حتسافر وين.......قصيدة

حتسافر وين من دمي
وشايل القلب وراك
حقيبة
هل أكتب ليك إذن خروج؟
وإنت أصلا منو الاداك إذن دخول؟
م تقول ساكت مالك
ولا خايف؟
وين تلقالك بت
حايم في دمها نيل
وين تلقالك نيل
حارس الضفة
شان ما تجرح خاطرك
موجة
أورملة
أوصدفة متلبد جواها بلد!
أطرح حزنك من حزني
شن فضل فيهو معاك
أجمع عيون أصحابك
وسددني عليك
ما تغمض عينيك
وأقرأ لافتة دكانك
ماك بليد
م تصلي صاح قبال أصلك
قبال مرسال عيني يصلك
وتوه في ركعة
وتجلي سجود!
مرتاح كده مالك؟
شان فريت من شجرة ضلك
شان دسيت ريدي في شق قلبك
كم مرة وإت سهران
فليت النجمة صباح
كم مرة وإت سرحان
طشيت في حقل غناي
يا ود م تشد حيلك
مالك فتران؟
عايزني أجيلك
كويس
دق نقارة عصفورك
صفر تحت الشباك
"سامعاك ما تجنني"
افتح ليك هسع
ولا لساك مستعجل؟
م تكضب علي
م عيونك فاضحاني
مدينة
وشارع
وحبة شفع
م تكضب عليك
م عيوني فاضحاك
نخلة
وناس
وفكرة حميمة
شايفني مستنية جيتك
في ضل دمك؟؟
وأنا حذرتك
م تبدل شمسك قمرا
م تبدل غيمتك صحرا
وأنا شايفاك شايل صوتك
بحة صرخة
وأنا منتظرة
إنت تكورك" الروب...أحي"
أحي منك
هاك جلابيتك طرحة
وحصلني
وأنا صبري كملتو معاك
ياخ م تسافر
قول سافرت
وين حتسافر من دمي؟؟!!
إسماعيل ميرغني

الاخ اسماعيل ميرغني
اعجبني الاسلوب غير التقليدي والمميز..
م تبدل شمسك قمرا
م تبدل غيمتك صحرا
وأنا شايفاك شايل صوتك
بحة صرخة
تحياتي

رائعة

الحميم إسماعيل

قصيدتك هذه فتحت جرحاً لم يتوقف نزفه
حاولت ألا أجعله ينزف خارج الحديقة .. الأغنيات
لكن
خلينا من الفرح الزائف .. بتعود أفراحنا وتلقى براح

يا حميم
كم هي شوارع البلاد الآن ؟
هل ما زلت تطهو أحلامك الحنونه على مهل ؟

أبداً
علاء

جديده
شكرا يا اسماعيل

الأعزاء :يابت يانيل؛ سجيمان؛ علاء؛الموصلى الفنان.
هذا السفر ـالدم
وهذه الحقيبةـ القلب
لا الحقيبة ملت المشاوير
ولا الدم صالح الوطن
بعضكم فىالسفر هناك
بعضنا فىالسفر هنا
وبين هنا وهناك
نحن وأنتم.
لكم الود وكل التقدير.

يا إسماعيل {صبري} بحثآ عن هذه الرائعة التي ما أن طالعتها حتى إنزاح التعب الهد ضراع النيل ، وفرحت بها فرحآ ،،، {صفر تحت الشباك} أعادة لي متعة {الحب في زمن الكوليرا- ماركيز} إذ لم تخني الذاكرة ، عندما حشد العاشق جوقة مغنيين عزفوا تحت شباكها حتى الصباح ،فمرحبآ بك شاعرآ مجيد وقاصآ نجيض تزين وجه المنبر بالروائع . وبيننا وعد لقياء في الصيف القادم عند أوبة النورس.

رائعه جدا اخى اسماعيل مرغنى
لقد سبحت بنا فى افق بعيد

****

الاخ اسماعيل مرغنى

قصيده جميله ..واسلوب ممتع ...
يديك العافيه

وين انت
ترمينا بيها وتتوارى!