دار فور والسلام المرتقب (قصيدة) هديتي الثانية للقراء في المنتدى

دار فور والسلام المرتقب


مالو الحبيب
وطني الحبيب
الأغلى من كل الأحبه
وأزكى من طيب الحبيب
مالو الحبيب
بلدي الحبيب
الأحنى من كل الأ ُمومة
وأوفى من أخلص طبيب
مالو الحبيب
زوّد معاناتنا الطويلة
وأشعل الخاطرلهيب
وطن الجدود
عالي المقام
رائع مهيب
كم في بعادو أبكانا الفراق
والليالي الشابّة
لفّاها المشيب
وطني الحبيب
يا إرث أ ُمّة
شامخه لي وقتا ً قريب
أهلي الحُنان
انا بدعو ليكم كل ليلة
كل صباح وكل مغيب
الأمل عاود قلوبنا
والسلام يارب نصيب؟؟؟؟
السؤال رسّل إجابتو ..
في مكتوب رهيب
الكِتاب البين إيدينا ..
خُطة.. من محتال غريب
يلى نعدِمو في دقيقة
وتنسى تاريخو الكئيب
ونطوي صفحاتو الحزينه
وينتهي الهم والنحيب
السنين الجاية حُبلي
بالأماني والزمن الرطيب
والصباحات الجميلة
آتية في ثوبا الغشيب
يا حبايب قولو خير
يوصل دعاي أنا للمجيب
كلامي ما تأليف مُحب
ولاهو ( خُطروفة ) أديب
كلامي نابع من جواي
وفكرة من عطـّاي وهيب
ويا حبايب قولو خير
يوصل دعاي أنا للمجيب
**************
وتتواصل الأفكار جميلة
تناشد الشيخ والأمير
هناك في الغرب الأصيلة
في المراعي..و في الدمير
يا أهلنا سلام عليكم
في المُراح أو في الحفير
من بعيد انا بحكي ليكم
ونيابة عن كل مستنير
نحن ( وحدتكم ) عشمنا
وبي (وِفاقكم ) نستجير
يا اهلنا في دار فور كفاية
نحن هدّانا النفير
( الكفيل ) في بلدو آمِر
ووالله فاض بيينا الكتير
والمذلة الفي شبابنا
طالت الحُر و الأسير
مافي زول مرتاح بتاتاً
الموظف و الأجير
الحنين الفي قلوبنا
أثرى من طين ( القـُرير)
والأصالة الفي نفوسنا
شايلة من ( بارا ) الكتير
والقناعة العُدنا بيها
تكفي ( سي قرنق ) والبشير
يا أهلنا في دار فور كفايه
السلام مكسب كبير
السلام مضمون نتايجو
والسلام يعني الكتير
ينصلح حالنا وزيادة
ويسعد الطفل الصغير
والبلاد تصبح غنية
ويبقى فيها الخير وفير
الحروب مهما استمرت
ما وراها غير قلباً كسير
والهموم الدايره بينكم
جزءِ من هماً كبير
العمر سنواتو عدّن
ما فضل إلا القليل
أنسو التناحر والخِصام
ويلى نسعد بالقليل
والحديث مفهوم ( روايتو )
بارك الله في القليل
الحديث مفهوم ( روايتو )
بارك الله في القليل
******
أم مجاهد / راس تنورة
السعودية