Post: #1
Title: مصيبة العافية بت نورين
Author: مريم الطيب
Date: 01-06-2004, 08:36 AM
Parent: #0
((الى أمهات السودان القابضات على جمرة حرقة الحشا))
اسمي العافية.. ساكنة امبده وعندى تمانية
ابوهم فاتهم متل الطير..شالو الشقا والضيم
خلاهم امانة ..اتحزمت واتلزمت على همى ..
قلت االعافية.. تقبلى وين فى الزمن الضيم ..
تقبلى وين فى الزمن الشين وراك تمانية..
اياكى يمة ويابة...وكتين الناس الشقيانين
السهرانين شايلين الليل يتراوحوا لى بيوتهم
كسرتى بتمرق..اشيل السوق على باب اللة..
عليك يااللة تكبر بلة ..تجبر صالح..
يشيلوا معاى هم الستة..............
فرهد بلة شوية وشفت عيونو..دخل ومرق مع الجنيات
سقتو مشيت لى جاد السيد سيد الطاحونة..قلت لو
بلة امانة روحك..ماعندى بلاهو يشيل الشيلة..
خليهو حداك ..يشيل ويخت اياهو جناك..........
يجينى المغرب جيعان واغيبش يحننى ..شايل لى
مدرسة اخوانو حق اليومية..فرحنا وقلنا خلاص
تقول اتوظف...........................
ويوم اتأخر بلة..قلبى نقر الجنا مو سالم..
اصلى بخاف الكشة..قلت االعافية اصبري شوية..
ابعدي الشينة.. صبري كمل جريت الشارع..
وقفت شوية.. اجرجرت على الطاحونة..
عارفاها بتقفل خمسة.. جادالسيد مصنقر بره..
قلت لو وووب ااجادالسيد وين بله.. باقي بخاف الكشه..
قام جاد السيد واتلملمو ناس الحلة......
جرينا النقطة.. جرينا الشرطة.. نقبل وين ااناس الشرطة..
نسأل مين.. لقينا الناس كارات كارات زي الطير..
نقبل وين ونسأل مين.. كمين كمين مفقودين......
وقف الضابط جمب الباب.. جريتلو سألتو..
_ وين بله؟؟؟
_ بله مين ياحاجه؟؟؟
_ بله وليدي الكبير.. أعاين لي الله وليهو..
_ اسمو بالكامل ياحاجة؟؟؟
_ بله عبدالحبار سماعين..
_ (يقلب ورقة بيده).. ده راح الجهاد اللواء 13
كتيبة المغيرات صبحا..
_ (منهارة).. جهاد مع مين.. جهاد ضد مين..جهاد لمتين؟؟
بتلفحو بله عيون اماتو.. ملاح اخواتو.. طبيق اخوانو
وبله يتيم...............
أنبح ليل ونهار زي الطير وعارفه الطير كان شالو جناهو
تب مابنوم.. أقوقي الليل وأقوقي نهار وحمالتي عليك ياالله
تفرج الحال.. اليوم في اليوم وبله بعيد مامعروف وين..
وغيرو كتير.. حالنا سجم.. ويومنا عدم.. وليلنا ندم....
يوما أسود زي الليل جوني بنات نايرات لابسات..
فتحت الباب ..
_ حباب الضيف.
_ زغردي ياأم بله..
_ بله رجع..ّّ؟؟؟؟؟؟؟؟
_ بله شهيد..
طرت هناك وقعت بعيد.. صرخ البيت.. صرخ الجار.. صرخ الطير..
مت حييت.. مت حييت.. مت حييت.. ألفين مرة.. شهيد لي منو..
شهيد لي شنو.. وقفت قويت وقلت...أمرقن بره.. ماهو شهيدكن بله.... بله شهيد أخواتو.. شهيد الطلبة الضاعو مهاهو.. شهيدي..
شهيد المسؤولية الشالا صغير.. شهيد البلد الطيب وخير..
بكره بفرهد بله مع أخوانو وتطلعو أنتو جماعة الغفلة..
بعد يومين جوني جماعة سمان ونضاف.. شايلين سكر وزيت..
ومية ألف على التربيزة.. صالح واقف بره يعاين.. جاهم داخل..
حفيان بي لباسو.. وقال لي رئيسهم أطلع بره..
ضحك الابله وعاين لي.. قلت لو بره.. صالح ماهو صغير..
صالح راجل وأرجل منك.. وصالح في الكتاب يابنية..
قلت لو بره وشيل حاجاتك.. واخجل.. ده تمن بله؟؟..
جزمة بله أشرف منك ومن الجابك.. ياوسخان ياتاجر الدين..
فقرانين ااي لكننا شرفاء وقلبنا ثمين..
قويت يابنية.. قويت وقويت.. فهمت وعيت.. حليل العافية
ست الكسرة الغافلة الطيبة.. فرطنا كتير.. غفلنا كتير..
دفعنا جنانا التمن الغالي..
شالو جنانا مابنسكت..
حرقو حشانا.. مابنسكت..
في الزنزانة.. مابنسكت..
بالجبخانة.. مابنسكت..
مليون دانة.. مابنسكت..
مابنسكت..
سؤال خارج النص...
هل فوضت العافية بت نورين أحدا للعفو-باسمها- عن قتلة ابنها ؟؟
|
Post: #2
Title: Re: مصيبة العافية بت نورين
Author: ودقاسم
Date: 01-06-2004, 08:52 AM
Parent: #1
تعرفي يا مريم أنا ما رحبت بيك في بوست الترحيب الخاص بيك ، قلت خليني أشوف هي منو وعندها شنو بعدين أقرر أرحب وللا لا ،، قلت هو أصلو أي زول تجيبو تماضر نحن نقوم نرحب بيهو كده على معرفة تماضر ليهو ؟
اتضح لي أن القاعدة ثابتة ، وأن سهام تماضر لا تخيب ،
هذا النص جميل ، يبكيني ويريحني ، أتألم للعافية وبلة ابنها ومن ينتظرونه ، وأرتاح حين أجد من يرفع الصوت عاليا ينادي بالقصاص من قتلة بلة ومحاولي تحطيم العافية . افرح حين أجد من يزف لي خبرا أن العافية لن تركع ولن تستكين ،،
أهلا بك مريم الطيب وبمقدمك الطيب ، طاب مقامك بين أهلك والأحبة .
|
Post: #3
Title: Re: مصيبة العافية بت نورين
Author: hanouf56
Date: 01-06-2004, 08:55 AM
Parent: #1
الاستاذة مريم الطيب
ابداع حقيقى .. تصوير رائع للواقع السئ
مزيدا من الابداع
ليس من حق اى شخص التنازل عن حق غيره
محمد
|
Post: #4
Title: Re: مصيبة العافية بت نورين
Author: Nasr
Date: 01-06-2004, 09:26 AM
Parent: #1
مريم ...يامريم...
ساعود...
_____________
أذا كنت كما انت عبق ...فاحترق
|
Post: #6
Title: Re: مصيبة العافية بت نورين
Author: دورنقاس
Date: 01-06-2004, 09:42 AM
الاخت مريم
النص اية
وخارج النص
عتلة ام راسين فى راس العدو
|
Post: #5
Title: Re: مصيبة العافية بت نورين
Author: Nasr
Date: 01-06-2004, 09:37 AM
Parent: #1
لإ ادرى كيف ...
واين ...
ومتى ...
صرت ناصر..
اللهم اجعلنى ناصرا للمقهوربن والغلابة..وفى الرقاب.والغارمين..وابن..سانصرك يامريم ساعود..
المخرج..
_____________
أذا كنت كما انت عبق ...فاحترق
|
Post: #7
Title: Re: مصيبة العافية بت نورين
Author: أبو ساندرا
Date: 01-06-2004, 10:11 AM
Parent: #1
وجواب داخل النص
فوضنا الشعب يقلع حقو وحق اخوانو ، وكلفناهو أن يتسدى لينا نار حرقتنا وحار دقتنا وبنشوف فيهم يوم اولاد الكلب ويومها تفرح العافية وتزغرد ،ويمتلي الوطن بالعافية
|
Post: #9
Title: Re: مصيبة العافية بت نورين
Author: Abureesh
Date: 01-06-2004, 10:37 AM
Parent: #7
أهلا ومرحبـا بالأستاذة مريـم الطيب.
ليس بالإمكان أبـدع مما كان.. هــذه الـ "Master Piece" عكست بكل الصـدق والشفـافيـة التى تكاد تكون مطلقـة، صـورة الحســرة والألـم التى عاشتهـا العافيـة، فنقلت مشـاعرهـا وأحسـاسهـا إلينـا كلنا، فعشناهـا كلمـة كلمـة، وسطـرا سطــرا.. ومشينـا معاها لحـد طابـونـة جاد السيــد، وباريناهـا لحـد النقطـة، ورجعنا حاسـرين معها للبيت، وإستقبلنا أخوات الجن معهـا، ولكن إنفطــر قلبنا وإنسكبت دموعنا قبلهـا عنـدما أدركنا نهايـة هـذا الفاصل الحزين.
أبوالريش
|
Post: #8
Title: Re: مصيبة العافية بت نورين
Author: maia
Date: 01-06-2004, 10:26 AM
Parent: #1
الاخت مريم
الله يدي العافية كل العافية
ولاولئك القوم الذين ما زلنا نسال هل ولدتهم امهاتهم يوم لن يذوقوا فيه طعم العافية
|
Post: #10
Title: Re: مصيبة العافية بت نورين
Author: AlRa7mabi
Date: 01-06-2004, 03:15 PM
Parent: #1
..
..
لا تجد بين دفتي هذا النص ( المبكي ) حرفًاواحداً يجعل الإبتسام ينزلق بين شفتيك إلا أن كتيبة اسلمتني لضحكٍ هستيريٍ .. لا يتوأم وسوداوية ( جوهر ) النص فتبينت أن ( شر البلية ما يضحك حقاً ) ..
..
..
وما بنسكت
رحمابي
|
Post: #11
Title: Re: مصيبة العافية بت نورين
Author: مريم الطيب
Date: 01-06-2004, 05:47 PM
Parent: #1
ودقاسم..المشترك الاعظم
هانوف
نصر
دورنقاس
ابوساندرا
ابوالريش
مايا
الرحمابى
عدت الى السودان ..من احدى غرباتى فى منتصف
التسعينات..كان الخوف سيد المكان والزمان..
والظلم يطوق الجميع بقبضةمن جحيم..هذا صوت
من لاصوت لهن داخل دهاليز المفاوضات..نحن ننتمى لهذا
الصوت..
|
Post: #12
Title: Re: مصيبة العافية بت نورين
Author: بدرالدين شنا
Date: 01-06-2004, 07:30 PM
Parent: #1
مريم محمد الطيب سلام
والله إن شاء الله كل ما الاقيك أرحب بيك بس
القصيدة في نفس حميد
ربنا يديك العافية من غير (مصيبة) يا مريم
|
Post: #13
Title: Re: مصيبة العافية بت نورين
Author: مريم الطيب
Date: 01-07-2004, 02:02 AM
Parent: #12
بدرالدين
انت رحب بى وانا ارحب بيييك
قمت بعرض هذا النص بمؤتمر الدراسات السودانية
بولاية بنسلفانيافى يونيو 2001 .وعملنا انا وتماضر
مزج بين هذا النص ونص اسمى عواطف الذى نشرته تماضر
فى هذا الموقع ..اعتقد يابدر الدين انهاتجربة فى غاية
الاثاره حيث تبادلنا النصوص عبر الفاكس والتلفون..والتقينا
قبل العرض بساعات قمنا فيهابتصميم الحركة وتم العرص فى يوم
السودان بفلادلفيا...تتلائم هذه الطريقة تماما مع حالة الشتات
هذه .....ولا شنو ليك
|
Post: #14
Title: Re: مصيبة العافية بت نورين
Author: bayan
Date: 01-07-2004, 04:28 AM
Parent: #13
مريم العزيزة
لدى كثير من كلمات الاطراء ولكن صارت كلها ممجوجة
ولكن
يا سلالالالالالالالالالالالالالالالالالالالام
عليك
تقديرى وحبى
تذكرى انك ماضية تحت الخط  
فى زيارتك المتأخرة 6 أشهر فى شمبات
اتذكرين؟
مرحب بيك تانى وتالت ومليون
|
Post: #15
Title: Re: مصيبة العافية بت نورين
Author: بدرالدين شنا
Date: 01-07-2004, 07:16 AM
Parent: #1
الغالية (مرحب) محمد الطيب مريم بيك مرة تانية
إنتي عندك حاجة العافية وتماضر عندها عواطف وأنا عندي حاجة السارة دحين خلوها تقعد معاكم
سكت الفندك
****
صاح البندق سكت الفندك
وحاجة السارة شن تفرك؟
عيال سلمان ياكلوا شنو؟
تعال ليهو يا الدودو ؟
الدودو ما بخوف طفل جيعان
ولا النو نا00 بتسكت مصارينو
وحاج سلمان صبح ضايق
متمنطق حزام دينو
يتنفس عبق بارود
يلعن في الأيام السود
وفي الماكلين لحم وشه
وما خلولو حتى خدود
وحالة الضيق00
جبالاً قاعدة فوق راسو
ينوم ويفيق00
وتبكي السارة تتخنق
صغيرها يصيح بدور ينشق
وكم من يوم ينوم بالدق
وبالصرخات يفك الريق
ويوم السوق
شد حماره حاج سلمان
وحاجة السارة واقفه معا
تجيهم شوق بنية الزين
فوق ايديها شايلة جواب
من الناظر 00 إلى سلمان
تحية وشوق00
الوليد مطرود
مصاريف00 أقلام00 أوراق
00أدراج00 أزيار00 تشجير
00ماهية غفير00 وعييييييييك
وبغلةً نائمة في الإبريق
تأكل في كلمة الحق
وبغلةً نائمة في الإبريق
تأكل في كلمة الحق
|
Post: #16
Title: Re: مصيبة العافية بت نورين
Author: مريم الطيب
Date: 01-10-2004, 05:22 AM
Parent: #15
الاخ بدرالدين
سكت الفندك نص معبر جدا يصلح مزجه مع النصين عواطف
والعافية...الله يديك العافية
الاخت بيان
معفول انسى ...المهم فى النهاية مش جيتكم
تحيات خالصة لبناتك..وللاخ العزيز ابراهيم
|
Post: #17
Title: Re: مصيبة العافية بت نورين
Author: الطيب بشير
Date: 01-12-2004, 01:59 AM
Parent: #1
| Quote: هل فوضت العافية بت نورين أحدا للعفو-باسمها- عن قتلة ابنها ؟؟ |
مريم أختنا في الظلم الفات و الهم الواحد و الفرح الجايي
سؤال وجيه و في {أيامه} و هل أدل على قدوم العفو من إستقبال القتلة أعضاء في المنبر الحر؟ و الترويج لحقوقهم في الكلام بغض الحقد عن {ما سلف}
مريم يا جرح بلة المفرهد أكتبوا لنا هذا الكلام البالغ الأهمية فو الله الذي لا يخدعه شاطر قد ظننت بنفسي الظنون هل أنا شايلها {معاهم} بلا ذنب؟ هل يستحقون أن نرحب بهم في المنبر كما رحبنا بالمقداد و مريم و عمر بانقا؟ هل هم أبرياء إن تابوا؟ هل يمكن أن يدهس طفلك سائق مسرع و تكفيك سوووووري ياخ؟ لاحظ أن السائق هذا غير عامد و ليس لجريمته من دافع لكن العفو عنه موضع أخذ و رد فما بال من قتلوا الشرفاء و خدعوا المستهلك السياسي المنهك بديباجة مذبوح على الطريقة الإسلامية!
مريم
أبلغي العافية أن لا عفو عن القتلة
و {ما سلف} أبشع من أن يسقط بالتغافل
|
Post: #18
Title: Re: مصيبة العافية بت نورين
Author: Mandela
Date: 01-12-2004, 02:56 AM
Parent: #17
يا مريم الأولى....
أنا اخذت منك موقف و ساتحرش بك كلما حجبت عنا الدرر...
شنا يا صاحبي...
انت الأ يحرشوك..يا خي
لك الود
|
Post: #19
Title: Re: مصيبة العافية بت نورين
Author: مريم الطيب
Date: 01-12-2004, 03:48 PM
Parent: #18
الطيب بشير
مانديلا
الحق حق ولايسقط بالتقادم
|
Post: #20
Title: Re: مصيبة العافية بت نورين
Author: Mutwakil Mahmoud
Date: 01-14-2004, 03:32 AM
Parent: #1
أختي العزيزة مريم
لكي كل الشوق وعبد اللطيف وألأسرة أولا
ولكي كل العتاب والملامة ثانيا ...وأنت تعرفبن لماذا فلقد كان لقاء عابرا جميلا موعدا بالكثير من عبقرينك الفذة وما تلتقطه عيناك اللماحتين من وراء تلك الكاميرا التي عشقتبها وقادتك لنا هنافي لوس أنجليس مرتادة أعتي دبار العلم والتحصيل فأزددنا فخرا ومفخرة بأخت أصيلة عزيزة علينا ...كنا خاتنك دخري للزمان الهنا في لوس أنجيليس لكن الله يلعن أولاد... وكسحابة صيف عديتي وأفتقدناكي ومازال مكانك شاغرا فهل نطمع في عودة وزيارة لنتفاكر في مستقبل مازلت مع قريبنك جاهدا في تحقيقه وأن بري النور لهذا قلت كت خاتبك دخري للزمان ...ياستي ماراح شئ وذي مابيقول خوجلي الغريد رحمه الله ...شيلي الملامه علي ...ختي الملامه علي ...ولكي العتبي حتي ترضي
سلامي لزوجك عبد اللطيف وقولي ليهو أوراقك مازالت قابعة في درجي بالمركز السوداني ومعه خطاب ساندرا هيل كأطلال ببرقة ثهمد تلوح كباقي الوشم في ظاهر اليد
عل كل مرحبا بكي وخيالك وعبنيك الثاقبتبن من وراء تلك العينين السوداويتين فنا أريد منهما أن يخطا و يحكيا صورة هذا الشعب العظيم والجيل الجديد في المهجر وأنتي أهل لهذا العمل والنص أصدق دليل فهلا فعلنا ذلك؟
كل التحية والأحترام
أخوكم د. متوكل
|
Post: #21
Title: Re: مصيبة العافية بت نورين
Author: مريم الطيب
Date: 01-14-2004, 09:26 AM
Parent: #20
اخى العزيز د. متوكل
لك تحياتى واحترامى
واشكرك على هذا الشعور الطيب...وهذا العشم الجميل(الله لا قطع العشم)
لوس انجلس مكان جميل عامر باهله التقيت فيه باصدقاء قدامى وعرفت
اصدقاء جدد اعتز بصداقتهم جميعا...اتمنى ان ترى تلك الفكرة العظيمة النور..ستجدنى ذراعا ايمن اتمنى لك ولها التوفيق...واشكرك مرة اخرى على هذا الكلام الرقيق لك تحيات عبداللطيف ....
|
Post: #22
Title: Re: مصيبة العافية بت نورين
Author: عشة بت فاطنة
Date: 01-14-2004, 09:39 AM
Parent: #21
مريم محمد الطيب يا احساس اديك العافية عشان ناس العافيةوصراحة فرحانين بهذا الابداع والربط الذكي لاحداث المسلسل السوداني وناس العافية وام زين وكل نساء السودان الكادحات القابضات الجمر وانشا الله حقهن ما يروح
|
Post: #23
Title: مريوم
Author: توما
Date: 01-25-2004, 03:28 AM
Parent: #1
وتخش ولا حتي تسلم ساااااي..
دي علي وزن وتفوت ولا حتي تودع سااااي
طبعا انا الجيت متاخره
طبعا شفتك واتخلعت..واتبسطت.. واندهشت ..
واستمتعت بالنص شدييييد يا مريوم يا كتااااابه
وقعدت اقول اتفررررررجي يا امنه
وبركه الجيتي
وانا زاتي بركه الجيت
والجاهم غايتو شديييييد
توما
|
Post: #24
Title: Re: مريوم
Author: مريم الطيب
Date: 01-25-2004, 03:53 AM
Parent: #23
ماشاء الله تبارك الله عشة بت فاطنة
وبت التومة جاياتنى سوا سواايه
العظمة دى ....سمدله ليك بالحلامة
يابت التومةومشتاقيييييييييييين
|
|