القرية السودانية في مهرجان التسوق بدبي تجنن....!

دخلت جناح السودان في القرية الدولية وانا غير مصدقة
منتهى الجمال والروعة, من اول الشكل الخارجي للمدخل المعبر تماما عن البيئة السودانية والواضح انه تم اختياره بعناية,
لاخر المعروضات والاقسام المختلفة والمتنوعة التي حملت كل ما هو مشرف وجميل من البيئة السودانية
طبعا الزحمة حاصلة و والجناح مزدحم بالزائرين من مختلف الجنسيات
فقد سمعوا الكثير عن تميز القرية السودانية في وسائل الاعلام وحضروا للتعرف عليها عن قرب
باكستانيين وهنود, خواجات وافارقة , الكل يتسابق في تفحص المعروضات ثم الفصال لدقائق مع البائعين وسريعا حمل اجمل المختارات , فهي فرصة لا تتكرر, ولا تجد مثيلا للمعروضات في الاقسام الاخرى
المنظمون بذلوا مجهودات خارقة للتعريف عن السودان, فتجد البوسترات وشاشات عملاقة تعرض مقاطع مسجلة عن جمال البيئة السودانية, بالاضافة للديكورات الداخلية المعبرة عن ذالك ايضا.

وهناك قسم مخصص للمنشورات يضم كتب ومنشورات غاية في روعة التحضير والتغليف توزع على الحضور مجانا, بالاضافة الى خيمة خاصة تقدم المشروبات السودانية والقهوة للحضور تعكس كرم الضيافة السودانية الاصيلة.في اجواء تعبق بروائح البخور والعطور التقليدية.
بالرغم من الزحام وكثافة المعروضات , استطعنا ان نغطي الجناح اخيرا والخروج بصعوبة لنجد فرقة فلكلورية تقدم عروضها الجميلة في المسرح المخصص لذالك خارج الجناح
فاخيرا استمع المنظمون لاصواتنا المطالبة بالتوقف عن تقديم لوحة العرس كالمظهر السوداني الوحيد في الاحتفال في مختلف الفعاليات , حتى حفظت مختلف الجاليات برنامجنا.
اليوم كان اكثر من رائع, وما زالت اصوات تلك الطفلة الصغيرة تتردد في اذني
تشد طرف ثوب والدتها مطالبة بالبقاء فترة اطول في الجناح
فاين لمثلها المولودة خارج السودان ان تجد فرصة اجمل من هذه للتعرف على بلدها
مجهود خارق وتطور ملحوظ من عام لاخر للجناح السودان بالقرية الدولية يستحق منا الاشادة.

تحياتي
زولة123




ملاحظة: ما سبق نوع من احلام اليقظة
ارجوا ان يتسع صدر المنظمين لها

بصراحة كاملة و دون مجاملة أعلنت إبنتى المولودة فى السودان و لم تنقطع عن زيارته سنويا و عمرها 16 سنةالآتى: أسوأ جناح زارته هو القرية السودانية و اندهشت غاية الدهشة أن تكتشف أن من يقوم على خدمة الجمهور بتقديم المشروبات فتاة من دولة شقيقة مجاورة و إن أسوا حفل اقيم فى مديتة العين في النادي السودانى وبإمكانات فردية من هواة كان , حسب وجهة نظرها أحسن بما لايقاس من الهرج و الهراء الذى قدمته الفرقة التي جلبت لتمثل الفن السوداني الشعبى وتساءلت بعفوية ماكرة وين البالمبو و فرقة الفنون الشعبية الرسمية و من الضمن ناس عقد الجلاد مش كانو أحسن لينا و للسودان من هذا!
سؤال لا يمكن الإجابة عليه : كيف يتم تحديد الجهات المعنية بتنظيم وإدارة القرية السودانية؟

الحقيقة انو القرية السودانية دائما بتكون متميزة الا ان الغريب فى الامر انو كل سنة بتكون اسواء من اللى قبلها

والسؤال البيطرح نفسو من المسئول من المشاركات الخارجية

..
.
طبعاً لو قارنا بين راي زولة 123 وابنتك التى تبلغ من
العمر 16 ربيعاً بدون مجاملة سارجح رأي زولة ليس لسبب
سوى عامل السن والالمام بالتراثيات ومقارنة بسنوات ماضية ولو كنت انت
زرت القرية السودانية وقلت العكس بكون فى كلام تانى ..

على العموم لو كانت ناجحة وجميلة فلاشك ان لسامية شبو وشلتها
من النخبة المختارة دور فى هذا النجاح وان كانت فاشلة فالشل نعزيه ايضا لسامية شبو باعتبارها لجنة منظمة ووصلت لهذا التنظيم بعلاقتها وانتمائها الانقاذي بلاشك ..

بالمناسبة انت ناس الامارات ديل بخلوا مهرجان دبي دا فقط
للزوار ما يمشوا ويورينا رأيهم ما دمنا لم نتمكن نحن من ابدا أراءنا
بالمشاهدة كدليل قاطع

تحياتى للجميع ..

الاعزاء المشاركين
تحية وعذرا على اللبس
الذي لم تنجح عبارة( احلام يقظة) في توضيحه
مشاركة السودان السنوية في هذه القرية اقل من المستوى, فقيرة, متواضعة, مخجلة ومثيرة للاستياء لدى معظم السودانيين
ومثلكم شاهدت كمية من التشدق على السنة اعضاء في اللجنة المنظمة لمشاركة السودان في المهرجان في تلفزيونا الوطنى
لافاجأ بما رأيت, مكتب وكرسيين ولوحة كبيرة تصافح فيها على ما يبدوا السيدة صاحبة الجناح الشيخ محمد ن راشد المكتوم
هي بلا شك تفتخر بها , لاكنها لا تمثل للزوار اي شي
ستاند طويلة عريضة في جناح قومي في مهرجان عالمي لا يجد العارضون شيئا ليعرضونة فيكتفون بالكراسي للجلوس عليها وتعليق صورة شخصية في الحائط؟؟؟؟!!!!!
في ركن آخر كمية كبيرة من البرتقال والجريب فروت مكدسة و (مرمية) في الارض, بصورة تبعثك على الاستغراب والتساؤل عن سبب هذا العرض, اهو للبيع؟ام لللعصر وتقديمها مشروب للزوار؟ ام ليتفرج الاجانب على ثروتنا الزراعية التي اختير البرتقال ليمثلها!!!!
معظم العارضين زهجانين, متململين, لا يرحبون بالزوار كما تشاهد في الاجنحة الاخرى, التي يجرك فيها البائعون جرا لمجرد التفرج على منتجاتهم, بلطافة ووجه باسم وملابس مزركشة تمثل ازيائهم القومية
ركن آخر صغير به مجموعة من المنتجات الجلدية اعتقد لو عرف الزوار الاجانب خصيصا طبيعتها لتهافتوا على شرائها, لاكن من يعرفهم ومن يجذبهم فالجناح ( خاوي)
في ركن اخر مجموعة من الاكياس الملفوفة تحوي شيئا ما لم يستهويني حتى انا للاقتراب لتفحصة
اقرب الاكياس وجدت لحسن حظي مكتوبا عليه ( كركدي)
وتذكرت كيف ان الاماراتيين يسألوننا دوما احضار كركدي مع كل مسافر للسودان
فهم يعرفون فوائده العديدة وبالتأكيد سيتهافتون على شرائه, لاكن كيف مع عرض سيء كهذا
في الجانب الاخر في الاجنحة السورية واللبنانية كمية من الخزعبلات ملفوفة بصورة براقة ولوحات اعلانية كبيرة تزعم نجا حها في علاج الكثير من الامراض, يقف الزوار عندها صفوفا للشراء.
واتابع بعد الرد على المعلقين
زولة123

زولة 123

تحياتى يا دكتورة زولة
و كل عام و انت بخير


دائمآ ما ينقصنا شيئين :


اللباقة


و


اللمسات الجمالية النهائية ( FINISHING )!!!!

mustadam
تحياتي لابنتك الذكية
واتعاطف معها عندما تعود لمدرستها بعد الاجازة لتحكي الفتيات عن مشاهداتهم
تفتكر, حتقول ليهم شنو؟
الفتاة الصغيرة في المقال الاول كانت تجر توب امها لحثها على الخروج قبل ان يحل موعد اغلاق القرية لتشاهد اجنحة اخرى
لان امها كما ترى الصغيرة : ( ما عندها غير جناح السودان البايخ ده)
انت محظوظ انه بنتك بتحب السودان وعارفة عنه حاجة

الزنجي
والله ما حصل صادفت سنة مرضية , لاكن اشاركك الرأي ان هذه السنة فاقت كل الحدود
اما سؤالك فعايز ليه قعدة
كيف يتم التحضير واختيار الاشخاص للمشاركات الخارجية؟
في معايير معينة ورغبة صادقة في عرض صورة مشرفة عن السودان, او تلعب المعرفة والرغبة في السفر الى المهرجان لينعموا هم ايضا بفرصة ذهبية للتسوق

tabaldina
شكراعلى حسن ظنك بي
لاكن الفتاة اصدق مني في تعبيرها
كنت اتمنى عرض صور في المقال لاكني نسيت الكاميرا في غمرة استعجالي للحاق بالعائلة
يا ريت لو ناس شافت القرية تساعدنا في عرض رأيها

تحياتي
زولة123

عزيزتي زوله 123
تحياتي وكل سنة وانتي طيبة
بالمناسبة وانا بقرأ في كلامك اولا اندهشت للكلام واخيرا اتضح لي معنى ما ترمين
حقيقة انا استغرب في ما يحدش باسم السودان من مشاركة في مثل هذه المهرجانات من المسئول؟؟ وعلى اي معايير تتم المشاركة فيه
القرية السودانية خاوية على عروشها كما قلتي لاشيْ سوى الكراسي واناس (زهجانين) حد الزهج -
بالرغم من انه كان ملتقى كثير من السودانيين في المعرض - كنا نتواعد في ركن السودان
واكثر ما ادهشني ان احدهم انبري في قسم خاص كتب عليه (احذية ايطالية) لاحظوا احذية ايطالية في القرية السودانية !!!!كيف دي؟؟؟
عموما تخيلت باني في (سوق سعد قشرة) ولا غير
رأفة بنا يا مسئولي المعرض واحتراما لوجه السودان الحضاري!

العزيزة دكتورة زولة 123

سلام وكيفك 0000

شكرا لاثارتك الموضوع وبصراحة قصة احلام يقظة دي انا ما فهمتها
اعتبرتها كلام مع التوقيع00 لذلك (انخلعت) في الاول
00000 نقول شنو غايتوا0000000
ما اود توضيحه هنا للاخ العزيز تبلدينا وهو ان المهرجان لاتشرف
عليه لجنة بل تديره شركة خاصة انابة عن وزارة التجارة000000
وكل السخف دة عشان قطاع خاص جدا يكسب قرشين عل سمعتنا التي
مرمطوا بها الارض0000

الدكتورة زولة
لك كل الاحترام
على ما اعتقد انو انتي اللحظة ديك كان عندك عمى الوان مؤقت
احسن ليك امشي اعملي فحص نظر
عليك الله يا جماعة دي قرية عاملة كدة زي سوق الجمعة وفي رايي احسن محل كان محمل الشرائط الكاسيت
اذا كانت القرية دي محتكرة التنظيم من زول واحد ما حتنجح؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ما معقولة زول واحد يكون محتكر التنظيم وعامل فيها دكتاتور ؟؟؟؟؟؟؟؟؟؟؟؟؟؟؟؟؟؟؟؟

كوستا
وانت بالف خير وعافية انشاء الله
للاسف نحن نرى اللباقة:نفاق وتقليل من شأننا
اما الفينيشنج: ففنشنج شنو يا زول, ما تدي الزبون الحاجة في يدوطوالي, تلفها ليه ليه؟ دي رفاهية زايدة
منطق زي ده تقبلناه وتعايشنا معاه, لاكن المصيبة عندما تتاح للاخرين فرصة التعرف عليه
مصيبة والله

ام سهى
كلك مفهومية يا ستي
كلنا كنا نوفر جزء كبير من وقت الزيارة لجناح السودان, نلتف حوله نلتقي بمن نعرف ولا نعرف
نوع يمكن من الواجب, لاكنه بلا شك ضائع.

سوركتي
الله يفتح عليك
اول خطوة لنقاش مهم , الاسباب والعلاج اذا امكن
لماذا تنيب وزارة التجارة احدا عنها, هل لعدم قدرة؟ ام الرغبة في الاستفادة المالية, وهل يحص الشخص المتحصل على حق احتكار المشاركات يدفع مقابل؟ وكم يبلغ؟ ومن يقرر ذالك؟

ساري الليل
ارجوا التمهل وانتقاء الكلام قبل الكتابة
وشكرا على النصيحة

ساكوتاوية العزيزة
كيفك يا ستي
وكويس اللقيتي حاجة تشتريها
عايزاكي تفكري معاي, ماهو المطلوب تقديمه من جناح للسودان في مهرجان ثقافي وتجاري مثل مهرجان التسوق
يعني نقاط للنقاش مش انتقاد بس , ولي عودة

لووووووول . و الله يا زوله أبدعتي ... انا من أول كلمتين عرفتك راميه لشنو .. لكن كلامك مضبوط..

أنا صراحه زرت القريه السنه دي..وعادتي دايما اني ما بزور أي قريه تاني غيرها .. يعني بجي من الباب طوالي على السودانيه .. وكلى لهفه وشوق عشان الزول يشوف الناس ديل محضرين لينا شنو لكن عينكم ما تشوف الا النور ..

خلاء بس ما أكتر .. الدكاكين في ...ههههه لكن بياعين مافي .. تلقى واحده ماسكه محل و لمن تسألها من مشرف المحل الأخر تقول ليك ( يا بتي أنا قالوا لي الطاقيه والجلابيه والملفحه مع بعض بي 100 درهم.. لكن الطاقيه براها ما بقدر أجاوبك لانو سيد المحل مافي ) طيب و أنا طاقه مشوار من أبوظبي لدبي عشان أتفاجأانو السودانيين لسه مصريين على عدم الإلتزام و الإستهتار الغبي ده حتى في المحافل الرسميه ؟ مسارح باقي القرى الناس بيستعرضوا فيها .. لكن حقنا يا حليلوا الشفع بيلعبوا فيهوا السكوكيه !!

الغريبه أنا زرتها من سنه 1999 وكل سنه كنت بجي .. بلاحظ تدهور أكتر من القبلو .. ياخي سنه 1999 دي أنا عندي موثقه بالصور .. جد كانت روعه بمشاركه الفرقه القوميه .. كانت عباره عن مرح في مرح.. جد الزول يحس روحو عايش أجواء سودانيه .. الكركدي و الشاى و القهوه ريحتها تطق من أول القريه ماشالله .. لكن المره دي يا ريت لو كان معاى الكاميرا .. المره دي النظام أمريكي .. Serve Your Self ! جيب قهوتك و مويتك و اتفسح .. وبعدين الTag مكتوب على السلعه .. وفي جهاز Indecator ده يوريك الحاجه بي كم .......

والله يا ساري لليل .. أنا على قولك مشيت خميت شرايط و طلعت .. وده مفروض ياخد جائزه أحسن محل .. ههههه

المهم يا جماعه .. عليكم الله التنظيم ده ماسكو منو ؟؟ وبتاع 1999 ماسكو منو كان ؟؟

معليش طولنا لكن للمغسه دور !

وتسلموا

تحياتي
سبقتموني بكتابة هذا الموضوع ، فخلال ليلتين متتاليتين زرت خلالهما القرية العالمية ، لم أمرّ أبدا بأسوأ من جناح السودان الباعث على الغثيان !!
ليس ثمة أسوأ من عرض "أحذية ايطالية" ، فضلا عن "سودانير" و"بنك النيلين" و"سيدة أعمال سودانية " ، تحتل المساحات الشاغرة ، وظللت وصديقي السعودي _ زميلي في العربية _ ننتظر فراغ الفرقة الموسيقية البائسة من اصلاح أجهزة الصوت المعطلة !!
هذه ادانة صارخة للذين يقدمون وطنا عظيما وجميلا بهذا القبح والابتذال . سيظل الوطن جميلا ، وستلتصق بهم صفة الابتذال ، لأن غياب السودان كان أفضل من "التمثيل به " وليس تمثيله !!
الى متى نكل أمور الجمال في بلادنا لمن لا يعرفون سوى القبح ؟

السلام عليكم


اولا المدخل من اليمين محل للخطوط الجويه السودانية وبعده محل لبيع الويكه والكركدي والشمار والشطه قاعدع فيه واحده ماده بوزه شبرين وبعده محليين لبيع القريب فروت المفروش علي الارض وبعده كافتريا حبشيه وبعده محل بيع الشرائط وبعده محل ويكه وبعده محل ويكه وبعده محل بيع احذيه ايطاليه قال والحذاء بي 100 درهم بدون مفاصله وفي الوسط مكتب الكونديسه ساميه شبو مع الصورة التي تصافح فيها محمد بن راشد وموتر من جياد بسعر غالي جدا وبس

السؤال المطروح اين وزارة الثقافه والاعلام
اين الشركات الكبري
اين الوزاراة والمصالح الحكوميه

اين وزارة الصناعه والتجارة الخارجيه

هل ياتري كلهم بقو ممثلين في ساميه شبو تلك التي تنحر السودان وهم لا يدرون

ملاحظه :- انو الفرقه التي تغني تعتمد علي رقيص البنات ونطيط الاولاد الفيها وبس

..
.
سلام يا د. زولة وبقية الكرام ..
حقيقة لقد ادهشنى سردك حتى ظننت ان احلامنا صارت واقعاً معتمدا
على تلك التصريحات التى أدلت بها سيدة الاعمال سامية شبو عن التنظيم
والمشاركة الفعالة للسودان والتى ستتم فى المهرجان هذا العام ...
ولكن كنت اتوقع من اللجنة المنظمة بقيادة البرنسيسة سامية ان يخيبون ظنى ويعكسوا وجهاً حضارياً مشرقاً عن الثقافة والتراث والمنتجات الوطنية
ولكنهم هاهم كانك يا زيد لا غزيت لا عرفت الغزو ..
هذا ما توقعت ان تقدمه السيدة الانقاذية سامية شبو التى على ما يبدو
انها استفادت من السفر والمهرجان فقط لتطوير مجموعتها وزيادة مكتسباتها الشخصية متناسية - كعادتهم - الحس الوطني والمكانة المشرفة التى من المفترض
ان يظهر بها السودان عاكساً وجهاً حضارياً وليس صورة مشوهة ومبتذلة تثير
الدهشة والحيرة ..
وتأكيدا للاخ سوركتى هذا نتيجة تسليم المشاركة للسيدة سامية شبو سيدة
الاعمال السودانية والتى تسعى جلياً فقط لمصلحتها الشخصية ولا يهمها ان
ظهر السودان فى اقبح وجه .
لله درك يا وطن ..

الاخ / عويس
الامنيات لك باقامة طيبة هناك..
دوما

والله يا زولة هجمتيني بأحلام اليقظة بتاعتك دي
قلت يااخوانا الحكاية شنو؟؟ الزولة دي مالا بتهضرب
وكمان لخبتني اكتر كلام تبلدينا
السنة دي ما قدرت اجي القرية العالمية والحمد لله
ولكن زرتها في السنة الفاتت
وكانت اسوأ ما شاهدت في المهرجان
بأختصار اوريكم كان فيه شنو
اولا بين كل محل واخر يوجد استريو
وبين كل استريو واخر يوجد محل ميسو(تصدقوا ميسو بقت سودانية)
وبعدين محل عصاير والبان (دايمة) وشوية قريبفروت عصير الكباية
بي خمسة رداهم
وحاجات عروس (خمرة ودلكة) وحل صابون حمام بوكيه وفنيك
ولمان تعمل يوتيرن وتجي راجع تلقي قدامك محل بتاع منتجات جلدية
وفولكلورية والمحل ضيق ومزحوم دخلت تحاورت مع المشرف علي المحل
سألتوا ليه ما جبتو الناس البسوا الحاجات دي هنا عشان يعملوها
قدام الناس الزوار
ضحك وقال الفكرة حلوة لكن مافي طريقة وواصل قائلا
نحنا جينا بطائرة خاصة ونحن في المطار فؤجينا بأن المقاعد مليانة
بأصحاب العمائم و الشالات والدقون لم نستطيع ان نسأل احد بل تم ارجاع
بعض المشاركات لعدم وجود مقاعد
سألتوا اصحاب العمم ديل منو
قال ناس وزارة الثقافة وولاية الخرطوم والمؤتمر الوطني وجمعية شنو
ما بعرف
قمت سألت الناس ديل وبن هسع؟؟ عشان اسألهم عن هذا العرض السئ
قام ضحك وقال
يا خوي ديل حضروا الأفتتاح وبس وغادروا لأداء الحج(تصوروا)
وحيجو راجعين هنا عشان التسوق ونرجع سوا بالطيارة المجاني
بعد الختام،، فتأمل
برضو تقولوا عاوزين عروض حلوة
اما حكاية سامية شبو دي
عاوزة بوست منفصل واخونا تبلدي عندو فكرة
عشان انا حجروا علي الكلام في هذه الشخصية
والأ اتهمت بمعاداه السامية

لقد قررت بهدوء شديدألآّ أعرض نفسي لمهانة التواجد بالقرب من جناح سامية شبوللعلاقات العامة بمهرجان دبى و أقنعت أولادى بذلك فذهبوا وتركونى حتى أوفر بعض الدراهم ! لاتتعجب ! فالمرء يحتاج لكميات مهولة من اللبراكس ومهدئات القولون العصبي الهائج من الغبن و المهانة !
شكرا يادكتورة يا زولة يا نجيضة! فقد لاحظت أحلام اليقظة من البداية ولكن وددت أن يفتتح النقاش حول الأمر .
وتبدو الإجابات سهلة بتوجيه اللو م لمنظمة الجناح والجهة التى تقرر سواء أن كانت وزارة السخافة أو التجارة ( السوداء)و لكن فى الواقع , الأمر أكبر من ذلك التبسيط . ألأمر برمته يتعلق بتخلي الدولة عن كونها دولة!هل نستطيع أن نحقق فى قرار إستخدام مبيدات محظورة فى مكافحة الجنادب فى مدنى مما أودى بحياة 19 إنسان ( قابل للإلغاء) و تقديم المسئول لمحاكمة عادلة؟ هل نستطيع أن نقدم جميع وزراء الصحة ومرؤوسيهم للجان التحقيق المحايد لنستجلى أسباب أنعدام الخدمات الصحية الأساسيةمما أودى بحياة الملايين بالملاريا وسوء التغذية و السل و غيرها من أمراض التخلف و المسغبة ؟ ووزراء القطاع الإقتصادى عن مآلات الضرائب الدقنية التي تحصل على الثمرات فى غيطانها؟وهل نستطيع أن نقدم كل مهرجى الإعلام السودانى على إفسادهم للذوق العام ناهيك عن ضلوعهم فى تأجيج نيران حرب خاسرة منذ البداية بدعاوى الجهاد ؟ ام نحاكم قبلهم من ساهم فى سوق الملايين كوقود لحرب أعلنوا على الملأ أنها لم تكن كذلك حين جد الجد من دول الإستكبار ؟ هل نحاكم وزراء التعليم العالي على قرارات التوسع في التعليم دون دراسة جدية ( لاأحلم بدراسة جدوى , فذلك يدخل فى باب العلمانية )حول ما يمكن أن يترتب على ذلك من أضرار,مما استدعى تشكيل قوات النظام العام لحجب بعض من تلك الاثار بما فى ذلك الإشارات الخجولة للتحسب من إنتشار الأيدز؟
أى دولة تلك التى تعتبر مواطنيها قابلين للإلغاء
مستدام

up

خالد عويس
فعلا ليس هناك اسؤأ من جناح السودان بجدارة
هناك اجنحة لدول فقيرة مثل تنزانيا وفيتنام وغيرها الكثير , تشعرك انهم يبذلون مجهودا في تقديم شي جميل عن بلادهم, حتى وان كانت بلادهم ليست بهذا الجمال
المسؤولون عن جناح السودان يعطوننا الانطباع انهم : ما عندهم نفس ونادوهم يحضروا الشغلانية دي رغما عنهم

عباس
اتمنى ان اجد صورا لعرضها في البوست فهي ابلغ تعبير
ولم يصادفني في تلفزيون دبي او تلفزيون السودان تقرير عن المشاركة او اتسعراض للجناح

تبلدينا
هذه السيدة لا اعرفها, يشهد الله انه لا يعنيني امر الاسائة لها او الاشادة بها
لاكن من يوم الحلقة الغريبة التي رأيتها تتحدث عن تحضيرها للمهرجان ورئاستها للمنظمين توسمت الخير وتفائلت بكون امراة هي المشرفة
فككل النساء توقعت لمسات جمالية راقية واعتناء بادق التفاصيل , كما تهتم اي سيده سودانية ببيتها
وتتفنن في اقتناء اشيك الديكورات والفرش فيه
لاكن الظاهر كله برضو احلام في احلام, وحرمة على راجل, بقت مافي حاجة نافعة في السودان

أحمد حنين
الله يكون في عونك
اتمنى ان يمر بهذا البوست احد المسؤولين
او يستضيف تلفزيوننا العزيز اللجنة المنظمة لنجري لهم محاكمة على الهواء
فكما تمر كل الاحداث دون تعليق او محاسبة
فلنتوقع الاسوأ العام القادم

تحياتي
زولة123

ننوسة
كل سنة وانتي طيبة


يعني مشيتي دبي ؟ وفتحتي لينا

ياستي ما مشكلة
بنجيك في مكانك يوم ما

السيدة زولة ،
اولا الحمدلله أنه قررت أتابع البوست otherwise كنت ح.أفتكر أنه بتتكلمي عن حاجة غير القرية السودانية التي تسببت في أني لم أذهب للقرية العالمية منذ 1999 رغم أقامتي في دبي.لقد أخطأت في ذلك العام وأخذت معي أحد الأصدقاء الأجانب الى هناك فوجدت نفسي في سوق "سعد قشرة في بحري" ولم أجد شيئا أقوله لهذا الصديق الذي كلما لأتى المهرجان قال لي Do you want to go shopping for sudanese food stuff المحنة الأكبر أن متعهدة القرية كل سنة تتسبب في مشاكل مع جوازات دبي لأنها بتبيع الفيزا لبعض الناس ويخالفون في الأقامة...
ياأخواننا هل ممكن يكون ده ما يعرض عن بلدنا لا أدري؟؟؟
هل كل سنة عندما تأتي طيبة الذكر لا تستقي أي فكرة عن كيف يمكن أن تحسن هذا الوضع؟؟؟

يا قنصلية السجم وين أنتوا؟؟ لكن زي ما بيقولوا القلم ما بزيل بلم

دكتورة زولة
سوق الحرامية بتاع الخرطوم احسن من القرية السودانية
الشغلانة احتكارXاحتكار

Quote: سؤال لا يمكن الإجابة عليه : كيف يتم تحديد الجهات المعنية بتنظيم وإدارة القرية السودانية؟

عمنا مصطفى ادم
دي امور 3 ورقات بتاعت جبهجية وشغال بتاع كوروبشن

الأعزاء ...

أهى دي الصوره المشرفه للقريه عام 1999 .. و باقي الصور بنزلها قريب .. و الله من كتر الناس كانت مبسوطه .. لو شفتو شريط الفيديو .. كنتو شفتوهم واقفين يرقصوا معاهم .....

وا حسرتاه ... تقولوا قريه 2004 ؟؟ الظاهر نحن ماشييين بالعكس .. كلو ما الزمن مشى لي قدام .. الناس بتمشى لقدام .. لكن نحن .. كلو ما حبه ماشيين في طريق التخلف و بس ..
الله غالب

و تسلموا