ولان البوست يعري الكثيرين من القامات حزف!!! دعوه ايها الظلاميون

ارتحنا زمنا ليس باليسير من التلاعب بالبوستات ولكن اري هذه الظاهرة تعود الان وبقوة للمنبر
اذا اردتموه منبر حوار نظيف فلا تمسوا ما نكتب ان لم يكن يمس احد
الان حزف بوست الاخ هوب فل ولي فيه تعليق طويل
ولا اري سببا ليحزف الا انه يعري الكثيرين ممن لا يسترون انفسهم
ارجعوا البوست رجاء وان اتفقتم مع صاحبه لحزفه فهو لم يعد ملكا له
بعدان مهرناه بمداخلاتنا فاعيدوه لنا او ردوا لنا مداخلاتنا نفتح بها بوستا جديدا
لا تسيئوا الي عقولنا بمثل هذه التدخلات علي ارائنا
اعيدوا البوست
او وضحوا لنا سبب حزفه

ايها الظلاميون يا من تخوف الحقيقة يا من تظهرون خلاف ما تبطنون
يا من تتحدثون بما لا تفعلون يا من تطالبون بما لا تفعلون
وبعد هذا نسمع من يتحدث عن الديموقراطية او الحرية المفقودة في السودان وانتم تريدون ان تجعلوها واقعا تعيشون في الظلام وتريدون الضؤ تطفؤا الانوار وتسالوا عن اشعة الشمس
ارجعوا البوست
ارجعوا البوست
ارجعوا البوست
الا يكفي بوست الصغير ايها الظلاميون

ايها الظلاميون اقنعونا بالحزف او ردوه

اعيدوا لنا البوست
اعيدوا لنا ارائنا
لا تحجروا علينا
ايها الاوصياء علينا ردوا علينا كلماتنا
لا تشوهو جميلا
لا تسيئوا الي الحرية بافعالكم

اساسي .. يا اخوي ..
انت المتشنج الزهجي .. قريبكم .. !
مجرد سؤال والله ..

شوف يا حميدة مساء الخير
لما يحزفوا ليك بوستك بتاع الامريكان والقمر بدون سبب اسالني السوال دا
البورد دا شابكننا فيهو حرية وديمقراطية ويشيلوا كلامنا يحزفوه
احسن يكون الموضوع واضح من البداية عشان نعرف في اي ظلام واقفين انحنا
لكن ضحك علي الدقون ما عايزين ..شبعنا من النفاق
وتاني نعيما
بس الله يلمني في الصابونة الخلتك ناير كدا

معليش ..يا اساسي ..
انا في المقام الاول بكتب البوست لنفسي ..
يعني لو جا قراهو واحد اتنين ..
يكون زيادة خير ..
وانت عارف المجتمعات السودانية ..
تطبيل .. للرخ الخرافي ..
وألبس اصفر .. عشان تظهر ..
ونظرية .. انا اعترض ..
وكلكم .. اولاد ... ونحنا الدين حقنا ..

دي القواعد العامة ..
وعليك اتباع ارشادات الاستخدام ..
عشان الكهرباء ما تضرب ..
واعلم يقينا ..
انه كله شغال بي 110 ..

يا حميدة لا اصفر لا كحلي

القاعدة البعرفها انه البوست يرجع

وبعد داك نتفاهم
وزي ما قال اشعب لما سالوه احسن الرز باللبن ولا اللقيمات
بجوز الهندي (او اي اكلة تانية) قال انا ما بحكم علي غايب

لكن والله منطقك سنين

بس خليني افضي من البوست

بس الله يلمني في الصابونة الخلتك ناير كدا
LOOOOOOOOOOOOOOOOOOOOOOOOOOOOOOOOOOOOOOOOOOOOL@Asaaaaaaaaaaaaasy
بس وريني الصـــــابونه لزومـــه شــنو؟
قول الله يجمـــع البوست الاتلحس...
لكن شايف صاحب البوست عمل مـيــــت

حسبي الله و نعم الوكيل

حب بتاع راس قلبك

Dear Asasi
Can you please brother quit the board today and come backtomorrow, you look upset today please dear.
thanks
asaad

LOOOOOOOOOOOOOOOOOOOOL@sudania

لا لا .. دي قاصد بيها واحد صاحبي ..
حرق لي روحي ..
مباريني اليوم كله ..

العزيز اساسي

انا صاحب البوست اقر واعترف بأني قد تنازلت عن البوست نسبة لرجاءات اخوة اعزاء ..
ولكنى حتماً لا املك حقاً في حزف الجزء الخاص بمداخلتك انت وبعض الأخوة.. فلكم الحق كل الحق بما تطالبون به .. وحتماً البوست لم يعد ملكاً لي ...


والبورد يحتاج لتقويم جاد بكل تأكيد .. ولن يكون هناك تقويم الا اذا التزمنا جانب الصدق في تعاملنا ... وما أراه الآن لا يبشر بخير ...
فصبراً جميلاً .. والله المستعان

شكرا محمد عثمان
شكرا اخي اسعد
وباذن الله انا ذاهب ولا اظنني عائد لا غد ولا بعده
الم تقرأ حديثي في البوست المسفوح المنتهك
كل هذا مجرد اوهام ونفاق وشللية ونفوس مريضة

وللجميع

Dear Asasi
When I said to you quit now and come back tomorrow I just know you are now upset and I don't wana you hurt any body while you are in this mood.
Please dont take it personally I my self need you to be around here .
And as brther Aboamna and brother Jamal said they call Bakery to Take that post off.
think about it and I need to see you here.
God bless you
Asaad

اساسى

شكلك الليلة مكشح المديدة الحارة

عزيزي أساسي

والمتداخلين


في الحقيقة انا شفت الموضوع ده متاخر وكان مفروض اول واحد يعلق عليهو


الموضوع اسهل من كدة كتير

انا اتصلت بالاخ جمال ( صاحب البوست وهو صديق شخصي ) وقلت ليهو عنوان البوست ما بشبهك بغض النظر عن الجواهو .... عشاني انا اسمح لي انو اتصل بالاخ بكري واسحب البوست وممكن تكتب بوست بي عنوان تاني .... ووافق الأخ جمال ( صاحب البوست مشكورا ) لانو فعلا بوست ما بشبهه

وولمتداخلين ولاساسي كل الود والاحترام


مع تحياتي
أبو آمنة

الاخ هوب فل
الاخ ابو امنة
شكرا للتوضيح
ولكن معالجة الامور عبر الهاتف ظللت اشتكي منها كثيرا في اكثر من بوست وبما انه منبر حوار وبما ان الشخص الذي ينزل بوست لا يصبح ملكه دعك من ان فيه مداخلات اخري لا يملكها هو اصلا كما اشار الاخ هوب فل فلا اظن ان الامر يعالج بهذه الطريقة
ولكم الشكر وعلي البورد السلام

رجعوا البوست ايها الظلاميون


اساسى انا برضو بشوف تمشى تنوم لبكرة
البورد دا شلكو الليلة حرقك دمك
وعلى شنو ياخ ؟

ملحوظة :-
لو رديت على رد كدا ولا كدا بغطس ليك البوست دا برضو

احلام
ملكة سبا

انتو الفيهم والله غايتو الله يصبركم علي لظي دي
انا شخصيا رميت طوبتا الليلة
كان الله كتب لينا اجازة بنتلاقي

والله يا اسعد عارفك وعارف نيتك ما بتحتاج توضح لي
وبتمني من الله انه يجمعني بيك
لان مثلك يسعي اليه
ولك كل ودي وتقديري واحترامي
اخوك القاطع وشه اساسي

ارجو ان تكون هذه اخر مداخلة وارجو من بكري حزف البوست بعد استشارة المتداخلين وموافقتهم


ملحوظة مهمة القامات في العنوان = القمامات


ودعا

اساسي كدي استهدى بالله

الموضوع ما جديد وانت عارف
ومحتاج لوقفه لا انتكاسه وانكسار

الانكسار للضعفاء فقط يا عزيزي .. ولا اعرفك غير صلداً واقفاً في وجه القبح بكل تلوناته

لا تزهب بعيداً
فالبورد يحتاج لصادقى الكلمه واحرار الرأى امثالك

ولك التحيه

Asasi
I swear God if you leave I am gonaa leave too, please dear stay and don't hurt the ones who love you please.
sorry to write in English I lost my Arabic software.

شكلها كانت القشة

ما اظنه يجي تانى يا اسعد

خليه يوم الخميس والجمعة ديل

وبعداك بنجرو جر ونرجعه تانى

ويا ناس جدة شدو الضراع واستعدو لى اللز

عزيزي أساسي

اعترف بانو انا غلطان في حقك وحق كل المتداخلين في البوست ... وكان علي الاقل من المفروض انو مجرد ماحصل الموضوع ( وبعترف برضو انو حل المسائل عن طريق التلفون برضو غلط ) كان من المفروض اقدم اعتذار واوضح الحاصل للجميع واعتذر ليهم ...

انا شخصيا ما عندي مشكلة في الكلام الاتقال في داخل البوست عري من تريد وافضح من تريد واصرخ في وجه من تريد ..... انا ما كنت معني بمحتوي الموضوع لانو من حق جمال ومن حقك تقولوا العايزنه

لكن يا اساسي اظن ممكن تكون متفق معاي انا وجمال بانو عنوان البوست ما بشبه كتابات جمال فبرغم اختلافي الجذري معاهو الا انو باحترمه جدا لانو بحترم الاخرين .... وبالتالي لما اشوف حاجة ما بتشبهه مفروض انبهه علي الحاجة دي ... ولحدي الان في اعتقادي انو خطأ الحذف اقل ضررا من خطا العنوان والتشنج الذي كان موجودا فيه ..


عموما لكم الحق في ان تناقشوا الموضوع مرة اخري تحت عنوان اخر اقل حدة وتشنج ولكم الحق في قول ما ترونه صحيحا ..


مع تحياتي واحترامي لكل المتداخلين
واعذاري لك مرة اخري في هذا الموقف غير الجميل

أبو آمنة

يعنى يا اساسى نقوم نردد
تفارق كيف تخلينا؟
شيل الصبر يازول
برد النفس شوية وابقى معانا
ويا احلام ناس جدة الا يستلفو واحد من ناس الرياض يدفر معاهم

اساسي
ماعارفه اذا كنته ح تلحق تقرا ردي ده ولا لا
لكن بداية عزيزي انا بعتبر خروجك البلاعوده ده نوع من الهروب مااكتر عذرا على اللفظ لكن انا كعهدي (القصير) بيك مابتزوق الكلام ومابتعرف تدور وتلف فيااساسي جد ده هروب المفروض تقول رايك في عين اي زول مهما كان والماعاجبو دي مشكلته
عارفه انو الموضوع مابقتصر على انو تقول رائيك وبس بل انها فيهو نوع من (قطع اللسان) مع انو هم اكتر ناس بينادو بالحريه على قولك واعمال الفكر ولمن واحد يعمل فكرو ويقول رايو يغطسو حجرو(حليل حجري)
المهم اساسي العزيز سؤال
لو هربته من البورد هل ح تقدر تهرب من الدنـــــــــــــيا؟
لانو الناس كده السودانيين كده عالمنا كده قبلته او رفضته هم كده الا من رحم ربي ...
فالقصه ماقصة بورد انما قصة شعب قصة ناس كانو بيحلفو بي اصلتهم لكن للاسف دي الحقيقه مجرده سواء قبلته او رفضته...
ماتمــــــــــــــــــــــــــشي يااساسي يمكن تقدر تغير ولو واحد في الميه ولو واحد في البورد مين عارف
وبعدين تعااااال اعد حلف وقسم كان انت مشيت هو زاتو ما ح ييجي تاني والله كده ح تبقى كتيره علينا القاعدين ليها شنووووووو؟
في انتظار ردك
نوف

هوب فول

نهاراتك بشكل
طلة ورود الحدائق

معليش ، بس دائما ملاحظ يا عزيزي انك بتسرع في حكمك على الاشياء وفي كثير من البوستات ، وبعدين يقوم يبقى ليك الكلام حار
في اكثر من بوست
بتدخل نفسك في حته ضيقه
مثلا مثلا مثلا للحصر
بوست الالوان بتاع رودا
وبعدين تبقى ليك المخارجه صعبة
يا ود امي حاول ركز معانا شوية
اضبط مخارج حروفك قبل ان تطلقها على الملا
لانو بعدها عملية المكابح لن تجديك نفعا

انت غلطان ..
وابو امنه برضو غلطان
عشان عنوان تتمسح مداخلات كامله
دا كلام دا ؟؟
الغلط مابتصلح بالغلط
نحن كنا ولازلنا ضد مصادرة الاراء ، بمجرد ان كلام الاخر لم يعجبني
لسانك حصونك زي مابقولو . اذا صونتو صانك ..
لذلك يجب مفروض اقيس واحسب كل كلمه قبل ان اقولها .. عشان كل كلمه بقولها بتكون شاهده علي ..
الكلمه امانه .. ويجب ان يتمرن الناس على هذا الامر ... لان الديموقراطيه ، ليست مجرد تشدق بكلام سرعان ما يتصطدم بقناعاتنا الشخصية ، فنضطر حينها عدم السماح للاخر بالتنفس ..
يا ايها الناس الجميله
لا تخنقوا هواء افكارنا من اجل ان تنعموا بلحظة راحة منه
ما الذي يخفوكم ان نقول راينا ؟؟
الحياة اجمل من كده بكثير وارحب من كده باكتر

ليس هنالك شيء بمستبعد ،
هب انكم احتليتم مناصب ، يكون لكم بموجب سلطتها امكانية خنق او سماح مرور اراء الاخر
هل سنصدق انكم ستسمحون للاخر مهما كان رايه مخالفا لكم ان يرى النور
؟؟
اشك في ذلك كثيرا ..
الممارسة الديموقراطيه تبدأ من البيت .. حتى في الشارع ،
حتى وانت في (حافلة) تتناقش مع كمساري يقول ووجهة نظره فيك
او حتى في سائق الحافله نفسها

والود بيننا نكهته الرائعة دائما في قلوبنا
والكره والحقد ابدا لا يبارينا بعد قول اي راي
واقعدوا عافيه

الاخوات والاخوة

الاسلوب الابوي التقليدي؛
بتاع : العنوان دا ما بشبهوا ؛ الرجاء حذف البوست ؛ انا باتصل ببكري؛ الخ الخ ؛ لا يجدي فتيلا ..
الم يكن الاخ جمال عبدالرحمن يعرف ما يشبهه وما لا يشبههه؛ قبل ان يكتب بوسته ؟
لماذا يطالب ابو امنه ويتصل هنا وهناك؛ بدلا من ان يقوم بالامر الاخ جمال عبدالرحمن ؛
اذا كان يري فيما كتبت يداه ما يعيب ؟
لماذا يوافق الاخ جمال علي هذا الطلب؛ ولا يتصل هو شخصيا ببكري ؛ لحذف البوست ؟
لماذا يثير الاخ اساسي كل هذه الضجة؛ دون ان يتبين حيثيات حذف البوست ؟
هل يعتذر الاخ اساسي الان للاخ بكري واعضاء الادارة ؛ بعد ان تبينت له حيثيات حذف البوست ؛
ويكيل غضبه الان تجاه الاخوان ابو امنه وجمال عبدالرحمن ؛
بوصفهما المسوؤلان الاساسيان عن حذف البوست ؛
ويوضح لنا من هم هؤلاء الظلاميون ؛ الذي اكثر من شتمهم والتعريض بهم ؟

عادل

عزيزي شرير والبرتقاله
تحياتي واحتراماتي

Quote: معليش ، بس دائما ملاحظ يا عزيزي انك بتسرع في حكمك على الاشياء وفي كثير من البوستات ، وبعدين يقوم يبقى ليك الكلام حار في اكثر من بوست بتدخل نفسك في حته ضيقه مثلا مثلا مثلا للحصر بوست الالوان بتاع رودا وبعدين تبقى ليك المخارجه صعبة يا ود امي حاول ركز معانا شوية اضبط مخارج حروفك قبل ان تطلقها على الملا لانو بعدها عملية المكابح لن تجديك نفعا

يا صديقي العزيز يبدو لي انك في احدي الحالتين .. اولي انك لم تلم بجوانب واطراف الموضوع اصل المشكلة جيداً .. أو أن هذه الكليمات كانت علي أطراف لسانك تود البوح بها في اقرب فرصة ..

عن موضوع الألوان لا اعلم من اي زواية كانت رؤيتك .. وعلي العموم رأيك يجد لدينا كل احترام وتقدير..

أما حديثك عن مكابح الحروف فهذا رأيك ولا لأحد الحق بالحجر عليه .. ويجد منى القبول والتفهم ..

وايضاحاً يا عزيزي
فقد كان العنوان هكذا " مشاطات اون لاين"
وفيه تحدثت عن فئه من الخلق قد لاكت لحومنا في اجتماعاتهم بعد أن شبعوا منها في ماسنجراتهم .. ولم احس حتى هذه اللحظه بأني قد جانبت الصواب في بوستى هذا .. ولم اظلم احدا فيه .. وكان عنواناً يناسب قدر المقصودين بقبحهم وسؤ فعائلهم ..
وما حدث هو حدث مكرر يا عزيزي ..
وليس الأمر بجديد ولا مستحدث
تدخلت العاطفه و"طلاق" الأخوان .. بأن هذا الأمر لا يشبهنا .. ولا أعلم من أي وجه هو .. ولكن من أجل عين تكرم ألف عين "فما بالك أن كانت العين للحبيب أبو امنه" .. لك وللحبيب اساسي وبقية الأخوة الأفاضل كل التحايا والمنى ..

Quote: التلاعب بالبوستات.... سببا ليحزف الا انه يعري الكثيرين ممن لا يسترون انفسهم تسيئوا الي عقولنا بمثل هذه التدخلات علي ارائنا الظلاميون يا من تخوف الحقيقة يا من تظهرون خلاف ما تبطنون يا من تتحدثون بما لا تفعلون يا من تطالبون بما لا تفعلون من يتحدث عن الديموقراطية او الحرية المفقودة في السودان وانتم تريدون ان تجعلوها واقعا تعيشون في الظلام وتريدون الضؤ تطفؤا الانوار وتسالوا عن اشعة الشمس يكفي بوست الصغير ايها الظلاميون الاوصياء علينا ردوا علينا كلماتنا لا تشوهو جميلا لا تسيئوا الي الحرية بافعالكم

Quote: والبورد يحتاج لتقويم جاد بكل تأكيد .. ولن يكون هناك تقويم الا اذا التزمنا جانب الصدق في تعاملنا ... وما أراه الآن لا يبشر بخير ...

Quote: كل هذا مجرد اوهام ونفاق وشللية ونفوس مريضة

Quote: لا تزهب بعيداً فالبورد يحتاج لصادقى الكلمه واحرار الرأى امثالك

Quote: ملحوظة مهمة القامات في العنوان = القمامات

ده شنو ده؟؟
ديل مالم ديل؟؟؟
الواحد لو بارانويد يمشى الدكتور

اساسي
اعلم ان لك راسا ناشفا بيد انه جيد الصنع

ما سميتهم بالظلاميين يسرهم جدا ان تخرج عن هذه المضارب
خليك قاعد وداوس ..
انتا قايل ده بورد بتاع المان يا حبة
ديل اخوانك سودانيين يقصونك في احتدام الكلام ويختخوها ليك لو لقو فيك فرقة ..
نحن من امة جُبلت على العناد ..ونشاف الراس والجِرسة والاعتذارات الخواء ..

اساسي
افهم و احترم حرصك التام علي حرية النشر في البورد
و اوافقك في ان سحب اي موضوع مسالة غير مقبولة حتي
من صاحب الموضوع , و علي واحد يكتب موضوع يتحمل تبعات
ما كتبه , حتي لو كان في غيبوبة اثناء الكتابة .
لكن يا اساسي هل الهروب و الحردان هو الحل
اذا كان اي زول يزعل يبطل المنبر اكيد الموضوع برمته
سينتهي ببساطة .
روق شوية يا اساسي و اكتب الف بوست و ما تنفعل
و خلي نفسك طويل

لا للحذف اينا كان العنوان او المضمون فكل شخص يعبر عما بداخله ويحسب له او عليه
لقد حذف من قبل ما هو اشد وما يوذي الجميع ولكن كلنا طالبنا باعادته حتى تمت
ترسيخا للمفهوم الديمقراطي الذي يفترض ان يتمثل في البورد
اخي اساسي حزين انا لقرارك واناشدك ان تعود يس من اجل الاوهام ولا من اجل النفوس المريضه وليس من اجل الشلليه بل من اجل اناس عاشروك واحبوك فالحب شعور حسي تلمسه الروح وتحسه الدواخل وان لم يكن ممكنا انا نقيس طوله او عرضه او ان نكيله بميزان
ونحن في الانتظار

الحبيب اساسى
الكل يرفض تماما فكرة ابتعادك عن هذا البورد إنسحابك الآن لا يحقق إلا أهداف هؤلاء .. ما اسميتهم بالظلاميين يسرهم جدا ان تبتعد عن البورد حتى لا يطاردهم قلمك الجرئ هذا هو غاية مرادهم وانت تقدمه لهم على طبق من ذهب وعن طيب خاطر

هل تترك البورد وتمنحهم نشوة النصر يلهون بها ? لا وكلا. ما انت بالمنهزم ...أنت صاحب رسالة ومبادئ
رجاءً لا تترك لهم ثغرة للفرح لأنهم ليسوا أهلاً له رجاء ان تواصل عطاءك .

هذا البورد كما فيه الموصلي ويحي وأشراقة وودعزة وأبكر إسماعيل وحسن الجزولي وموديك و اساسى .... و.... و... الكثير من الرائعين الخلوقين العاشقين للوطن.. فيه أيضا كثير من الظلاميون كما اسميتهم بنفسك


يا عزيزي اساسى لك هذا الاهداء ..ادفقى .. قاسم ابوزيد ..مصطفى اتمنى ان تتدفق وتملا المساحات بالوضوح إدفق
فى كل حتة .. وكل زول أبقى .. شان تحيا الفصول









إدفقى ما تبقى رقراق
أبقى يا ضُل .. يا شموس
غطى المساحات بالوضوح
إستنهضى الشوق .. الجلوس
وهجك شوارع ذاتى
فى ليل اليباب
ما تشفقى العطش .. الرحيل
النيل ركيزة
ودمعة الأحباب سِحاب
ما تخافى من دم الغروب
لو رتّش الّلوحة الضباب
مادام ضمير الفينا .. حى
مادام عِريق العِشق .. حى
ملحوقة يا مدن السراب
نديانة بى فرح التساب
*****************
أدفقى فيضان عمار
أتربعى .. وفجّى الوجع
دمع الألم .. ما يدفّقك
ما خاب غناك
فارسك رجع
إتوهجى وإنتى الشمس
إتلهجى نورك سطع
نوّر بوادينا الكساح
رقصت مزامير الصباح
مبكية قرية وقنبلة
متكية دمعة .. وسنبلة
الليلة فى إيدنا السلاح
ريشة وكدنكة .. ومطرقة
نبنيكى أحسن يا ظروف
مخضرة .. دانية القطوف
نطوى المسافات .. نسبقا
****************
أدّفقى بلدك فِداك
إتوهطى
ورّى البنيات العديل
محمية بى عرق الترابلة
ونغمتك مسقية بى الريد العتيق
أنغام رباباتك تشيل
معزوفة الليل .. والرفيق
ما تصغرى
تكبر أمانى السنبلة
هَىْ أكبرى
تصغر معانى القنبلة
ما ترجعى الصد لى المداين .. والقرى
شيلى الشحوب والإصفرار
أدى البويتات منظرا
إدفقى فى كل شارع .. وكل بيت
فى روابينا المحنّة
وفى ضمايرنا السهول
إدفقى
فى كل حتة .. وكل زول
أبقى .. شان تحيا الفصول

الاخ العزيز جدا اساسي
حقيقة كنت اود فتح بوست خاص اناشدك فيهو بالعودة الينا، ولكن في الوقت الحاضر اكتفيت بمناشدتك هنا في هذا البوست الذي يحمل اسمك ، رجائي ورجاء كثير من الاخوة والاخوات بالبورد ان ترجع الينا فانت اخ كريم وتمتلك اراء شجاعة نحن في امس الحوجة اليها، رجائي ان تعود لمحبيك وهم كثر فهلا عدت اخي؟؟؟؟؟