لمتين اندهلك وتصدى

لمتين اندهلك وتصدى
ويبادر صوتى اغانيكى
القاك حنينة وبتهدى
الناس البايسة حواليكى
تسقيهم من موية الفرحة
والضحكة سراعا بتجيكى
يكفينى احبك واتطامن
والنهر الطيب يكفيكى
يوماتى اجيلك متغرب
ارتاج فى جمة واديكى
وابداك قصايد ولهانة
بتكاتل فى الحزن الفيكى
بالبى تماما بتصبر
والمنك اقالدو وافديكى
طربان وبونس فى النجمة
فى الضلمة الحالكة اغنيكى
المعنى الاول ايامك
والنابض فيكى معانيكى
بلقاك قصادى ومزدانة
بالروح والفرح الحاويكى
بهواك تماما ومغبر
بالريح الكاتمة بواديكى
متصبر بكتب فى باكر
القاكى جهارا اسميكى
ياواحدة على القلب المتدردر
ياشايفة مصيري بعينيكى
ارتاح من غيبتكى بلقاكى
واواعد طيبتك اهنيكى
بالنفس الطالع متكمل
بالناس الطاردة اعاديكى
بالضى الواقد فى صدرك
بالروح الفينى ومن قلبى
يمكن ميعادى يكفيكى
مااظن وهواك مكملنى
والهمس الفينى يناجيكى
القاك فى الخاطر زغرودة
وابداك من تانى اناديكى
واقولك نصبر شان باكر
يغشانا وخيرو مغطيكى
اتمهلى انتى هواى وحدك
بلقاك فى باكر اوفيكى
متطامنة تلملمى شطانك
شان ارسي فى قلب مؤانيكى
واجيلك شايل خير وافر
وبالفرح البى اناديكى

زمراوي اخوي

لعلك طيب


الكلام حلو تب


لكنك مكسر ومنبرش نبراشه

عباس اخوى
شكرا على كلماتك والكسير والانبراشة فى معتنى الحبيبة/الوطن اذ يتداخلان مع بعضهما البعض
اتمنى ان اكون قد وفقت فى توضيح ذلك فى قصيدتى

اكيد طبعا ودمت زخرا لهذا الوطن العظيم

وده احلي كسير في رحاب الاثنين معا


ربنا يحفظك

زمراوى

التحية والشوق

أنت تكتبنا
نقرأك، نتوسدالمعنى، فنجدنا

تنده فينا كل الطرب المتحفز بشدوك العالى

ونحبك

أبوذر

زمراوي
صباح الخير
اهلاً بيك وانت تعود من جديد
كم انا سعيد بيك
ابو أمنه
كيف بالله
وكم من شوق بلاحقني فيك
اندهك
لكن خايف كيف اكتبك

عزيزى ابوذر
اشتراط على لاكتمال الندى ان ادلو بدلوى فى البئر وان اسكب المعنى حبرا شفيفا
شكرا لاطرائك وتسلم وتطيب
عزيزى هدهد
اين انت ايها الغائب
واين حل بك الترحال
جميل ان نراك بعد غيبة

لمتين

نعم يالجريفاوى لمتين
وبالمناسبة دى تتذكر قصيدة لمتين بتاعة حليمة مساعد
لوعندك نزلها

قصيدة جميلة يا ياسر زمراوي
لكن في البداية وقفت في كلمة :اندهلك
غلبني اقراها!
وهي كما هو معروف لهجة مصرية.
كان ممكن تكتب باللهجة السودانية :انده ليك
او كان يكون احسن لو استبدلت ببناديك السودانية

ولك تحياتي ومحبتي

تماما كماقلت عزيزى عجب الفيا
والحقيقة عدم وجودى فى السودان ووجودى هنا حيث اللغة الانجيلزية يصيبنى احيانا بنوع من الانسلاخ اللغوى
وكنت حاسي انو الكلمة دى فيها شئ

لمتين يا زمراوي لمتيييين؟