|
بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو
|
الناس تحتفل بعيد الحب فى كل بقاع الارض الا ودالجعلى وبعض القله المشوكشه من الناس بالله عليك الله كان ما شلاقه ساكت الشبهنا كده دا الحب ليهو شنو وكمان وقت نحب مشكلتنا بنحب بكل كياناتنا لكن زى ما بقولو العرجه لمراحه الغريبه زمن الناس بحبو نحن مبارين الفارغه والمبادئ المزيفه وبعدما خلاس القطر قرب يفوتنا وبدينا التلاتينات جينا نفتش لها فى حب النت واللونغ دستنس حماكم وحماكن الله منو لانو اتخيلو مهما يكون قوى فى النهايه الحبيب او الحبيبه على البعد اذا لقت ليها زول قريب التانى حقو راح تانى ما اسمع لى زول يجى حايم بى جاى يقولى حب النت وكلام فارغ زى دا ياخى والله تكون زول ايمانك ضعيف يدمرك ادييييل كدا المهم اجمل مواسه لاقيتا كانت من صاحبى ياسر الجميل ضرب لى تلفون قال لى اها جهزت هدية الفلنتاين قلتلو لى منو قال لى لى فلانه قلت ليه ما اظن اها قعد ينظر ويفزر ويزرزر فوقى لمعرفة الاسباب التى انا نفسى لا اعرفها المهم شال وقشاها فوقى وقالى انا ماشى السودان وحا اشيل معاى هديه منك لعيد الحب وما داير اى اعتراض حرم تقول اى كلمه تانى لا بينى ولا بينك اتخيلو الزول دا بس من كلامى ليه عنها بس وعمروا ما لاقاها ولا سمع صوتا فما بالكم باخوكم كيف يكون عيد الحب معاهو وبرضو تقولو لى الطياره فيها بورى اها قمت تانى ضربت لى ياسر واشيل واقنع فيهو انو ما اناالمابى والزوله دى قنعت منى وقالت لى بكل زوق اننا ما بننفع مع بعض لاسباب عددتها هى واقنعت بها نفسها وبرضو اقنعتنى عشان هى طوالى عندها مقدره قويه جدا على اقناعى باى حاجه حتى لو بعدها عنى طالما فى ذلك راحتا والغريبه المرات الفاتت بتكسر واتجرس واوسط ليها صحباتا لكن اغرب حاجه المره دى حسيت براحه كبيره جدا وكانى رميت حاجه تقيله من راسى ومبسووووط جنس بسطه يكون من شنو يا جماعه غايتو صاحبى معتز قالى دى ام فريحانه ولما تفك احر من فكة البنج من الشافع الطهروهو لكن ما شايف كده الغريبه وما عندى رغبه اضرب لى زول اوسطو وحجزتا رحله لى اوراندو فى الاسبرنق بريك لمده تسعه ليالى بس كيه للدنيا دى هسى الكتابه دى والله العظيم تلاته ما جرسه لكن حسيت انى داير افضفض عشان لو ما عملتا كده حااطق عديل كده يعنى شهرين انا وصاحبى رحنا فيها وكل السبب النت اللعين اخخخخ انا منو ضرب لى تلفون عصام الزين قالى قالو عصفورتك طارت قلت ليه والله ما خافت فوقى الله قالى بالله قوم الله قالك امش اضهب وحب فى النت غلبنى اجاوب والله وزى ما بقولو ناس النحو اسقط فى يدى هسى نفسى مرقت من بنات بلدى بصوره فظيعه ودى اكتر حاجه مكرهانى انو متأكد انو بلدى جميله وبناتا حلوى معشر وزينة فى النساء لكن برضو فيهم من هن بلا رحمه ولا يعرفن للحب معنى لكن دايما الجمال بغطى على القبح ما سمى الانسان الا لانه ينسى وما سمى القلب الا لانه يتقلب اها نحتفل بعيد الحب ويا دار ما دخلك شر والله نخت يدنا فى خدنا وننتظر رحمة السماء المستحيله فى مثل هذه الحاله البائسه
|
|
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: Yassir7anna)
|
اخى الكريم ياسر حنا تحياتى وانشاءالله مانجيك فى شينه بعدين قلت لى زمنكم ما كان فى شواكيش امال حسين ملاسى دا مالو راسو كراضم كان عندو قوب ما ياها الشواكيش اما ذات الدين دى ياها سبب الاذيه زاتا والمره الجايه الا اشوف لى يهوديه وكمان ماتقول صاحبتى بتاعت الشطرنج لسه البربوزل بتاعا فالد لكن كنا بنفتش لى ذات الدين تربت يدانا الله يدانا يتربا الجن الليتربا وبعدين اليهوديه والله ذات دين وذات جمال وذات مال وذات اى حاجه الحاجه الوحيده انها ماذات سودان وهنا كل حاجاتا دى لاتعنى حاجه لواحد اهل عوض مثلى بس يا ياسر نطلب منك دعواتك عشان انا عندى اعتقاد فى انك زول صالح ومتوسم فيك الخير مع كامل التقدير
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
افو يا جعلي اركز والله نحن زمام كنا بنتحمل مش الشاكوش بس الشاكوش والساطور وابو فرار واهلنا بقولو الحب زاتو عيب افو يا جعلي تبكي من مرة وين حرة القلب وين الرجالة انت ما سمعت بواحد جعلي مرته ولدت الساعة تلاتة صباحا جابت بت،،، قام خنق البت وقال ما عندنا بت بتجي الوقت دا علي العموم طبعا انت معذور لأنو الجيل الجديد من الجعليين(ج ج ج) شوية قلبوا رهيف وبكايين وانشاء الله الشوكشتك تكون جعلية عشان يكون زيتنا بيتناوشاكوشنا في ولدنا وانا في رائ ترسل الهدية (سكينة ضراع فيه شوية دم)
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: doma)
|
والعرس دا متل الموت بن ادم دا كله بضوقه دحين اوليدي رزقك موجود ما تشفق تب انت ذاتك ود متين؟؟ لسع الدنيا قدامك طويله عريضه خالتى الحبيبه جدا دومه تحياتى لك باعياد الحب وكل اعياد الدنيا تتهنى ماتتمنى لكن قصدك تقولى لى الشاكوش زى الموت كل نفس ذائقته ما قلنا شى لكن بدون مقدمات دى تبقى فيلونى والله رايك شنو تسلمى على المؤازره ولك موده خاصه فى قلبى يا اعز خاله عشان دايما سباقه مع كل الحب
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: ahmed haneen)
|
عزيزى احمد حنين اجمل حاجه انها ما جعليه خاله يعنى مخلوطه لكن صدقنى زمنكم الشواكيش ما بتحرق زى الليله عشان كنتو جنب اماتكم والله انا كان كنت جنب امى لو ادتنى طلقه ما اتلفت عليها وبى مناسبة نكتتك الجميله دى اديك واحده حقت جدنا قالو جا واحد من ناس الحله العايشين فى الخرطوم وداير يتقدم لى بتو اها قبال ما يلاقيهو قالو ليه ود ناس فلان داير بتك فلانه قالهم مافى عوجه ود ناس فلان دا كمان بشاورو عليهو بعد شويه جا داخل الولد واهلو وسلمو على جدنا قالو لو يا عم فلان ولدنا داير البت دى قالهم عوجه مافى قام الولد نطه شكرن يا جدى بس الراجل انخلع وقالهم ولدكم نعل مو اب شارلستون دا قالو لو ايو قالهم والله لو يبقى اخر راجل ما اعرس لو بتى قالولو ياخ الراجل دكتور قالهم والله لو يبقى نبى الله الخضر طالما بتشنط بى الزفت دا با بديهو بتى لكن الزمن دا يا حنيـن نحنا انسختنا وقلوبنا بقت رهيفه وتسلم يا حنيــن
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
ود الجعلي كر علي يا وليدي متين دا حصل عليك وياها خطيبتك الكلمتنا بي فوزك في مسابقة الشطرنج قبل ما تكلمها ؟ يمكن زعلت من الهنق داك
خيرها في غيرها وانت لسه صغير وجاهل الشاكوش مابسوي شي الله يستر علينانحن ناس على اعتاب الاربعين فيها بشتنه مع الشفعة وكدي ونبقى في حق النفقة وحق المتعة انت دا موسم فك التسجلات دا الشاكوش رغم كم نسمع بيه في البورد دا غايتو ربي يقدر الخير للحبان كلهم لكن اكيد خير شد حيلك بس
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: الجندرية)
|
الشاكوش يوم الحب..
زى الكتاحه يوم الغسيل..
المهم لو المثل ما لفق ..ننجر ليك واحد غيرو..الوضع محتاج لى مثل سريع..
والله انا لو من " يافتاتى" دى استعمل نظام الشاكوش ده..
للنهايه..لانو حسه لو كنت عرستها كان جبت ليها غنية "يا وليه"..
وتثبت نظرية " تكوركو لينا نجيكم..نجيكم تكوركو"
معليش ..اخد نصيحة دوما ..هههه والف من تتمناك ياود الجعلى.
لكن قصة احمد حنين..رهييييييبه.. وذكرتنى الجعلى المسطول وجه بيتهم الساعه اربعه ص..دق الباب، اختو فتحت الباب طاخ اداها كف قاليها دى مواعيدتجى فيها؟؟
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: Tumadir)
|
العزيزه تماضر بالله شفتى الدنيا دى بتلف كيف المهم يا زوله زى ما بقولو الجاتك فى راسك سامحتك لكن تصدقى طرطشت لى مشيتى السودان فى ميتين ابو اهلى ماعارف اقول لى عركى شنو واقول لى نا احتفالات ناس سودانيز اونلاين شنو بعد ما اتفقت مع كل التاس انو العرس فى اليوم الفلانى هسى داخل فى اضافرينى كلمتا اختى الصغيره قالت لى بطريقتك نحن قدمنا لى اجازتنا مخسوس عشان نجى نحضر عرسك قلت ليها العروس فرتقت قالت لى مالينا دعوه حنسا قلت ليها وغلاوت امى لو تبقى اخر مره فى الدنيا ما اعرسا قالت لى المهم تتصرف اها يا تماضر دبرينى اعمل شنو بس مع كل التقدير والموده
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: الجندرية)
|
الخاله الجندريه ما اظن عندك اى مشكله بعد الشفع وبعدين زولك اطول بكتيييير من حكاية الشواكيش دى لكن بينى وبينك ارخى ليهو حبل الجندره حبه بس عشان لو الشاكوش وقع جندرتك دى مويه ما بتسقيك ليها وتبقى تتلفتى زى التكاسى فى موقف بصات شندى الحافله فيها خمسه وعشرين راكب فيهم والموقف فيه خمسطار تكسى الخمسه وعشرين نفر فيهم خمسه فى ناس مستننهم وخمسه ساكنين قريب من الموقف وعشره من الغرب بمشو البنطون بى كارو والخمسه الاخيرين طلبه وبتاع التكسى بس يقعد يتلفت زى مروحة التربيزه لك التحيه وما نجيك فى شينه
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: nada ali)
|
ود الجعلي.. شاكوش يا ود الجعلي... كفـــــــــــــــــــــــــــــــــــــــــــــــــــارة والله يا ود الجعلي.. أسه خالك راسو كلو بقي ينكرش من آثار العدوان القديمة..يا ود الجعلي.. شاكوش...شاكوش عديل كده وفي عيد الحب...كفارة والله..
ود الجعلي والشاكوش الما محري وفي عيد الحب خلي دمعك يجري والشمات يغنو من سوبا لي بحري والشاكوش كرب فوق راسك آلجعلي ما بيفرز الغبيان كان بني كان كحلي
كفارة يا حبيب كفارة تعيش وتاخد غيرها..
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: خالد الحاج)
|
الحبيب والخال خالد الحاج الجميل ياخى والله ما حارقنى الشاكوش زى ما حارقانى الجهجهه لكن ما اظن تكون فى مشكله طالما الزيكم ممكن يآزرونى وقلت لى راسك كلو كراضم غيتو سمعنا تحت تحت قالو الناس الشوكشوكن انت وحسين ملاسى هم زاتم وكان ما اخاف الكضب قالو حسين بياخد اول وبعداك برسلك انتا وترجع بنفس الخيبه بعد ما الجكس يكتشف انك من طرف ملاسى عشان كده قالو امك كانت بتحزرك من مباراتو وكل الشوكيش حقاتك انا ما بلومك عليهن عشان نصهم من عدم سماع كلام الحاجه والنص التانى من مبارات المدعو ملاسى انا غايتو الكلام دا ولا قاطعو من راسى ولا كلمنى بيهو عادل امين ولا خاجتين تسلم ياخال وانشاء الله مانجيك فى شينه يا حبوب
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: Raja)
|
ود الجعلى، عارف يا ود الجعلى عنـدى ليك وصفـة لمواجهـة الكارثـة دى.. الكمـدة بالرمــدة: الصبـاح بـدرى.. أمشـى لمبنى الستى هـوول بتاعكم.. (البلـديـة).. شفت كيف.. قبال ما الغفـرا زاتم يجـو.. وأمش مباشــرة لمكتب الميــور.. قوم إتجعص فى الكرسـى بتاعـو، وخت رجليك فوووووق فوق تربيـزتـو.. وخلى الواد يجيب ليك قهـوة مضنكلـة.. وافضل عاين فى الزخـرف.. فوق فى السـقف لحـد ما يجى الميــور، والبـودى قارد بتاعـو.. بعـد داك خلى الدنيا تتقلب.
| |
|
|
|
|
|
|
Re: ليه ما حصل سمعنا بزولة ادوها شاكوش؟؟؟؟؟؟؟؟؟؟؟ (Re: ASAAD IBRAHIM)
|
الأخ ود الجعلي ، كفارة يا حنين ، خاتمة الشواكيش إن شاء ..... لكن ده ما معناه تعتزل و تختار العزوبية طريق للحياة .... المكتوب مكتوب ، و المكتوب لك مقسوم .... بس إن شاء الله المكتوب يحمل في طياته السعادة ... ومنو عارف مش يمكن تكون مكتوب لك الأستاذة فلانه ؟!
يا أستاذ أسعد ، التصريح بالشاكوش ما مختصر علي الشباب فقط ، في بعض الشابات اللواتي يصرحن به أيضا . يمكن يكونوا البنات أقل من الشباب ، و السبب وراء ذلك قد يكون إحساسهن أو الإحساس الذي يخلقه المجتمع بأن مثل هذه الأمور لا ينبغي علي الفتاة البوح بها ... يعني ما كويسه لملفها العام – إن صلح التعبير . بالإضافة لذلك العديد منهن يعبرن الموضوع في غابة الخصوصية ...
أستاذه دومه ، أحكي لك شاكوش ألذ ، عندي واحدة صحبتي – و هنا أريد لفت نظر الأستاذ أسعد ، بأن معظم الفتيات يعبرن عن أنفسهن بصيغة "إحدى صديقاتي.. " - بعد ما نزل الشاكوش علي رأسها ذي الضربة القاضية .. و لملمت عفشها وانسحبت من الساحة و هي رافعة رأسها ، تدور الأيام و الشاب يرجع ، ويحاول يلقي له مدخل و لمن تقطعت به الأوصال ، قام قال شنو! ، قال :" ما أنتِ أصلك ما كان عندك مشاعر نحوي !! و ما صدقتي إني أنهيت الموضوع عشان تنفكي !!! "
لليوم ده أموت ضحك كل ما أتذكر الموضوع ....... قصدي كل ما تتذكر صحبتي الموضوع !!!!!
| |
|
|
|
|
|
|
Re: ليه ما حصل سمعنا بزولة ادوها شاكوش؟؟؟؟؟؟؟؟؟؟؟ (Re: Omshaba2)
|
الاخت Omshaba2 والله اسمك دا جهجهنى جنس جهجهه عليك الله تكتبيهو بالعربى اما بخصوص الاستاذه ما عارفك قاصده منو لكن كان قاصده الدكتوره ينظر فى الامر مع انو فرق سته سنوات دى ما اظن تشتغل معاها انا ببصم بالعشره لكن بس مابقدر افاتحا ولا افاتح اهلا لكن بينى وبينك صاحبتى شديييييد لكن عمرى ما اتكلمت معاها خارج الاطار لكن ما عارف يكون لكن تحت كل الظروف هى زوله رايعه والحاجه كم مره بتهبشنى بيها وما عارف...
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: samo)
|
Quote: لا تأمنن على النساء مودة ان النســــاء وصالهن مقسم اليوم عندك تيهها ودلالهـــا وغدا لغيرك كفها والمعصم |
عارف يا ود الجعلي انا ما عارفة توقبعك هو السواها فيك ولا الشاكوش هو سبب التوقيع يعني هل البيضة من الجدادة .. ولا الجدادة من البيضة؟؟
علي العموم كل عيد حب وانت طيب والشواكيش الجايات اكتر من الرايحات صدقني بتجيك مناعة ..وما مهم بعد داك
نصيحة اخوية غير توقيعك..امكن الحظ يكون أحسن
لك الود
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: haneena)
|
حنيينه الحنينه ضيفتنا العزيزه لك تحياتى كل الودمن كل ناس المدوست اها حتجى تزورى مدينتنا متين عشان نفرش الارض زهور وقولى لى هاله الرفضت العرض بتاعى انو مارس جاء وغصبا عنها حتجى لى صاحبتا والله حناكل السمايه نخليكم اما بخصوص توقيعى والله جاب لى الهواء واوعدك مجرد ما الازمه دى تنتهى اغيرو اكراما ليكم يا ناس لندن انتى وندى وندى امين وكل حسنوات بلدى لك ولهن كل الحب
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: samo)
|
العزيز سوما لك الود والاحساس ما بتوصف لكن بتحس انو الدنيا مسيييييخه عندنا فى المعمار قبل اليوم المتفق مع المالك على تسليم المشروع لازم تجيب زول يمسليك المالك وما تكون عندك معاهو علاقه عشان ما يجامل عشان تضمن انو كل التفاصيل اكتملت لكن بعد ده كلو المالك برفض لك على الاقل اربعه خمسه حاجات اها باختصار كده الزول البياخد شاكوش بكون ما عمل الجك لست دى عشان كده بشوف نفسو هوبلس للحظات لكن سرعان ما تختفى هذه الحاله هوبفولى
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
ود اخوي الجعلي
ات ظاهر الشاكوش ده اثر عليك شديد لمن بقيت ما قادر تقرا زتو
القال ليك زمنا مافي شاكويش منو؟ زمنا بس مافي شاكويش انترنيتية، كانت كلها ارض ارض، كتامي يعني،ومال الصلعة والشيب ديل من شنو؟ ما من الشوكيش المبكرة
انا مرة ادوني ليك شاكوش خارجي، من برة الخرطوم شفت الشلاقة دي كيف، يازول جيت راجع بالبص ما فاهم اي حاجة، لط لي الطيش ماعارف روحي انا ماشي ولا جايي، اها لمن جيت داخل البيت وشي كان يلعن قفاي، بس اقرب عنقريب واتمددت زي الجنازة، اها امي يا حليلة عرفت الحاصل شنو، تشيل وتجيب في الاكل والموية والعصائر وانا اقول ليها أ أ وتقول لي ياولدي ما تفكر كتير انسى الموضوع قوم اكل وانا اقول ليهم أ أ، يازول تاني يوم من الصباح مشت لي فكي جنبنا شي بخرات وشي محيات، غايتو سردبت لي كم يوم كده، وتاني رجعت حليمة لي عادتها القديمة قمت من الدغش افتش، عشان كده وجود الام ضروري في حالات زي دي
فالمسالة مسالة وقت ليس الا، انت بس سردب ساكت، ولا اعمل بي وصية ابو الريش دي وقول ليهم as it comes it comes
بعدين انت تشيل وتهقهق في اليهوديات وعايزة تسكت ليك، شوف اقول ليك قولة للمرة الجاية، شفت المره كان قلدت اختها ما بتنساها ليك لي يوم الدين، خلي تقلد لي في اليهوديات كمان، عشان كده يا اخوي اعمل حسابك وتاني خليك حريف، انا مرة واحدة في الشارع رفعت لي ايدها ساكت قربو يودوني التوج تقول لي big HUG كمان
تسلم يا الغالي
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: سمندلاوى)
|
الأخ ود الجعلي ، كفارة يا حنين ، خاتمة الشواكيش إن شاء ..... لكن ده ما معناه تعتزل و تختار العزوبية طريق للحياة .... المكتوب مكتوب ، و المكتوب لك مقسوم .... بس إن شاء الله المكتوب يحمل في طياته السعادة ... ومنو عارف مش يمكن تكون مكتوب لك الأستاذة فلانه ؟!
يا أستاذ أسعد ، التصريح بالشاكوش ما مختصر علي الشباب فقط ، في بعض الشابات اللواتي يصرحن به أيضا . يمكن يكونوا البنات أقل من الشباب ، و السبب وراء ذلك قد يكون إحساسهن أو الإحساس الذي يخلقه المجتمع بأن مثل هذه الأمور لا ينبغي علي الفتاة البوح بها ... يعني ما كويسه لملفها العام – إن صلح التعبير . بالإضافة لذلك العديد منهن يعبرن الموضوع في غابة الخصوصية ...
أستاذه دومه ، أحكي لك شاكوش ألذ ، عندي واحدة صحبتي – و هنا أريد لفت نظر الأستاذ أسعد ، بأن معظم الفتيات يعبرن عن أنفسهن بصيغة "إحدى صديقاتي.. " - بعد ما نزل الشاكوش علي رأسها ذي الضربة القاضية .. و لملمت عفشها وانسحبت من الساحة و هي رافعة رأسها ، تدور الأيام و الشاب يرجع ، ويحاول يلقي له مدخل و لمن تقطعت به الأوصال ، قام قال شنو! ، قال :" ما أنتِ أصلك ما كان عندك مشاعر نحوي !! و ما صدقتي إني أنهيت الموضوع عشان تنفكي !!! "
لليوم ده أموت ضحك كل ما أتذكر الموضوع ....... قصدي كل ما تتذكر صحبتي الموضوع !!!!!
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
ود الجعلى يا زميل تعرف بالضبط اليوم ده السنه الفاتت اخوك مصقوع مش شاكوش ده فرار عدييييييل كده..حمتك دى جاتنى واتبهدلت واتبشنت....تتخيل قبالا بى يومين كنا بننسق عشان نتلاقى فى بلدا عشان نرتب موضوع العرس !!! ديل عجيبات ياخى ...لكن انحنا اعجب منهن
شفت النصائح الفوق دى كلها ما حتعمل ليك حاجه ,ولا حتنفعك اتمغس مغستك...كان عندك دميعات كبها و لو لقيت اى طريقه تتفشا فيها ما تقصر (النصائح دى ما للرجال بس ,برضو للنساء لو الامر بالعكس) يعنى مرق المغسه الفى بطنك كلها...ما بتحلك لكن بتريح شويه غايتو انا ساعدتنى جدآ,مرات اعمل حاجات واقول لى روحى نان ده ما غلط؟؟؟ لكن الغلط ما حصل وانتهى و بحاول هسه ما اقع تانى..لكن اخوك قلبو خفيييف و بنات حوا لذيذات وبتحبن بس نلقى الهديه و رضيه
اسمع كان اتضايقت تعال علينا فى بوستينا بنرفع ليك معنوياتك شويه تسلم
فلنحب ونحتفل بعيد الحب..رغمآ عن..
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
سلامات.....
داخله برجل لوراء ورجل لقدام خايفه تتضايق من طلتى عشان هى صحبتى
لكنى دخلت لسببين اولا اواسيك واقول ليك علقه تفوت ولا حد يموت
ثانيه اعترض على وصف صديقتى بالخائنه رغم انك لم تنطقها لفظا ...فصديقتى لا يمكن ابدا ان تترك شخص ارتبطت به من اجل شخصا اخر فهى انسانه عندها مبادئ واعرف طبعها جيدا, ما تم هو نتيجه سوء الكمونيكيشن التى من اكبر اسباب الفراق هذه الايام خصوصا لو كان كل واحد فى بلد والحاجه الوحيده البتربط بينهم هى الماسنجر والتلفون, برأيى ان هذا مشروع فاشلا بكل المقاييس
لا اؤيد ان نرمى اللوم دائما على الفتاه فى مواضيع الشواكيش فهى عمليه مشتركه وعلى الطرف الأخر ان يبحث عن الاسباب الحقيقيه بدل اللوم على الطرف الاخر
لا اعتقد ان الدين يمنع المرأه ان تنهى علاقتها مع من ترتبط معه ان كانت هناك خلافات رئيسيه او عدم القدره على التفاهم لأختلاف الشخصيتين, لكن الدين يمنع الغدر وانا متأكده ان هذه الفتاه لم ولن تغدر بك ابدا
اشكرك لطوله بالك والله يرزقك بمن تسعدك ويعوضك خيرا
وفى امان الله
لا اله الا الله
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: bint_alahfad)
|
الاخت العزيزه بت الاحفاد لك تحياتى والتقدير انا دايما بخت حسن الظن فى المقام الاول لكن لما الزول يكون عارف الحاصل وبالتفصيل ما اظن حسن الظن بنفع لكن عمرى ما اقدر اوصف زول بانو خاين عشان دى حسب مفهومى كلمه قبيحه شديد وما اظن اوصف بيها زوله بعتبرا عندها فضل على وكاتت اكتر من عزيزة لكن وبما انى زول كامل الايمان والحمد لله لا ارمى باللوم على صاحبتك وانتى كزوله معروفه بالورع والاخلاق الساميه المفروض تكون قناعاتك بانو القرب حاجه غير حميده اكبر لانو فيه اللقاء والنظره وممكن يؤدوا لحاجات اكتر وصححينى لو غلطان نحن برضو اخوان والله شنو المهم يازوله قولى لى صحبتك ربنا يسهل عليك وراء وقدام وانت برضوربنا يقدم ليك ما فيه الخير اختى الفاضله
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: Elmosley)
|
تعرف يا ود الجعلي عاوز تنظر للموضوع وتلقي روحك الفائز؟ انظر للموضوع من هذه الناحية... لو قدر ان تزوجتما ورزقتما باطفال ..وبعدها اكتشفتما ان استمرار الحياة بينكما مستحيل ..فهل الافضل الانفصال حينها ام الان ؟ علي اني اقول لكما حرام عليكم ادو انفسكم فرصة ولا تتخزوا قراراتكم حين غضب في مثل هذه الامور المصيرية ..فكلاكما خاسر علي اني اقر ان المثل القائل _البعيد من العين بعيد من القلب_ التواجد المكاني مهم وهو احد الاركان لانجاح العلاقة والا كان الحب مجرد خواطر وخيالات علي انه كثير من الزيجات (الحقيقية ) وليس العلاقات تفشل للبعد المكاني فلا تبتأس صديقي ..ولا تصرح باي قرار فالمشاعر ان كانت صادقة عمرها لا تموت ولا تكسر والخلاف وارد بين الاخوة...ولكنهم يستمرون.
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: Elmosley)
|
الدكتور ابوهديل تحياتى وكل التقدير والله فعلا عسى ان نكره شيئا وهو خيرا لنا والله كانو الاقدار تنظر الواحد بالفرج والله وانا فى قمة الاستياء والزهج من الدنيا اذا بى اسمع اجمل الاخبار الجميله وهى اجمل مليون مره من لو انى ما اخدت شاكوش لانى ممكن اكون مستنيها من اتخرجت من الجامعه تسلم يا موصلى يا انسان ملئ بالتفاؤل الحب لكل التاس مع مودتى الصادقه والتقدير
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
اخى الكريم ود الجعلى
أشكرك على تقديرك لصديقتى رغم فراقكما وهذا ان دل على شئ فيدل على اصلك الطيب, وأطمنك ان هذه فتره وتعدى ويوما ما ربما ستعرف ان فراقكما ربما كان فيه خيرا لكما لأن الله سبحانه وتعالى لا يقدر الا الخير, وعسى أن تكرهو شيئا وهو خير لكم, صدقنى هذه فتره وستعدى بأذن الله فقط استعين بالصبر والصلاه وسيوفقك الله سبحانه وتعالى الى كل خير, حقيقه لا اعلم ملابسات الموضوع للنهايه ولكن من خلال متابعتى للأحداث اشك ان هناك سوء فهم فى الامر ولا ادرى ان اتخدتو القرار فى لحظه غضب ام بعد تريث على العموم الايام حتورينا الحاصل وليقدم الله الخير لكم جميعا انشاء الله
بالنسبه لكلامك انو افضل البعد لتجنب الكثير من المحرمات مثل النظره او غيرها اوافقك الرأى اخى فى هذا ولكن كما لها اضفانتج فلها ديس أدفانتج, ومنها صعوبه الكمونيكيشن من خلال التلفون او الماسنجر, الشئ الاخر انكما للأن لم تروا بعض وجها لوجه وطوالى محددين وقت العرس بعد سته اشهر وهذا لا يمكن فمن المفترض ان ترو بعض الرؤيه الشرعيه وتأخذ موافقه الاهل بوقت كاف قبل التحضير للذواج , وهى كانت خايفه من اشياء كثيره بخصوص هذا الشأن ووجدت نفسها ما عارفه رأسها من رجلينا فماذا لو لم تتفقو بعد طول الانتظار, وماذا لو لم يوافق الاهل وماذا وماذا وكثيرا من المخاوف التى لم تستطع تحملها بمفردها سته شهور أخرى...الحمدلله على كل شئ ولكننى اوكد لك ان عامل الكمونيكشن هو اهم شئ فى الموضوع ولأخر مره تحدثت معها اكدت لى انها لا يمكن ان تفكر ان تتركك من اجل من تقدم لها وهى عملت المستحيل لأبعاده, اذن اسباب الفراق هى لا دخل لها بمن تقدم لها بل لأنها وجدت نفسها غير قادره على الانتظار سته اشهر وهى فى قلق وتوتر على مصير هذه العلاقه غير ان اخر مشكله قد احدثت شرخا ما فى العلاقه, على العموم وفقكم الله لكل خير واى شئ يختاره الله سبحانه وتعالى تأكد فيه الخير لكما...تحياتى
وفى امان الله
لا اله الا الله
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: bint_alahfad)
|
اخيتى بت الاحفاد اولا شكرا للدعوات الصالحات من زوله صالحه وتانى حاجه بمناسبه انو يمكن الاهل ما يوافقو دى ما اظن لانو لا احسب انو عندى سبب يخليهم يرفضونى وبالمناسبه المجهود البذلتو انا عشان اقنع اهلى اكبر مجهود انا ابذلو فى حياتى ياخى انا فى ناس فى الاسره اترجيتم رجاء وعمرى ما اترجيت لى زول عملتو عشان خاطر علاقتى بيها وراهنت على نجاحه والكل يقول لى ياخى دا وهم ساكت لكن كان عندى دوافعى الخاصه والكمن سنس بتاعى عمرو ماخذلنى لكن زى ما قلتى قدر الله وما شاء فعل لكن بالنسبه للكميونكيشن ا ظنها كانت مشكله فكنت بكلما بعد مرات تلاته مكالمات فى الاسبوع المكاله ما اقل من ساعه وساعتين وبلاقيها اولموست ديلى فى المسنجر قلتى لى المشكله الاخيره دى بالذات انا برئ منها براءة الذئب من دم ابن يعقوب والله وبكره حتعرف كده لكن اوردى الاوان فات على الاقل من ناحيتى انا ياهبه صحبتك دى اتعاملت معاها بقلب ابيض صافى كعادتى دوما مع كل من يدخل حياتى لكنها ايزر ما عاملتنى بالمثل او ان الاقدار ترفض البقاء لنا سويا ولك تحياتى وتمنياتى لكما بالتوفيق
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
Messenger (Inbox) Inbox - WAD ELGAALI#4 Inbox - New Message - Outbox
Date: 13-02-2004, 03:47 PM From: bayan To: WAD ELGAALI#4 Subject: كر علينا الشاكوش يضرب عدوك الابن الحبيب ود الجعلى الطلع ما جعلى عارف يا وليدى النساء ثلاثة انواع امرأة غير عادية وغير متكررة هذه شاكوشها يجعلك شهيدا فى معركة فاصلة ويجب تسمية هاى ويى عليك و ونوع ممكن ان تلقاه فى كل لفة ودى شاكوشها يجعلك شهيدا فى موقعة صغيرة ومن ثم يطلق اسمك على شارع تقاطعى صغير وما معبد ذاتو والنوع الثالث هى تلك المرأة التى تبحها وتتمنى ان يراها العالم كله بعينيك وهى كذلك وهنا مافى اى شاكوش فأجتهد يا بنى وأظفر بالنوع الثالث والضربتك شاكوش دى من النوع الثانى يلا بطل البكى والجرسة خالتك بيان شكرا خالتى العزيزة الدكتوره بيان ودما لك تحياتى ومحبتى لكن الغريبه الضربتنى شاكوش دى من النوع التالت وكيلك الله لكن دا يكون اختلال فى الموازين كتر خيرك يا دكتوره وانشاء الله ما فى اى بكى بعد كده
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
ود الجيلى الرابع ما دام همك انقاذ ما يمكنه بعد الشوكشة فى عيد الحب...اتبع الاتى: أ/اعمل self test ,الاختبار الذاتى لاجهزة الحب والجاذبية عندك حتى تعرف لماذا اتفنشت(اقعد قدام المراية اتاكد ان الشنبات اتزبتت والدقينة اتهذبت ,لو كيف شيلا برة..الصلعة اتغطت ,بدل العراقي والجلابية البس بنطلون شبابى ويا حبذا لو كان جينز بفنيلة عليها صورة احد النجوم العالمين..احفظ كلمات برطانت مختلفة لزوم الثقافة العالمية(اصلوا البنوت بحبن الانسان المتمدن) ب/ بعد كده تتاكد بآن الحاجات دي شغالة تمشى محطة الحافلات عشان تشوف تاثيرها في الجنس اللطيف...وتشوف العوازة اضافة او حزف او تعديل شنو ج/ بعد كده تدخل في علاقة غرامية سريعة لرد الاعتبار المشاعرى بعد الشوكشة(ما مهم تكون شكلها كيف لان الشينة في عين حبيبها جميلة,الغرض الاساسى هو :انا عندى حبيبة اذن من حقي احتفل بعيد الحب د/احتفل معاها بعيد الحب باثر رجعى..او كما يقول الصعايدة: اذا فاتك الترامى.. اتمرمت بطرابو ملحوظة هذه الوصفة خاصة بود الجيلى الرابع ...ممنوع الاقتباس حيث لا نتحمل فشلها ولكن نفتخر بنجاحها
| |
|
|
|
|
|
|
Re: بمناسبة الاحتفالات باعياد الحب تذكروا اخوكم ودالجعلى وآزروهو فى شاكوشو (Re: WAD ELGAALI#4)
|
يا شباب هوى صحى بقولو مرمى الله مابترفع الليله الجمعه جرت العاده ان اتصل بالوالده مجرد ما اصحى من النوم لمده طويله واعرف الاخبار واتكلم مع كل الشباب لانهم كلهم بجمعوا معاها بتونس معاهم لحدى ما يجى وقت الصلاه اها هسى اتكلمتا معاهم وانتهيت عارفين المصيبه الكبيره شنو بعد ما اجى من الصلاه بكلم الزوله دى اها هسى راسى فى قله اعمل شنو بعد اجى من الصلاه وكيف اقضى الساعتين الكنت بتكلم فيهم معاها غايتو ما عارف الا كان اقوم اضرب لى خالتى دومه والله امشى اشوف لى صرفه اها عليكم الله رايكم شنو فى الوهم دا
| |
|
|
|
|
|
|
|