
لكن اعمال التخريب و التدمير مابتنفع ابدا ابدا ..
ووجهة نظرك حاولي تعيدي النظر فيها لاني لو كنت من الشرطة ولو حتي من الشعب
وشفتك ومن معاك بتخربوا في جزء من الوطن انا اول واحدة حاقيف ضدكم بالكلمة و
بالقوة .... احنا عائزين نعمر بلدنا مش نخرب ارضنا ؟؟؟؟
التخريب ده حق الغلابة الماعندهم عقل ولا هدف ولا قضية ...ولا مغذي ..
واختلاف الاراء لايفسد للود قضية...

اختى بيان
لما الحكومة تشترى بكاسى للامنجية انا بكسر معاكم . ده ذى تلفزيون راجل صحبتك
لكن لما مستثمر اجنبى ( او حتى سودانى ) جاء يعمل شغل فى السودان تقوم الناس تكسروا . ده ذى تكسير المكتبة
عارفة ليه ؟
لان الاستثمار معناها عمل و وظائف ( ان شاء الله ) لمية زول بس . دى يعنى ١٠٠ اسرة يعنى ٥٠٠ راس .
لو نجح الاستثمار ده معناها مزيد من الاستثمار
معناه حتى العيال اللى بيغسلو العربات ح يستفيدوا . معناها حتى الدكاكين الصغيرة اللى فى شارعه ح تزدهر . و لا ما كده؟؟؟؟
اما الناس الجعانه فما اظن ح يشبعوا لو المول اتكسر
و ان نكسر المول عشان الحكومه زفت فده فكر غريب جدا
و الاغرب منه راجل صحبتك . و الاغرب من كده صحبتك اللى لسه قاعده مع راجل ذى ده

عارفة يا سمارت

الحقد الطبقى دا كعب شديد
اها انا بعانى منو شديد جنى وجن الناس الغنيانين
ليه ما عارفة والله..
فغصبا عنى كنت حاشيل اكبر
حجر وتش فى معرض الى ام دبليو
لانها جد بتستفز الفقر جواى

بالله راجل صاحبتى دا مش عينة.. اها النوع دا كان مسك الحكومة
بيملاها لينا مولات..بس الحمدلله شغال استاذ فى الجامعة
وما اظن يمسك ليه حكومة لو لقاها جارية جنبو

لكن ذى ما قلتى دابيفتح شغل للناس
وحاجات كتارة.. لكن برضو كسيرو بيدى الحكومة درس والا ما مات فى السودان 2 مليون عشان يثبو نقطة.. مرات الحاجات والثورات دى بتصصحح المسار..بعدين الاستثمار دا كلو عمولات ولخبطات وفساد
عشان كدا بالله لو سكتنا والمستثمرين ديل جو.. الكيزان بيغنو زيادة
وبعدين بيتمسكو بالكراسى التى تدر اللبن اكثر
معا لتطفيش المستثمرين
الى حين وجود حكومة منتخبة

السارا بت امى شكرا
دابى عرفتا انتى زعلانة ليه
وما عرفتى المغذى اصلى يا بت املا بغصد مغزى
البى الزاى مش ال..ذ
سورى للغلط بتاع الاملا

هاهاهاها ولايهمك ياعسل
احنا ماخصمين .. احنا بنتناقش و نتفاكر..
يعني انتي كان قصدك (المم) الاكل و الشراب يعني؟
طيب لكن لما خربوا المول ده استفادوا شنو؟
لقوا المم؟؟؟
والله يابيان الواحد بقي ماعارف قضية السودان دي الحل ليها شنو؟
خليها علي الله بس.

السارة اختى
شكرا ليك يا حلوة يعسلن ايامك يا رب
شوفى المسألة ما لقو شنو
لانه السؤال دا برضو ممكن نطرحو لاى مناضل استفاد شنو
استفادوا ثبتوا نقطة
انا بحكم السن بريد احكى القصص
شوفتى وكتين كنت بقرأ فى استاذ كدى قاشرنى
يرجع لى مقالى بدون ما يقراه ويقول لى امشى عيدى
مرة كدا قعدتا ايام وليالى اظبط فى فى مقال ما يخرش مية
جيت اديتو ليه..قلبو قال امشى اكتبى تانى
مشيت وتانى قال اكتبى تانى.. مرة رجعتو بدون اخت فيهو سطر جديد قال اوكى بقى كويس.. اها عرفتا انه قاصدنى .. زعلتا شديد عشان الحقارة دى
قمتا قلتا كان شاكلتو ياها الممسوحة لى فى ورقتى
والمقبول محمدنى.. قمتا عشان اديه درس امشى وتعال دا
جبتا مبلغ اربعة نواة بلح دخلتها فى ابرة الهواء بتاع عربيتو رقدت
طوالى فى الواطة جيت بعد الدوام لقيتو.. يشيل وحدة واحدة يوديها الطرمبة ويجى..والعرق دا والصلعة كيف..حاااااااالة سعبة
حتقولى استفدتا شنو مش
اتفشيت فشة ما حصلت
وبقيت من اليوم داك بستحمل كل بياخاتو
لانى عاملة حاجة اكبر من بياختو دى
واكيد الناس الكسرت المول حيجيها احساس بالفشفشة ما حصل والرسالة وصلت الحكومة
يا حكومة السجم شوفينا وحسى بينا.ز نحن خلاص قرضنا
وشكرا ليك ومعا لتطفيش الاستثمار لحين وجود حكومة ديمقراطية

نحن نعاني من حالة جهل مزمنة
"الاستثمار الأجنبي يعتبر عامل أساسي للخروج من حالة الفقر
التي نعاني منها "
جاء جعفر نميري لزيارة إحدى القرى
وكانت براميل المياه مليئة بالثلج والغبار والأوساخ
علق عليها أحدالظرفاء مخاطبا الثلج
أيه اللجابك عندنا إن شاء الله يلايقوك
وهذا هو حالنا

هل تعتقدوا بأن شيئا مثل هذا يمكن يحدث في أي بلاد أخرى
وخذوا مصر نموذجا .

والله من وراء القصد

وبعدين؟؟
الحصل شنو؟؟


....

كلبةً والدة فوق كوم الزبالة
محجوب كلموه وقام مشالة
مستعجل قبل مايأخذ سؤالة
بي فد طلقة أتم لي عيالة

استثمار اجنبي بتاع شنو ديل جايين يبيعوا منتجاتهم عندكم ويلملوا دولارات البترول ودولارات المغتربين يعني من دقنه وفتلوا لو كان قطاع انتاجي كنا نقول تشغيل عطاله وتصنيع لمنتجاتنا المحليه ولا شنو ياالاقتصاديين ؟؟؟

This message is not flagged. [ Flag Message - Mark as Unread ]

You Can not Let People understand or appreciate these things untill you gave them their wrights
المشاهد هي هي
الفواصل هي هي
والعرض مازال مستمر
بالشخوص فى المسرحية
مااتغيرت فى التفاصيل والتراكيب والقضية
المدافع صوته عالى المستفيد رافع شعاره البدقية
مابهم الناس تموت
ولاتفرق فى الاسية
المهم يبقى سيد
تعظيم سلام للاوامر النرجسية
والمبادئ بتبقه هشة
والشعوب هي الضحية
يعنى ايه لوجانا عام ومر عام
النوافذ مشرعة
ماطلاهايوم رقراق شمس
الحزن جواها قابع
الفرح بهرب يمشي
والزمن معياروواحد
مابتعرف غير القرش
ناس بتعرق في الحرائر
وناس بتوسد برش
ناس بتنعم بالمسارح والملاهى
وناس فى بلاد الله بتطش
ناس بتنعم بالمطايب
ناس تنوم بعضم قرش
ناس بتعرق من جبينا
حقوقها عند زولا سمين عامل كرش
يعنى ايه لوجانا عام ومر عام
مسكين ممدد فى الركن
مغلوب يصارع فى المرض
ايدو ملوية بطنه مهرية عيونه متكيه رقبتو محنيه
روشتو في ايدو بيحلم بطعمية
سايقاهو جبرية
مسكين يصارع فى المرض
يسأل الناس للحال عرض
ممشوق ممسح بالقرض
لعلو يشفي من المرض
اتبدل الزمن الجميل
ياحليلو قاضى القرض
يعنى ايه.............
المأبموت بالبندقية
يبقي كاتلاهو الضغوط
واللى كايس لقمة ياكل
الايمضى على الشروط
لايكابر لايطالب

بصراحة نحن امة مجيدة في التكسير ولا غير، لو ان كل حكومة دكتاتورية كانت او ديمقراطية قامت ببناء شي ما في السودان، لكان عندنا الان شي ولكن فقط ازالة اثار اي اننا حكومة وشعباً بارعين في التكسير، الي الجحيم جميعاً اغنياء وفقراء وشعباً وحكومات.

لم يزعجنى الخبر بقدرما ازعجتنى ردود اخوتى فى البورد

مالكم تدافعون عن الهمجيه والبربريه ؟؟

كيف تقرون تكسير الجمال فى بلادى ؟

كيف تدافعون من حطم جسر الاستثمار فى بلادى ؟


الاتراك شعب عملى جدا ...

ياترى لو نجح المول ده فى السودان ... كم راسمالى تركى كان

حايجى ويعمل لينا مشروع ؟؟؟


بعد الحصل ده هل من الممكن يجى تركى ولا متتورك عشان يعمل

اى مشروع فى السودان ؟؟؟

وده حصل فى وسط الخرطوم العاصمه .. فكيف ندعوا الاخرون

للاستثمار فى جنوب السودان ؟؟

وا اسفاى ... وا اسفاى

وا اسفاى على تفكير الاخوة البورداب



وتسلمى يا بت منصور

ديكو

وهذاالحدث أحد الإجابات القاتلة لبوست وضعه أحد الزملاء بعنوان لماذا لا يتقدم السودانيون؟؟؟!!!

حسب ما نما لعلمي تم بناء المول بشراكة من مستثمرين أتراك وآخرين سودانيين .. وكما شاهدت جابناً من افتتاحه فهو يعد مركزاً عالمياً من حيث المعمار والتجهيز والديكور .. وإضافة جميلة لعاصمة السودان.

وإن التخريب (إن صح الخبر المنقول) يعد سابقة خطيرة وسبة سوداء في وجه السودان الغالي وشرخ في مثل الشعب السوداني الراقي دائماً في تعامله مع الأجانب ..

وهو مؤشر خطير وناقوس يدق معلناً التغيير السلبي في التركيبة السكانية للعاصمة وطغيان الدهماء والغوغاء من الناس.

إن هذا الحدث يستوجب الاستنكار الفوري من الجميع بمختلف الألوان السياسية .. لأنه سلوك مرفوض تماماً في جميع الأحوال وفي جميع الأزمان هكذا تراه النفوس السوية المتزنة.

لا يبرر هذا العمل ما حاق بأي شخص من ظلم حكومي أو قبلي أو جهوي لأن هذا المشروع لا يعود لأي من تلك الجهات إنما هو مال خاص .. ويحق لأصحابه حمل السلام للدفاع عن حقهم من التلف في حال عجز السلطات عن توفير الأمن لهم ومن مات منهم يكون مات دفاعاً عن ماله وهو شهيد شرعاً.

هؤلاء الغوغاء لم يندفعوا لذلك بمحض تفكيرهم بل وراءهم بلا شك ثلة من المنبتين الذين قصدوا التخريب بغرض إحراج الحكومة على حد فهمهم القاصر ولم يدروا أنهم يشوهون صورة بلدهم ربما لعدة عقود بهذا الحادث الذي سيشكل مانعاً لجذب المستثمر .. وهذا الانطباع لا يزول بذهاب هذه الحكومة وإنما سيلاحق الحكومات السابقة .. إذ لا ضمان لعدم تكراره فالغوغاء متوفرون ولن تعدم أي حكومة قادمة مثل هذه المعارضات ضيقة الأفق.

1) أدعوا الجميع لشجب وإدانة هذا المسلك المشين.

2) أدعوا مشرف المنبر أن يضع عبارات استهجان لهذا المسلك على سطح الموقع ..

التحية لجميع العقلاء في بلدي.

جاد

والله يا جماعة كل الناس الردت بالسلب في الموضوع ده وشكرت الناس الخربت ودمرت اقول الله يعقلهم وربنا يشفيهم لانو الليلة زول بكون قاعد في امريكا وبقول الناس ديل معاهم حق يوم واحد الناس دي اتلمت وعملت تظاهرة سلمية للبحدث في وطنهم وقاموا قدموا مذكرة لي اي جمعية او جماعة او الامم المتحدة بخصول الموضوع في دارفور او الوضع في الخرطوم او او او

المؤسف في الموضوع ده انوا لو صاحب المول او مديره قرر انوا يقفل المول ويسافر يرجع بلده اتخيلوا يا منافقين في كم اسرة عندهم ولدهم شغال هناك وكم بت شغالة والبيت كلوا كان سعيد كيف باشغل الولد في المول او بشغل البت في المول واتخيلوا الحسرة والندامة وهم وخلوا الشغل وقعدوا في البيت وما لقوا شغل تاني اتخيل بس ناس البيت حيكون شكلهم شنو واتخيلوا او تخيلي نفسك شغالة كنتي او شغال بعد داك تحالوا قولوا والله يكسروا ما هو دواء ماف وماف كهربة

للذين فرحوا بهذا التكسير
حينما تعم الديموقراطية ربوع البلاد إنشاء الله هل سيشجع ماحدث أي مستثمر أجنبي من المغامرة في السودان ؟
حدث ماحدث في عهد عسكري معروف بالكبت فمابالك بالديموقراطية ؟
ستقولوا لي ستكون هنالك حرية في التعبير ولن يكون هنالك خراب
سأسالكم هل عايشتم الديموقراطية السابقة ؟
كان الحال مثلما هو عليه الأن حقد وتدمير حيث تنقص الثقافة والوعي السياسي ؟
أذكر عند انتفاضة ابريل كان الشماسة وأقول الشماسة لأني شاهدتهم بأم عيني في الخرطوم كانو يكسرون كل شئ يقع في ايديهم وكنت في ذلك الوقت مع والدي في مكتبه بالسوق العربي ( موظف حكومي ) وسيارته البي إم دبليو ( هيلمان موديل 60 ) واقفة تنم عن إمتلاء كرش صاحبها بحقوق الغلابة فبدأ احدهم بتكسير زجاجها فاستعصى عليه بادئ الأمر فتعاون معه آخرون حتى هشموا كل مابها من زجاج .
هذه هي العقلية المتواجدة الآن دون وعي سياسي حقيقي فبدلا من التهليل ناقشوا كيف نتخطى هذا الجهل

كثير من المداخلات هنا يصعب التفريق بينها ، فالناس الذين يدينون والذين يفرحون معا تختلط الاشياء بينهم ، اعتقد ليس هنالك احد يقر تكسير المباني والمنشآت اي كان مالكها .. لكن هنالك مرحلة يصلها الشخص الذي ارتكب الفعل لابد من محاولة تحليلها .. ومعرفة اسبابها .. فمن المعروف العنف ليس سمة غالبة في الشعب السوداني بينما هو ظاهرة ودراسة الظاهرة تتم وفق الظروف التي انتجتها وفي هذا الاطار نجد ان السبب الذي يدفع الناس لتكسير وتهشيم واجهات هذه الاماكن هو حالة من الغبن ، ومن العوز الذي اوصلهم لهم سماسرة الدين والدولار .. واكلة السحت في بلادنا ، هل يعتقد احد ان هذا المول يحل مشكلة .. الذين يتحدثون عن فقدان الوظائف لماذا لم يتكلموا عن جيوش المسرحين عن العمل العام -- الجيش -- الشرطة -- الخدمة المدنية -- مصانع السكر -- مصانع النسيج -- لماذا لم يتكلموا عنما بيعت مؤسسات السودان الرابحة باسعار زهيدة لتجار الجبهة الاسلامية في سياسية الخصخصة .. التي حولت بها الجبهة الاسلامية كل ممتلكات الشعب الى مشاريع خاصة بأربابها ، وسرحت الالاف من العمال والموظفين بما يسمى بالصالح العام .. هل تعتقدون ان حل مشكلة الوظائف في مولات تبنى على هياكل الفقراء . واين هذا التباكي على مول هشمت واجهته بينما نحن حرقت بيوتنا واغلقت مصادر رزقنا وتبعثر اهلنا في اطراف الدول وانتم تتباكون على مول ... للذين يتحدثون عن الشماسة الذين كسروا الزجاج .. هل كلف احدكم نفسة بدراسة ظاهرة الشماسة نفسها .. من اين جاؤا وماهي الظروف التي دفعت بهم الى افتراش طرقات الخرطوم الوحيلانة في السلسيون والمخدرات .. والى اي اسر ينتمون وماهي مسؤولية الدولة عنهم .. ؟ واذا لم تجد اجابة او لم تكلف نفسك عناء البحث فستجد مولات اخرى مهشمة .. فبدلا من بناء كول فليأتي المستثمرون لبناء مصحات لمعالجة المدمنين ، او مستشفيات لمعالجة الايدز او بذور لزراعة مليون ميل مربع فهذه بلد زراعية وليست منطقة سياحية لبناء المولات .. اعتقد ان الخرطوم لن تكون يوما ما مزارا سياحيا مالم يكنس هؤلاء من طرقاتها وقصورها .. هكذا يجب علينا النظر لهذه الحادثة في هذا السياق اما الذين فقدوا وظائفهم فهم ادرى بمعالجة اوضاعهم .. وادرى بالظروف التي ادت لهذا الفعل .. انا هنا لا اؤيد العنف او التكسير لكني اتناول الظاهرة من زاوية اخرى وهي دوافع هذا الفعل .. واذا لم تحل هذه المشكلة الاقتصادية فستتجلى في ظواهر كثيرة .. عنف .. زواج عرفي .. بيع اعضاء .. دعارة وشبكات مخدرات واوكار للجريمة .. فالفقر يولد كل شيئ . وستنهار كل القيم .. التي تتباهون بها امام العالم وامام نفسكم تلك الشخصية السودانية ستتظى .. ولتبقى لكم هياكل المولات ..

باللـه يا ابنوس مافي داعي للتنظير ـ والتباكي باسم الشماشة ! ـ الحصـل دا اذا كان فعلآ حصل مافي شئ يمكن يبرره ـ الناس تقول ليك مستثمرين اتراك ـ تقوم تجيب سيرة الصالح العام؟ ـ وأنت عارف أن حتي البلد الانت عايش فيها دي كل يوم بيرفدوا فيها هلم من البشر ـ وأنت لو ما اشتغلت لامن عرقك نقط حتترفد ، وما ممكن تلقاها بارده ـ الا طبعآ من عطية بند العطالة الذي يكفل لك الحياة ـ وهم عشان يصلوا لمرحلة بند العطالة والضمان الاجتماعي دي ما رقدوا وانتظروا ، بل كدوا وعرقوا واجتهدوا لحدي ما شبعوا وشبعوا البيجيهم ـ ـوانت زاتك برضو بكرة لمن تمسك الحكومة حتبدأ بما تعتقده اصلاح وتنزل في الجبهجية فصل للصالح العام ـ يعني مافي فرق بين زعيط ومعيط ـ و قدامك سابقة كنس آثار مايو ـ حكومة الصادق عملت شنو غير اعادة انتاج السدنة ؟؟ ـ و مرمي اللـه ما بيترفع ـ و مادام دي ذهنيتنا، مش لو بقت حكومة جبهة واللا حكومة ديمقراطية، لو جو حكمونا الامريكان ذاتهم بجلالة قدرهم ما حينفع ـ والدليل عندك حال العراق اليوم ـ
ـ يعني انت داير الاجنبي يجي يبني ليك مصحات لمعالجة المدمنين ، و مستشفيات لمعالجة الايدز او بذور لزراعة مليون ميل مربع ؟؟ ـ ليه؟؟ كانوا مخلفيننا وناسيننا؟ ـ اذا ناس دايرة تدمن المخدرات وتتناسخ بالايدز ـ الترك دخلهم شنو؟؟ يعني لو جيتنا كوزير للاستثمار حترفض كل الاستثمارات الغير زراعية او رعوية؟؟ ياخي ايوة المول بيحل مشكلة ـ مشكلة الذهنية المتخلفة التي تنظر للنظام والنظافة كرفاهية ـ ولا تؤمن بأن النظافة من الايمان ـ و بقي قدرنا أن جاء الشوام والاتراك يعلمونا الترحيلات والسفر المريح والمطاعم النظيفة !! ـ وليه ما تكون الخرطوم عاصمة سياحية ثم تنتقل تدريجيآ للأقاليم ــ ليه داير الوضع يظل كما هو الي ان تقوم الساعة؟ يعني رأيك شنو في شماشة نيويورك؟؟ ـ وبعدين ما تقول لي حبهجية ولصوص ـــ وهذا الكلام المستهلك الذي اصبحنا نعلق فيه كل فشلنا وخيبتنا ـــ هو الجبهجية اللصوص ديل جو ناطين من المريخ؟ واللا ياهم زاتهم الاتبعروا من بين اصلاب وترائب هذا الشعب الهمام !! ـ ومن كل فئاته عندهم نسخة !! ــــــــ فيهم الجايين من الشرق ومن الغرب والشمال وحتي الجنوب وفيهم اولاد الاغنياء واولاد الفقراء ـ وفيهم الجايين من العمارات والجايين من بيوت القش ومن بيوت الجالوص والزبالة ـ يعني عينات مختلفة من هذا الشعب اللحم راس ـ
وبالله عليك ياتو قيم دي البنتباهي بيها قدام العالم؟ قيم الطهورة الفرعونية؟ واللا الهمباتة والنهب المسلح؟ ـ ناس بدل ما تحفر ليها آبار تشرب منها وتسقي بهائمها وتستقر، تقعد تشتري وتكدس في السلاح؟ وبعدين دايرين نعرف منو حرق بيوت منو؟؟ ـ هل الحكومة حرقت بيوت الجنجويد واللا الجنجويد حرقوا بيوت الفور واللا الزغاوة حرقوا بيوت الحكومة ؟؟ـ نحن زاتنا والله تشابه علينا البقر !!! ــــــــــــ

غايتو قالو عملية عفراء دي كانت زوبعة في فنجان زي ما ذكرت ملكة سبأ ـ لكين سواء كانت بقت واللا ما بقت، نحن الفينا اتعرفت ــ

البكاء على المول دا والكلام عن البيوت الفاتحها
على حسب معرفتى من سنة 1989
الشغلانات دى بيلقوها المحاسيب
يعنى بس.. الكوز يفتش لابنه مكان تانى وخلاص ولا بنته
البوينت انه ما لازمنا من اصلو
لاننا جعانين وحفينين وبنشترى الهدوم المستعملة
نوع المفروش فى الارض داك
وجابوه بالطيارة وباعوه بالخسارة 5 بالف

مثلا فى السودان دار الوثائق
الى الان تفلى الكشافات الميليانة
غبار ومتكوبة بخطوط مختلفة
مطموسة الارقام ولا كمبويتر مافى ولا جهاز اوبك
وعايز تصور جريدة تسوق زول شغال وتجيب عربية وتمشى السوق
عشان تصورها ترجع الموظف يعنى ذى الداية
يعن بلد الفوضى والفاسد تضرب اطنابها
والجوع يقفل الجهات الاربعة
نجى نعمل مول بمواصفات عالمية
بالله يا فرد امشوا شوفوا مستشفى العظام
بولا شنو ولاشنو ولاشنو
تعالو اتكلمو عن المول الفية مارسيدسات
وبنات سمحات واولاد بيعرفوا انجليزى وماكلين التفاح ومعلمينهم بالدولار
انا طبعا احترم وجهة نظركم جدا واتفهمها جدا

قالت الاخت تماضر :

Quote: حصل شنو يا شاموق..ولسه ما حكيت لينا عن السودان..بحسك الشاعر

معقول يكون شمهروش هو صديقنا الاديب علاء شاموق الذي ترك الرياض و عاد للسودان مؤخرا ...
ان كان هو فله التحية و التقدير و ان لم يكن فالتحية و التقدير لعلاء من خلال شمهروش و لشمهروش شخصيا.

ليتني استطيع ان احصل علي اسم اخر مستعار خفي ... و ليتني حضرت زمن الرخا في البورد ....
فما افيد ان تكون لنا عدة اسماء....

و بما ان الشيء بالشيء يذكر ... فانني اذكر اننا كنا في السبعينات نداوم على قراءة مجلة صباح الخير المصرية .. و كان الرائج حينها ان مفيد فوزي يكتب باسم نادية عابد صفحة رومانسية كدا تجيب للزول رطوبة .......و لكن حتى الان لم نتأكد هل مفيد نادية ام لا ...

التحية لكل البورداب
لم اقصد الاثارة بهذا الموضوع او اود ان اخطب ود النظام المتهالك الذي يقف على صدورنا سنيناُ
ما حدث ليلة اغتصاب العفراء وصمة عار في وجه كل سوداني صميم واصيل (مش يكون ميد ان تايوان) اصلي ود بلد
مش يكون حافظ ليه كلمتين بالعربي والانجليزي تصف مثقف ونصف جاهل يؤيد الخراب الذي حدث في ليلة الخزلان
اعود وأقول فليذهب الرئيس والغفير الي الجحيم وليبقي ما نؤسس له كلنا وهو ثقافة جديدة لونية متفردة من التقبل
للرأي والراي الاخر
ان ماحدث قد دمعت عينا كل حر كل من يعشق تراب الوطن [
/B]
ماهو الانطباع الذي أخذه المستثمرون عنا اننا شفع روضة بمعني الكلمة


ولنا عـــــــــــــــــــــــــــــــــــــــــــــــودة

الاخ العزيز حسين ملاسى

اعرفك بان الاخ شمهروش ليس هو الاخ شاموق لان شمهروش عمرو ما اغترب ولا طلع من البلد الحلوة دى لاشاف غربه ولاغربه شافتو شمهروش
من البلد الغبشه والناس الغبش تعبان كحيان عيان يهاتى فى شوارع الخرطوم حفيان وله كل التقدير والاحترام وهو يجاهد ويبارز ويكافح من اجل لقمة العيش......... شمهروش لك مليون تحيه قلبية



مجرد تصحيح معلومه يا ملاسى

اشكرك فيصل يازول يازووووووووق خالص
والشكر لكل البورداب اهل الحارة العمرهم ما اكلوا باردة
الاخ ملاسي مشكور جدا وله التحية
فقط الغلطة كانت من تماضر لانها اول من رد على الموضوع وكتبت
ود شاموق المهم هو الوجع الذي شعرنا به كلنا من هول ما حدث









تقليب الشوق والشوق مقلوب قلبتا اشواقي

ماشاء الله تبارك الله
حتى البطيخة دي مفرشين ليها ومرقدنها ، اصناف من الفاكهة كنت اظن اني لن المسها الا في الجنة انشاء الله ..
خرفان موضبة ولحمة بالمعني الصاح ..
السكر والدقيق والزيت وكلو
حتى الجرجير والبصل ديل تشتري وتجي تحاسب بالكمبيوتر
واتقلع كان ماكنت قايلة مدرس الكمبيوتر كضاب لمن القال (الشخوت) السود ديل بيقروهن (باللايت بن) ويعرفو مواصفات السلعة
حلويات اشكال اشكال
حاجات ارفليم البنشوفها في التلفزوين.... وحاجات الدش برضو بالكوم
ملبوسات واحذية على مد البصر
نظام .. نظافة ... وجمال مع انه الشغلة ماتظبطت خالص والعمل جارى على قدم وساق وهمة اتراك ماعادية
البنيات والوليدات البياعين ديل تقول معزلنهم عزيل
ناس العيون الزرق والشعر الاصفر الشغلانة وقعت ليهم صاااقطة ومتكيفين وممارسين حياتهم العادية
نضم (نهى زندقى) مافي .. تحوم كدىىى واى حاجة موضح جنبها تلقط وتخت في العربية الكاريها وراك ولا لازيها قدامك .. بعد داك تشوف اللمضة (اللمبة) المولعة معناتو (الكاشير) شغال يستلم بضاعتك يضوى فيها ويلزها ليك بهناك .. تدفع وتتخارج كان بضاعتك كتيرة معانتو عربيتك واقفة برة توصل لخشم الباب .. والمهلة نضوكها
دا .. ولا دا
يا ايدى شيلينى ختينى
سلالم الله والرسول .... ولا البمشي براهو دا
اتوكلت عليك ياسيدي وكنكشت في يد صاحبتي العاملة فيها تفتيحة لانه امها شافتو في الحج ... وهووووووووبا .. وياربي انا وين ... الناس الحمر والحناكيش وطريقة اللبس والقعدة وهمونى ليك عديييل كدا .... هنا فوق في الكافتريات والسينما والألعاب . والله انا من عم قسم دا شايل ليه موبايل طوبة وعامل لى فيها ابو عرام كرهنى بمس كولاتو وزيييييطك لقيت نفسي تاني تحت ولسة قايلة نفسي ماهنا ... سحبت لى (لزازة) (هههههه) مع انى شايله لى فتيل شامبو وحلاوة (امبرمه ) وهطهن وفكرت انى المرة الجاية اجيب لى اى شافع انشاء الله ود ناس مريومة داك وافسحو معاى زى الشفع المبغبغين اللازنهم ديل
مرقت برة وحرم العفراء دا حديث تاني ... ولمن وصلت عم قسم كنت لسة في حالة تانية واتوقعته يحمدل لى سلامة الجية .. لكن الشمس الحاقدة دى رجعت ليك البلد دى في رمشة عين
وياناس جوا ... ياناس محمداحمد ... الماشاف بلد برة يمشى يتفرج
ووحات نظرى مجااان لاقرش ولاتعريفة ... بس اعملوا حساب شيل الحس
واصل الشغلانة ياجماعة قالو والعهدة على الراوي انه بت حنكوشة وافقة وسط حنكوشات تحت (صيوان) يوم الافتتاح بره جاء واحد (شماشي) منبسط ومندهش اتشعلق في (ماسورة الصيوان) الصيوان اتهز وكان داير يقع ثبته راجل كان واقف .. الحنكوشة اخلعت واعصابها باظت صرخت وكنكشت في الراجل... صرخت الحنكوشة الجنبها معاها ومن حنكوشة لحنكوشة (زى ديوك دكين) الشغلانة جاطت واخدت طابع الاثارة (والخناشير) لقوها فرصة واظن كانوا قاصدين الحنكشة بس ومافي اى قصد تخريب مع سابق الإصرار (وبرضو العهدة على الراوي)
واطمئنوا عفراء بخييير وبكامل اناقتها وابهتها والزوبعة كانت داخل فنجان بساحتها الخارجية

الاخ فيصل 44

الاخ شمهروش

اشكركم للتوضيح ... و التحية من خلالكم لاخونا ود شاموق ... و الذي منذ ان صار خرطوميا قل

نشاطه عما كان عليه عندما كان في الرياض

و التحية لكل ادباء - و شعراء - بلادي و لكل الشباب الواعد

و لكل المهمومين بهمومها ....

و ناسف للخلط الذى حدث ...

بس بيني و بينكم كلنا ود شاموق وكلنا شعراء ....

شمهروش لا حولة نص المسقف علو انا؟
لانك عقدتنى والله للطيش..

مكلة سبا
والله فى حياتى ما قرقرت مثل هذه القرقرة.. ابدااااع شديد
بعد انفصال منطقة الشايقية حنعملك الناطق الرسمى بتاع حركة تحرير اولاد شايق

Quote: ووحات نظرى مجااان لاقرش ولاتعريفة ... بس اعملوا حساب شيل الحس واصل الشغلانة ياجماعة قالو والعهدة على الراوي انه بت حنكوشة وافقة وسط حنكوشات تحت (صيوان) يوم الافتتاح بره جاء واحد (شماشي) منبسط ومندهش اتشعلق في (ماسورة الصيوان) الصيوان اتهز وكان داير يقع ثبته راجل كان واقف

يكون الشماشى دا ولدى اصلو الحقد الطبقى دا جينتك
وبركة يا بنيتى الجبتى لينا
شمار الشغب وسببو الاصلى.. ذى صريخ بنات الداخلية لما يقولو فى حرامى.. كل يوم بنجرى نلف المدرسة كلها نصرخ ومافى زول ابدا قال لى شوفتا الحرامى.. يعنى المسعلة كلها شماشى واحد ابدى دهشته وفرحو بشعليقتو فى عامود الصيوان..
حتى الفرح ما عايزنو يفرحو يا كافينول
ملاسى اخوى ربنا يديك الفى مرادك يا رب
اسمين فى حوش بكرى واحد تحب بيه وتبقى شايل اسمك واحد
تشتم بيه وتقول رايك الحقيقى.. لانه انا بعد قريت الرد داك تأكد لى انه.. كلامك صاح
لانه انا عارفة أنى ما شينة لدرجة اتكفت بلا غبينة واطلع نص مسقفة

لا حول ولا قوة إلا بالله .. اللهم آجر السودان في مصابه واخلف له خيرا منه.

عن أمي عن حبوبتي قالت حدثني العارف بالله جدنا قال::: القلم ما بيزيل بلم:::



جاد

والله لم أرى مثل هذا الجدل والنحيب على مول الا في هذا البلد العجيب

وين كان هذا النحيب عندما أعدم مجدي وجرجس؟؟ وين كان هذا النحيب عندما أعدم 28 ظابطا؟؟ وين كان هذا النحيب عندما قامت مجازر جوبا 92 ؟؟ وين كان هذا النحيب عندما جلدت النساء في بلد عيب أن تتشاجر مع السيدات فيه؟؟

كم من الشعب السوداني يستطيع أن يشتري من مولكم ده ؟؟ بالمناسبة أنا مقيم في دولة فيها مئات المولات عشان ما تقولوا حاقد ولا كده؟؟ كم مستشفى كان يمكن أن تبنى بتكاليف هذا المول ؟؟

الحكومة القبيحة دي اللي بتفتح مول مش أحسن تركز في مشاكل الحرب والسلام ولا المول أهم؟؟

يا أخواننا مولكم مبروك عليكم

الأحباب الأعزاء تحياتي ‏
لمعرفة رقي وتطور الأمم أنظر لحضارتها وتتطورها ولكن في السودان إذا أردت أن تتطور وينظر ‏إليك فخرب ودمر كل ما هو أمامك هذا ماحدث في افتتاح أضخم مول في السودان ولكن هي دائماً ‏روح العبثية والفوضى والهمجية التي لم تنزوي بعيداً عن المجتمع السوداني حتى مثقفوه هنا في هذا ‏المنبر يمجدون تلك الأفعال المشينة ويعتبرونها نوعاً من البطولة وأنها تخدم أهداف وآمال وتتطلعات ‏الشعب من الخلاص من هذا النظام الجاثم على صدور الجميع .. متى هذه البربرية والروح ‏الاستئصالية لكل ما هو جميل وجاذب؟؟؟ والتي تنفر المستثمرون من الولوج في استثمار قادم داخل ‏السودان مهما كان .ما حدث وصمة عار في جبين الشعب السوداني الذي ما زال في سنة أولى رقى ‏وحضارة وتتطور وكان الله في عونك يابلادي ‏
سؤال لمن زج بمشكلة دار فور في هذه القضية ما علاقة تلك بهذه القضية أرجو التوضيح إلا أن ‏يكون ذلك نوعاً من ..... ‏

يا ابراهيم علي مشكلة دارفور زجت هنا والرد كان علي ابنوس الذي يشير الي حرق البيوت و..و.. ـ بناءآ علي خلفية نقاش قديم ـ ان شاء اللـه اكون اوضحت ـ الا اذا كان ...... ــ

أويد بقوة طرح الأخ أبنوس : هنا لا اؤيد العنف او التكسير لكني اتناول الظاهرة من زاوية اخرى وهي دوافع هذا الفعل .. واذا لم تحل هذه المشكلة الاقتصادية فستتجلى في ظواهر كثيرة .. عنف .. زواج عرفي .. بيع اعضاء .. دعارة وشبكات مخدرات واوكار للجريمة .. فالفقر يولد كل شيئ . وستنهار كل القيم .. التي تتباهون بها امام العالم وامام نفسكم تلك الشخصية السودانية ستتظى .. ولتبقى لكم هياكل المولات ..

أرفض التخريب والدمار مهما كانت الاسباب ، برغم إماني بالظروف المريرة التى تمر على اغلبية ابناء شعبنا من شظف فى العيش ومعاناة فى العيش بصورة كريمة ومظالم عمت البلاد بطولها وعرضها ولكن هذا التصرف يدل على همجية وعدم حس وطنى ونحن نأمل فى بناء سودان جديد مبنى على التسامح والتعايش والعمق الوطن . ومن ناحية الاستثمار الاجنبي من المفترض التشجيع يكون للاستثمار فى مشاريع البنية التحتية وليس مولات ودمت .

عزيزى ابنوس اننى التقى معك بشدة فى مقولتك :
هنا لا اؤيد العنف او التكسير لكني اتناول الظاهرة من زاوية اخرى وهي دوافع هذا الفعل .. واذا لم تحل هذه المشكلة الاقتصادية فستتجلى في ظواهر كثيرة .. عنف .. زواج عرفي .. بيع اعضاء .. دعارة وشبكات مخدرات واوكار للجريمة .. فالفقر يولد كل شيئ . وستنهار كل القيم .. التي تتباهون بها امام العالم وامام نفسكم تلك الشخصية السودانية ستتظى .. ولتبقى لكم هياكل المولات ..

ولكننى أرفض مبدا التخريب والدمار لممتلكات الوطن والخاصة وهذا يدل على همجية التصرف وعدم وعى بالحس الوطنى لمن قام بهذا التصرف برغم قناعتى بأن اغلبية ابناء شعبنا يعيشون حاليا" تحت حد الفقر ، من جراء السياسات الخرقاء التى طبقت بلا رحمة فى حق ابناء شعبنا ومن النهب المنظم لثروات الوطن من قبل طغمة الاغلية الحاكمة .

وفي راى ان الاستثمار الحقيقى ليس فى المولات والشركات العصرية للصارات السودانية ، ولكن هو فى مشاريع البنية التحتية للوطن ودمتم .

الاخزة البورداب الاحباب سلام ليكم كلكم
جميل ان نطرق كل المواضيع نتحدث بحرية نتقبل الراي اخر بما لا نهاية من المساحات
كل المشاكل والالام التي نعاني منها يمكن ان نطرحها ونناقشها
ونجتهد في ايجاد الحلول
لا للتخريب والتكسير ان ما حدث ايام الاحتلال لم تشهده البلاد بطولها وعرضها
ولك ياحبينا الذي تستوطن بلاد المليون موووووووول نحن هنا في بلاد المليون مييييييييل نقول وبكل فخر
ان ماذكرتوه من مخدرات ودعارة وجوع هو مرض عقلي اصاب روؤسكم وانتم تتمشدقون بالبلاد الاجنبية
وتترمتلون بصالات الترانزيت تسألون الامم المتحدة الاوراق والاعانة
ونحن بين الكوبريين ننعم بكل ماهو جميل واصيل وانشا الله ربع مووول او ربع وقية نبق
وين ياملكة ديل بخلوناننعم بي حاجة زي دي


لانك معاي وحضورك مرتب

و لانى كسلانه .. ح اعمل cut and paste من ردى على بوست ود قاسم ( لم ار هذا البوست الا مؤخرا)...

..الا تروا معى انه بدلا من دعوة رأس المال الاجنبى للاستثمار فى "مول" .. الم يكن من الافضل استثماره فى مشروع طاقة يجلب الكهرباء لكل بيت .. على الاقل فى العاصمة (صاحبة المول)...

لا اعتقد ان عاصمة كعاصمتنا .. غارقة فى الظلام (الحسى و المعنوى) ... مهيئه للمول ... من ناحيتى ..يكفى ان اعود للسودان واجد كهرباء و مياه لا تنقطع بالساعات و الايام .. و الا أموت عطشا فى قلب الخرطوم ..,أتمنى ان أكون على ثقة فى انه اذا ما احتاج احد ابنائى لرعاية طبية ..فسأجد مستشفا مؤهلا (و لا أقول خمسه نجوم) لعلاجه.. أتمنى ان اطمئن ابنتى ذات الستة سنوات انها ستزور اهلها فى السودان و لن تعانى من أورام و تقرحات فى جميع اجزاء جسدها بسبب عضات الباعوضة اللعينه .. أو ان تطاردها اسراب الذباب النهم اينما حلت. غاية ما اتمناه (و لا اعتقد انه سيصبح حقيقة) ان يعاملنا موظفى المطار باحترام و مراعاة ابسط حقوق الانسان. ..وعدم اهدار كرامتنا فى كل المرافق الحكومية...
نرجو ان نراجع اولوياتنا و نعيد صياغتها .. بدءا بأعادة صياغة الفرد السودانى .. وتعريف ماهية القيم اللتى تْؤهلنا لنكون شعبا حضاريا....


--------------------------------------------------------------------------------

توضيح

يا ملاسى يا خوى القصه ابسط من كل هذه التحليلات السياسيه


افتكرته ودشاموق..


لو فى اى تغييرات لازمه..المرجو اعتمادها


وشكرا شمهروش على التفهم


وبصراحه "شيناتكم"، جمع شين الحرف، كترت على... ههه

Quote: يا ملاسى يا خوى القصه ابسط من كل هذه التحليلات السياسيه

الاخت تماضر تحياتي

الواحد كان نفسو من زمان يطلع محلل سياسى ... بس معليش الواحد المرة دي طلع اوت

و اهو مرة تخيب و مرة تصيب ...

و معليش لسوء الفهم ... و اكرر الاعتذار ...

بس برضو ضللني:

Quote: والله ياتمااااااااااااااااضر حقيقة انت ست وجعةليلة امس اثبتنا للعالم باننا دهماء بان السودان (دلوكة وعودها لين)رااااااااااااح المووووووووووووول وراحة معاة وسامة مصطفي سيد احمدزادت اسعار الرغيف و الشعب الجاهل صاحب المليار فنان ومبدع وطمبار وزمبار يفرغ كل غله في احدث منشاء بالبلاد

بس ندائي لشمهروش ... يا خوي مالك مقل كدا يعني كم و تمانين بوست بس خلال الفترة الطويلة
دي ... مواضيعك في السلك ... كتر من الكتابة بالله

و برضو التحية للجميع ....

أما كان ان يُقام الحد علي الخرطوم؟
وتغتسل عفراء البرئه؟

الاخوة المداخلين
اولا لم اقل انني من مؤيدي تكسير المنشآت ، ولدينا في المظاهرات تجارب في ظل هذا النظام ، وكان اول تنبيه لطلاب ان لا تكسروا اي شيئ ولا تردوا اياديكم فقط جردوا حناجركم واهتفوا ... رغم ان الهتاف في ظل هذا النظام يواجهة بفوهات البنادق .. ونعود للموضوع اولا شكرا الاخ منير في تخصيصك رد على مداخلتي :
ودعني اخرج بك الى نقطة افضل كي ترى الامور بوضوح .. ان حديثك عن ما لا تفهمه في من يقتل من في دارفور فهذا سأوضحه لك في اسبوع دارفور القادم ، ولكن لتعلم انا لا يهمني من القاتل ومن المقتول .. بقدر ما يهموني هم الاثنين .. فأذا كنت من عرب او زنوج دارفور فالاثنين اهلي وعشيرتي بل كل الشعب السوداني وانا ابن لهذا الشعب الذي ارى ان حل مشاكله الراهنة لا تتم بجذب هذا الاستثمار الاجنبي الاستهلاكي .. بل يجب التركيز على الاحتياجات الفعلية لهذا البلد .. وامكانيات الاسثمار فيه .. وبما اننا بلد زراعية ومصدرة للماشية فهذين القطاعين هم الاولى بالاستثمار .. اما هذه الانشطة الطفيلية فلا تهم شعبنا في شيئ ولا يضيف منظر مبنى ما شكل جمالي لمدينة شحبت وجوه ساكنيها .. وغارت عيونهم من الجري وراء صحن الفول بالطعمية ... اما الذين تتحدث عن تسولهم للامم المتحدة فهم كانوا عزيزين ومكرمين في بيوت نشأت على التكافل والتراحم وانجبتهم امهات سودانيات فما الذي شردهم وجعلهم يتسولوا طرقات الخروج الى المنفى في بوابات اللجؤ العقيمة ..؟ الم تسأل نفسك هذا السؤال ؟؟
واراك تتحدث بأستخفاف عن ما يجري في غرب البلاد من مآسي بقدر ما تزرف الدموع على زجاج مول هشم .. وارجوا ان لا تشغل بالك بالتفاصيل من يقتل من في دارفور بقدر ان تشغل بالك بأيقاف هذا الاقتتال ، الذي سببه الرئيسي هو هذا النظام الذي يجلب استثمارات فارغة الى الخرطوم بينما يقدم البنادق المحشوة بالزخيرة للبسطاء من شعبنا ليقتلوا بعضهم بعضا !! وكيف تريدني ان احزن لمبنى كسرت زجاجات واجهته بينما في وطني قرى كاملة تزول في لمح البصر هي وسكانها .. وبوادي ترحل الى لا اتجاه يحاصرها الرصاص من كل الاتجاهات ..
انا لا اريد امريكا ان تحكم او تدخل السودان فهذه لا ادري ما الذي ادخلها في الموضوع .. لكن كل ما عنيته من ردي ان الحادثة ليست معزولة عن الحال العامة التي وصل اليها الشعب السوداني .. والاستفزاز الذي تستمر فيه الحكومة كل يوم بجلبها لمثل هذه الاستثمارات .. الطفيلية .. والتي لا تقدم او تؤخر من الحالة الاقتصادية .. كيف بحكومة فرتقت النقل الميكانيكي .. وباعت مصانع النسيج وغيرها من مشاريع البنى التحتية .. دون ان نسمع كل هذا التباكي . وتتحدثون عن فقدان وظائف .. دخل الصالح العام في حادثة المول .. هو تحسر بعض المداخلين على الكم وظيفة التي فقدت بينما لم يطرح احد قضايا الالاف المفصولين من الخدمة المدنية .. واراك عنيتني بكثير من الحديث الذي لا ارى مبرر له ويمكن ان يكون في بوست منفصل لانه يتعلق بموايضع اخرى ..
الاخ شمهروش :
تقول لي نحن الذين نعاني من المشاكل المتعلقة بالزواج العرفي وبيع الاعضاء وشبكات الدعارة .. رغم بعدي من السودان لسنوات .. لكن اقول لك تلفت حولك .. فأنت اذا كنت لا ترى فأنا ازرق اليمامة على قول بشرى الفاضل عبر هذا الشباك الضيق ارى الخرطوم حولك غارقة في بلاعة الجريمة .. وانهيار كامل للقيم الاخلاقية .. وبيع الاعضاء اصبح له سماسرته .. وشبكات لها صلات بمافيا الاعضاء .. وعليك ان تتلفت فقط سترى كل شيئ .
وقتها لن تعيش في راحتك الزائفة ستعرف وتتوقع ما يحدث لاحقا
اتمنى قراءة ما اكتبه بوضوح حتى لا يقولني شخص ما لم اقله ..
ولك المداخيلن الود العميق

اخي ابنوس ـ سلامات ـ اولآ اعتذر لك عن مقدمة خطابي لك ، والعفو يا اخي ـ واشكرك علي خطابك المهذب الراقي
ثانيآ اخي لست انا من جاء بذكر الامم المتحدة ، فاتمني مراجعة الردود مرة اخري حتي لا يختلط عليك البقر برضو ـ
وثالثآ اخي لست مستخفآ ولا أجروء علي الاستخفاف بمآسي بلدي واهلي في الغرب ـ بل العكس ، فهي من المعضلات التي احس باليأس وهول المأساة فيها وانا اتابع عمق الخلاف الذي اخشي ان يكون قد خرج من السيطرة ـ اذ الواضح ، وكما هو معروف ان الخراب هين لكن الاعمار الصعب، واشعال الحريق لا يكلف اكثر من قشة كبريت بينما اطفاؤه يكلف ربما ارواح، وبذر الفتنة لا يتطلب اكثر من همسة وشاية لتستحيل الي دماء ومذابح، بينما اخماد الفتن يحتاج الي ما يحتاج من نفوس كبار يندر وجودها وسط هذا الكم الهائل من الغبائن والثأرات ـ لذا بلغت مرحلة من الاحباط العميق من هذه المعضلة التي اراها تتوسع يوميآ ـ بينما اقدر واحس بمدي شعورك انت كأحد ابناء دارفور المكتوين بنار الحرب عن قرب ـ والعبارة التي اعتقدت انها استخفاف هي تساؤل حقيقي وانا اتابع تداول القضية في الاخبار وفي هذا المنبر ـ فمثلآ بينما يأتي البعض من ابناء دافور بأخبار عن جرائم الجنجويد والمليشيات العربية ضد الآخرين، يعرض الآخرون صورة معكوسة تمامآ عن الاوضاع ـ ومثلآ بينما يملأ الاخ نهار البورد اخبارآ عن فصل الطلبة العسكريين وعن عنصرية الحكومة نجد ان قريبة وزيرآ للتربية والتعليم ـ وبينما تتكلم الصور عن المشردين من اهل دارفور بسبب القصف الحكومي، تظهر في الانباء الحكومية ايضآ سكان قري مشردين في العراء يصبون لعناتهم علي المتمردين ـ يعني بأختصار الصورة جايطة ـ
الشئ الثاني الذي اود ان انوه له هو دفن الرؤوس في الرمال بهذا الضخ الاعلامي الهائل الذي يوحي بأن هذه المشكلة بدأت مع الانقاذ ـ والكل يعلم ويتجاهل الحقيقة المرة ان الحرب كانت مشتعلة بين القبائل من زمان خالص ـ وقد سمعنا بها منذ الثمانينيات ـ وربما كانت قبل ذلك، ولكنها قطعآ تأججت اثناء الحرب التشادية حيث انتشر السلاح رخيصآ ـ وما زلت اذكر اصدقاء وزملاء من دارفور وهم يحدثوني، في ذلك الزمان، عن حرق القري والابادة والمذابح المتبادلة بين القبائل ـ واذكرهم تحديدآ يحكوا لي عن مجازر ضد قبيلة القمر ـ و قبائل اخري كالبديات و غيرهما ــ هذا اذآ ما كان عليه الحال منذ زمن نميري ـ واري ان بتر المعلومة والقاء المشكلة علي الانقاذ وحدها فيه دفن للحقائق وتضليل وزوغان وتأجيل فقط لمواجهة لب القضية ـ والتي ربما اتفقنا انه صراع بقاء حقيقي بين قبائل دارفور ـ وهو صراع أكل عيش للانسان والحيوان الدارفوري ـ وهنا يتجسد الصراع بين الزراعة والرعي ـ وكما ذكرت لك في نقاش سابق انه يستحيل ان يبقي نمط العيش الرعوي التقليدي لتلك القبائل علي ما هو عليه في هذا العصر ـ لا يمكن ان تتنقل قبائل كاملة بكل مواشيها وابلها ونسائها واطفالها في السنة مرتين بين اقصي شمال الي اقصي جنوب الاقليم ـ لا يمكن !!!ـ وفي هذا الترحال الدائم جريآ وراء السحاب والسراب تتأخر اجيال عن ركب التطور زائدا هلاك القطعان و عداوات الطريق ـ وكما قلت لك ، للأسف الشديد بدلآ عن ان يتجه ابناء تلك القبائل للحل الاسلم وهو الاستثمار في سبل الاستقرار ، حتي ولو بالمجازفة بنصف ثروتهم الحيوانية، جنحوا الي الحل الاصعب والاشرس، وهو شراء السلاح وتكديسه ـ وبذا تسابقت القبائل علي التسلح وازدادت النيران اشتعالآ ـ ومما زاد النار اوارآ استغلال المنتفعين للوضع لتأجيج المشكلة ـ ثم تسيست القضية الي ان ركب قمتها الآن طرفي الجبهة، ونحن بالطبع لا نعرف المدي الذي يمكن ان يصلوه من الفجور في الخصومة ـ وهذا سبب احباطي ويأسي ــ
أما بخصوص المول موضوع البوست ، فما زلت اصر انه شئ ايجابي ليس لأنه سيوفر هذا ويشغل ذلك، ولكن لأنه ربما كان مفتاحآ لتغيير نمط حياتنا بوجه او بآخر ـ دع الناس تري وتعرف ان هناك سبل للحياة مختلفة ـ خلي بتاع اللبن يفكر في طريقة لتغيير اسلوبه في البيع ـ خلي الناس تعرف ان الرجال صنعت والرجال نظمت حياتها وعرفت دروب المدنية ـ خليهم يستفزونا عشان استفزازهم دا يحرك فينا طاقة للعمل وبذل الجهد ـ اسوأ انواع الحقد هو الذي يدفعك لتحطيم نجاح الغير ـ
وليكن استثمارآ استهلاكيآ ـ فهذا سيأتي بذلك ـ وما عيب الاستهلاك؟ ألا تعلم أن حركة الاقتصاد تقوم علي الاستهلاك؟ ألا يعتمد ثلثا اقتصاد امريكا علي جيب المستهلك؟؟ ـ مع اني اشك في نجاح هذا المول نسبة لأن الجو زاتو ما بيساعد، لكين برضو بأقول خليه يتبني ليكون مثل حجر ألقي في مياه راكدة ـ خليه يخج لينا ركودنا دا ـ خلينا نقوم استارتر، يمكن بعد داك ندردق بدون دفرة ـ خلي العرض يبدأ ياخي والما يشتري يتفرج ــ

اخي ابنوس ـ بمناسبة النقل الميكانيكي دي ـ يحكي أن نميري كان ابتدع ليهو حاجة سماها يوم الانتاج ـ ما زي يوم الهجيج (الخدمة) بتاع الطيب سيخة ـ في يوم الانتاج كانت ساعات العمل تمتد حتي الساعة خمسة مساء ـ احد اصحابي الظرفاء(وهو كان شغال في النقل النهري)علق وقال: حقو في يوم الانتاج دا بالنسبة لعمال النقل النهري والنقل الميكانيكي يفكوهم بيوت من الساعة عشرة صباحآـ عشان الانتاج يزيد !!! ـههه ـ
طبعآ دي بس طرفة لا تعني اني اؤيد تشريد العاملين ولكني لست ضد الخصخصة المرشدة النزيهة ـ


أما يا اخونا الحنين ياخي انت كدي أبدأ بالطقيع ـ لأنه مرحلة (الجديع) دي مرحلة متأخرة خالص ـ لوول ــ

تماااااااااااضر اشكرك جدا على الدخلة الحلوة دي.......

والهم واحد والفقد واحد
جميل ان نعرف انك بخير
بس الكلام ده استروه عشان فضيجتنا ما تبقى بي جلاجل

والله يا بيان فشيتني
ذي الجماعة الفشوا روحهم في المول
بعدين الأتراك ديل عملوا شنو استثمار مفيد في البلد
حلويات،، مخابز،، مطاعم
كلها حاجات استهلاكية وليس انتاجية
بعدين ورونا المستثمر السوداني المعاهم دا منو
انقاذي كبير ولا جبهة حرامي
علي العموم يا بيان لو انا معاك كنت جدعت جنس طوب
زي ما قال ابو عاقلة

قل الطوبة ،، قل الطوبة
وافلع دومة القصر البنايتو قزاز
وناسو عزاز

ابنـــــــــــــــــــوس........
نحن أولاد الخرطوم محل الطيارة بتقوم
الشعب كلوا يغني في الحافلات والكافتريا ولا يوجد اي من الذي تحدثت عنه (من زمان الحاجات دي موجودة)
وعلى مسمع ومرأى من ايدي السلطة (الديمقراطيةوالدكتاتورية)
وكانت الحكومة بتاخد ضرائب
هل ليس هنالك مجتمع مثالي توجد ثقرات في كل بقاع الدنيا ولكننا ندمن البحث عن سفاسف الامور لم يكن هنالك غبن او ظلم
ماتسمع به ياأبنوس نوع من الاعلام المأجور والخائن الذي يتربص بمجتمعنا
لم نسمع باي نوع من التفجير والتكسير او خراب
ومهما يكن من الضغط الاجتماعي او النفسي هذا لايبيح الفوضي والانفلات الاخلاقي والامني

والزول البيته نضيف بكون طول عمره نضيف

Quote: علي العموم يا بيان لو انا معاك كنت جدعت جنس طوب

شكرا ليك يا احمد
خلاص نلوى كفاحنا معا
نعمل اجتماع ونعمل هتلست(hit list)
الطوب حيكمل غايتو

الاخ شمهروش
لا ادري ما معنى انكم اولاد الخرطوم ... محل الطيارة بتقوم وغيره من الاحاديث التي لا ترقى لمستوى ما نناقشه .
المؤسف انك تعترف ان الخرطوم تختلف عن غيرها .. ويعتز الذين منها انهم افضل من غيرهم وهذا لب القضية .. اي شعب ذلك الذي يغنى في الحافلات .. اظنك من شريحة لا تركب الحافلات اصلا .. هذه الخرطوم ليست لأحد هي لكل هذا الشعب البعيد والقريب .. واذا رجعت انت لاصولك ستجد نفسك تنحدر من اقليم بعيد ولا تقوم من غير الكتاحة .. ولكن تظل النظرة للسودان هو الخرطوم .. انت عندما تتحدث عن السودان في بالك الخرطوم وبس اما انا ففي بالي السودان كله .. اعتذر لدخولي في البوست الخاص بك .. فقد كنت اعتقد ان الحوار يكون بلغة افضل .. وليست هذه النبرات المتعالية الفارغة .. ويا عزيزي نحن ابناء السهول الجديبة .. ابناء الاقاليم المهمشة والفقيرة .. من اقصى مناطق التصحر .. وقلنا نفيتح معكم يا ابناء الخرطوم نافذة للحوار .. لكن طالما هذه لغتك اعلن خروجي من بوستك .. حتى اشعار آخر
الاخ منير سأنقل الحوار بيننا الى بوست آخر .. اتمنى ان نلتقي بهناك .
لك ودي

ابنــــــــــــــــــــــــــــــــــــــــــــــــوس يا كائن بلون الانتمــاء
لم يدر بخلدي مسألة الانتماء الي الخرطوم كمدينة وانا من ساكنيها ولكن من باب المعرفة والالمام ببواطن ما يدور فيها
وهذا للتوضيح ولانني لا استغني عن قلم راقي ومهذب يرسل الكلمات ممهما كانت كاللحن والصباح الشجي
واظن الاشعار الآخر قد انتهى الان ومزيد من المناكفة والمدافرة في سبيل هذا الوطن المجروح والما انعرف ليه وجيع
لك ولكم مني كل الحب والتقدير


وكان حيين بتلاقى...

ود عقاب اشكرك كثيراً علي هاتفك الرقيق
والساكت عن الحق شيطان اخرس وما عهدناك هكذا ومنتطرين مزيداً من الحقائق

انت ود عقاب دا لابد تحت المول دا يسوي في شنو ؟؟؟
اظهر وبان عليك الأمان

وبالمناسبة انا قبل كدا حصلت لى لخبطة تماضر دى .. قريت بوست ورديت على انه حسين ملاسي وبعد شوية اكتشف انه حسام هلالى بس الاتش والال زغللو عينو
لكن عدا من حسين ملاسى كيف ؟؟ الله تعلم

عفراء تركيا , مبنى الرئاسة




عفراء ليلا دون إغتصاب




أبنوسي

تبلدي خفتا على اللوحة الجميلة دي ما يشوفها الجماعة
يخلو عاليها واطيها
وغريب جدا ان الاوطان تبنى بسواعد بنيها, ما عدا عندنا في السودان
امانة في ذمتك ياملكة الصورة دي لو فرشوا فيها حنضل ما ببقى حلوا

-? - any new news

شمهروش
الكويس انو ايام تكسير مبنى عفراء وقتها كان إعلام الترك مشغول بقضايا تانية , وهو إعلام مبني على الإثارة , ولو كان وصل أي شريط مصور من عفراء الخرطوم ليلتها كان لي هسع حيكون معروض في القنوات التلاتين او زيادة ديل .
في الإتفق على اهمية المول كتشجيع لي مستثمر وفي الشاف المول نوع من رفاهية البقلاوة في زمن الشعب ما لاقي دقيق الخبز . بس أكيد بواطن الأمور والتجارة والإستثمار بين الخرطوم وتركيا ما وقفت علي مول تجاري .



أبنوسي

السلام للجميع
لم اشارك في النقاش عن المول بسبب الانشغال الشديد
و كنت مقرر اكتب بوست عن المول , لكن بسرعة اعلق علي ما حدث في ليلة الافتتاح ,بسبب عدم الالتزام ببرنامج حفل الافتتاح و تحديدا حضور الفنان محمد الامين حدثت اعمال شغب , المسالة ما الفنان او الحفل الموضوع احساس فظيع بالمفارقة الشارع المار امام المجمع التجاري يؤدي الي افقر احياء الخرطوم الانقاذ, مايو عد حسين , السلمة , الازهري سكان هذه الاماكن حضروا بكميات كبيرة و الدليل ان الشرطة كانت تطارد المتظاهرين في اتجاه هذه الاحياء , هؤلاء المساكين اصابهم احباط سيصيب اي من الافراد البسطاء في حال دخوله الي المول , انا شخصيا حسيت بمنتهي الفقر , حزام بـ 97000 جنيه قمصان باكثر من خمسين الف جنيه قصص صعبة جدا يا اخوانا , قررت اني تاني ما حا ادخل لهذا المول و لا ممكن اودي اولادي و الا حا اخش في ازمة حقيقية . فيا اخي شمهروش اعذر هؤلاء المتظاهرين (اتفق معك تماما في رفض العنف و التخريب بكل الاشكال) و لكن هل تعلم ان هنالك سوق تباع فيه الشية بالقطعة ؟ ما بالك بواحد يشتري الشية بالقطعة ليجد ان سعر جزمة واحدة يساوي سعر الف قطعة شية؟

الاخ عصام
لك كل التحيات الغوالي الطيبات
عندما قامت مدينة الرياض الحي الفاخر بتاع اولاد الذوات كانت تلك المناطق اوكاراً للاجرام وحوادث الاحزمة خير شاهد.
لم يدر بخلد احدهم ان يهشم ويكسر تلك المحلات التي في حينها كانت تعادل مليون موووول.
فقط ان الانسان في ذلك الوقت كانت له قيمة حتي وهو فقير او مجرم
انسان السوان المشبع باللاشئ (ود البووالعبوب) فارغ اجوف يدعي الثقافة والتحضر.

لا يوجد اي سبب في الدنيايدعك من تكسر وتخرب وتهدر اموال مجموعة قررت ان تغامر في بلاد ومع سعب لاتصلح حتى لقضاء الحاجة



شرح لي ود البواو العبوب(عندما يتوفي ضغير البقر يقوم الرعاة بسلخ جلده وهو ميت ليساعد امه فى ادرار اللبن)