افتتاح أول مول عصري بالخرطوم

تابعت بالأمس عبر التلفزيون افتتاح أول مول عصري بالسودان، يحمل اسم " عفراء" وهو جنوب الساحة الخضراء، وحقيقة عمل ضخم جداً يضاهي معظم مراكز التسوق الموجودة بالخليج، وكلف العمل قرابة الخمسين مليون دولار، وهو تابع لإحدى الشركات التركية، ويابورداب الخرطوم معلومات لو عندكم عن هذا الصرح الضخم.

بختهــم أطفال دارفـور..
إن شـاء الله يكون فيـه بلاى قـراونـد ملحق بيـه، وميـدان للإسكــوترز

وما زلنا في إنتظار المعلومات؟؟؟

استاذ ابو الريش
عهدناك ليطف و قمة التهذيب ( و لا تزال طبعا )
ليه يعنى التقطيم ده ؟؟؟
قياسا على ردك ده . ممكن اقول ليك و انت المقعدك لسه فى امريكا دى شنو ؟ ارجع السودان للخرطوم و ساعد موظفين الاغاثة او ارجع عن طريق تشاد و خاول اعمل حاجه
مفروض تكون بقيت عملى( من عشرة الامريكان ) و عارف كونك تعلق صور و تمنع الناسالكلام عن اى شى اخر ابدا ما حل

صور تلفزيونية من قناة النيل الأزرق، وحاجة جميلة فعلاً.

بالله عليك يا سمارت أنا، المعاشــر الأمريكان منو هسـى.. الشبــاب الشـايفهـم بيلعبـو البولنق ديل، واللا أبو الريش الما شـاف موفى ولا نايت كلب (زى ما قال المرحوم فريـد شـوقى)، مما جا أمريكا..
ثم إنى عبرت بإسـلوبى عن رأئى، ولم أطلب من أحـد أن لا يتكلم.. متين قلت الكلام دا يا سمارت أنا..
بعدين مواجهـة الظلـم فى دارفـور وغيـرهـا، لـه أوجـه متعـددة، وقـد يكون بإستطـاعتى هنا فى أمريكا أن أعمل أكثـر وبتأثيـر أكبــر، (وهـذا ظاهـر بالمناسبـة) من عملى فى الســودان، الذى يقوم بمثلـه الأن ألاف الناس. وثق، فإن اللحظـة التى أرى فيهـا أن وجـودى فى الســودان وعملى من الداخل سيكون أقـوى تأثيـرا وعائـدا فســوف أذهب هناك..

أجمل مافي المركز كان إدارتو البادرت لي تعيين مجموعة العمل قبل ما تفتتح المحل , بذكر الشركة وصلت من تركيا وأعلنت تنظيم لقاء مع كل الطلاب السودانيين هنا في قبرص , وقاموا بعرض الفكرة وتشجيع الخريجين من مختلف المجالات , وكالعادة إفتكرناها حركات السودان ولازم تكون في قائمة جاهزة , بس للحق إختاروا أكتر من أربعة من خريجين الجزيرة هنا , والأهم إنهم أقاموا دورة تدريبية حتى للملتحقين بالمركز من السودان في تركيا , في مركز الشركة المرتفع لأعلى من تلاتين طابق .
يا ريت لو اصحاب المال السودانيين في خارج السودان يقدروا يوظفوا قروشهم ويفتحوا فرص عمل ويطوروا البلد قدر إستطاعتهم

wooooooooooow

تحياتى ,
هسع عليكم الله ناس خالتى نفيسة وأمونة السفنجاتهن مقطعات وتيابهن شربانة ديل بيخلوهن يدخلن المول دا ؟؟؟
ولا هن بيفكرن فيه ؟
ويمكن هن ذاتهن ما عارفاتنه !!!!
يتخيل لى حيجيبو ناس الأمن وناس محجوب عروة يقيفوا فى الباب يعزلوا الناس الممكن يدخلوا ,وكان دعا الموقف يفتشوا جيوب الناس عشان يتأكدوا ان كل زول يحمل ملايين الدينارات او الجنيهات , وطبعآ الدين ممنوع !!!!
يعنى الحناكيش حاجاتهم وحياتهم ورفاهيتهم ماشة وكاسحة , وحبايبى الغبش ناس البلولة اللسة بيفطروا بالتبش يدقشوا ويكابسوا للرغيف !!!مول شنو ليهم ؟ كدى اليلقوا الدواء !!!
والأ ناس تية وأبكر وآدم فى غرب السودان البتحصد فيهم الرشاشات !!!
ويا حليلكم يا ناس أدروب وأوهاج .
****
فى تاجر من جماعتنا ناس الجزيرة جاء للخرطوم وأجر ليهو دكيكين فى الحى وجاب فيه علبتين صلصة (البيع بالملعقة ) وثلاثة صابونات غسيل , وكبريتين , وعنقريب كبير ختاهو قدام الدكان وصنقر فوقو , فى حنكوشة عربيتها عطلت قدام الدان والدنيا حر , جات لسيد الدكان وقالت ليهو : عندك جيلتى ؟ (الجيم معطشة ) قال ليها لا والله .
قالت ليهو عندك جيلى ؟ (معطشة برضو )
حبيبى قال ليها ولا دا .
سألته تانى : طيب عندك جبنة ؟(معطشة )
قال ليها ولا حتى دى .
قالت ليهو عندك شنو ؟
قال ليها عندى شحنية .

قال ليها عندى شحنية @ ست البنات@loooool

الناس في شنو والح........في شنو !!!!!
فأنعم بطول بقاء يا عمر البشير

الاخ راكوبه
احد بورداب الخرطوم
المهندس ضمره ودعقاب
يعمل مع الشركة المنفذه
لى المول بعد حفل الافتاح
غدا 21/2
سوف نطلعه حتى يطلعكم على
المعلومات الكافية عن المول

اخوك عثمان احمد عبدالله

شكرا علي الصوره الحلوه دى وبصراحه حاجة تفتح النفس وعشان الناس في السودان تعرف العالم البره وصل وين ويبطلو حرب وتجعل فيهم همه الي التطوير وانشاء الله نشوف محلات تجارية في الخرطوم وكل السودان وكده العندو فلوس يشترى والمفلس يروح يتفرج ويرجع البيت يفكر كيف يعمل فلوس عشان يشترى من محل ذى وبصراحه انا والله مديون بس الحقيقه تقال عمل حلو وكمان عشان ناس دارفور المناطق المهمشه انشاءالله الشركات تمشى هناك تشارك في التطوير وبطلو حرب اذا كانت الحكومه والله غيرها ويجب علي الجميع الوقوف في وجه الحرب والضغط علي الجانيببن.
الي الامام ومزيد من الاستثمارات الاجنبيه في كل المجالات فنادق مطاعم ومدن سياحيه وطرق واتصالات والطيران والتصنيع والكهربا والزراعه والتعدين ياناس هوي الحل في السودان هو الاستثمار الاجنبي ويجب علي السودانيين المنافسه
الي الامام ياسودان الي الى الامام ومزيد من الصور التى تفتح النفس

ويبدو بأن الفوارق الطبقية قد لعبت دورا هداما ايضا في قصة المول وفي نبأ عاجل وردنا من الخرطوم بخصوص المول تقول الأنباء بأنه كان من المفترض ان يحيي حفل الأفتتاح المبدع محمد الأمين ولسبب او لاخر لم يات سيادته لتشريف الافتتاح وكانت جماهير غفيرة جدا تنتظر حفل الأفتتاح لتمر علي المول من قبيل طواف الوداع ولتسهر مع المبدع الكبير محمد الأمين ولما اصر ملاك المول علي ان لاتفتح الابواب الا بحضور محمد الأمين كانت فورة الجماهير قد بلغت أشدها ثم هاجوا وكما نعلم كيف يتصرف السودانيون عندما يهيجوا ويقال والعهدة علي الرواة بانهم حطموا كل ماهو جميل في ذلك المول والذي كلف خمسون مليونا من الدولارات الخضراء,, ومرة أخري يبدو بأن الذين خططوا له أختاروا العاصمة الخطأ في الزمن الخطأ وعليه العوض ومنه العوض ,,,

هذا المول مملوك لأربعة من لصوص الجبهه الأسلامية واحدهم كان مديرا لأحدى المؤسسات شبه الحكومية والتى تم بيعها للمدعو جمعة الجمعة اللص السعودى المعروف ولكن بعد ان تم بيع كل التوكيلات التى كانت تملكها تلك المؤسسة شبه الحكومية لشركات اخرى مثل توكيلات لبن الفورموست واستلام عائداتها بالدولار وبذلك اتضح السبب الذى دعاهم لبيع تلك المؤسسة بذلك الثمن البخس والذى اراد عبدالرحيم حمدى اقناعنا بأن تلك الصفقة رابحة لحكومة السودان .المهم لقد اكل اللص السعودى هوا مصلح وهو الآن يريد استرداد امواله.
لكن ماحدث عند افتتاح ذلك المركز التجارى فيستحق بوستا منفصلا لأنه حوادث الشغب والتدمير طالت حتى المارة والعربات المارة والحافلات وكابينات التلفونات بقرب المول وغايتو كانت هيصة.
ارجو الأطلاع على مقال د.كمال حنفى بصحيفة الرأى العام عدد الثلاثاء الفائت ومحاولة القراءة مابين السطور.
اخوكم مرقنو كرعينو.

قلقو
الرجاء أن تفصل لنا ما حدث
كما بحثت عن مقال د. حنفي ووجدته في عدد يوم الخميس 19 فبراير
شكرا لك

الأخ حليم..
ارجو ان تفبل اسفى واعتذارى لأيرادى خطأءا بأن مقال د.حنفى جاء بعدد الثلاثاء والصحيح هو وكما اوردته انت بأن المقال جاء بعدد الخميس 19/02/04 .
هل فهمت ما اراد ايصاله لنا د.حنفى وهل ربطت هذى بتلك؟
مع تحياتى

قلقو
شكرا للتصحيح وجل من لا يسهو

لكن ما هو السبب المباشر للشغب؟؟
اوردت صحيفة الصحافة اليوم

رافق افتتاح مجمع عفراء التجاري مساء امس احداث شغب وتخريب ادت إلى تدمير الواجهة الزجاجية وبعض ممتلكات المجمع.
وافتتح وزراء الاستثمار والمالية والتجارة الخارجية والعلاقات بالمجلس الوطني مساء امس مجمع عفراء الذي تأسس بشراكة سودانية تركية.
وتجاوز مجموعات من المواطنين الذين احتشدوا منذ العصر لحضور الافتتاح الاجراءات والضوابط الامنية واحدثوا فوضى في المدخل وهشموا الواجهة الزجاجية للمبنى واتلفوا بعض الممتلكات كما امتد الشغب إلى الطرقات وقذف بعض المواطنين سيارات المارة بالحجارة واتلفوا بعض اجزائها.
وتصدت الشرطة لمثيري الشغب وسيطرت على الموقف.
ووجدت هذه الاحداث ادانة واسعة من قطاعات الجمهور الذين اعتبروا مسلك قلة بأنه غير مسؤول.

سلام واحترام للجميع
مشتاقين كميات
ويا المنهدس خبرك شنو
والاوضاع فى المول مستقر وبعد تعب لقيت كى بورت عربى انجليزى كل الاجهزه تركيه
لكن بكره احتمال احول جهازى واوافيكم بالاخبار
وتسلمو يا حلوين

الاخوة والأخوات.

يبقى السؤال قائماً ما هي الحوجة الضرورية لمثل هذا الMall؟
خلاص تمكن أشاوس الانقاذ بحل كل مشاكل السودان؟

دينق.

......والى ان يرعى الحمل امنا مع الذئب ساظل اعبر عن نفسي بهذه الطريقة الخاطئة.
الطيب صالح

قولوا بس ان شاء الله الشعب السوداني يحافظ على نضافته اولا وصيانته مش بعد سنتين يكون خرابه سااااااااااااااااااي
دي شكلها حركه من الحكومه دايره تلهي بيها الناس اظنها ناويه على كاااااااااااااااااااارثه
الله يستر
نوف