حكاية مسلم جنوبي اسمه عيسى كواج

ساخنة شمس الظهيرة
مثل انتخابات عام 1986م وكنا بحكم السن والتجربة حديثي التجربة بالانتخابات وأجواءها
وهيأ لنا حزبنا الشيوعي العظيم جوا فريدا ومعملا حقيقيا لاكتساب التجارب والمعارك .
كان بيننا يافع صغير لم يتعد الـ14 ربيعا ولكنه بحكم الموروث القبلي كان يماثلنا في السن
لقد كان عيسى كواج من قبيلة الدينكا في جنوبنا الحبيب .
كانت مهمته اجتذاب اكبر الأصوات من أبناء الإقليم الجنوبي لصالح مرشحتنا فاطمة احمد إبراهيم مرشحة القوى الاشتراكية بالبراري .
منذ ذلك الحين لم التقي عيسى الا عام 1996 ، في إحدى فرندات السوق الافرنجي بالخرطوم
كان طويلا ممشوقا مثل أهله ـ وسمينا ـ ولله الحمد مثل ارزقيه الظلام !! ، أسرعت إليه احضنه بالسلام وأنا اهتف ـ عيسى كواج ـ فبادرني ( أنا ما بقيت عيسى أنا الشيخ سليمان !!!!!) فانتفضت قليلا وتأملت وجهه ولاحظت مشروع لحية صغيرة تنمو بازدهار . قلت له .. أسلموك !! قال الحمد لله ، فباغته مثل ما باغتني .. طهروك !!!! ضحك وقال .. يا خالد انت لازم تحكها للآخر .. اسمع هسه أنا مستعجل وتعال لي في المكتب ، أعطاني كرت تعريف ، وقرأت ... ( هيئة مسلمي جنوب السودان ، الشيخ سليمان ) وتحت الاسم اكثر من تلفون وفاكس ورمز بريدي كمان !! . لحسن الحظ فقد كانت مكاتب هذه الهيئة في الرياض بالخرطوم لا يفصلها سوى الشارع من منزلنا الكائن بامتداد ناصر . وذهبت في اليوم الذي حدده لي .
دخلت إلى مبنى الهيئة ووجدت بعض أبناء الإقليم الجنوبي في قاعة الانتظار وجلست . بعد نصف الساعة حدثت جلبة في المكان وهب الناس وقوفا كأن أمر جلل حدث ، لقد كان الأمر الجلل ينبئ بوصول الشيخ عيسى إلى المكتب !!! وكنت جالسا في مكاني . لا حظ وجودي وصافحني وأنا مندهش دخل الشيخ إلى مكتبه تتبعه حاشية ، وبعد نصف ساعة جاءني الشيخ شخصيا وقال لي انه لا يستطيع الآن مقابلتي لانه خارج إلى اجتماع ، وطلب مني أن احضر له في المنزل بعد أن أعطاني وصفا دقيقا . وفي المساء ذهبت إليه . حقيقة كان المنزل عاديا جدا في الجريف غرب . وبعد أن دخلت وقبل ان اجلس جيدا فاجأني قائلا : طبعا انت مستغرب أنا بقيت مع الجماعة ديل ، لكن شوف أنا حا أجيب ليك الكلام من الآخر .. قال لي بمكر شوف أنا دخلت معاهم لانو عايز قروش هسة أنا مليونير مش مدرس تعبان ذيك . والبيت ده بتاعي حولنا من بيت الإيجار في ناصر واشتريت البيت ده لي ناس أبوي وهسة أنا ببني بيتي في الطائف !!!! . واكد لي بأنه يضحك على ناس الجبهة وانه لازال مسيحي !!
وخرجت من بيته وأنا حزين
وتأكدت تماما ان الدين في بلادي اصبح تجارة

يا زول كدا قطعت رزق صاحبك.. بيتو ما حيكتمل و و احد تاني حيمسك بدلو و يبني بيت جديد.. يعني الشعب حيخسر تمن بيت و نص

اخوي ود العبيد
بالغت عديل
الزول دا الجماعة حيقيموا عليهو حد الردة
خاصة في شهر يناير في ذكري اغتيال الأستاذ
غايتو ذنب الزول عليك
بعدين ما وريتنا طهروه ولا لا

الاستاذ خالد العبيد

توقعت انه حيكون لسه مسيحي رغم عدة الشغل الكيزانية

المهم عند الجبهجية المظهر الكوزي وممكن جدا يكونوا عارفين انه لسه مسيحي