يا بورداب الرياض فيكم واحد ضباح !!!!

يابورداب الرياض
كل عام وانتم بورداب في خارج السودان
كل عام وود قاسم مشلهت في الغربة
وغريبة غريب
وود وراق في المنصة
ودكين يكون حرارته بردت
المهم بكرة الصباح
المسلخ زحمة والجوطة حاصلة
والخروف امام الشقة يكورك وعاوز برسيم وموية
وكل دقيقة نفتح الشباك نطمن عليه خايفنو يجي واحد يلحقوا
امات طه والعيال وامهم يعيدوا بلا خروف والخمسمية تكون طارت
غايتو شوفوا لينا واحد ضباح
وعندو خبرة وعندو عدة وبعرف يقطع اللحمة
ويطلع الكرشة،، والريش والمرارة وباقي مستلزمات الكمونية
وهذا اعلان يا دكين
ويا ود قاسم لو ضباحكم خلص بدري ادينا مس كول
وبحكاية مس كول
احكي ليكم نكته عن واحد شايقي ( دون عنصرية)
ناشف وما بطلع ريال واحد
شغال في محل موكيت
قامت حريقة ،، قام عمل مس كول لي ناس المطافئ ،،

الاخ حنين انا جاهز ضباح درجة أولى ما ببقى ليك زي الشايقي ولا كمان بنعمل مس كول ادينا رقم الخروف كامل وانشاء الله يكون داخل شبكة الرياض وانشاء الله برضو ما يكون خارج الخدمة والسكين مشحونة بي سوا العيد ولك التحية

أخوك وليد احمد

الاستاذ احمد /وليد / وكل البورداب
كل عام وانتم بخير


ذكرتنى بكلمة ضباح دى لمن اول مرة دخلت فى نادى الفنانين
قام عازف الكمان المعروف امد الله فى عمره عبدالله عربى سأل
المرحوم على ميرغنى إنت الزول ده إسمه ساطور عديل كده؟
قام المرحوم على ميرغنى رد عليهو إنت ما عارف ده جزار كبير
فى السوق ،طبعا ده بحكم إنو بيعرف عبد الله عربى يحب ليك
ناس السنكيت والعكو , قام جانى تانى عبد الله عربى ورّحب بى
بطريقة خاصة جدا وقال إنت يا ولدى محل جزارتك جنب ويين فى السوق
فما قصرت وصفت ليهو وصف وهمى لانو عرفت إنو ممقلب
ويمكن قرابة الشهر كل مرة يجى يقول لى ياخى انا خلصت بنزينى
كلو بفتش لى محلك ده ، لحد ما عرف إنو ما خد مقلب صاموتى من
المرحوم على ميرغنى وبتذكر إنو اليوم داك على ميرغنى ما جا نادى الفنانين لانو قال لو جا عبدالله عربى حيضبحه.
وخلاص طالما وليد جاهز نحن نجى ناكل بس.

الاخ احمد حنين
كل سنة وانت طيب ..ناس البلدية ماشافو خروفك دا ولا مشغلو هزاز
ها ها ها ها ها

ترهاقا.. بالله انت ساطور الفنان طيب ما دى حلوة معاى واناكمان بعرفك لانك قبل كدا دخلت على بوست من بوستاتى...ربنا يسهل علينا
والبت دى توافق ونغير مهنة سائق خاص دى عشان نقدر نستخرج استقدام
ودا كله عشان نضمن حفلة مجااااااااااااااااان
كل سنة وانت طيب والقابلة على امانيك

وليد لازم تقطع المرارة قبل كل شىء لانها بتكون حااااارة
ولكم ودى

احمد حنين أخوي
كل سنة وانت طيب
عيدك سعيد وجميع بورداب الرياض
والله اخوك بيعرف بضبح من الاضان للاضان
بس انت وصف لي البيت وخلي العيال يكونوا بعيدين

أحمد حنين
كل سنة و انت و العيال و أمهم بخير

انا ضبحت مرة و الخروف قام مشى و هو مضبوح
و من يومتا حلفت ما أضبح
لو عاوز ضبح بطريقتي بجيكم

كل سنة والجميع بخير
شكرا لكم اخوتي علي الضبح
والله تستاهلوا الضبح وما قصرتوا
غايتوا انا اتصرفت
الخروف اضبح كيف دي خلوها سر
عاوزة بوست منفصل
تصوروا الخروف طلع ما فيهو مرارة- مرارته مفقوعة

الأخ وليد
ما قصرت والله انت عارف الخروف زاتو طلع سوا
تضبحوا تعدي بيهو يوم العيد وترجعوا الزريبة يشحنوا

اما انت يا ساطور
حكايتك غريبة انا اول مرة اعرف انك مهم اقصد الساطور
حبابك الف يا ساطور
ياريت تشرفناانت والعيال وعندي ليك شربوت كارب (ملخبط)

الأخ ابو قوته
انا في راي تغير المهنة لي ضباح او مهنة البت لي ضباحة
امانه ما راجيك ضبح كتير
انت عارف اليوم ضبح الخروف في الرياض 100 ريال
كمان بس يقطع الرأس والباقي تتموا براك تقشرو وتكسرو وتقطعوا
عشان كدا لقيت خروفي بدون مرارة والكبدة راحت وين ما عارف
اما حفلتك خليها علينا انت جيب المدام الضباحة
وعينك ما تشوف الا النور(دا اذا شافت تاني)
اخوان الربة جاهزين اطور بي ساطوره
وعمار بي سكينته
ووراق بي صحنوا
وود قاسم بي هجيجو
وابو جهينة بي كرفتتو
والبقية دكين والجماعة

الأخ حمزاوي
كل سنوة وانت طيب
فينك فاقدنك
اخلي العيال بعدين
انت عاوز تضبحوا بي كلاشنكوف
ولا خايف الدم يرش

ابو جهينة
يل خوي ضبحك دا
ذي دفن الليل اب كراعا بره
اكان كدي انا بعرف اضبح افضل منك
الخروف ما بقوم يمشي لكن يكورك باع باع
كيف الدمام معاك
تحيتنا لبورداب الشرقية
مع المحبه للجميع

الاخوان حنين وساطور أها يا جماعة العيد انتهى وما سمعنا اي خبر انشاء الله تكونوا ضبحتم والله بعتزر انا مشيت المنطقة الشرقية محصل لي خروف محتضر في الدمام بتاع واحد اخونا وبعد دا ما حصل العيد لانو كان بلفظ انفاسوا الاخيرة والمرة الجاية بنجيبوا ليك في الجزارة يا أخ ساطور تقوم بالمهمة دي انشاء الله وكل سنة وانتو طيبين بس نخاف من المقالب !!!!!!!!!!!!!!

وليد احمد

يا احمد حنين بطاقتك آآآآآ عفواً خروفك بتاع سوا دا بعد الشحن كان خارج الشبكة وبره الخدمة طيلت ايام العيد عشان ما قدرنا نحصلو عشان زحمة الاتصالات في الحج دي يظهر، على العموم ما مشكلة آيه رأيك تعزمنا بيه في استراحة بعد العيد دا ولا تخلية لعيد الضحية الجاي نسأل الله أنو ما نكون الضحية نحنا في البلد دي ولك التحية.

وليد احمد عبد الله