تاريخ أمدرمان ......

أبحث في تارخ مدينة أمدرمان " معماريا"
أرجو مساعدتي باقتراح أي مصادر عن المدينة .
لكم الود

..
.
امدر ،،
يا ربوع ســودانا ..
نحيك وانتِ كل آمالنا
فى غربك عروس الرمال
وفى شرقك اية جمال
وجنوبك واسع مجال يا حلاة رطبك فى الشمال..

مأ احلى الذكريات فى امدر بين فتيح والخور واولئك الانجم
السامقة فى نجوم الثورة وفراعه امبده واكلات السمك فى الموردة

والله يا مانديلا اسف ما عندى طلبك بس قلت اديه دفرة فووق
انت ما عارف انا امدرمان دى بالنسبة لى زى كردفان لو طريت شارع
الدومه ساى قلبي برف وراسي بلف ..
يا ريت لو ابناء امدرمان يجوا هنا يحكوا ويغرغروا ويقلبوا الذكريات

وووينك يا بناديها وودعزة
اها لى فوووووق يا الطابية المقابلة النيل


تحياتى

Quote: أبحث في تارخ مدينة أمدرمان " معماريا"

سيطول بحثك يا مانديلا و سيطول ... و سيطول... و سيطوووووووووووووووووووول ........

ملاسى

مانديلا...
داير شنو بالضبط..
لأنو لو كنت داير خرائط.. دي صعبببببببة.. ولو داير دليل ده أصعب.. إلا يقعد زول قديييم كده يحكي ليك المبنى ده كان وين والمبنى داك اتبنى متين....
واثني صديق ملاسي في:

Quote: سيطول ... و سيطول... و سيطوووووووووووووووووووول ........

ومبروك مشروع التخرج مقدمـــا،،

مانديلا
حليل امدر وحليل ناسه انته ما سمعته الشاعرالراحل العبادى قال
امدر قامت بجهله وابت اهله
المطوب تحديدا شنو امكن نساعدك
تحياتى

الأخ / مانديلا

هناك بعضها :-

1/ تاريخ مدينة الخرطوم ( محمد ابراهيم أبو سليم).

2/ سلسلة قضايا الاسكان فى السودان ( أعمال سعد الدين فوزى - تحقيق واعداد فاطمة بابكر محمود )

3/ مشاكل الاسكان المنخفض التكاليف فى السودان - مذكرات ووثائق السودان يونيو 1954-( ب. ج. سانديسون) .


وأعانك الله

..
.
انا امدرمان
انا السودان
انا الدرة البزين بلدي
انا البرعاك سلام وامان
وانا البهواك يا ولدى


هيلا هووووووووب ..

دفرة يا مانديلا .. عشان استاذنا الجزولي جاب ليك دعم

بجيك تانى

جيب معاك حاجة يا تبلدينا ما تجي و ايديك فاضيه ..... عارفها مهمة

مستحيلة بس خلينا نشوف برضو ....

ملاسى

..
.
انا امدرمان تأمل فى نجومي
انا السودان تمثل فى ربوعى

سلام يا ابو الحسن ..
انا والله لو ما خايف انحرف بالبوست دا من مساره
وخاصة اخونا مانديلا الظاهر عيهو مزنوق فى ( البروجيكت بتاعه )
كنت قلبتته ليكم غنا واغنيات عن امدرمان وصور وتاريخها وكدا ..
بس هندسة معمارية وبروجكتات دى ما عندى - خلي بالك من برجيكتات دى
مصطلح جديد -
بس بالمناسبة ناس امدرمان ديل هاجروا وخلوا البلد
من ورانا بعد نيفاشا ولا شنو ؟؟؟


جااااااااى تانى

Quote: خلي بالك من برجيكتات دى مصطلح جديد

مخلي بالي و الله يا تبلدينا ..... ما توصي حريص يا خوي ...

بعدين لو علي الغنا و التاريخ و الصور اكيد بتلقي ...بس معمار و هندسة معمارية و حركات زي دي

ما اظنك تلقي ليك حاجة تب ...

تصدق يا تبلدينا ... ما زول في جدودنا جاب ليهو زول يرسم ليهو خريطة و لا جاب ليهو مقاول ...

عشان كدا لمن تدخل البيت - الحوش - الا تضبح لو عرفتا تطلع تاني !!!! و الله يكون في عون اخونا

مانديلا ...

ملاسى

تعرف ياتبلدينا ماحايكون فى اى تعارض بين رغبتك ومطالب اخونا مانديلا .. لأنو امدرمان كمدينة فان تاريخها فى كل مفاصل حياتها (عمران وناس واجناس وحكايات )بنى من ادب المشافة وطق الحنك! ولذلك فممكن جدا ان يستعين الدارس والباحث فيها بالثقاة الذين تخصصوا فيها .. يعنى صديقنا العزيز شوقى بدرى الى جانب الاساتذه عبد الله محمد زين ومحمد عبدالله مشاوى من الممكن جدا الأستعانة بهم لأجلاء بعض الحقائق بخصوص عمران امدرمان الى جانب ما كتب فى هذا الخصوص , وبالمناسبة ممكن ان اضيف ( يازول يا زول ) من اعضاء البورد ايضا ! وبهم يمكننامثلا ان نعرف منهم المادة التى تم بها بناء حى تقلى غرب اسبتالية امدرمان كأصغر احياء المدينة ولماذا ,أو مثلا حى كودنوباوى حيث كان فى الاصل يعرف بحى الكارة ايام المهدية , ومن هذه المعلومة البسيطة يمكن معرفة اى المواد استعملت فى تشييد منازل هذا الحى بعد تصنيفنا الاجتماعى لسكانه مثلا ! وقس على ذلك .. هذا اضافة لأخذ عينة من خرائط أغلب بيوت هذه المدينة .. لماذا الحوش الكبير مثلا .. وكثافة استخدام الجالوص لبناء غرفه والحكمة من النفاجات بين منزل وآخر , ولماذا, والحكمة من استخدام اخشاب السنط فى ابواب المنازل والشعبة لأسناد حجرات البيوت ! وضيق الشوارع خاصة فى امدرمان القديمة .. وهكذا .. والله أعلم.

تبلدينا: يال دفراتك.... ،حرف زي ما بتدور....و لا أقول ليك أنحرفليك أنا...

قيل في ما قيل ....
" تبكيك الجوامع الانبنت ضانقيل "................
ملاسي....أقرا السطر الفوق ده تاني...

هذه المرثية المغناة يا ملاسي تحكي و بصدق أن الجوامع تبكي و البيوت تفرح و الاسواق تتنفس ...فالمباني كائنات تتعلم مثلنا تماما
....مالك داير تكسر مقاديفي ....
فيا عزيزي الغناء ثقافة و الحكاوى ثقافة و العمران هو كذلك ثقافة...بل هو الثقافة الأكبر التي نمارس فيها بقية ثقافتنا...

أنا يا ملا سي في حوش جدي و كما قال الهادي الضلالي "امدرمان حيشان " و أنا مارق الصباح بشرب الشاي تسعة مرات لانو كل ما أفتح لي باب شارع الاقيهو بيت تاني و ناس قاعده بي صوانيها تهجم علي طلاق أشرب معاهم ......و أنا خاشي نفس الحكاية للفطور و هكذا دواليك...

بلدي يا حبوب : المطلوب تتبع نشاة و تتطور المدينة عبر حقب الريخية مختلفة مذ كانت مجرد تجمع للصيادين حتى أصبحت اليوم عاصمة شعبية , بل و مدينة أفريقية مميزة تجمع في تعدادها أعراق افريقية مختلفة ..

د. حسن الجزولي ...لك الود الكثيف...كل المدن أجناسها و حكاياها و عمرانها متشابك...شكرا على أسماء الكتب و البشر...نبذاتك لم تزدني الأ شهية لاخوض في الموضوع أكثر...و اسمح لي أن أضعك في قائمة المصادر الشفهية....


يا رجاء.....بروجكت شنو؟؟؟؟؟ دي حركة كدة عشان نقضي وقت في الأجازة الكلها برد و كتاحة دي.........

(قدلة يا مولاى حافى حالق فى الطريق الشاقى الترام)

بنفس احساس كاتب السطور اعلاه ،ادخل الحوش دة وكلى ثقة فى رحابة الصدر لصاحبه الاخ مانديلا ان يقبل مشاركتى باقتراح ان يتحول هذا البوست (تاريخ امدرمان) الى مكتبة عامرة تحكى ولو بعض عن تاريخ امدر يجد فيها الباحث ماشبع رغبته فى الثقافة الامدرمانية التى تمثل نموزج السودان المنشود حيث تتصافح الاديان وتتمازج الالوان
اضافة ان هذا البوست يمكن ان يتحول الى قهوة امدرمانية معتقة بذكريات الماضى واخبار الحاضر لما يجرى فى حوارينا العتيقة ابدا ويمكننا ان نأمها يوميا ونعوض ولو سويعات من العدااا وفااااااااااااااااات من عمرنا ونحنا برة امدرمان
واتمنى ان يكتبو كل اولاد امدرمان فى الداخل وذكريات الفى الخارج مع مشاركة بعض الشخصيات من خارج البورد والذين عاصروا حقبا مختلفة من تاريخ البقعة وهذا سيكون النواة لهذا المنتدى داخل المنتدى

اكتبوا يا اولاد امدرمان اى شى اى شى بس نعيش معاكم فى جو امدرمانى
ونتجول معكم فى الازقة الضيقة من حفر القماير طرف الدباغة ودنوباوى
والكباجاب وحفر ابوحبيب وكداوية قووية ومشاكسات اولاد الاشلاق والملازمين
ذكرونا معاركنا مع اولاد بيت المال وهم يقفوا فى طريقنا للوصول للاذاعة والتلفزيون
ذكرونا حسن بدير وسمك سكى
زكرونا حبوباتنا فى سوق الطواقى والريحة اللذيذة الفى تيابهن

ذكرونا ايام بيع وشراء الالغاز والمجلات فى المحطة الاسطى والاستمتاع بمغامرات لوزة وتختخ
ذكرونا تمباك سوق الجلود و دكتور امين ونادى التاج

يلا يا جماعة اكتبوا صحو الوجود حتى نعود

عزيزى مانديلا اعود لك مرة اخرى ولك ولامدرمان التحية

العزيز أحمد...
لك الود...

يا خوي لا تستاذن و لا حاجة أنا ما فوق قبت الكلام ده لملاسي...أنو الغنى و الحكاوى المشافهة بالنسبة لي مصدر برضو ...أنتو احكو بي راحتكم...

أها الشارع الشاقي الطرام حسب ما أعلم هو شارع المورده....مع أنو أنا اتوادت بعد موت الترام بنصف قرن ,,,

أنا ألزمك با أحمد أن تعود و تحكي لينا فوق الزول الحافي حالق و ساكي ليه ترام ده ماله؟؟؟

أنا أمدرمان
أنا السودان

يلا أيها الأمدرمانيون
غنوا و تحاكوا لاجد ما بين سطوركم منفذ....

ام در

اشوف نعيم دنيتي وسعوده
امتي ارجع لمدر واعوده

امتي تلمع لي بروق رعوده
حظوظي تنجر لي وعوده

روحي ضاعت في النار قعوده
لي هون ياربي عوده


اعلاه كلما يمكن ان اساعدك به.واذا ذكرت اسم السودان اكيد ذكرت البقعه.لانها جامعه كل السحنات السودانيه.وينطبق فيها القول الاتي:-
(اضرب يمين وشمال لكن دير بالك من الشتم).

هذا ما ورد في موسوعة بريتانيكا الطبعة الحادية عشر . الصادرة عام 1911
عن وصف مدينة امدرمان...في اوائل القرن العشرين...


OMDURMAN, a town of the Anglo-Egyptian Sudan, on the west bank of the Nile, immediately north of the junction of the White and Blue Niles in 15 38 N., 32 29 E., 2 m. N. by W. of Khartum. Pop. (1909 census) 42,779, of whom 541 were Europeans. The town covers a large area, being over 5 m. long and 2 broad. It consists for the most part of mud huts, but there are some houses built of sun-dried bricks. Save for two or three wide streets which traverse it from end to end the town is a network of narrow lanes. In the centre facing an open space are the ruins of the tomb of the Mahdi and behind is the house in which he lived. The Khalifas house (a two-storeyed building), the mosque, the Beit el Ama~ta (arsenal) and other houses famed in the history of the town also face the central square. A high wall runs behind these buildings parallel with the Nile. Omdurman is the headquarters of the native traders in the Anglo-Egyptian Sudan, the chief articles of commerce being ivory, ostrich feathers and gum arabic from Darfur and Kordofan. There is also an important camel and cattle market. Nearly every tribe in the Sudan is represented in the population of the city. Among the native artificers the metal workers and leather dressers are noted. The government maintains elementary and technical schools. Mission work is undertaken by various Protestant and Roman Catholic societies.
Omdurman, then an insignificant village, was chosen in 1884 by the Mahdi Mahommed Ahmed as his capital and so continued after the fall of Khartum in January 1885. Its growth was rapid, the Khalifa (who succeeded the Mahdi) compelling large numbers of disaffected tribesmen to live in the town under the eye of his soldiery. Here also were imprisoned the European captives of the Mahdistsnotably Slatin Pasha and Father Ohrwalder. On the 2nd of September 1898 the Anglo-Egyptian army under Lord Kitchener totally defeated the forces of the Khalifa at Kerreri, 7 m. N. of the town. A marble obelisk marks the spot where the 21st Lancers made a charge. Within the enclosure of the Khalifas house is the tomb of Hubert Howard, son of the 9th earl of Carlisle, who was killed in the house at the capture of the city by a splinter of a shell fired at the Mahdis tomb. (See SUDAN: Angle-Egyptian.)

حليل ام در و حليل ناسها
و صحي متى ارجع لم در و اعودها
و الله يااخ مانديلا ما عارفه اقول شنو , لانه بالرغم من انه انا معماريه لكن ما قدرت اوجه مشاركتي في اتجاه دراستي لكن لقيت نفسي بس عاوزه اتكلم عن امدرمان البعرفها و قاتلني الشوق ليها , قاتلني الشوق لشارع المورده محطه المجلس البلدي , و قاتلني الشوق للمشاققه عن طريق حوش الخليفه و حي الاسبتاليه عشان اصل الشهدا , و قاتلني الشوق للحظات التعب عز النهار في البص المزدحم الجاي من الخرطوم و اول ما يصل الكبري احس بالراحه واقول اااح من اعماقي لانه بعد ده كان حصلت اي حاجه بصل البيت انشاء الله كداري ,و ياحليل سوق امدرمان و الحوامه فيه العجب قبل العيد بيويمن تلاته كده ,و ياحليل ناس امدرمان الحنان البيلاقوك في الشارع يدوك السلام و التحيه,و ياخوانا مشتاقه بالجد اطلع الصباح امشي كشك الجريد الاقي رجال حلتنا بتناقشو في امور البلد و الثقافه و السياسه و اعاين ليهم من بعيد باعجاب و منهم محمد دقيل فريد و بعض اساتذه مدرسه الاحفاد و محجوب شريف احيانا و ناس كتار كنت بس باعاين ليهم و انا معتزه بانه ديل اهلي,
يا اخوانا انا لي بس 9 شهور بعيده عن امدرمان لكن اموت على شوفه نيلها و شمه ترابها,و اموت على مناسبه تجمع اهلها,,,,
لكن عوده لموضوعك عن تاريخ نشاه و تطور امدرمان من ناحيه معماريه فانا اوعدك بانه انا حاجتهد و احاول اجمع ليك ماده مفيده ,,,,
و يا جماعه واصلو و حكون عن امدرمان الزمان لانها اكيد احلى من البنعرفها نحن حسه و مكسرانا موووووت

الاخ مانديلا

سؤالك صعب و طلبك قاسي . فهمت انك تدرس المعمار و تود كتابة بحث عن " التأريخ المعماري " لامدرمان . كل الذي قرأته عن هذه المدينة كان عن اهلها و ترابطهم و ريادتهم في كافة المجالات السياسية و الفنية و الادبية و الكروية .

لكن معمار امدرمان القديمة بمكن ان نأخذ له مثالا بيوت حي الركابية و الكاشف و ابوروف وودنوباوي , فبيوت تلك الاحياء من الطين و اسقفها من الجريد و الحطب ومع ذلك لاتزال صامدة ولان المعمار يدرس " The theory & design of structure " فاني اقترح عليك ان تدرس المواد المستخدمة في بناء هذه المنازل و "الخلطات " و نسبها و كيف نجحت في بنيان قوي يناسب الظروف البيئية لهذه المدينة من ارتفاع درحة الحرارة والكتاحة و الهبوب . و يمكنك ان تأخذ عينة مثلا من تراب " الرقيطة" وتحلله معمليا لتبيان تركيبته الكيميائية و هنالك شيي اخر جدير بالبحث وهو " روث الحيوانات " و دخوله في صناعة "الزبالة" .

وهنالك بيوت من نوع اخر نأخذ لهل مثالا بيوت حي الامراء و حي الضباط و بعضا من حي السور و التي بنيت علي الطراز الانجليزي فتجد شبابيك الشيش و الحوش الفسيح و الحديقة و قد تجد بيوتا مشابهة لذلك في لندن و لاهور و نبودلهي وكل البلاد التي حكمها الانجليز .

بعد " الدش" ده كلو اشتاق لفول مصلح عند " احمد سعد " او " موسي نفخو" أو " الجان "

آمنة....يا زميلة
لكي الود....يا مولاتي أنا دايرك تتكلمي عن أم در زي ما تحبي....و كل ما تحبي...و انا علي اقرا بين السطور...و هسي بعد ما فضيتي الشحنة الجميلة من المشاعر دي و ضربتي فول في تلاتة اكشاك...يلا ....تعالي راجعه و منطقيني...

شكرا على المقترحات و الافكار يا خالد...
أعدك ان انشر جزءا كبيرا كن البحث هنا...
لك الود

عزيزي مانديلا ..
كنت من فترة اقوم بطباعة كتاب تاريخ الخرطوم ..
وهو يتضمن ايضا تاريخ امدرمان .. منذ نشأتها والي حين قريب ..
ولظروف العيد ومشاغل العمل .. توقفت ..
ومجرد الفراغ منه ..
سأنزله علي الانترنت ...

وهي دعوة مفتوحة .. للاخوان ..
لاحياء برنامج الكتاب السوداني علي الانترنت ..
فالمكتبة السودانية في الانترنت فقيرة الي حد يدعو للخجل ..

وايضا يتضمن الكتاب .. خرائط كروكية للمدينتين ..

وهذه هدية من أليك .. بعض الصور عن ام درمان

شكرا حميدة...
يا ريت لو تدلني على اسم المؤلف و دار النشر و انا شاكر...
و اضم صوتي لي صوتك,,,افتح بوست منفصل بالموضوع عشان نناقشه مع المؤلفين الموجودين هما...

امدرمان عمرت داخلنا مبانى طيفيه
لا نشاهدها لكننا نحسها
فالعماره فى امدرمان فيها كل الابعاد الصوفيه التى
تتبين فى الدانقيل والنفسيه التى تتشكل فى الحوش الفسيح
والسودانيه التى تتبين فى من هم سكان المبانى ..
امدرمان مدينه مبنيه من الاحساس لان الطين الذى لعبنا به
صغارا شيدنا به منازلنا كبارا0

أستاذ حمزة أنت الدخلك المعهد شنو؟؟؟؟
انت المفروض كان تخش معمار و الله.....

..
.
اصيلة حنينة يا امدرمان
جمعت الناس .. كل الناس ..
عديد سحنات وكمان اجناس
لا كليت
لا صديت
لا مليت
لا .... الخ للاسف لا احفظها

والله اول امبارح كنت بستمع لصلاح مصطفي وهو يتغنى
بهذه الاغنية التى تهزنى من الداخل واتذكرت البوست دا ..

وقلت هيلا هوووووب

الأخ مانديلا أرجو أن تبحث عن بوست به خرائط قديمه للمدن الثلاث (العاصمه المثلثه) منذ زمن بعيد غالباً فى أواخر القرن الثامن عشر قمت بنشره على هذا المنبر قبل زمن بعيد وستجد به الكثير مما قد يساعدك فى فهم جزء من التركيبه المعماريه لأمدرمان والخرطوم وبحرى وكانت أمدرمان الأكبر تليها الخرطوم ثم بحرى وهناك سوق امدرمان والجامع الكبير والمستشفى والسجن ومايقع شرق المستشفى كله من معسكرات للانصار وأيضاً حى المسلمين كما يُسمى على الخريطه وهو حى العرب وحى المسيحيين(حى المسالمه) ومقابر البكرى وأحمد شرفى وهناك مقابرأخرى تقع على الركن الجنوبى الغربى لسوق أمدرمان مكان البوسته الحاليه وشارع الهجره وطاحونة كبيره للغلال ضمن طواحين متعدده بالبلده تقع على ناصية شارع كررى يمين الداخل إليه من السوق الكبير غالباً جوار بائع الثلج الحالى

Thanx sourketti..
Thanx alot

امدرمااااااااااااااان

لا حولاااااااااااااااااااااااااااا

معمار!!!!!!!!!!!!!!!!!!!!!!!!!!!!!!!!!!!!

أسمع انظر ليك اسه ولا مافي داعي؟!!

لا لا في داعي نظر