اغنية حزينة في اليوبيل الفضي للاستقلال بواسطة عزة عزة الدين هلالي

أغنية حزينة

في اليوبيل الفضِّي للاستقلال









واحد .. واحد .. ستَّة وخمسين

حتَّى استقلالك بالتَّسنين !! ؟

يا بلدي يا بلد المنسِّيين

اللسَّع ضايعين وغلابة

اللسَّع عايشين بالآمال

الما لقوا لسَّه جواب لسؤال

هو صحي استقلال

ولاَّ استغلال ؟

بالقاف بالقاف

ولاَّ هو بالغين ؟

يا بلدي حتتهجِّيوه متين ؟

دا أريتو استقلال التَّابة

عمرك طرَّادة ولي هسَّـع

لا عرفتِ قراية ولا كتابة !

عمرك طرَّادة ولي هسَّـع

نصِّك عايش عيشة الغابة !

خمسة وعشرين سنة من عمرك !

ولسَّـه العالم عايشة غلابة !

خمسة وعشرين سنة والعامل

لسَّع شغال باليوميَّة !

استقلال ما محى أمِّـيَّة

استقلال ما حلَّ قضيَّة

خمسة وعشرين سنـة والعامل

لسه بضرِّب في الماهيَّة




يحسب أكلو وتطلع فارقة

أكل اخوانو وتطلع فارقة

أكل اولادو وتطلع فارقة

وبعد ايام صفَّ التَأشــيرة

يكون استقبل زول للشَّارقـة

ما تستغربوا جداً وتسألوا ليه العالم دايماً مارقة

وليه يبهاجر عامل ماهر

دي شريعتنا عليها الظاهر

إذا كان واحد زيِّ وزيَّك

وزيَّينا كان يرجى الماهيَّة

موظف رزق اليوم باليوم بالتلتلة عايش وبالزِّنديةَ

عمل الليلة مرة وعربيَّة !!!

انتدبوهُ لحتَّة كدة ومن دون احراج ما تسألوا وين

عمل الليلة مرة وعربيَّة

والماهيَّة زي ما هيَّة

ما تستغربوا جداً وتسألوا أسئلة بايخة شديد وغبيَّة

أسألوا أسئلة في المليان

اسئلة حيَّة

أسالوا ليه الدُّنيا بتغلـي

وانت بترخص يا إنسان

أسالوا تاريخ الأوطان

أسألوا تاريخ الوطنيَّة

هل في العالم في استقلال ما محى أمِّـيَّـة ؟

هل في العالم في استقلال ما حلَّ قضيَّـة ؟

نحنا بنسأل يا إنسـان

نحنا ضحيَّة

نحن النَّاس العايشة ودار

نحنا الجيل الجَّربوا فيهو جميع انواع الاستعمار

نحنا الجيل الجرَّبوا فيهو جميع انواع الاستهتار

نحنا الجيل الما ورُّوهو ولا في يـوم

معنى الوطنيَّة

خمسة وعشرين سنة من عمرك

والوطنيَّة في نظر الحاكم

هي التَّسليم للحزب الحاكـم

ونبذ الماضي

وكُلَّ الكان

ما ورُّونا ولا في يوم

حبّ الأوطان

خمسة وعشرين سنة من عمرك

ولسَّه بنحلم بالأوطان

لسَّه بنحلم يا إنسـان

لسَّه بنحلم يا السُّودان

لسَّه بنحلم بي أزمـان

فيها الخير في كُلِّ مكان

وفيها الحـب

للأرض الحبلى

وفيها الوطنيَّة الأوطان




عز الدين هلالي



--------------------------------------------------------------------------------
Fه mere plads i din Hotmail-inbox med MSN Extra Storage ا

فعلا ياعز الدين وتحيه لي عزوز
وتحيه ليك ياشريف

شكرا معزه
الله يخليك

القصيده هى مقدمه لى الديوان الاخير
للدكتور عذالدين هلالى

دمتم