دعـوة لتجـمـيع اعـمال حـمـيد الاولـي

تقابلت مع الاخ حميد حميد في زواج رقم صفر وتحدثنا كثير عن شودانيز وغيرها وعلمت انه بفقد لعدد كثير من اعماله الاولي وانا الآن بصدد تجميع بعض من تللك الاعمال واتمني ان تتظافر جهود الجميع من اجل القيام بهذا العمل يعني نريد اعماله الاولى مثل
كان رجعت اديني فاضى
************
شن طعم الدروس
***********
تعال قص البلد وارجع وغيرها
يمكن ارسال العمال عبر هذا البوست او على بريدي

تسلم يا ابويسرا بتبنى الدعوة وبنفتش معاك يا زول

تسلم اخي منعم
بس شوفوا لينا الليندي وين لانه مستودع اعمال حميد

تسلم يا ابويسرا
نحن معاك من اجل هذا الرمز الأنسان
قبل ان يرحل ونفقده فجأءة لا قدر الله
واكرر معك النداء للجميع
من اجل عيون الوطن
من اجل نادوس
كابروت
نورا
ودمتم

وأآخ من حظك يا الجابرييى !!!

فوق

ابو يسرا .. ابو النسب ازيك وازى خطيبتى


ايوب فى جده برضو عندو كميات من اشعار حميد

يا اساسى شوف ايوب وين ؟

الليندى برضو وين ؟


وكلنا معاك بنفتش


ديكو

الأخ الجميل أبويسرا

شكرا لهذه المبادرة الجميلة والتي نحن أحوج منها حتى من حميد نفسه، فهي مكتوبة بعبق فترة مختلفة.
سأحاول ان اسهم معك بما لدي.
وسأبدي مساهماتي بهذا النص الذي غنا مبدعنا الراحل جزء منه في أغنيتين مختلفتين


آه يا غُبُشْ
ما عندي ليكم غير نغيم ..
برجوه ينفُض
لي غبار زمن القسا ..
الكتّاح
يهِزْ عرجون نخل صبر الغلابة الطالْ ..
يحِتْ يخرِتْ ..
تباريح الأسى
الممدودة فوق نور الدُّغُشْ
يا نورا آه ..

يحرَد كنائسنا المسيح ..
يعرش مدارسنا الصّدى
ييبس .. يباس
حلق العصافير الوديعة من البُكَا
يندَرْدَرْ الصّوت البعيدْ ..
أسيان يصُد من دون صدى
ينكَفْرَنْ الفجر الصّبوح ..
يحمي الزهيرات الندى
تختا الدراويش الضّريحْ ..
يسكن خلاوينا الجنون
يهجر جوامعنا الإله
يا نورا آه ...

تطرح غيوم الشوق تئِنْ ..
تشرَقْ
تموت خيل ..
كلمة الحق التّناهِدْ في الشِّفاه
تعقِر بسيمة الصِّحْ
مع لوبي الجّروفْ
تغرِزْ ضريعات الحروفْ
ينشف مُرَاح الأمسيات ..
تتمطّق الأرضة المروق والأغنياتْ
اللّي الشّروق ..
والأرض
والحب والمطر
تضْهَب تتوه ..
وكتين يضيع عرق الجِّباه الشُّم ..
شمار في مرقة
آه يا نورا آه ...

من دّرْبِكْ التّور نَفَس خيل الصّبُر ..
فَتّر خطاوي الشّوق وراه
يا نورا آه ...

ساعة الشّموس الغُرْ .. تهضلمْ
تلحق الصِّح في المغاربْ
تدفر الضو الكهاربْ
في وشيّكْ
تذفر المدن
الضّبابية
السّرابية ... الكآبة
وحائط التيِّه
والطّشَاشَات
فوق قِفيِّكْ
يا أم عوارض .. مو دعاشة ..
ماها شبّورة وتقيفْ
جايي ليك يا نورا غيمة ..
تملا ماعونك خريفْ
يملأ عينيك ويفضِّلْ ..
يروي جوّاك ... العطاشة
مو دعاشة

.......

يا مطر عِزْ الحريقْ
يا مصابيح الطّريقْ
يا المراكبية البتجبِدْ
من فَكْ الموج الغريق
يا الجزاير النتحويبا ..
لما إنشعوز بحرنا
جينا ليك والشوق دفرنا
يا المراسي النتحويبا ..
لما إنشعوز بحرنا
يا نشوغ روحنا ودمرنا
يا المحطات الحنينة ...
القصّرَت مشوار سفرنا
يا ما شايلك بيني حايمْ
أيوة شايلك .. بيني حايمْ
في الأرِضْ تكوين قضيّة .. !!!
في السّمَا الأحمر .. غمايمْ
بي برِدْ نغما السّلامِي ..
رَطّبَتْ حلق الحمائمْ
طنبر النّخل التبلدي ..
راقص الأبنوس وصَفّقْ
سَوّتْ الصقرية موجة
خَلّت النِّيل هاجلو هوجة
بشّرت بالخير بلدنا ..
شالت الشّبَال نسائمْ
جدّدَتْ زلفي القديم ..
أمشي بي الماشيبو أقاوم
لا بتكَبِّر راسي فورة ..
لا بتصغِّرني الهزائمْ
جِنْس يا نورا ابن آدم
حلمو في عالم مسالِمْ


لا اللّيالي الماها ليّا ..
لا الشّمَاتات العليّ
لا البنوك المخملية
لا تفاهات الحضارة ..
لا عفاريت المدينة ..
لا العمارات السّوامِق ..
فوق ضَهَر ناساً فقارى
لا الهتاف الفاوة ضارى
غطى بالي من الفوارق ..
لا الألوهة الطوطمية
لا البرندات الوسيمة ..
ولا الأسامي الأجنبية
بتمحى من عيني ملامحِكْ ..
وإنتي جاية المغربية
جايي دايخي المغربية ..
وشِّك المقبول مكَنْدَكْ ..
سامسونايتك زمزمية
كونشبر ..
مرزبة
مقطع
ريشة فانوساً مدَرْدَحْ
قلت بيهن لي زمانك ..
يا زمان الحاجة عندكْ
يا زمان الآفة حدّكْ ..
لا تطا الوردة الصبية


يا نفس فجر القصائد .. يا بلادي
القَطَع قلب الرّوادي
باللُّواج الجاي وغادي
ده ما هو صوتِكْ .. لاها صورتِكْ
دي البترقش
ناديي فوق صدر الجرائد ..
ماها صورتك !!!!
لا هو صوتك ..
لاها صورتك !!!



إنتي يا الفي إطْن الصّحَارَى
شُفّع العرب الفتارى
البَفِنّو الشايلا إيدُنْ ..
ويجرو كابسين القطارة
يجرو باريين القطارة
لا سراب الصّحراء موية ..
لا حُجار سلّوم موائدْ
إنتي في الغابة اليصارِعْ ..
جوفو للآهات تلكِّي
ياما دفّقْ غيم رجاهو ..
لكن الأيام كركِّي
في خلا حالنا اليمحِّن ..
ويملأ بالسُّهد الوسائدْ
إنتي غيمة ..
شديرة ..
خيمة ..
إنتي جاهنا ..
والتّقَا الطّلَقَت وشينا ..
فرّقَت غُمّة جباهنا
فرّجت في الحارّة ضيقنا
فرّحَت شُفّع فريقنا
والمواعين الحزينة ..

وإتجاهنا
يا النغيم البقّ فينا ..
وشدّ لي وتر إنتباهنا
يا تباشير يا بشارة
إنتي يا ضرعاً تَكَرْمَشْ ..
شان يرضِّعني الجسارة
إنتي في منفاي رفيقة ..
وفي حشا الأشواق حرارة
يا هُدَى النّاس الحيارى
يا ندى الفجر اليبلِّلْ
صور عوينات الفقارى
جاي ليك ..
آه جاي ليك ..
يا نورا آفة
آفة للسوس الجا ينقُرْ ..
عود عشيماً داخرو فيكْ
وأصلي لمن أدور أجيك ..
بجيك
لا بتعجِّزْني المسافة
لا بقيف بيناتنا عارِضْ ..
لا الظُّروف تمسك في إيدي
ولا من الأيام مخافة
يا نفس فجر القصائد ..
ما ضِهِبْ في بُعدي عنِّكْ
واصلي متغرِّب عشانك ..
راضي بالبيجيني منِّكْ
ما بكيت شُحْ اللّيالي
لا شكيت نُحْ .. شلتو حالي
رغم إنو الحال بيفسَخْ ..
إلا كُت في الحارة بصرخ
يا وطن عِز الشّدائدْ
يا وطن عِز الشّدائدْ

ده كلام وسيم وطاعم كمان عله يسد مابنا من جوع
شكرا ليك يا ابويسراء
وشكرا للذين يعملون لتجميع شتات وانتشار حميد (نيلنا وعنوان بلدنا) وكثيرا ياشباب ما يفقد الشعراء نصوصهم (يبدو ان للغاوون فعل آخر ورغبه جميله في فكره الفقد والضياع هذه) اذن دعوتان واقتراح تالت ياابويسراء
دعوه 1 نعمل على محاربه الغاوون اولا
دعو 2 نعمل على جمع اعمال كل الرايحين والرايحه اعمالهم
اقتراح 3 انت ما تقول ماتحفظه لحميد والآخرين ان كان هناك متسع لااخصك وحدك وانما كل العابرين الي هذا الشارع النيل

فيصل عباس

الف شكر نادوس ولولاك لماكانت هذه المبادرة لانك اجلستني مع الاخ حميد فى زواج الاخ رقم صفر وكان اروع لقاء ولك الشكر آلاف

up

هذا بوست لـ (سن رايسس123) فيه 24 قصيدة من أروع ما كتب حميد . انزله بتاريخ 28/4/2002م بعنوان ( أجمل ماقاله شاعرنا حميد حسب رغبة ناس البورد)
أجمل ما قاله شاعرنا حميد حسب رغبة ناس البورد

والتالي بوست لأبو يسرا بتاريخ 31/12/2002م ، فيه قصيدتي (هاشم الأخضر) و(نادوس)
Re: قلتََّ أندهِك

وفي العناوين التالين ستجد قصيدتين لحميد بصوته ، وهناك عدة قصائد اخر بصوت شاعرنا الكبير . ولو عملت بحث في إرشيف المنتدى ، خاصة إرشيف 2003 ستجدها ، كما ستجد قصائد انزلها حميد بنفسه .
الى يحي بن عوف / خوفي من تلحق رفيقك بصوت حميد

برضو ليك يا موصلي عروس الطين بصوت حميد]

الأخوان تراث والليندي
الوصلات بصوت حميد ما شغالة
اسعفونا
وعاوزين المزيد
تشكروا مقدما

الأخ الليندي وتراث
فينكم
عاوزين المزيد
وطلب بسيط لو سمحتم
لو في واحد فيكم
عندو قصيدة الضو وجهجهة التساب
يلحقنا بيها