الرائع دوما محجوب شريف والاستاذ سيف الجامعة ...وسنة الاسلام السلام

سنة الاسلام السلام

احرمونى ولا تحرمونى سنة الاسلام السلام
المجد لله في الاعالي وعلى الارض الـسلام
ــــــــــــــــــــــــــــــــــــــ
قدلة يامولاي حافي حالق بالطريق الشاقي الكـلام
في الفؤاد ترعاه العناية ملء روحي وعز المنام
لو هزمت بلملم غنايا ما بخونو وابيع الكــلام
مابسـلم شـرف الدواية للهواجـس وليل الخصــام
غير ذلك ماعندى غاية غير ذلك بئـس الختـــام
* * *
منى شايف شابت مفارق
ماني خايف ولا انهزام
العـزايم قط لم تفارق والاماني تمـام التمـام
لو علي انا بس ماهو فارق الـدوام لله الــدوام
تهنا بين هوات الفوارق ياخ ديل ناسا هـــوام
كم وكم هم في القلب كم جراحا تحت المســـام
المسالك صبحت مهالك والحلال في ايد الحــرام
البخونـك لا شك هالك البـجيك في جنح الــظـلام
نحن منك مامـن هنالك اي هذا الشعـب الـهـمام
نحن منك لـذلك مســتحيل ان نقـبل نضــــام
* * *
كنت ماهل ياابوي وساهل كلو دربا بي ناسو اهل
ياحنونا دافي المناهل مالو زولك ممكون وناحل
وانت عندك ياباالسواحل والسهول غاباتك مراحل
والشمس والنيل والغمام
* * *
ياحفيف انفاس البيارق في الشوارع ودفءالزحام
مشـتهنـك مالك مفارق لفتة منك تشـفي السـقام
الملامح كانت تسـامح والجلـوس للحـق والقـيام
الحناجـر ليسـت خناجـر والمنابر ذات احتـرام
كـلو مايك ولا سلك شايك
بين جمـوع الناس والكلام
* * *
ياجلوسا فـوق الارائـك والمسـدس تحت الحـزام
نحن شعبا للفجـر حايك دربتنـا ايـادي الصدام
حصـولهم حتي الاجـــنـة
وصـولهم عتبة سـجننــا
كنتو انسا ام كنتو جنا
الكـلام المافيهو إنـة
بوضوح النبرة المـرنة
سوف نصـمد مهـما حزنـا
لونلاقي الموت سنة سنة
كـل قطرة دم تبقى حنة
الليالـي لكي تمتحنـا علمتنا مسكنا الاعنة
مافي حـرا حريته منـة
والببايع قط ليس منـا
والبخون الشهدا الكرام
احرمونى ولا تحرمونى سنة الاسلام السلام
المجد لله في الاعالي وعلى الارض الـسلام

هذه القصيدة للشاعر الرائع المناضل الجسور محجوب شريف .الشريف
والتى سوف يتغنى بها الاستاذ سيف الجامعة

التحية والتجلي لشاعرنا محجوب والاستاذ سيف

.......... ولاقدام نتش عين الضلام بالضوء

ياجماعة الحاصل شنو
انتم.. مابتعلقوا الله يكون صاحب البوست صاحبكم او معارفكم ولا شنو
قولوا اي حاجة قولوا القصيدة تعبانه قولوا اي حاجة
قولوا القصيده قديمة

والله يا طارق انا ناويه اعلق واكتب تانى الشاعر الشيوعى الزعلت مستدام وادلل ليهو كمان
لكن عده الشغل في البيت ( العربى)



بالمناسبه ..... دي احلى ابتسامه طفله فى الوجود

شنو يا طارق خشي شمال كده مالك...
صبراً يبل الابريه مافي...

القصيدة جميلة..محجوب شريف الهمته الأغنية المعروفة و لا أنا غلطان...تعرف دايما المغيين هم البستمدو من الأغاني القديمة لكن الشعراء؟؟.......ده باب جديد و اتمنى انو نسمع التسجيل لي سيف الجامعه...

شكرا ليكم ياراوية لكم كل الحب والاحترام ولى كتاباتك الرائعة في المنبر
مانديلا شكرا ليك انت عارف مفترض هذا المنبر يوثق
للشاعرين محجوب وحميد لانهم نبض الشارع السودانى وهم من اصدق الشعراء في السودان واشرفهم...

فوق

العزيز طارق اسماعيل..
فوق عشان شاعرنا الانسان محجوب شريف وفناننا البديع سيف الجامعة..
فوق تاني عشان القصيدة الجميلة..
وفوق كمان عشان الما قروها لسة..
وكل عام والجميع بخير..

محجوب شريف قال
الحزب حبيبى وشرييانى
ادانى بطاقه شخصيه
*****
من غيو الدنيا وقبالو
قدامي جزاير وهميه



محجوب شريف موهوب وفنان لكن مافى شك انه فهمه وطريقه تفكيره هى العمقت احساسه الشعرى وهموم الوطن الانشغل بيها طول عمره هى الاخرجت ابداعه هذا
اما الحديث عن سيف فاتركه لمره قادمه

شكرًا يا جميل يا زميل

لو هزمت بلملم غنايا ما بخونو وابيع الكــلام
مابسـلم شـرف الدواية للهواجـس وليل الخصــام
غير ذلك ماعندى غاية غير ذلك بئـس الختـــام


محجوب شريف وغير ذلك بيئس الختام