في مايزيد الرزق

يا ناس البورد أهو في سنة خلاص إتملصت عديل كده وباقي عليها شوية أيام وأظن نحن والحمد لله أكثر الناس المفلسين في العالم المغترب ليهو مليون سنه عشان يبني البيت ولغاية هسع ما بني حتى راكوبه والمغترب عشان يعرس وبعد ما كان البنات بيجرو وراهو زمان بقن يجرن منو والقاعد في البلد بيحاول يعمل حاجه يوم تصيب ويوم تخيب أها أمنياتي ليكم كلكم في السنة الجديدة دي سنة ألفين وأربعة كان جي إل وكان إكس إل ربنا يحقق ليكم جميع أمانيكم ويسترها معاكم ويوفقكم ويديكم العافية والصحة وتنعموا جميعاً بالسلام وتمتلئ قلوبكم بالإيمان والمحبة والمحنة وتمتلئ عقولكم بالعلم والمعرفة النافعة وقشه ما تعتر ليكم.
وأنا بنكش في كتبي القديمة لقيت هذا الموضوع وأحببت أن أشرككم أو أشارككم فيه وربنا ينفعنا بما نسمع أو نقرأ. ,غليكم بعضاً من الأشياء البسيطة التي تكون سبباً بإذن الله في زيادة الرزق:

صلة الرحم
مواساة الأخ في الله تعالى
البُكور في طلب الرزق
الإستغفار
استعمال الأمانة
قول
إجابة المؤذن
ترك الكلام في الخلاء
ترك الحرص
شكر المنعم
اجتناب اليمين الكاذبة
الوضوء قبل الطعام
أكل ما يسقط مِنَ الخِوان
وَمَنْ سَبَّحَ الله تعالى كل يومٍ ثلاثينَ مرة دفعَ الله تعالى عنهُ سبعينَ نَوعاً مِنَ البَلاءِ أيسرها الفقر.

وأظن أنها جميعاً أشياء في غاية البساطه وأقل في المجهود من دبل كليك في فأرة كمبيوتر يعني كليك واحد وبس

الفاضل الملا عمر
كل عام وانت بخير
شكرا لهذا الموضوع المهم جدا بالنسبة لي،، ليس فقط لأهمية الرزق المادي،، بل أيضا لرغبتي أن يرزقني الله البركة والصحة وحب الناي والحياة
وهي قيم لا تشترى

سلمت

أهلا بت قضيم وربنا يديك الصحة والعافية كمان وكمان ويريحك من الوساخه الكيمان كيمان والباعوض والناموس والضبان ويبقى السودان أحلى مكان ووطن يتسع للجميع

الاخ مولانا الملاعمر ـ
تجدني مساكك ردودك قفزآ من بوست لبوست لخفتها و سهولة استعمالها ككبسولات للتخفيف من السخونة وآلام البورد ــ
كما ذكرت و كما كانت حبوبتي حواء رحمها الله تردد ، الغزالة (الدنيا) دي ما بتتلحق ،،،،، وأهو وصلنا سنة (2004) و ما زلنا جارين ـ لامن الشريك يقبض ــ وان شاءالله بعد دا كله نلقي لنا راحة بعد الشريك يقبض ـ لكين برضو يمكن التحضير النفسي لذلك بمثل ما ردت حبوبتي جمال ، الله يرحمها، حينما اتت اليها حفيداتها من المدرسة يجرن و يصيحن، يوما جمال... يوما جمال .. قالولنا في المدرسة القيامي خلاص قربت تقوم ــــ فردت عليهن : أي أريتها تقوم، دايري امشي اشوف اهلي !!! ــ

منير رحم الله حبوبتنا جمال وأسكنها فسيح جناته ، وبصراحة مشكلة المشاكل لمن القيامة تقوم يعني من عمل عملاً صالحاً فلنفسه ومن أساء فعليها ، وبعد ده كلو مجموعنا ما حا يدخلنا الجنة حتى لو بدينا نصلي ونصوم ونعبد الله كما ينبغي منذ ولادتنا إلى آخر يوم في حياتنا.
لك التحية والتجلة والإحترام ولحبوبتنا جمال وجميع موتانا وموتى المسلمين الرحمة والمغفرة.
بالمناسبة أخي منير موضوع رزقاً يكوس لك ورزقا تكوس لو دي قصتها شنو أوعه يا جماعه يطلع واحد ويقول لي قصتها بانكس ولا مرينز

الاخ الملا عمر
تحياتي وسلامي
اخي الكريم نحتاج بشدة لمثل هذه المواضيع الجميلة اكثر منها ولا تبالي.
دخول الناس الجنة من رحمة الله سبحانه وتعالي وهو الرحمن الرحيم
وجعلها الله في ميزان حسناتك.
مع تقديري

أخي أسعد
جزيت خيراً ونسأل الله لنا ولكم الرحمة والمغفرة ، وأهو محاولات من هنا وهناك عسي ولعل أن نكون من زمرة الذي يعمرون هذا المكان الجميل بجمالهم الحسي والمعنوي.
دمت يا أبا السعود

اخى almulaomar
يديك العافية
و برضو عن فضل سورة الواقعة:-

روى بن مسعود رضي الله تعالى عنه عن النبي صلى الله عليه وسلم أنه قال : (( مَنْ قرأ سورة الواقعة في كل ليلةٍ لم تُصبْه فاقةٌ أبداً )) رواه البيهقي في شعب الإيمان.

الملاعمر، ياخي المثل (رزقاً يكوس لك ورزقا تكوس لو ) دا بالذات قدر ما لفيت ودورت ما لقيت لي حاجة تشبهه قالها العرب واللا العجم !! ـ دا اختراع سوداني خالص ـ ويبدو ان اهلنا هم احسن من عبر عن هذه المتاهة ـ متاهة طلب الرزق الدائرية ـ يعني فات (لو جريت جري الوحوش غير رزقك مابتحوش ) درجة ـ

(رزقاً يكوس لك ورزقا تكوس لو )


مثلا تكون انت عذابى وماشى تتغدى فى المطعم
يلاقيك واحد عنده اسرة (صغيرة) ويقوم يعزمك
بحليفة كدا لازم تتغدى معاه بتكون وفرت حق الغدا
بس لازم يكون لله
او ما يكون عندك سيارة بتدل تركب تاكسى
واحد يشيلك ملح وتوفر حق التاكسى

او ما تكون خاطب وفجاءة تلقى ليك
واحدة غنيانة وعنده عمارة

او ما يكون عندك فلوس عشان تشترى
اقامة تلقى ليك واحد يدك اقامة مجان

او تجى السعودية وتلاقى الوليد
لبن طلال يوزع فى الزكاة
او تلاقى صلاح ادريس وتسلم عليه
دا كله رزق يكوسلك

ولكم ودى

الاخ الكريم الملا عمر...

جزاك الله خيرا للتذكير...وكل سنه وانت طيب

أخي الوقور الملاعمر
جزاك الله كل خير
و أرجو أن لا تطول الغيبات

الملاعمر
جزاك الله كل خير

أخي الكريم أبو الزفت
شكرا على تشعيبي في منبر يضم فطاحة وعمالقة في الأدب والفن والسياسة ، وربنا يحقق لينا جميعاً أمانينا وما ذلك على الله بعزيز