(مطر الفرح عاود هطل) على الشرقية باحتفال البورداب بذكرى الاستقلال المجيدة

أمس الجمعة وفي لحظات فائقة الروعة تجمع بورداب المنطقة الشرقية بالسعودية في احتفال رائع بمناسبة ذكرى استقلالنا بإحدى استراحات مدينة الدمام وقد حضر اللقاء :-

-أم سهى وأسرتها الرائعة المكونة من زوجها الأستاذ زهير وزهرتيها الرائعتين الجميلتين سهى وسارة
-عمك تنقو
-الشرغوف
-زورو
-حميدة
-محمد إبراهيم
-محمد مدني
-صداح
-خالد الطيب
-الزول زاتو
-كوستا
-أبوأحمد
-فيصل محمد الطيب
-أبومرام 22
-نادر

إضافة إلى كوكبة من ضيوف وأصدقاء البورداب الذين شاركونا المناسبة وأشادوا بترابط وتناغم أعضاء سودانيزأونلاين بالمنطقة الشرقية.

اعتذر عن الحضور كل من الزملاء أبو مهجة وبشرى لتواجدهم بمدينة الرياض .

شارك في الاحتفال شركاءنا الدائمين الزملاء في رابطة أصدقاء الكتاب بالمنطقة الشرقية الذين هبوا كعادتهم معنا في تنظيم معرض الكتاب الذي يحوي العديد من الكتب القيمة.

كذلك شارك التشكيلي ناصر عباس محمد الحاج والمقيم ببروكسل بمعرض تشكيلي مصاحب لفعاليات الحفل.

في البداية قدم نادر كلمة المكتب التنفيذي للرابطة للترحيب بالضيوف الكرام ، وإعطاء نبذة تعريفية عن رابطة سودنيزأونلاين بالمنطقة الشرقية تأسيسها وعضويتها ولائحتها التنفيذية وبرامجها وأهدافها ، وإنجازاتها من خلال البرامج الاجتماعية والتربوية والفكرية والتي كان أبرزها دعم جمعية صباح لرعاية وتأهيل الأطفال المشردين بشحنة من الملابس وتجهيز كمية أخرى سيتم إرسالها في الأيام القليلة القادمة ويجري التنسيق أن يكون ذلك قبل العيد ليتمكن الأطفال المحرومين من قضاء العيد بملابس جديدة لتتم فرحتهم.

تواصلت بعد ذلك فعاليات الحفل حيث شارك الأستاذ جبر الله عمر الأمين الصحفي المخضرم والمحلل السياسي بصحيفة اليوم السعودية بورقة عمل عن القضايا السودانية المعاصرة ، تناولت بالنقاش والتحليل الواقع السوداني اجتماعياً وثقافياً وسياسياً بعد مرور نصف قرن على الاستقلال ، نالت ورقة العمل استحسان الحضور بما ناقشته من قضايا تهم كل سوداني حادب على مصلحة الوطن ... ووضعت تساؤل مُلح ، هل حقاً نال السودان استقلاله عام 1956م ؟؟؟؟؟؟

بعد ذلك جاء دور الشعر حيث شارك الشاعر معز احمد بقصائد جميلة ورائعة من أعماله وقدم قراءات لشعراء آخرين ...

جاء بعد ذلك دور الطرب حيث شارك معنا الفنان المرهف الأستاذ إبراهيم الماحي (إبراهيم ساورا) وقدم مجموعة من الأناشيد الوطنية للأستاذ محمد وردي (اليوم نرفع راية استقلالنا ) (يا شعباً لهبك ثوريتك) تفاعل معها الحضور وكانت حقاً فاكهة الحفل ... شكراً إبراهيم الماحي ... شكراً لكل الكوراليست وعلى رأسهم الشرغوف ...

خلال الحفل شارك الزملاء في الرابطة زميلهم المهندس وليد المهدي ( زورو) عضو الرابطة الفرحة بمناسبة نيله درجة الماجستير في الهندسة من جامعة الملك فهد للبترول والمعادن .... مبروك زورو مرة أخرى وعقبال الدكتوراه ... وقد قدم خلال الحفل عرض مختصر لأطروحته في نيل الماجستير ...

مقتطفات من الحفل :-

-الزميل حميدة صور الحفل بكاميرا فيديو ووعد بعرض جزء من الحفل في هذا البوست.

-عمك تنقو كالعادة كان شعلة من النشاط في التحضير للحفل وواصل قفشاته مع جميع الزملاء .

-أم سهى بأريحيتها المعهودة وكرمها السوداني قدمت دعوة غداء دسمة وعلق أحد الزملاء أن أجمل ما في الحفل ملاح النعيمية اللذيذ في وجبة الغداء ...

-علق أحدهم على الحضور الأمدرماني الكثيف في عضوية بورداب الشرقية .

-مشاركة الزملاء في رابطة أصدقاء الكتاب نالت استحسان الحضور بالمعرض المصاحب للفعاليات وهي دعوة لكل البورداب والسودانيين بتكوين روابط للقراء حيث أن الفكرة هي شراء كتب وتصويرها وتغليفها بشكل جميل وبيعها بأسعار زهيدة لا تقارن بأسعارها في المكتبات مما يتيح قراءتها للجميع ...

-كوستا قدم الفقرات بإحترافية عالية – مزيع ضل طريقه للهندسة ..

-سعدنا بمشاركة أسرة الزميل البوردابي أبوأحمد وأسرة عضو البورد صداح ..

-تفجر نقاش جميل عن القضايا السودانية وشارك الأعضاء بآراء جريئة خاصة قضية أبناء السودانيين المغتربين وتربيتهم بعيداً عن البيئة السودانية الاجتماعية وتأثير ذلك على التصاقهم بالوطن وقضاياه ... وقد تم الاتفاق على طرح هذه القضايا جميعها في لقاءات قادمة وفي وقت أوسع حتى تنال حظها من النقاش.

-في نهاية الحفل اجتمع بورداب المنطقة الشرقية وتم التفاكر حول برامج الرابطة وقضاياها وأشاد الأعضاء بالمكتب التنفيذي للرابطة والتنسيق والإعداد للحفل .

-الجو كان نجم اللقاء حيث زخات المطر والغيوم التي أضفت على اللقاء رونقاً وبهجة لكن في نفس الوقت أفسدت الأمطار الغزيرة على بعض الزملاء الذين لم يتمكنوا من الحضور لرداءة الطرق

عاش السودان وعاشت ذكرى الاستقلال

الاعزاء
بورداب الشرقيه
جد حزين لانو الواحد قاااااااااعد في الشرقيه ومالامي فيكم عموما ليكم كلكم التحيه بمناسبه احتفالكم بذكري الاستقلال وتهانينا مقدما بالعيد وكل سنه والناس بخير

الاخ نادر
حقا كان يوما رائعا روعة الحضور
افتقدنا مشاركة بورداب الرياض وانتظرنا طلتهم
الاخ خضر نحن احزن لعدم مشاركتك بس كان تتصل باي واحد عبر موبايلاتهم الموجودة في البوست .. عموما الجايات اكثر بس ادينا تلفونك ونحن حنصلك مش انت
شكرا نادر وانا اقرأه تمنيت ان اكون معاكم ....

وطنا
الباسمك كتبنا ورطنا
أحبك
مكانك صميم الفؤاد
وباسمك اغنى..
وتغنى السواقى
خيوط الطواقى
سلام التلاقى
ودموع الفراق
واحبك ملاذ
وناسك عزاز
أحبك حقيقه..
وأحبك مجاز
وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس
أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى
صحى بتملا عينى..
وتشّرف غناى
بحضرة جلالك..
يطيب الجلوس
مهذب أمامك يكون الكلام
لأنك..
محنك
عميق الدروس
مجيد المهابه ومديد القوام
شبابك..
تشابك
شديد الزحام
أراهم..
وراهم
غبار الحياه
مداين..
تعاين
كأمّ العروس
تهلل..
تكلل
جبين الإمام
رزازاً يبلل أغانى الخليل
أصدق كلامك حقيقه وبخاف
أخاف الطريق..
اللى ما بودى ليك
وأعاف الصديق
اللى ما بهم بيك
معاك انتظارى..
ولو بالكفاف
وعنك بعيداً
أبيت الرحيل
وبيك اعتزاز الصباح الجميل
جميع الأغانى اتكالن عليك

لكم الله .. ياناس الشرقية .. !

الحلوين
براديب الشرقيه
كان بودي الحضور بعد خروجي من الرياض لكن طقتني نزله ام برد
امي قالت ليك كان عندكم قرض ادونا
والجايات اكتر
تنقو
ام سهي
نقلت تحياتكم للجماعه
غريبه سالني عنكم ما عارفني هفوفي!!!

كان يوما سودانيا بهيجا تداعي له بورداب الشرقية و أسرهم و أصدقاؤهم و كان عظيما في قامة المناسبة , لا البرد القارس و لا المطر منعا الناس من الاحتفال . كان يوما بسيطا و شفافا كما الكريستال و كانت المودة و الحميمية هي سيدة الموقف . تعارف البورداب و لاقي بعضهم البعض _ وجها لوجه _ , أسسنا بذلك لترابط أجتماعي أحسب اننا نحتاجه معينا في غربتنا .

أثارت الندوة التي قدمها الاستاذ جبرالله العديد من المواضيع التي نأمل أن نتناولها بمزيد من البحث في لقاءات الرابطة القادمة.

أشعار الاخ معز جديرة بأن تري النور علي نطاق أوسع .

و المطر ينهمر , غني أبراهيم ساورا :

واحلالي القبلي شال
شبال لمع برق المهيرة
قيرا .. قيرا يامطيرة
يارذاذ الدم حبابك
ياشهيد الشعب أهلا

اللافت للنظر في الحضور هو تنوع الاجيال فمابين حميدة و استاذ جبرالله حقب وأجيال و تأريخ , كل جيل له تجربته و رؤاه و لكنهم جميعا أجتمعوا علي حب الوطن و الوفاء له و اشتركوا جميعا في "شيل" هم السودان.

التحية الخالصة للجنتنا التنفيذية علي هذا اليوم الذي بشر بمستقبل مشرق للرابطة الوليدة و تحية ايضا لرابطة أصدقاء الكتاب للمشاركة القيمة .

الزميل عمك تنقو سيقوم بإنزال صور المناسبة في غضون الساعات القادمة

لقد فاتني الكثير الممتع

لقد داهمتني نزلة برد وكحة خشيت عليكم من العدوى.

التحية لكم جميعا وعلى رأسكم الريس ( ام سهى ) فقد اثبتت انها قائدة ناجحة وست بيت تمام . وعين الحسود فيها عود يا احمد ابو سهى

مرة أخرى اعتذاري لعدم تمكني من الحضور

سلامتكم ودشندي وزول واحد
الجايات أكتر من الرايحات ... والقادم أحلى
تمنيناكم بيننا وإفتقدنا وجودكم ومشاركتكم

يا تنقو الحكاية شنو ماشين ننوم ما تشوف لينا (المنجهة) دي وين؟ سارة قدتني تلفونات عاوزة تشوف صورتها... خاصةً الليلة عيد ميلادها ..

كل سنة وإنتي طيبة يا سارة عا عسل وعقبا مليون شمعة ...

دقيقة بس اظبط الكرفته واجيكم

الاعزاء بورداب الشرقيه
العزيزه ام سهي
تحيه وود بقامه الجميع
059344381 ده تلفوني في انتظاركم ايها الاعزاء مع التاكيد بانو الجاي معاكم ولي قدااااااااااااااااام

الاعزاء شرقيو البورد
بكم ازدان ذاك المساء
تحية لكل من وقف وراء نجاح اليوم
تحية من هنا وحتي كاف هناك للاخ خضر ... كده كسبنا العجب يا ناس الرياض ... باقي الزين وباتستوتا

يا الاحساسك سطرا سطرا ملا كراسك

تحية وبعد لشعبنا الابي في ذكري الاستقلال

صداح

الاخ حميده انشاء الله المرة الجاية تسمع كل الكلام الجميل البتقول فيهو ده من اخونا ابراهيم الماحي الذي وعد بالكثير
بورداب الشرقية .. ايه رايكم نعمل عيدية لينا تالت ايام عيد الاضحى في دار الرابطة ونكلم ناس الطرب والنغم ونناقش اهم قضية من القضايا التي طرحت في الامسية الماضيه فلتكن قضيه التعليم هي محور نقاشنا .. ايه رايكم وانا انتظر آرائكم
لكم عميق محبتي واحترامي

الاستاذة أم سهي ...
وعد اللقيا هو الامل ..
والعيد فرصة مناسبة ..
بس تعليم في العيد ..
ياخي حتي المدارس مقفلة ..
بس لو حبينا نضرب مثل ...
نجيب طبشير من وين ..

خلاص يا حميدة ولا تزعل هو نحن لمينا فيك بي هين عشان نزعلك
خلاص نخليها طرب وذكريات ... نطلق العنان لذكرياتنا
ايه رايك

كان المطر النجم الاول




بهجة وفرحة

الأرض الطيبة يخرج نباتها طيب باذن الله
بروح المودة وصفاء السريرة كانت متعة اللقاء فالتحية لحادي الركب أم سهى وكوكبتها العظيمة من الشباب الذين تدفقوا كتلة من النشاط ليكون ذلك اللقاء بحق درة أيامنا في الغربة التي قتلت الفرح في القلوب والإبتسامة في الشفاه.فكلمة شكرا قليلة في حقكم. متعكم الله بالصحة والعافية ونطمح نحن عواجيز الشرقية في اريحيتكم وكرمكم ونحن رهن الإشارة

الاستاذ المحترم ابو مرام
لك الود حقا ازداد اللقاء جمالا بوجودكم نحن كل منانا فرحتكم لنزيل عنكم قليل من بؤس الغربة والوحشة التي لازمتنا طويلا .. وليكن وعد اللقاء دوما حبا وفرحا واملا وتفاؤلا
لك الود والاحترام ولكم حب وود رفاقي في اللجنة التنفيذة

هذه روح وطنية رفيعه

الأعزء بورداب الشرقية....
كل التحايا والتجلة ..
وكل سنة وانتو طيبين والسودان بالف الف خير
كتبت قبل شوية كلام كتير وفيهو لوم وعتاب شديد لكن ربنا ما اراد انكم تتطلعوا عليهو ..
كانت الامنيات ان نكون معكم مساهمين ومشاركين في هذا اللقاء فليس كل ما يتمناه المرء يدركه..
المهم لكم كل التحايا وعقبال مليون شمعة ليكم ومليونين لسوداننا الحبيب.
ابوالهيثم

عمك تنقو ... ياهم صورتين العايز نريط ليهم الكرفتة . وين باقي الصور ؟؟ سليت روحنا عديل كدة ...:

الفاضلة أم سهى والكوكبة االمشعة نورا
نعم ليوم الفرح ولمة الشمل ولقاء الفرح والمودة والحب النبيل معكم في اقتراحكم بلقاء العيد فنحن من خلفكم ونشد من أزركم وربنا يكلل مساعيكم بالنجاح

ستجتمع اللجنة التنفيذية خلال الأيام القليلة القادمة لتقرر بشأن برنامج العيد .. وحتى ذلك ولكي ندخل الاجتماع على خلفية آراء الزملاء أعضاء الرابطة نرجو منكم كتابة آراءكم ومقترحاتكم هنا بشأن برنامج العيد .. موعده .. شكله ... الخ

ننتظر مساهماتكم ... خاصة الذين تخلفوا عن الحضور في احتفال الرابطة بالاستقلال ...

في حضرة جلالك يطيب الجلوس
مهذب أمامك
يكون الكلام


كل الود
نادر

بورداب الشرقية
كلي اذان صاغية لسماع ارائكم بالعيدية

موافقين وباصمين بالعشرة ورهن الإشارة

وكل عام والجميع بخير

تنقو هاك العفريتة دي عشان الصور ...
بالمناسبة (الجماعة) عملوا ليك شنو مع (الجماعة) ناس الكُتات وكده ؟؟؟؟؟ شايفنك توصيات شديدة اليوم داك بالليل قمنا عملنا ليك نظام هوونا وكدة عشان الشباب ياخد راحتو بالنسبة للأنساب وترتيبات (من رطب وليس رتب) ما بعد مرحلة العنوسة وهلماجرا جري ....

طبعا الصور حيرتني عديل
شفت يا نادر ما قلت ليك مافي امل ..قال ليك دي القشورية وما ادراك ما القشورية

غايتو كان واحد شاف الصورة دي يدينا خبر لاني ما شايف اي شي وبعدين بقول ديل منو

اما بالنسبة للموضوع والجماعة يا نادر .. اسكت وما تجيب لينا الهوي
عشان انا ممكن ازوغ في اخر لحظة يعني مخلي لي باب مفتوح وكان كتبت حاجة هنا حيكون دليل مادي ضدي لوووووووول

نادر عمك تنقو
اقعدوا ساي نحن ما فاهمين حاجة فهمونا ولا اسه برفدكم

الحكاية واااااااضحة يا ام سهى
مش ياها زي قصة الكارو بتاعنا يا عمك تنقو ؟؟؟
لو ركزتي شوية ح تلقي التفسير يا ام سهى
والله يا عم تنقو باين عليك خلاص دخلت الخط الاحمر

تنقو ..
انت الصور دي .. بالحبر السري .. ؟!!

ام سهي ..ما تاخدي في بالك ..نادر بكون دخل البوست بتاع الشربوت حق الجندرية دا .... لوووول ..لمن القاك بقول ليك


زوزو ابو صلعة قصدك الاندروبر ... لووول ..والله انا اخير لي اقيف في الصينية واجدع كان كدا ...

حميدة ..والله احترت واحتار دليلي في الصور دي ..بمناسبة الصور حصل شنو في شريط الفيديو ؟

عمك تنقو

هم زاتهم قالوا خالين ليهم بابين مفتوحين لوووووووووووووووووووول

التحيةلكل من ساهم فى إقامة الإحتفال ...

لقد سعدنا باللقاء حقاً

وشكراً للأعضاء وعلى رأسهم الأستاذة / أم سهى

وكان جميلاً بأن أسعد بتعارف الأستاذة / أحمد وأبو مرام

وفى إنتظار هطولك يا نادر....

فيصل

السحب خواء ... والبرق تعجل ... من لي بمطر في وضح الشمس؟

كونوا في أقصى القرب من اللحظات المنفية في فاتورة العمر هذه لنجمّل هذاالشتات (ونمد ألسنتنا للغربة أن موتي بغيظك) ... هي دعوة للتعاضد ضد سطوة المنافي ... وفيضانات الحنين الجارفة .. سعدتُ بلقائك ... ولنلتقي مرة أخرى على نفس المرافئ تلك .

لك عظيم الود وكل ورود العالم

نادر

يا تنقو ..
رسل لي الصور علي الايميل ..
بشوف ليها حل ..
وشريط الفيديو .. طبعته علي CD
وحأنوزعه علي الجماعة في اقرب لمة ..
وفي انتظار .. العناوين والتلفونات

كل حميدة جميل

شكراً حميدة

شكرا حميدة على الحاجات اللذيذة دي

الأ نادر وكل أعضاء اللجنة
السلام عليكم ورحمة الله وبركاته وكل عام وأنتم بخير اعاده الله على الجميع بالخير واليمن والبركات . ما أحلى التلاقى وما أجمل اللحظات التي يقضيها الواحد منا بينكم وحتى تكتمل فرحة اللقاء ويتمكن الجميع من الحضور والمشاركة أقترح أن يكون اللقاء والإحتفال بالعيد في أول أو ثاني جمعة بعد العيد لأن معظم الناس أما خارج المنطقة أو لهم ارتباطات أخرى.ولكم الشكر والتقدير من قبل ومن بعد

الأخ أبومرام

تحياتي وكل عام وأنت والجميع بألف خير ...
اتضح لي من خلال اتصالي بالعديد من الزملاء أنهم حقيقة إما خارج الشرقية أو على الأقل أي برنامج في أيام العيد نفسها لا يناسبهم .. عليه أثني على اقتراحك وسنعمل على أن يكون الاحتفال بالعيد في نفس الموعد الذي اقترحته ...

عظيم الود

نادر

الأخ نادر وكل البورداب
عيد سعيد وعمر مديد وكل عام وأنتم بخير أعاده الله على الجميع باليمن والخير والبركات ومزيدا من العطاء في عيد الفداء ونحن على العهد إن شاء الله.مع أمنياتي لكم بمزيد من النجاحات

الليلة الوقفة و بكرة العيد

كل عام يابورداب الشرقية و انتو بخير

والسنة الجاية معيدين انشاء الله في بلدنا

أحبتي بورداب الشرقية
احييكم من على البعد وحقيقة انا افتقدكم بشدة هذه الايام وانا خارج الشرقية والعيد لا يسوى لي شيء في بعدكم (شفتوا انتو غاليين علي كيف)
كل سنة وانتو بالف خير وعافية ويحقق الاماني السعيدة للكل وننعم بوطن خير ديمقراطي يسعنا جميعا


عموما حنتلاقى وانا سعيدة باني حاحضر العيدية معاكم لكم الود وكل الشوق

الفاضلة أم سهى
كل عام أنت والأسرة بخير وربنا يحقق الأماني.سفرا سعيدا وعودا حميدا