الكهربه جات املوا الباقات

الكهربه جات املوا الباقات


01-06-2004, 05:10 PM


  » http://sudaneseonline.com/cgi-bin/sdb/2bb.cgi?seq=msg&board=8&msg=1073405442&rn=0


Post: #1
Title: الكهربه جات املوا الباقات
Author: بلدى يا حبوب
Date: 01-06-2004, 05:10 PM

فى ظروف اضطرارية وعلى مقعد حافلة امدرمان الخرطوم الذى حصلت عليه بعد ان جمعت كل محتوياتى الشخصية فى جيب القميص مع ملاحظة الضغط عليه باليد فى كل محاولة ركوب بعد معركة موقف الشهداء الصباحية كانت الخسائر تسجل مؤشر طفيف تمثل فى تغير لون البنطلون من الرمادى الى البنى المبرقع ببعض بياض اورنيش جزمة راكب وده حكايته خلوهاشوية والتصقت بالبنطلون دمغةمواصلات زيتيه لا يظفر بها الا راكب من النوع الديلوكس ومن نشطاء حركة 11خ السودانية والتى ينضوى تحتها الكثير من العاملين فى الدولة وزبائن الكشات داخل برندات وشوارع اسواق الخرطوم ولا ننسى فئة بائعات الشاى وان كان دورهم فى المنظمة يقل مع مرور يوم جديد نتيجة تغير وسائل المواصلات بداية بامجاد وركشات وهذا دلالة على تحسن الظروف المعيشية.واديكم مثل معبر لتطور الحياة الاقتصادية لستات الشاى تلاحظ فى الفترة الاخيرة امتلاك الموبايل لهن وعلشان ما تطلقوا عليهم صفة السمى برجوازية هدفهن من ذالك هو جعل الخط ساخن مع موبايل محلية الكشات (والذى ظفر به احدهم نتيجة معاملته والثقه التى فاز بها) لزوم الانزار المبكر بالاستعداد والاحتماء بالمتاريس تحسبا لوقوع غارة كومريةتكون خسائرها تدفقق المياه الساخنه وحبيبات مركب ابوغزالتين الشديد التأثير على العقول بجانب تكسر وتهشم الزجاج وانتشار ثانى اكسيد الكربون المنبعث من قطعات الفحم وهذا بدوره يؤثر فى عملية التنفس وخاصة الحناكيش ومن جاراهم.
نرجع للموضوع الذى قصدت منه كتابة البوست وهوعن ادارة مؤشر الراديوالى امدرمان من قبل كابتن القيادة والعربةتتمايل فى كبرى امدرمان العتيق وفى نشرة الانباء نقل المذيع كلمة الرئيس فى افتتاح محطةقرى الجديدة ومن خلال متابعتى القهرية قال(شوف يا ناس تانى كهرباء يتقطع مافى وكمان تانى حكاية الكهربه جات املوه الباقات مافى ).وللاسف الشديد قطع كابتن القيادة الخطاب بشريط (تقوم بينا العربية) الى ان هبطت رحلتنا بمطار الوصول وكانت اول المحطات الجرى الى جماعة برد.

عذرا مجرد خواطر راكب حافله مع التحيات

Post: #2
Title: Re: الكهربه جات املوا الباقات
Author: bayan
Date: 01-06-2004, 05:35 PM
Parent: #1

لووووووووووووووول يا حبوب
عارف انا كان عندى لبسة يوميا للموصلات
عبارة عن اسكيرت جينز لا طعم لا لون وقميص كاكى
كنت بركب بص شمبات الاراضى من آخر محطة اول بص مع ستات الشاى
العمال و الشغالات والطلية.. بعدين بنزل فى بحرى بمشى موقف حافلات الخرطوم
فى الطريق كم زول بيتف من شباك حافلة طج يقع فوقى بعدين بمشى
موقف بحرى بمشى اركب بصات سوبا انزل فى المركز الاسلامى و اركب خ11
اصل المعهد (معهد الخرطوم الدولى)طويل على الداخلية حمام وغير هدوم
لانه هدومى بتكون علقت فيها كل المخلفات البشريةودا فى الغالب لو واحدة قالت انبى امسكى لى ولدى دا ولا بتى دى
كل يوم بلبس نفس الهدوم لغاية ما بتى بقت تشير ليهم على انهم هدوم المدرسة بتاعة ماما
لكن اسع طبعا المواصلات راقدة وانا كرسى الشهيد بصارع فيهو عديل كدا.. وبفوز طوالى بالضربة القاضية...
قلتا لى شنو تانى خلاص الكهربة ما بتقطع ولا بنملا الباغات؟
من خشمك لى باب السما
بالله اتر لينا الخبر دا هل الزول دا كان بيحكى فى رؤية ولا بالجد الكلام

يعنى لازم خبر تفصيلى
لانو لو جد بتترتب عليه قرارات مصيرية
وشكرا ليك

Post: #3
Title: Re: الكهربه جات املوا الباقات
Author: بلدى يا حبوب
Date: 01-06-2004, 06:34 PM
Parent: #1

دكتورة بيان
تعرفى الكلام للراوى وتعودنا ان نسمع حكايات الف وليلة فى كل الخطب وبعودة للوراء لا نجد مجانية للعلاج ولا حتى فى الحوداث وما زالت رسموم العبور مستمرة فى الشوارع السفرية بالرغم من ان الرئيس عبر خطابات سابقة اعلن الغائها ولننتظر حتى تسرى الكهرباء فى الاسلاك فى الصيف الفادم وهو المحك الحقيقى.
اما عن تفصيل الخبر فقد تم افتتاح محطتى قرى بالقرب من مصفاة البترول واستخدم الغاز فى تشغيلهما بواسطةشركات صينية وحسب كلام الجرائد ما ينتج من كهرباء يفوق المنتج حاليا فى السودان بكل مصادره وهنالك محطة ثالثة قيد الانشاء.
ولكن ممكن اقول ليك اذا اصبح هذاالكلام حقيقة فهنالك مشكلةعدم مقدرة الشبكة القديمة ومحولاتها فى استيعاب المنتج من الكهرباء وهذا بدوره سوف يؤثر على حمولة المحولات مما ينتج عنه احتراقها ونعود الى محطة قطع مرة اخرى. وعليه لابد من تجديد كل قطع غيار الشبكات القديمة. وطبعا كلامى ده اذا افترضنا الموضوع جد.
وحزارى من كرسى الشهيد انته ماعرفته ما غيروا اسمه (كرسى حسن الخاتمة) ولك تحياتى


قلتا لى شنو تانى خلاص الكهربة ما بتقطع ولا بنملا الباغات؟
من خشمك لى باب السما
بالله اتر لينا الخبر دا هل الزول دا كان بيحكى فى رؤية ولا بالجد الكلام

يعنى لازم خبر تفصيلى
لانو لو جد بتترتب عليه قرارات مصيرية
وشكرا ليك